U millonesil koʼoleloʼob u testigoʼob Jéeobaeʼ ku kaʼansajoʼob tiʼ tuláakal yóokʼol kaab. Letiʼobeʼ ku kaʼanskoʼob le baʼax ken u beet u Reino Dios jeʼex u yaʼalik le Salmo 68:11. Teʼeloʼ Jéeobaeʼ ku yaʼalik: «Le koʼoleloʼob ku tsikbaltikoʼob le jatsʼuts baʼaloʼob ku taal tiʼ Diosoʼ beyoʼob junpʼéel nojoch ejércitoeʼ».

Chéen baʼaleʼ le kaʼansaj ku beetik le koʼoleloʼob Testigoʼoboʼ maʼ igual yéetel le bix u kaʼansaj le koʼoleloʼob tiʼ uláakʼ religiónoʼoboʼ. ¿Baʼax túun u jelaʼanil?

Le koʼoleloʼob ku kaʼansajoʼob tiʼ uláakʼ religiónoʼoboʼ ku beetik u nojchiloʼob tu religiónoʼob, le oʼolal maases ku kaʼanskoʼob le máakoʼob yanoʼob ichil u religiónoʼoboʼ. Pero le koʼoleloʼob u testigoʼob Jéeobaoʼ ku kaʼanskoʼob le máakoʼob minaʼanoʼob ichil u religiónoʼoboʼ, letiʼobeʼ ku kaʼansajoʼob joonaj joonajil wa jeʼel tuʼuxak ka yanakoʼobeʼ.

Yaan uláakʼ baʼax maʼ igual ku beetik le koʼoleloʼob yanoʼob tiʼ uláakʼ religiónoʼoboʼ. Letiʼobeʼ ku páajtal u kaʼanskoʼob yéetel u nuʼuktikoʼob le máaxoʼob yanoʼob ichil u religiónoʼoboʼ. Chéen baʼaleʼ le koʼoleloʼob u testigoʼob Jéeobaoʼ, wa yaan juntúul xiib okjaʼanajaʼaneʼ, maʼ tu kaʼansajoʼob teʼ múuchʼuliloʼ. Le meyajaʼ chéen ku beetik le xiiboʼob tsʼaʼanoʼob utiaʼal kaʼansajoʼ. Le Bibliaoʼ ku yaʼalikeʼ chéen xiiboʼob unaj u nuʼuktikoʼob le múuchʼuliloʼ (1 Timoteo 3:2; Santiago 3:1).

Lelaʼ bey u yeʼesik le baʼax tu yaʼalaj apóstol Pablo tiʼ Titooʼ. Letiʼeʼ tu yaʼalaj: «Teneʼ tin pʼatech tu islail Creta utiaʼal ka a wutskíint le baʼaloʼob maʼ maʼalobtak ku beetaʼaloʼ yéetel utiaʼal ka a tsʼáa ancianoʼob tiʼ cada kaaj». Apóstol Pabloeʼ tu yaʼalaj xaneʼ «juntúul ancianoeʼ kʼaʼabéet minaʼan baʼax oʼolal u taʼakal u pool yéetel chéen juntúul u yatan [unaj u yantal]» (Tito 1:5, 6). Le baʼax tu yaʼalaj apóstol Pablo tiʼ Titooʼ chíikaʼan tiʼ le baʼax ku yaʼalik le carta tu túuxtaj tiʼ Timoteooʼ. Teʼeloʼ ku yaʼalik: «Wa juntúul xiib u kʼáat ka tsʼaʼabaktiʼ u meeyjil u kanáantaʼal le múuchʼuliloʼ jach maʼalob le baʼax ku tsʼíiboltikoʼ. Le máax kanáantik le múuchʼuliloʼ kʼaʼabéet juntúul máak minaʼan baʼax oʼolal u kʼeʼeyel, juntúul máak chéen juntúul u yatan, [...] noʼojaʼan utiaʼal kaʼansaj» (1 Timoteo 3:1, 2).

¿Baʼaxten chéen le xiiboʼob ku páajtal u kaʼansajoʼob yéetel u nuʼuktajoʼob teʼ múuchʼuliloʼ? Pabloeʼ tu yaʼalaj baʼaxten: «Maʼ tin chaʼik u kaʼansaj le koʼoleloʼ, mix ka u tsʼáa le xiib yáanal u páajtaliloʼ. Le koʼoleloʼ maʼ unaj u tʼaaniʼ. Tumen yáax Adán beetaʼabi, tsʼoʼoleʼ ka beetaʼab Eva» (1 Timoteo 2:12, 13). Úuchik u yáax beetaʼal le xiiboʼ tu yeʼeseʼ Dioseʼ u kʼáat ka kaʼansajnak le xiiboʼ yéetel ka u nuʼukt tuláakal baʼal.

Jesúseʼ u Nojchil tuláakal le máaxoʼob meyajtik Jéeobaoʼ, letiʼobeʼ ku yilik u beetkoʼob le baʼax tu beetaj Jesúsoʼ. Le discípulo Lucasoʼ tu yaʼaleʼ Jesús kaʼacheʼ ku «bin kajalkaaj yéetel tiʼ mejen kajtaliloʼob táan u tsikbaltik le baʼaloʼob maʼalobtak ken u beet u Reino Diosoʼ». ¿Baʼax túun tu beetaj le discípuloʼob le ka aʼalaʼabtiʼob ka xiʼikoʼob kaʼansajoʼ? Letiʼobeʼ «binoʼob tiʼ tuláakal le mejen kajtaliloʼob táan u tsikbaltikoʼob le baʼaloʼob maʼalobtak kun úuchloʼ» (Lucas 8:1; 9:2-6).

Teʼ kʼiinoʼob xanaʼ le xiiboʼob yéetel le koʼoleloʼob ku meyajtikoʼob Jéeobaoʼ ku beetkoʼob yéetel kiʼimak óolal le baʼax ku yaʼalik Mateo 24:14, teʼeloʼ Jesúseʼ tu yaʼalaj: «Le baʼaloʼob maʼalobtak ken u beet le Reinooʼ yaan u tsikbaltaʼal tiʼ tuláakal yóokʼol kaab utiaʼal ka ojéeltaʼak tumen u kajnáaliloʼob tuláakal kaajoʼob, le kéen tsʼoʼokkeʼ ku taal u xuul».