XOOK 13
¿Baʼax kun úuchul tiʼ le religiónoʼoboʼ?
1. ¿Tuláakal wa le religiónoʼob kaʼansik u jaajiloʼ?
Ichil tuláakal le religiónoʼob yanoʼ yaan máaxoʼob jach tu jaajil u yóol taak u adorarkoʼob Dios. Jéeobaeʼ taak u yáantik le máaxoʼob uts u puksiʼikʼaloʼoboʼ. Pero u jaajileʼ le religiónoʼoboʼ yaʼab baʼaloʼob kʼaastak tsʼoʼok u beetkoʼob (2 Corintios 4:3, 4; 11:13-15). Teʼ noticiaʼoboʼ k-ilkeʼ yaan religiónoʼobeʼ ku táakpajloʼob tiʼ guerra, tiʼ u kíimsaʼal máak yoʼolal u raza yéetel tiʼ u violartaʼal mejen paalaloʼob. Yoʼolal le baʼax ku beetik le religiónoʼobaʼ yaʼab máak ku xuʼulul u creertik Dios. Xok Mateo 24:3-5, 11, 12.
Le maʼ jaajil religiónoʼ ku pʼatik kʼaasil u kʼaabaʼ Dios, pero le jaajil religiónoʼ ku beetik u alabartaʼal. Le maʼ jaajil religiónoʼoboʼ ku kaʼanskoʼob tuusoʼob yoʼolal Dios, yoʼolal le kíimiloʼ bey xan yoʼolal uláakʼ baʼaloʼob minaʼan teʼ Bibliaoʼ. Pero Jéeobaeʼ u kʼáat ka ojéeltaʼak u jaajil yoʼolal letiʼ. Xok Ezequiel 18:4; 1 Timoteo 2:3-5.
2. ¿Baʼax kun úuchul tiʼ le religiónoʼoboʼ?
Yaʼab religiónoʼobeʼ ku yaʼalikoʼobeʼ u yaabiltmoʼob Dios, pero maʼ tu páajtal u tuskoʼob Jéeoba tumen letiʼeʼ claro u yilik maas u yaabiltmoʼob le kʼasaʼan yóokʼol kaabaʼ (Santiago 4:4). Teʼ Bibliaoʼ tiʼ le religiónoʼob maʼatech u kaʼanskoʼob u jaajiloʼ ku yaʼalaʼaltiʼob «Nojoch Babilonia». Bey u kʼaabaʼ kaʼach junpʼéel kaaj anchaj le ka tsʼoʼok le Búulkabaloʼ, tiʼ káaj u jóokʼol le religiónoʼob maʼatech u kaʼanskoʼob u jaajiloʼ. Maʼ tun xáantaleʼ Dioseʼ yaan u xuʼulsik tuláakal le religiónoʼob ku kaʼanskoʼob tuusoʼoboʼ. Xok Apocalipsis 17:1, 2, 5, 16, 17; 18:8.
Pero Jéeobaeʼ u chʼaʼamaj en cuenta le máaxoʼob uts u puksiʼikʼaloʼob yanoʼob ichil le maʼ jaajil religiónoʼoboʼ. Le beetik táan u kaxtik le máakoʼobaʼ utiaʼal u kaʼansik u jaajil tiʼob. Xok Miqueas 4:2, 5.
3. ¿Baʼax unaj u beetik le máaxoʼob u kʼáat u yojéeltoʼob u jaajiloʼ?
Le jaajil religiónoʼ ku beetik u biskuba tuláakal máak
Jéeobaeʼ taak u yáantik le máaxoʼob u kʼáat u yojéeltoʼob u jaajiloʼ. Le beetik ku yaʼaliktiʼob ka u pʼatoʼob le religiónoʼob ku kaʼanskoʼob tuusoʼoboʼ. Le máakoʼobaʼ wa jach tu jaajil u yaabiltmoʼob Dioseʼ yaan u beetkoʼob le baʼax ku yaʼalikoʼ. Xok Apocalipsis 18:4.
Teʼ yáax siglooʼ yaʼab máakoʼob maʼalob tu kʼamiloʼob le baʼax tu kaʼansaj le apóstoloʼoboʼ. Jéeobaeʼ tu kaʼansajtiʼob bix unaj u kuxtaloʼob yéetel baʼax unaj u beetkoʼob utiaʼal u kiʼimaktal u yóoloʼob. Toʼon xaneʼ unaj k-beetik baʼax ku yaʼalik le Bibliaoʼ yéetel k-tsʼáaik táanil Jéeoba ichil k-kuxtal. Xok 1 Tesalonicenses 1:8, 9; 2:13.
Jéeobaeʼ yéetel kiʼimak óolal ku kʼamik le máaxoʼob ku jóokʼloʼob tiʼ le religión maʼ tu kaʼansik u jaajiloʼ. Le máaxoʼob ku yookloʼob ichil le jaajil religiónoʼ yaan u biskubaʼob yéetel Jéeoba, yaan u biskubaʼob yéetel le máaxoʼob yanoʼob ichiloʼ, tsʼoʼoleʼ jeʼel u yantaltiʼob kuxtal minaʼan u xuuleʼ. ¿A kʼáat wa a disfrutart le bendiciónoʼob ku yaʼalik Diosoʼ? Xok Marcos 10:29, 30; 2 Corintios 6:17, 18.
4. ¿Baʼax ken u beet Dios utiaʼal u yantal kiʼimak óolal way Luʼumeʼ?
Utiaʼal u yantal kiʼimak óolal way Luʼumeʼ Dioseʼ yaan u xuʼulsik le religiónoʼob maʼ tu kaʼanskoʼob u jaajiloʼ. Beyoʼ maʼ kun seguer u tuusoʼob mix u beetkoʼob u pʼektikuba máak. Tuláakal le máakoʼob kun kajtaloʼob way Luʼumeʼ yaan u adorarkoʼob chéen Jéeoba. ¿Máasaʼ jach jatsʼuts le promesaaʼ? Xok Apocalipsis 18:20, 21; 21:3, 4.
