Kʼeʼex u kuxtaloʼob tumen le Bibliaoʼ

¿BAʼAX áant juntúul x-chʼúupal utiaʼal u yantal u biilal u kuxtal? ¿Bix káajik u meyajtik Dios juntúul político jach kʼasaʼan kaʼachi? Koʼox ilik baʼax ku yaʼalikoʼob.

«In kʼáat kaʼach ka yaabiltaʼaken» (INNA LEZHNINA)

SÍIJ TU AÑOIL: 1981

TUʼUX SÍIJI: RUSIA

KAʼACHEʼ: MAʼ YAABILTAʼANIʼ

BIX KUXLIKEN KAʼACHI: In taataʼob kaʼacheʼ kóokoʼob, le oʼolal le ka síijeneʼ teen xaneʼ kóoken. Tin chichnileʼ jach kiʼimak in wóol kaʼachi, chéen baʼaleʼ in taataʼobeʼ tu divorciartubaʼob. Leloʼ tu beetaj u jach yaatal in wóol. In papá yéetel in sukuʼuneʼ pʼáatoʼob kajtal Troick, pero teen yéetel in maamaeʼ binoʼon kajtal Cheliabinsk. Ka máan kʼiineʼ in maamaeʼ tsʼoʼok u beel tu kaʼatéen, chéen baʼaleʼ in padrastroeʼ jach ku káaltal yéetel jach ku jatsʼkoʼon kaʼachi.

Tu añoil 1993, búul óotsil in sukuʼun. Leloʼ tu beetaj u jach yaatal k-óol. In maamaeʼ joʼopʼ u káaltal yéetel joʼopʼ u jaʼajatsʼken xan. Teen kaʼacheʼ in kʼáat ka yaabiltaʼaken, le oʼolal joʼopʼ in bin tiʼ jejeláas religiónoʼob. Chéen baʼaleʼ mix tuʼux tin wuʼuyaj wa yaabiltaʼaneniʼ.

BIX TU KʼEXIL IN KUXTAL LE BIBLIAOʼ: Le yaanten 13 añosoʼ juntúul in wéet xook kaʼacheʼ u testigo Jéeoba. Letiʼe suuk kaʼach u tsikbaltikten baʼax ku yaʼalik le Bibliaoʼ. Jach uts tin tʼaan kaʼach in kaanbal yoʼolal le máaxoʼob chúukpaj u yóol u meyajtoʼob Diosoʼ, jeʼex Noé yéetel Joboʼ. Le táan in xook kaʼach yéetel le Testigoʼoboʼ káaj xan in bin teʼ reuniónoʼoboʼ.

Yaʼab baʼaloʼob tin kanaj teʼ Bibliaoʼ. Jach kʼuch tin puksiʼikʼal in kanikeʼ Dioseʼ yaan u kʼaabaʼ (Salmo 83:18). Jaʼakʼ in wóol ka tin kanaj le Bibliaoʼ u yaʼalmiliʼ baʼax kun úuchul teʼ tu tsʼook kʼiinoʼobaʼ (2 Timoteo 3:​1-5). Jach kiʼimakchaj in wóol in kanik xaneʼ yaan u kaʼa kuxkíintaʼal le kimenoʼoboʼ, tumen beyoʼ yaan in kaʼa ilik in sukuʼun (Juan 5:​28, 29).

Chéen baʼaleʼ maʼ tuláakal máak kiʼimakchaj u yóol ka joʼopʼ in xokik le Bibliaoʼ. In maama yéetel in padrastroeʼ u pʼeekoʼob le Testigoʼoboʼ, le oʼolal tu yaʼaloʼobten ka xuʼuluk in xook tu yéeteloʼob. Pero teneʼ jach jatsʼuts in wilik kaʼach baʼax táan in kanik, le beetik maʼ xuʼul in xookiʼ.

Jach yaachaj tin wóol úuchik in pʼektaʼal tumen in láakʼtsiloʼob. Le ka tsʼoʼokeʼ úuch junpʼéel baʼal tu beetaj u maas yaatal in wóol. Le in wíitsʼin ku bin tin wéetel teʼ reuniónoʼob kaʼachoʼ kíimi, tumen búul tiʼ junpʼéel río xan. Chéen baʼaleʼ le Testigoʼoboʼ junpuliʼ maʼ tu pʼatenoʼob tin juunaliʼ, tin wuʼuyaj jach u yaabiltmenoʼob. Leloʼ letiʼe baʼax kin tsʼíiboltik desde úuchoʼ. Tin tsʼáaj cuentaeʼ letiʼob u jaajil religión, le oʼolal okjaʼanajen tu añoil 1996.

UTSILOʼOB TSʼOʼOK U TAASIKTEN: Tsʼoʼok u máan seis años tsʼoʼokok in beel yéetel Dmitry. Letiʼeʼ jach táaj uts tin wéetel. Tu kaʼatúulaloʼoneʼ táan k-meyaj teʼ sucursal yaan tiʼ u testigoʼob Jéeoba tu kaajil San Petersburgooʼ. Ka máan kʼiineʼ in taataʼobeʼ xuʼul u jach pʼektikenoʼob.

¡Jach kiʼimak in wóol úuchik in kʼaj óoltik Jéeoba! Bejlaʼeʼ yaan u biilal in kuxtal tumen táan in meyajtik.

«Yaʼab baʼaloʼob taak in wojéeltik kaʼachi» (RAUDEL RODRÍGUEZ RODRÍGUEZ)

SÍIJ TU AÑOIL: 1959

TUʼUX SÍIJI: CUBA

KAʼACHEʼ: KU TSʼÁAIKUBA TU CONTRA LE GOBIERNOOʼ

BIX KUXLIKEN KAʼACHI: Síijen tu luʼumil Cuba, tu kaajil La Habana. Teʼ tuʼux síijenoʼ jach yaʼab óotsilil yéetel baʼatelil yaan. Le ka nojochchajeneʼ utschaj tin wich le yudooʼ, lelaʼ junpʼéel deporte tuʼux ku baʼateʼel máak.

Como jach maʼalob in xook kaʼacheʼ in papáʼobeʼ tu túuxtenoʼob xook universidad. Le tiaʼanen teʼeloʼ joʼopʼ in tuklikeʼ maʼ maʼalob bix u meyaj le gobierno yaan teʼ luʼum tuʼux kajaʼanenoʼ, le oʼolal tin tsʼáajinba tu contraʼob. Juntéenjeakeʼ teen yéetel juntúul in wéet xookeʼ t-loʼoloxaj juntúul policía yéetel t-jaʼajatsʼaj u pool chéen utiaʼal k-luʼsik u tsʼoon, jach óolak k-kíimseʼ. Yoʼolal leloʼ kʼaʼaloʼon yéetel aʼalaʼab yaan k-kíimsaʼal. Kex chéen 20 años yaanten kaʼacheʼ aʼalaʼab yaan in kíimsaʼal.

Le kʼalaʼanen kaʼachoʼ joʼopʼ in máansik tin tuukul baʼax ken in beet le kéen tsʼoʼonken utiaʼal in kíimsaʼaloʼ. Maʼ in kʼáat in weʼes wa saajken kaʼachi. Chéen baʼaleʼ teʼ súutukoʼ táan xan in tuklik uláakʼ baʼaloʼob kaʼachi, por ejemploeʼ, ¿baʼaxten jach yaʼab injusticia yaan teʼ yóokʼol kaabaʼ yéetel baʼax oʼolal kuxaʼan wíinik?

BIX TU KʼEXIL IN KUXTAL LE BIBLIAOʼ: Ka máan kʼiineʼ aʼalaʼabtoʼoneʼ maʼ ken k-kíimsbil, baʼaxeʼ 30 años ken k-beet cárcel. Teʼ kʼiinoʼoboʼ letiʼe ka tin kʼaj óoltaj jujuntúul u testigoʼob Jéeobaoʼ. Letiʼob kaʼacheʼ kʼaʼaloʼob yoʼolal u religiónoʼob. Tin tsʼáaj cuentaeʼ le Testigoʼoboʼ maʼ saajkoʼobiʼ yéetel maʼatech u kaxtikoʼob baʼateʼel tiʼ mix máak. Kex maʼ u beetoʼob baʼaloʼob kʼaastakeʼ maʼ táan kaʼach u kʼuuxiloʼobiʼ mix pʼujaʼanoʼob úuchik u kʼaʼalaloʼob.

Le Testigoʼoboʼ tu kaʼansoʼobten baʼax u tukultmaj Dios utiaʼal wíinik. Tu kaʼansoʼobten yéetel le Bibliaoʼ Dioseʼ yaan u sutik paraísoil le Luʼumaʼ. Tsʼoʼoleʼ maʼ tun beetbil baʼax kʼaas, yaan u yantal justicia yéetel chéen utsul máakoʼob kun kajtaloʼob utiaʼal mantatsʼiʼ (Salmo 37:29).

Jatsʼuts in wilik kaʼach baʼax táan in kanik, chéen baʼaleʼ in modoseʼ maʼ bey jeʼex u tiaʼaloʼoboʼ. Tin tukleʼ maʼ tun páajtal u xuʼulul in wokskinba tiʼ política. Le oʼolal tin chʼaʼtuklaj in xokik le Biblia chéen tin juunaloʼ. Le ka tsʼoʼok in xokikeʼ tin tsʼáaj cuentaeʼ chéen u testigoʼob Jéeoba ku kuxtaloʼob jeʼex le yáax cristianoʼoboʼ.

Le ka tin xokaj le Bibliaoʼ tin tsʼáaj cuentaeʼ unaj in kʼexik yaʼab baʼaloʼob ichil in kuxtal. Por ejemploeʼ unaj u xuʼulul in poochʼil, in tsʼuʼutsʼik chamal yéetel in wokskinba tiʼ política. Maʼ chéen chʼaʼabil úuchik in beetik tuláakal le kʼeexoʼoboʼ, chéen baʼaleʼ yéetel u yáantaj Jéeobaeʼ béeychaji.

Junpʼéel tiʼ le baʼaxoʼob istikyaj in controlarkoʼ letiʼe in séeb pʼuʼujuloʼ. Le oʼolal kin orar tiʼ Jéeoba utiaʼal ka u yáanten. Proverbios 16:​32, jach tsʼoʼok u yáantken. Teʼeloʼ ku yaʼalik: «Juntúul máax maʼ tu jáan pʼuʼujuleʼ maas maʼalob ke juntúul máax jach yaan u páajtalil, juntúul máax u yojel u controlartubaeʼ maas maʼalob ke juntúul máak ku tiaʼalintik junpʼéel kaaj».

Tu añoil 1991, okjaʼanajen ichil junpʼéel barril yaan kaʼach teʼ cárceloʼ. Tu añoil 1992, teen yéetel uláakʼ máaxoʼob kʼalaʼanoʼobeʼ jáalkʼabtaʼaboʼoneʼ ka túuxtaʼaboʼon España. Le ka kʼuchen teʼeloʼ u testigoʼob Jéeobaeʼ jach maʼalob úuchik u kʼamkenoʼob yéetel tu séebaʼanil joʼopʼ in bin reunión tu yéeteloʼob. Leti’obe’ tu yáantenoʼob utiaʼal in séeb suuktaliʼ.

UTSILOʼOB TSʼOʼOK U TAASIKTEN: Bejlaʼeʼ jach kiʼimak in wóol tumen táan in meyajtik Jéeoba junmúuchʼ yéetel in watan bey xan yéetel u kaʼatúulal in hijaʼob. Yaanten u jatsʼuts privilegioil in máansik yaʼab tiempo táan in kaʼansik uláakʼ máakoʼob yéetel le Bibliaoʼ. Yaan horaeʼ kin kʼaʼajsikeʼ óolak kíimsaʼaken tin táankelmileʼ. Le oʼolal kin tsʼáaik gracias tiʼ Jéeoba yoʼolal tuláakal le baʼaxoʼob tsʼoʼok u tsʼáaiktenoʼ. Tak bejlaʼa kuxaʼaneʼ yéetel yaanten junpʼéel jatsʼuts esperanza. Kin tsʼíiboltik u kʼuchul u kʼiinil in wilik le Paraísooʼ, teʼeloʼ yaan u beetaʼal baʼax maʼalob yéetel ‹maʼ tun yantal kíimiliʼ› (Apocalipsis 21:​3, 4).

[Uláakʼ baʼax ku tsoʼolol]

«Jach kʼuch tin puksiʼikʼal in kanikeʼ Dioseʼ yaan u kʼaabaʼ»

[Oochel]

Teen yéetel in wíichameʼ jach jatsʼuts k-ilik k-kaʼansik baʼax ku yaʼalik le Biblia tiʼ le kóokoʼoboʼ