Le ka maʼach Jesús tumen le soldadoʼob tu jardinil Getsemanioʼ, sajakchaj le apostoloʼoboʼ ka tu pʼatoʼob. Baʼaleʼ kaʼatúul tiʼ letiʼobeʼ pʼáatoʼobiʼ. Pedro «bey xan uláakʼ juntúul disipulo», maʼ xaaneʼ Juan (Juan 18:15; 19:35; 21:24). Letiʼobeʼ binoʼob xan tu yotoch Anás, le tuʼux bisaʼab Jesusoʼ. Le ka bisaʼab Jesús yiknal Caifás, u nojchil le sacerdoteʼoboʼ, Pedro yéetel Juaneʼ binoʼob tu paach le máakoʼoboʼ. Maʼ xaaneʼ saajkoʼob u kíimsaʼaloʼob, baʼaleʼ taak u yilkoʼob baʼax kun beetbil tiʼ Jesús.

Juaneʼ kʼaj óoltaʼan tumen u nojchil le sacerdoteʼoboʼ, le oʼolal jeʼel u páajtal u yokol tu yotoch Caifaseʼ. Pedroeʼ pʼáat paachil, pʼis úuchik u tʼaan Juan yéetel juntúul x-palitsil kanáantik le jooloʼ, ka chaʼab u yokol.

Teʼ áakʼab jeʼeloʼ jach táaj keʼel, le oʼolal yaan kʼáakʼ tʼabaʼan teʼ táankaboʼ. Ka kulaj Pedro kʼíich ichil le máakoʼob utiaʼal u páaʼtik «u yilik baʼax kun úuchul» tiʼ Jesús (Mateo 26:58). Beora yéetel u sáasilil le kʼáakʼoʼ páajchaj u kʼaj óoltaʼal Pedro tumen le koʼolel kanáantik le jooloʼ. Ka tu yaʼalajtiʼ: «¿Máasaʼ techeʼ u disipuloech xan le máakaʼ?» (Juan 18:17). Teʼ súutuk jeʼeloʼ yaan uláakʼ máakoʼob tu yiknaloʼob le ka joʼopʼ u yaʼalik tiʼ Pedro lelaʼ (Mateo 26:69, 71-73; Marcos 14:70).

Pedroeʼ jach sajakchaji. Ka joʼopʼ u beetik bey maʼ u yojel mix baʼaleʼ, ka tak bin teʼ jooloʼ. Ka tu yaʼaleʼ maʼatech u máan yéetel Jesús, kʼuch tak u yaʼale: «Maʼ in kʼaj óoliʼ, tsʼoʼoleʼ maʼ tin naʼatik tiʼ baʼax ka tʼaan» (Marcos 14:67, 68). Ka tak «joʼopʼ u jurar táan u yaʼalik» utiaʼal ka ilaʼak jach jaaj baʼax ku yaʼalik yéetel jeʼel tak u yóotik muʼyaj wa maʼ jaajeʼ (Mateo 26:74).

Teʼ súutuk jeʼeloʼ láayliʼ táan u juzgartaʼal Jesuseʼ, maʼ xaaneʼ tu kaʼapʼéel pisoil u yotoch Caifás. Desde teʼ táankaboʼ Pedro yéetel u maasil máakoʼoboʼ ku yilkoʼob u bin yéetel u suut le máaxoʼob ku naʼakloʼob u yaʼaloʼob baʼaloʼob maʼ jaajtak tu contra Jesusoʼ.

Pedroeʼ ku tʼaan jeʼex le galileailoʼoboʼ, le oʼolal séeb úuchik u yilaʼal maʼ jaaj baʼax ku yaʼalikiʼ. Tsʼoʼoleʼ ichil le máakoʼoboʼ tiaʼan Malco, le máax kúulxotʼtaʼab u xikin tumen Pedrooʼ. Le oʼolal tu natsʼubaeʼ ka tu yaʼalaj tiʼ Pedro: «¿Máasaʼ teech le tin wilech teʼ parcela yéetel le máakoʼ?». Ka tu yaʼalaj Pedro tu yóoxtéen maʼ u kʼaj óol Jesuseʼ kʼaaynaj juntúul tʼeel, jeʼex aʼalaʼabiktiʼoʼ (Juan 13:38; 18:26, 27).

Teʼ súutuk jeʼeloʼ Jesuseʼ tsʼoʼok u chíikpajal u yilaʼal tu pasilloil le kaʼapʼéel pisooʼ. Ka tu sutubaeʼ u taatsʼ úuchik u yilik Pedro, maʼ xaaneʼ teʼ súutuk jeʼeloʼ tu yuʼubaj bey chʼíiklomtaʼab u puksiʼikʼaleʼ. Kʼaʼajaktech le baʼax aʼalaʼabtiʼ tumen Jesús teʼ cuarto tuʼux tu kʼiinbesoʼob le Pascuaoʼ. Chéen máans ta tuukul bix u yuʼubikuba le ka tu tsʼáaj cuenta tsʼoʼok u béeytal le baʼax aʼalaʼabtiʼoʼ. Ka jóokʼ paachileʼ ka joʼopʼ u yokʼol yéetel yaayaj óolal (Lucas 22:61, 62).

¿Bix páajchajik u yaʼalik Pedro maʼ u kʼaj óol Jesús kex jach tu yaʼalaj maʼ ken u beet kaʼachiʼ? Tsʼoʼok u mixbaʼalkúuntaʼal u jaajil yéetel Jesuseʼ tsʼoʼok u taasaʼal bey juntúul j-kʼasaʼan máakeʼ. Le oʼolal Pedroeʼ jeʼel kaʼach u páajtal u defendertikeʼ, baʼaleʼ tu sutaj u paach tiʼ le máax «ku bisik máak tiʼ kuxtal minaʼan u xuul[oʼ]» (Juan 6:68).

Le baʼax úuch tiʼ Pedrooʼ ku yeʼesikeʼ tak le máaxoʼob jach chúukaʼan u yóol u meyajtoʼob Diosoʼ jeʼel u beetik baʼax kʼaas wa maʼ u líiʼsmuba utiaʼal u aktáantikeʼ. Le baʼax úuchtiʼoʼ yaʼab baʼax jeʼel u kaʼansik tiʼ tuláakal le máaxoʼob meyajtik Diosoʼ.