Teʼ tu tsʼook tarde tu máansaj Jesús yéetel u apostoloʼoboʼ tu kaʼansajtiʼob unaj u yeʼeskoʼob kabal óolal le ka tu pʼoʼaj u yookoʼoboʼ. ¿Baʼaxten bey úuchik u kaʼanskoʼoboʼ? Tumen u yojel baʼax ku tsʼíiboltkoʼob. Kex tsʼoʼok u kʼubik u kuxtaloʼob utiaʼal u meyajtikoʼob Dioseʼ, láayliʼ táan u tsʼíiboltik u beetik u nojchiloʼob yóokʼol u maasileʼ (Marcos 9:33, 34; 10:35-37). Ka máan kʼiineʼ tu kʼexaj bix u tuukuloʼob.

Le apostoloʼoboʼ joʼopʼ «u baʼateltʼantikoʼob máax ichiloʼob ku tuklaʼal letiʼ u maas nojchil» (Lucas 22:24). ¡Bukaʼaj wal úuchik u beetkoʼob u yaatal u yóol Jesuseʼ! ¿Baʼax túun tu beetaj?

Letiʼeʼ maʼ tu kʼeyoʼobiʼ, baʼaxeʼ tu tsolaj u nuʼuktiʼob yéetel yaabilaj. Tu beetaj u tuukuloʼob yéetel le tʼaanoʼobaʼ: «U reyiloʼob le kaajoʼoboʼ ku nojbaʼalkúuntkubaʼob yóokʼol le máakoʼoboʼ, yéetel le máaxoʼob yaan autoridad tiʼoboʼ ku nojbaʼalkúuntaʼaloʼob ikil u yaʼalaʼal jach ku beetkoʼob uts tiʼ le máakoʼoboʼ. Baʼaleʼ teʼexeʼ maʼ a beetkabaʼex beyoʼ, [...] ¿máakalmáak u maas nojchil: le máax jáalik le janaloʼ wa le ku kutal jaanloʼ?». Ka tsʼoʼokeʼ tu kʼaʼajsajtiʼob le baʼaxoʼob u beetmaj yaʼab u téenel ichiloʼoboʼ, ka tu yaʼalajtiʼob: «Baʼaleʼ teneʼ tiʼ yanen chúumuk tiʼ teʼex jeʼex le máax ku jáalik a woʼocheʼexoʼ» (Lucas 22:25-27).

Kex yaʼab u téenel tuukulnaj le apostoloʼob maʼ maʼaloboʼ, letiʼobeʼ tsʼoʼok u chúukpajal u yóoloʼob máan yéetel Jesús kex maʼ chéen chʼaʼabiliʼ. Le oʼolal tu yaʼalajtiʼob: «Jeʼex in Taata tsʼoʼok u beetik junpʼéel núuptʼaan tin wéeteleʼ, teneʼ kin beetik xan junpʼéel núuptʼaan ta wéeteleʼex utiaʼal u tsʼaʼabalteʼex junpʼéel Reino» (Lucas 22:29). Letiʼobeʼ tsʼoʼok u chúukpajal u yóol u tsaypachtoʼob Jesús. Le oʼolal tu beetaj junpʼéel núuptʼaan tu yéeteloʼob utiaʼal u múul gobernaroʼob tu yéetel teʼ Reinooʼ.

Baʼaleʼ kex táan u páaʼtkoʼob lelaʼ, láayliʼ kʼebanoʼobeʼ. Le oʼolal Jesuseʼ tu yaʼalajtiʼob: «Satanaseʼ tsʼoʼok u kʼáatik ka chaʼabaktiʼ u sen tíitkeʼex jeʼex u beetaʼal tiʼ le trigo» ken cernirtaʼakoʼ (Lucas 22:31). Ka tsʼoʼokeʼ tu yaʼalajtiʼob: «Teʼ áakʼabaʼ yaan u beetaʼal a láaj tʼóochpajleʼex tin woʼolal, tumen tsʼíibtaʼan: ‹Yaan in beetik loob tiʼ le j-kanan tamanoʼ, le tamanoʼob túunoʼ yaan u kʼiʼitpajloʼob›» (Mateo 26:31; Zacarías 13:7).

Baʼaleʼ Pedroeʼ tu yaʼalaj: «Kex tuláakal ka beetaʼak u tʼóochpajal ta woʼolaleʼ, ¡teneʼ mix bikʼin kun beetbil in tʼóochpajal!» (Mateo 26:33). Jesuseʼ tu yaʼalaj tiʼ Pedroeʼ táanil tiʼ u kʼaay kaʼatéen juntúul tʼeel teʼ áakʼaboʼ, yaan u yaʼalik maʼ u kʼaj óoliʼ. Baʼaleʼ aʼalaʼabtiʼ tumen Jesús: «Teneʼ tsʼoʼok in kʼáat óol ta woʼolal utiaʼal maʼ u saʼatal a fe; teech túuneʼ ken suunakecheʼ líiʼs u yóol a sukuʼunoʼob» (Lucas 22:32). Kex beyoʼ Pedroeʼ seguernaj u yaʼalik: «Kex ka yanak in kíimil ta wéeteleʼ junpuliʼ maʼ ken in waʼal wa maʼ in kʼaj óolechiʼ» (Mateo 26:35). Le u maasil apostoloʼoboʼ tu yaʼaloʼob xan beyoʼ.

Jesuseʼ tu yaʼalaj tiʼ u disipuloʼob: «Chéen junpʼíit kʼiin maas kin pʼáatal ta wéeteleʼex. Teʼexeʼ yaan a máan a kaxteneʼex, baʼaleʼ jeʼex tin waʼalaj tiʼ le judíoʼoboʼ: ‹Teʼ tuʼux kin binoʼ teʼexeʼ maʼ tu páajtal a taaleʼexiʼ›, lelaʼ letiʼe baʼax xan kin waʼalikteʼex beoraaʼ. Teneʼ kin tsʼáaikteʼex junpʼéel túumben mandamiento: ka a yaabiltabaʼex ta baatsileʼex. Jeʼel bix tsʼoʼok in yaabiltikeʼexoʼ, teʼex xaneʼ bey unaj a yaabiltikabaʼex ta baatsileʼexoʼ. Wa ka yaabiltikabaʼex ta baatsileʼexeʼ tuláakal máak ken u yojéelteʼ teʼexeʼ in disipuloʼex» (Juan 13:33-35).

Ka tu yuʼubaj Pedro u yaʼalik Jesús chéen junpʼíit kʼiin maas kun pʼáatal tu yéeteloʼobeʼ, tu yaʼalaj: «Yuumtsil, ¿tuʼux ka bin?». Jesuseʼ tu núukaj: «Teʼ tuʼux kin binoʼ, techeʼ maʼ tu páajtal a taal tin paach beoraaʼ, baʼaleʼ ken tsʼoʼokkeʼ yaan a taaliʼ». Pedroeʼ tu yaʼalajtiʼ: «Yuumtsil, ¿baʼaxten maʼ tu páajtal in taal ta paach beoraaʼ? Teneʼ yaan in kʼubik in kuxtal ta woʼolal» (Juan 13:36, 37).

 Beoraaʼ Jesuseʼ tu kʼaʼajsajtiʼob le ka tu túuxtoʼob kʼaʼaytaj tu luʼumil Galilea le ka tu yaʼalajtiʼob maʼ u biskoʼob junpʼéel bolsa utiaʼal taakʼin yéetel utiaʼal u biskoʼob baʼal u jaantoʼob (Mateo 10:5, 9, 10). Tsʼoʼoleʼ ka tu kʼáatajtiʼob: «¿Máasaʼ mix baʼal tu bineltajteʼex?». Letiʼobeʼ tu yaʼaloʼob: «¡Jaaj, mix baʼal!». Jesús túuneʼ tu yaʼalajtiʼob: «Baʼaleʼ beoraaʼ, le máax yaan u x-mukubeʼ u chʼaʼe, yéetel u chʼaʼ xan u sáabukaan; le máax xan minaʼan u espadaeʼ u kon u nookʼ utiaʼal ka u man junpʼéeliʼ. Tumen kin waʼalikteʼexeʼ, le baʼax tsʼíibtaʼanaʼ tiʼ teen kun béeychajal: ‹Letiʼeʼ ilaʼab bey juntúul kʼaakʼas máakeʼ›. Le baʼax tsʼíibtaʼan tin woʼolaloʼ táan u béeychajal» (Lucas 22:35-37).

Jesuseʼ táan u tʼaan tiʼ le kʼiin ken baʼajak tiʼ junpʼéel cheʼ tu chúumuk máaxoʼob beetik baʼax kʼaas wa tu contra le leyoʼ. Ken tsʼoʼokkeʼ u disipuloʼobeʼ yaan u sen chʼaʼpachtaʼaloʼob. Letiʼobeʼ ku yuʼubikoʼob bey jach listoʼobeʼ, le oʼolal tu yaʼaloʼob: «Yuumtsil, ¡ile!, teʼelaʼ yaan kaʼapʼéel espadaʼob». Letiʼeʼ tu núukajtiʼob: «Yaan yéetel leloʼ» (Lucas 22:38). Yéetel le kaʼapʼéel espadaoʼ yaan yéetel utiaʼal u kaʼansiktiʼob junpʼéel baʼax jach kʼaʼanaʼan.