Ka aʼalaʼab tiʼ Jesús tumen le judíoʼob maʼ maʼalob úuchik u tsʼakik le máak tu kʼiinil le sabadooʼ, letiʼeʼ tu yaʼalajtiʼob: «In Taataeʼ tak bejlaʼa táan u meyajeʼ, teen xaneʼ láayliʼ táan in meyajeʼ» (Juan 5:17).

Le baʼax tu beetaj Jesusoʼ maʼatech u bin tu contra u leyil le sábado u tsʼaamaj Diosoʼ. Le úuchik u kʼaʼaytik le maʼalob péektsil yéetel le úuchik u tsʼakik le kʼojaʼanoʼoboʼ táakaʼanoʼob ichil le baʼaxoʼob maʼalobtak ku beetik u Taataoʼ. Le oʼolal Jesuseʼ tu beetaj xan baʼaxoʼob maʼalobtak mantatsʼ. Le judíoʼoboʼ jach pʼuʼujoʼob yoʼolal le baʼax núukaʼabtiʼob tumen Jesusoʼ, le oʼolal maas taakchaj u kíimskoʼob. Baʼaleʼ ¿Baʼax uláakʼ beet u tsʼíikiloʼob?

Letiʼobeʼ maʼ chéen pʼuʼujoʼob úuchik u tsʼaʼakal le máak tu kʼiinil sábado tumen Jesusoʼ, baʼaxeʼ tumen tu yaʼalaj xan letiʼeʼ u Hijo Dios. Utiaʼaloʼob letiʼobeʼ junpʼéel poochʼil úuchik u yaʼalik u Taataeʼ Dios, tumen táan u ketkuba tu yéetel. Baʼaleʼ Jesuseʼ maʼ sajakchaj u yaʼaltiʼob jach bix u biskuba yéetel u Taataiʼ. Tu yaʼalajtiʼob: «Le Taataoʼ u yaabiltmaj le Paaloʼ yéetel ku yeʼesiktiʼ tuláakal le baʼaxoʼob ku beetkoʼ» (Juan 5:20).

Le Taataoʼ letiʼe máax tsʼáaik le kuxtaloʼ, lelaʼ bey tu yeʼesil le úuchik u tsʼáaik u páajtalil tiʼ jujuntúul máakoʼob utiaʼal u líiʼskoʼob jujuntúul kimenoʼoboʼ. Jesuseʼ tu yaʼalaj: «Jeʼex le Taata ku líiʼsik le kimenoʼob yéetel ku kaʼa kuxkíintikoʼoboʼ, le Paaloʼ ku kaʼa kuxkíintik xan le máaxoʼob u kʼáatoʼ» (Juan 5:21). Le baʼax tu yaʼaloʼ jach jatsʼuts, tumen ku yeʼesik baʼax ku taal u kʼiin u yúuchul. Desde teʼ kʼiinoʼobaʼ le Paaloʼ bey táan u líiʼsik le kimenoʼoboʼ. Le oʼolal Jesuseʼ tu yaʼalaj: «Le máax ku yuʼubik in tʼaan yéetel ku creertik le máax túuxtenoʼ yaan kuxtal minaʼan u xuul tiʼ, yéetel maʼ kun juzgartbil, baʼaxeʼ tsʼoʼok u tokikuba tiʼ le kíimiloʼ yéetel tsʼoʼok u máan teʼ kuxtaloʼ» (Juan 5:24).

Le ka tu yaʼalaj Jesús lelaʼ mix tuʼux ku chíikpajal wa tsʼoʼok u kaʼa kuxkíintik juntúul kimen, baʼaleʼ letiʼeʼ tu yaʼalaj tiʼ le judíoʼob pʼekmiloʼ jach yaan u kaʼa kuxtal le kimenoʼoboʼ. Letiʼeʼ tu yaʼalaj: «Yaan u kʼuchul u kʼiinileʼ, tuláakal le máaxoʼob yanoʼob ichil le muknaloʼoboʼ yaan u yuʼubikoʼob u tʼaan yéetel yaan u jóokʼloʼob» (Juan 5:28, 29).

Kex yaan yaʼab poder tiʼ Jesuseʼ, letiʼeʼ maʼ tu tsʼáaj naʼatbil wa igual yéetel Diosiʼ. Letiʼeʼ tu yaʼalaj: «Maʼ tu páajtal in beetik mix baʼal chéen tu juunal in wóol; [...] maʼ tin beetik chéen baʼax in kʼáat, baʼaxeʼ kin wilik in beetik le baʼax u kʼáat le máax túuxtenoʼ» (Juan 5:30). Baʼaleʼ kex maʼ igual yéetel Dioseʼ, Jesuseʼ tʼaanaj tiʼ le nojoch meyaj ken u beet utiaʼal u béeytal le baʼaxoʼob u tukultmaj Diosoʼ, lelaʼ yáax u yaʼalik tu táan yaʼabkach máakoʼoboʼ. Tu yaʼalaj xan uláakʼ baʼax eʼesik tiʼ le máaxoʼob pʼekmiloʼ jaaj le baʼax ku yaʼalikoʼ. Tu yaʼalajtiʼob: «Teʼexeʼ yaan máaxoʼob tsʼoʼok a túuxtikeʼex tu yiknal Juan, letiʼ túuneʼ tsʼoʼok u yaʼalik u jaajil» (Juan 5:33).

Kex kaʼapʼéel jaʼaboʼob paachileʼ le máaxoʼob pʼekmil Jesusoʼ tu yuʼuboʼob u yaʼalik Juan Bautista tiʼ u nuuktakil le judíoʼoboʼ yaan u kʼuchul le máax kun aʼalbiltiʼ «le Profetaoʼ» wa «le Cristooʼ» (Juan 1:20-25). Utiaʼal u kʼaʼajsiktiʼob bix u yeʼeskoʼob tsiikil kaʼach tiʼ Juan Bautista, le máax tsʼoʼok u kʼaʼalal carceloʼ, Jesuseʼ tu yaʼalajtiʼob: «Teʼex xaneʼ ichil junpʼíit kʼiineʼ ta wóoteʼex antal yéetel nojoch kiʼimak óolal yáanal u sáasil» (Juan 5:35). Tsʼoʼoleʼ tu yaʼalaj yaan uláakʼ baʼaxoʼob eʼesik jach máax letiʼ.

Jesuseʼ tu yaʼalaj: «Letiʼe baʼaxoʼob kin beetkoʼ, [táakaʼan le milagro táant u beetkoʼ] yéetel leloʼobaʼ ku jaajkúuntikoʼob letiʼe Taata túuxtmilenoʼ. Tsʼoʼoleʼ le Taata, le máax túuxtenoʼ tsʼoʼok u jaajkúuntik máaxeniʼ» (Juan 5:36, 37). Jeʼex le ka tsʼoʼok u yokjaʼ Jesuseʼ, Dioseʼ tu yaʼalaj u Paal (Mateo 3:17).

Le máaxoʼob pʼekmil Jesusoʼ tak letiʼob u yojloʼob jaaj baʼax ku yaʼalik. Le Kiliʼich Tsʼíiboʼob ku yaʼalikoʼob jach u kʼaj óoloʼoboʼ ku tʼaanoʼob tiʼ Jesús. Letiʼeʼ tu yaʼalajtiʼob: «Wa ka creertikeʼex Moiseseʼ jeʼel xan a creertikeneʼexeʼ, tumen letiʼeʼ tsʼíibnaj tin woʼolal. Baʼaleʼ wa maʼ ta creertikeʼex le baʼaxoʼob tu tsʼíibtoʼ, ¿bix ken a creerteʼex le baʼaxoʼob kin waʼalikoʼ?» (Juan 5:46, 47).