Jesuseʼ bisaʼab maʼ jach náach tu paach le kaaj le tuʼux kun kíimsbil xan kaʼatúul j-ookoloʼoboʼ. Le kúuchil jeʼeloʼ ku kʼaabaʼtik Gólgota, wa U Kúuchil Baakel Pool, desde ‹náacheʼ› chíikaʼan u yilaʼal (Marcos 15:40).

Tu yóoxtúuliloʼobeʼ piʼit u nookʼoʼob. Tsʼoʼoleʼ ka tsʼaʼab suʼutsʼ vino xaʼakʼtaʼan yéetel mirra tiʼob. Maʼ xaaneʼ lelaʼ beetaʼab tumen u koʼoleliloʼob Jerusalén, baʼaleʼ u soldadoiloʼob Roma tsʼáatiʼob utiaʼal u aguantartikoʼob le kʼiʼinamoʼ. Baʼaleʼ ka tu túuntaj Jesuseʼ, maʼ tu yóotaj u yukʼiʼ. ¿Baʼaxten? Letiʼeʼ maʼ u kʼáat ka saʼatak u yóoliʼ, u kʼáat kíimil chúukaʼan u yóol tak tu tsʼook.

Jesuseʼ chikúunsaʼab teʼ cheʼ utiaʼal u baʼajaloʼ (Marcos 15:25). Le soldadoʼoboʼ tu bajoʼob u kʼab yéetel u yookoʼob yéetel clavos. Tsʼoʼoleʼ jeʼex úuchik u bin u waʼakúuntikoʼob le cheʼoʼ bey úuchik u maas yaatal u kʼiʼinam le ka chʼuylaj u wíinklil Jesusoʼ. Baʼaleʼ Jesuseʼ maʼ tu kʼeyaj le soldadoʼoboʼ. Baʼaxeʼ tu yaʼalaj ich oración: «In Yuum, perdonartoʼob tumen maʼ u yojloʼob baʼax ku beetkoʼobiʼ» (Lucas 23:34).

U suukileʼ le romailoʼoboʼ ku tsʼíibtikoʼob junpʼéel letrero utiaʼal u tsʼáaikoʼob ojéeltbil baʼax oʼolal ku kíimsaʼal wa máax. Teʼ kʼiinoʼob jeʼeloʼ Pilatoeʼ tu yaʼalaj ka tsʼíibtaʼak: «Jesús Nazaretil u Rey le judíoʼoboʼ». Tsʼíibtaʼab ich hebreo, latín yéetel griego, beyoʼ tuláakal máax kun páajtal u xokik. Le baʼax tu beetaj Pilatooʼ ku yeʼesik maʼ maʼalob u yilik le baʼax tu beetaj le judíoʼob úuchik u beetkoʼob u kíimsaʼal Jesusoʼ. U maas nojchil le sacerdoteʼoboʼ maʼ utschaj tu tʼaaniʼ, ka tu yaʼalaj: «Maʼ a tsʼíibtik: ‹U Rey le judíoʼoboʼ›, baʼaxeʼ tsʼíibt: ‹Le máax tu yaʼalaj: «Teen u Rey le judíoʼoboʼ»›». Baʼaleʼ Pilatoeʼ maʼ tu chaʼaj u kaʼa suʼusutaʼaliʼ, tu yaʼalajtiʼ: «Le baʼax tin tsʼíibtoʼ tsʼoʼok in tsʼíibtik» (Juan 19:19-22).

Le sacerdoteʼoboʼ pʼujaʼanoʼob táan u máan u yaʼalikoʼob le baʼax maʼ jaaj tu yaʼaloʼob tu contra Jesús teʼ Sanedrinoʼ. Le oʼolal le máakoʼob ku máanoʼob naatsʼoʼ ku piʼiʼtik u pooloʼob yéetel ku pʼaʼastikoʼob, ku yaʼalikoʼob: «¡Eej!, ¿maʼ wa teech le ka waʼalik jeʼel u páajtal a nikik le templo yéetel a kaʼa líiʼsik ichil óoxpʼéel kʼiinoʼoboʼ? Salvartaba túun, éemkech tiʼ u cheʼil le muʼyajoʼ». U nuuktakil le sacerdoteʼob yéetel le escribaʼoboʼ ku yaʼalikoʼob tu baatsiloʼob: «Beoraaʼ éemek le Cristo u Reyil Israel tiʼ u cheʼil le muʼyajoʼ utiaʼal ka k-ile yéetel ka k-creerte» (Marcos 15:29-32). Tak le kaʼatúul j-ookoloʼob chʼuykíintaʼan tu tséeloʼ joʼopʼ u yaʼalikoʼob baʼal tiʼ kex letiʼeʼ mix baʼal kʼaas u beetmaj.

Le u kantúul u soldadoiloʼob Romaoʼ joʼopʼ xan u pʼaʼastikoʼob Jesús. Maʼ xaaneʼ letiʼobeʼ tsʼoʼok u yukʼikoʼob le suʼutsʼ vinooʼ, le oʼolal ku pʼaʼastikoʼob Jesús, tumen maʼ tu yóotaj u yukʼiʼ. Le romailoʼoboʼ joʼopʼ u pʼaʼastikoʼob Jesús yoʼolal le letrero tsʼaʼan yóokʼol u pooloʼ, ku yaʼalikoʼob: «Wa teech u Rey le judíoʼoboʼ, salvartaba» (Lucas 23:36, 37). Chéen máans ta tuukul. Le máax ku yaʼalik letiʼ le bej, le jaaj yéetel le kuxtaloʼ táan u pʼaʼastaʼal kex maʼ tu  náajmatik. Kex beyoʼ, letiʼeʼ chúukpaj u yóol u muʼyajt tuláakal, maʼ tu yaʼalaj mix baʼal tiʼ le judíoʼob paktikoʼ, tiʼ u soldadoiloʼob Roma pʼaʼastikoʼ mix tiʼ le kʼasaʼan máaxoʼob chʼuykíintaʼan xan tu tséeloʼ.

Le kantúul soldadoʼoboʼ tu jóoʼsoʼob kanjaats tiʼ u nookʼ Jesús utiaʼal u chʼaʼik junxéetʼ cada juntúuliʼ. Letiʼobeʼ buulnajoʼob utiaʼal u yilkoʼob máakalmáak kun pʼáatal tiʼ cada juntúuliʼ. Baʼaleʼ le u yáalal u nookʼ Jesusoʼ «minaʼan kaʼach u chuuyil tumen túulis beetaʼanil, desde tu kaʼanlil tak tu kabalil». Le oʼolal le soldadoʼoboʼ tu yaʼaloʼob: «Maʼ k-jatikeʼex, baʼaxeʼ koʼoneʼex buul utiaʼal k-ilik tiʼ máax kun pʼáatal». Beyoʼ tu béeykuntoʼob le baʼax ku yaʼalik le Kiliʼich Tsʼíiboʼoboʼ: «Tu tʼoxoʼob in nookʼ ichiloʼob, yéetel buulnajoʼob utiaʼal ka u yiloʼob tiʼ máax kun pʼáatal u yáalal in nookʼ» (Juan 19:23, 24; Salmo 22:18).

Teʼ súutuk jeʼeloʼ juntúul tiʼ le j-ookoloʼob chʼuykíintaʼanoʼob tu tséel Jesusoʼ tu tsʼáaj cuenta letiʼeʼ jach tu jaajil juntúul Rey. Ka tu kʼeyaj le uláakʼ juntúuloʼ, tu yaʼalajtiʼ: «¿Maʼ wa ta chʼaʼik saajkil tiʼ Dios kex tumen tiaʼanech xan yáanal le castigoaʼ? Toʼoneʼ táan k-boʼotik tu chúukaʼanil le baʼaxoʼob k-beetmoʼ; baʼaleʼ le máakaʼ mix baʼal kʼaas u beetmaj». Ka tu kʼáat óoltaj tiʼ Jesús: «Kʼaʼajsen ken ookkech ta Reino» (Lucas 23:40-42).

Jesuseʼ tu núukajtiʼ: «Tu jaajil kin waʼaliktech bejlaʼeʼ: Yaan a wantal tin wéetel teʼ Paraísooʼ», maʼ teʼ Reinooʼ (Lucas 23:43). Lelaʼ jelaʼan tiʼ le baʼax tsʼoʼok u yáax aʼalik Jesús tiʼ u apostoloʼoboʼ, letiʼobeʼ yaan u kutaloʼob tiʼ tronoʼob tu yéetel teʼ Reinooʼ (Mateo 19:28; Lucas 22:29, 30). Baʼaleʼ maʼ xaaneʼ le j-ookol judíoaʼ u yuʼubmaj u tsikbalil le paraíso tsʼaʼab tumen Jéeoba utiaʼal u kuxtal kaʼach Adán yéetel Eva yéetel u paalaloʼoboʼ. Beora ken kíimik le j-ookolaʼ jeʼel u páajtal u páaʼtik u yilik u béeytal lelaʼ.