Jesuseʼ tu kaʼansaj yaʼab baʼaloʼob tiʼ u apostoloʼob táanil tiʼ u túuxtikoʼob kʼaʼaytaj kaʼakaʼatúulil. Baʼaleʼ maʼ chéen tu yaʼalajtiʼob bix unaj u kʼaʼaytajoʼobiʼ. Tu yaʼalaj xan tiʼob yaan u chʼaʼpachtaʼaloʼob: «¡Ileʼex!, táan in túuxtikeʼex bey tamanoʼob ichil loboʼobeʼ; le oʼolaleʼ, kanáant bix a máaneʼex jeʼex u beetik le kaanoʼoboʼ, baʼaleʼ kuxleneʼex x-maʼ siʼipilil jeʼex le palomaʼoboʼ. Kanáantabaʼex tiʼ le máakoʼoboʼ, tumen yaan u kʼubkeʼexoʼob tiʼ u jueziloʼob le kaajoʼ yéetel yaan u jaʼajatsʼkeʼexoʼob tu sinagogailoʼob. ¡Yaan xan u biskeʼexoʼob tak tu táan gobernadoroʼob yéetel reyoʼob tin woʼolal!» (Mateo 10:16-18).

Jach beyoʼ, u disipuloʼob Jesuseʼ yaan u chʼaʼpachtaʼaloʼob, baʼaleʼ tu yaʼalajtiʼob: «Ken kʼuʼubkeʼexeʼ maʼ a sen chiʼichnaktaleʼex yoʼolal baʼax ken a waʼaleʼex wa bix ken a waʼalileʼex, tumen tiʼ le súutuk jeʼeloʼ tiʼ kun tsʼaabil a wojéelteʼex baʼax ken a waʼaleʼexiʼ; tumen maʼ chéen teʼex ka tʼaaneʼexiʼ, baʼaxeʼ u kiliʼich muukʼ a Taataʼex ku tʼaan ta woʼolaleʼex». Tsʼoʼoleʼ tu yaʼalaj xan tiʼob: «Le sukuʼuntsiloʼ yaan u kʼubik u yíitsʼin utiaʼal ka kíimsaʼak, yéetel le taatatsiloʼ yaan u kʼubik u paal, yéetel le paalaloʼoboʼ yaan u tsʼáaikubaʼob tu contra u taataʼob yéetel yaan u beetik u kíimsaʼaloʼob. Teʼex túuneʼ yaan a chʼaʼpʼektaʼaleʼex tumen tuláakal máak tu yoʼolal in kʼaabaʼ, baʼaleʼ le máax kun chúukpajal u yóol tak tu xuuleʼ letiʼ bíin u salvartuba» (Mateo 10:19-22).

Tumen jach kʼaʼanaʼan le kʼaʼaytajoʼ, Jesuseʼ tu yaʼalaj tiʼ u disipuloʼob ka u kanáantubaʼob. Tu yaʼalajtiʼob: «Ken chʼaʼpachtaʼakeʼex tiʼ junpʼéel kaajeʼ, púutsʼkeʼex tiʼ uláakʼ kaaj; tumen tu jaajil kin waʼalikteʼex: Ken kʼuchuk u Paal máakeʼ, teʼexeʼ maʼ a láaj xíimbalteʼex u kaajiloʼob Israeliʼ» (Mateo 10:23).

¿Máasaʼ jach maʼalob le baʼaxoʼob tu yaʼalaj Jesús tiʼ u doce apostoloʼoboʼ? Baʼaleʼ le baʼax tu yaʼaloʼ láayliʼ bey unaj u beetik le máaxoʼob kun kʼaʼaytajoʼob tak ken tsʼoʼokok u kíimil yéetel u kaʼa kuxtaloʼ. Lelaʼ bey kun úuchloʼ, tumen letiʼeʼ tu yaʼalaj tiʼ u disipuloʼob: «Yaan a chʼaʼpʼektaʼaleʼex tumen tuláakal máak». Teʼelaʼ maʼ táan u tʼaan tiʼ u pʼektaʼal chéen le apostoloʼoboʼ. Tumen mix tuʼux ku yeʼesik wa le apostoloʼob bisaʼaboʼob tu táan le gobernadoroʼob yéetel le reyoʼob le ka kʼaʼaytajnajoʼob Galileaoʼ mix wa kʼuʼuboʼob tumen u láakʼtsiloʼob utiaʼal ka kíimsaʼakoʼob.

Lelaʼ ku yeʼesikeʼ Jesuseʼ táan u tuukul tiʼ baʼax ku taal u kʼiin le ka tu yaʼalaj tiʼ u apostoloʼob le tʼaanoʼobaʼ. Tsʼoʼoleʼ tu yaʼaleʼ u disipuloʼobeʼ maʼ u xíimbaltoʼob tuláakal u kaajiloʼob Israel «ken kʼuchuk u Paal máak[iʼ]». Lelaʼ ku yeʼesikeʼ u disipuloʼob Jesuseʼ maʼ ken u tsʼoʼoks u kʼaʼaytikoʼob u  Reino Dios táanil tiʼ u taal Jesús bey Reyil yéetel Juezileʼ.

Le táan u kʼaʼaytaj le apostoloʼoboʼ maʼ unaj u jaʼakʼal u yóoloʼob wa ka chʼaʼpachtaʼakoʼobiʼ, Jesuseʼ tu yaʼalajtiʼob: «Le disipulooʼ maʼ maas nojoch tiʼ le máax kaʼansikoʼ, mix le palitsil maas nojoch tiʼ u tsʼuuliloʼ». Le baʼax tu yaʼalaj Jesusoʼ jach séeb u naʼataʼal. Wa letiʼ chʼaʼpachtaʼab ikil u kʼaʼaytik u Reino Dioseʼ, u disipuloʼobeʼ yaan xan u chʼaʼpachtaʼaloʼob. Baʼaleʼ Jesuseʼ tu yaʼalajtiʼob: «Maʼ a chʼaʼikeʼex saajkil tiʼ le máaxoʼob ku kíimskoʼob le wíinkliloʼ baʼaleʼ maʼ tu páajtal u xuʼulskoʼob tiʼ le kuxtaloʼ; baʼaxeʼ chʼaʼex saajkil tiʼ le máax jeʼel u páajtal u xuʼulsik tiʼ le wíinklil bey xan tiʼ le kuxtal teʼ Gehenaoʼ» (Mateo 10:24, 28).

Jesuseʼ tu yeʼesaj bix unaj u beetaʼal. Letiʼeʼ tu yóotaj kíimil ikil u meyajtik Dios ke ka xuʼuluk u chúukpajal u yóol u meyajt Jéeoba, le Dios yaan tuláakal páajtalil tiʼoʼ. Chéen letiʼ jeʼel u páajtal u xuʼulsik «le wíinklil» (wa le kuxtal ku taal u kʼiinoʼ) yéetel chéen letiʼ jeʼel u kaʼa kuxkíintik máak utiaʼal ka kuxlak utiaʼal minaʼan u xuuleʼ. ¡Bukaʼaj wal úuchik u líiʼsik u yóol u apostoloʼob yéetel le tʼaanoʼobaʼ!

Jesuseʼ tu ketaj le bix u kanáantik Dios le máaxoʼob meyajtikoʼ, tu yaʼalaj: «¿Maʼ wa tu koʼonol kaʼatúul mejen chʼíichʼoʼob chéen tu yoʼolal junpʼéel chan taakʼin? Kex beyoʼ, mix juntúul tiʼ letiʼob ku lúubul luʼum wa maʼ u yojéeltaʼal tumen a Taataʼex yaan teʼ kaʼanoʼ. Le oʼolaleʼ, maʼ chʼaʼikeʼex saajkil, teʼexeʼ maas koʼoj a tojoleʼex tiʼ yaʼab mejen chʼíichʼoʼob» (Mateo 10:29, 31).

Le baʼax tu yaʼalaj Jesús tiʼ u disipuloʼob ka u kʼaʼaytoʼoboʼ yaan u beetik u jatskuba le familiaʼoboʼ, yanoʼobeʼ yaan u kʼamkoʼob, uláakʼoʼobeʼ maʼatan. Jesuseʼ tu yaʼalaj: «Maʼ a tuklikeʼex wa taalen in taas jeetsʼelil way Luʼumeʼ». Le oʼolal kʼaʼabéet maʼ u sajaktal máak tiʼ u láakʼtsiloʼob utiaʼal u kʼamik le baʼax ku kaʼansik le Bibliaoʼ. Jesuseʼ tu yaʼalaj: «Le máax maas u yaabiltmaj u taata wa u maama tiʼ teneʼ, maʼ u náajaltmaj u taal tin paachiʼ; yéetel le máax maas u yaabiltmaj u hijo wa u hija tiʼ teneʼ, maʼ u náajaltmaj u taal tin paachiʼ» (Mateo 10:34, 37).

Baʼaleʼ yaan máaxoʼob kun kʼamik le baʼax ku kaʼansik le disipuloʼoboʼ. Jesuseʼ tu yaʼalaj: «Jeʼel máaxak ka u tsʼáa u yukʼ junpʼéel vaso síis jaʼ tiʼ juntúul tiʼ le disipuloʼob tumen disipuloeʼ, tu jaajil kin waʼalikteʼex: Yaan u kʼamik u náajalil» (Mateo 10:42).

Ka tsʼoʼok u tsolik tiʼ u apostoloʼob le baʼaloʼobaʼ, letiʼobeʼ «binoʼob tiʼ tuláakal le mejen kajtaliloʼob táan u kʼaʼaytikoʼob le maʼalob péektsiloʼ yéetel táan u tsʼakikoʼob le kʼojaʼanoʼob tuláakal tuʼuxoʼ» (Lucas 9:6).