Le escribaʼob yéetel le fariseoʼoboʼ tʼaanajoʼob kʼaas tiʼ le kiliʼich muukʼoʼ, tumen tu yaʼaloʼob maʼ u kiliʼich muukʼ Dios áantik Jesús u jóoʼs le demonioʼoboʼ. Le baʼax ku yaʼalikoʼoboʼ ku yeʼesik wa tu tséel Dios yanoʼob wa tu tséel Satanás. Jesuseʼ tu yaʼalaj: «Teʼexeʼ jeʼel u páajtal a beetkabaʼex jeʼex junkúul maʼalob cheʼ ku tsʼáaik maʼalob icheʼ, wa jeʼex junkúul cheʼ maʼ patal ku tsʼáaik ich maʼ pataleʼ, tumen yoʼolal u yicheʼ ku kʼaj óoltaʼal le cheʼoʼ» (Mateo 12:33).

Le oʼolal maʼ maʼalob ka tuklaʼak wa yéetel u yáantaj Satanás ku páajtal u jóoʼsaʼal le demonioʼob tumen Jesusoʼ. Teʼ tu tsoltʼaanil le puʼukoʼ, Jesuseʼ tu yaʼaleʼ junkúul maʼalob cheʼeʼ ku tsʼáaik maʼalob ich, maʼatech u tsʼáaik ich maʼ pataliʼ. Bey túunoʼ, le baʼax ku yaʼalik le fariseoʼob tiʼ Jesusoʼ ku yeʼesikeʼ beyoʼob u yich cheʼ kʼaschajaʼaneʼ. Jesuseʼ tu yaʼalajtiʼob: «U chʼiʼibaleʼex kaan, ¿bix jeʼel u páajtal a waʼalikeʼex baʼaloʼob maʼalobtak wa kʼaakʼas máakeʼexeʼ? Tumen tu chiʼ máak ku jóokʼol tuláakal baʼax yaan tu puksiʼikʼal» (Mateo 7:16, 17; 12:34).

Bey túunoʼ le baʼaxoʼob k-aʼalikoʼ ku yeʼesik baʼax yaan t-puksiʼikʼal, lelaʼ ku meyaj utiaʼal k-juzgartaʼal. Le oʼolal Jesuseʼ tu yaʼalaj: «Kin waʼalikteʼexeʼ jeʼel baʼalak kʼaas ka aʼalaʼak tumen le máakoʼoboʼ, tu Kʼiinil le Juiciooʼ yaan u juzgartaʼaloʼob tu yoʼolal leloʼ; tumen tu yoʼolal le baʼaxoʼob ka waʼalikoʼ yaan u yaʼalaʼal utsech, yéetel tu yoʼolal le baʼaxoʼob ka waʼalikoʼ yaan u yaʼalaʼal kʼasaʼanech» (Mateo 12:36, 37).

Kex táan u yilik le escribaʼob yéetel le fariseoʼob le milagroʼob ku beetik Jesusoʼ tu yaʼaloʼobtiʼ: «J-Kaʼansaj, k-kʼáat ka a beet junpʼéel chíikulal utiaʼal k-ile». Letiʼobeʼ tsʼoʼok u yilkoʼob le milagroʼob ku beetik Jesusoʼ, le oʼolal minaʼan baʼax oʼolal u beetaʼal uláakʼ utiaʼal ka u yiloʼob. Jesuseʼ tu yaʼalaj tiʼ u nuuktakil le judíoʼoboʼ: «Junpʼéel generación kʼasaʼan yéetel ku traicionartik Dioseʼ maʼ tu xuʼulul u kaxtik junpʼéel chíikulal, baʼaleʼ maʼ kun eʼesbil mix junpʼéel chíikulal tiʼ, chéen u chíikulal Jonás le profetaoʼ» (Mateo 12:38, 39).

Jesuseʼ maʼ tu tsʼáaj tuʼux u kʼáataʼal baʼax u kʼáat u yaʼaliʼ, le oʼolal tu yaʼalaj: «Jeʼel bix Jonás pʼáat ichil u nakʼ le nuxiʼ kay óoxpʼéel kʼiin yéetel óoxpʼéel áakʼabeʼ, bey xan u Paal máakeʼ óoxpʼéel kʼiin yéetel óoxpʼéel áakʼab kun yantal yáanal luʼum». Jonaseʼ luʼukʼ tumen juntúul nojoch kay, baʼaleʼ xeʼeb jáal le jaʼoʼ, lelaʼ bey ka kaʼa kuxlakeʼ. Jesuseʼ tu yaʼaleʼ yaan u kíimsaʼal, baʼaleʼ tu yóoxpʼéel kʼiineʼ yaan u kaʼa kuxtal. Le ka kaʼa kuxlaj Jesuseʼ, u nuuktakil le judíoʼoboʼ maʼ tu kʼamoʼob «u chíikulal Jonás» jeʼex tu yaʼalil Jesusoʼ, beyoʼ tu yeʼesoʼob maʼ u kʼáatoʼob arrepentir yéetel u kʼex u tuukuloʼobiʼ (Mateo 27:63-66; 28:12-15). Baʼaleʼ «u máakiloʼob Níniveeʼ» arrepentirnajoʼob le ka tsʼoʼok u yaʼalaʼaltiʼob tumen Jonás baʼax ku taal u kʼiin. Le oʼolal yaan u yaʼalikoʼob kʼaas baʼax tu beetaj u máakiloʼob le generacionaʼ. Jesuseʼ tu yaʼalaj  xaneʼ, yoʼolal le baʼax tu beetaj u reinail Sebaoʼ yaan u yaʼalik maʼ maʼalob le baʼax tu beetaj le judíoʼoboʼ. Letiʼeʼ taakchaj u bin u yil Salomón yoʼolal le naʼat yaan kaʼach tiʼoʼ, ka tu yileʼ jach jaʼakʼ u yóol. Ka tsʼoʼokeʼ Jesuseʼ tu yaʼalaj: «Le máax yaan wayeʼ maas nojoch tiʼ Salomón» (Mateo 12:40-42).

Jesuseʼ tu ketaj le bix u tuukul le kʼasaʼan generación yéetel juntúul máak ku jóokʼol juntúul demonio tiʼoʼ (Mateo 12:45). Tumen le máak maʼ tu chupaj yéetel baʼaloʼob maʼalobtak le lugar pʼaʼatoʼ, le demoniooʼ ku taasik uláakʼ siete demonioʼob maas kʼasaʼanoʼob utiaʼal ka ookoʼobiʼ. U kaajil Israel xaneʼ bey tsʼoʼok u limpiartaʼal jeʼex le máak jóokʼ le demonio tiʼoʼ. Baʼaleʼ le kaajoʼ maʼ tu kʼamaj u profetaʼob Diosiʼ, mix Jesús, le máax yaan u kiliʼich muukʼ Dios tu yóokʼoloʼ. Lelaʼ ku yeʼesikeʼ le kaajoʼ maas kʼaas yanil ke tu káajbal.

Le táan u tʼaan Jesusoʼ kʼuch u maama yéetel u yíitsʼinoʼob ka waʼalajoʼob paachil tiʼ le máakoʼoboʼ. Le máaxoʼob kulukbaloʼob naatsʼoʼ tu yaʼaloʼobtiʼ: «A maama yéetel a wíitsʼnoʼobeʼ tiʼ waʼalakbaloʼob táankabeʼ, u kʼáat u yilechoʼob». Jesuseʼ tu yeʼeseʼ u disipuloʼobeʼ maas bey u yíitsʼnoʼobeʼ yéetel bey u maamaʼobeʼ. Ka tu tichʼaj u kʼabeʼ tu yaʼalaj yoʼolal u disipuloʼob: «In maama yéetel in wíitsʼnoʼobeʼ letiʼe jeʼeloʼobaʼ, le máaxoʼob uʼuyik u tʼaan Dios yéetel ku beetkoʼoboʼ» (Lucas 8:20, 21). Letiʼeʼ tu yaʼalaj utiaʼal u yeʼesik kex uts tu tʼaan u máansik tiempo yéetel u láakʼtsiloʼobeʼ, maas uts tu tʼaan u yantal yéetel u disipuloʼob. Lelaʼ ku yáantkoʼon utiaʼal u maas kiʼimaktal k-óol k-antal yéetel le máaxoʼob meyajtik Diosoʼ, maases le ken aʼalaʼak maʼ maʼalob baʼax k-beetik ikil k-meyajtikiʼ.