«Le Reinooʼ yaan u tsikbaltaʼal tiʼ tuláakal yóokʼol kaab»

«Le baʼaloʼob maʼalobtak ken u beet le Reinooʼ yaan u tsikbaltaʼal tiʼ tuláakal yóokʼol kaab utiaʼal ka ojéeltaʼak tumen u kajnáaliloʼob tuláakal kaajoʼob, le kéen tsʼoʼokkeʼ ku taal u xuul» (MATEO 24:14).

¿Baʼax tu yóotaj u yaʼal Jesús? Lucaseʼ tu yaʼaleʼ Jesús kaʼacheʼ ku «bin kajalkaaj yéetel tiʼ mejen kajtaliloʼob táan u tsikbaltik le baʼaloʼob maʼalobtak ken u beet u Reino Diosoʼ» (Lucas 8:1). Jesúseʼ tu yaʼalaj: «Kʼaʼabéet xan in bin tiʼ uláakʼ kaajoʼob utiaʼal in tsikbaltik le baʼaloʼob maʼalobtak ken u beet u Reino Diosoʼ, tumen le beetik túuxtaʼaben» (Lucas 4:43). Tu káajbaleʼ tu yaʼalaj tiʼ u discípuloʼob ka xiʼik u tsikbaltoʼob u Reino Dios tiʼ le kaajoʼob yanoʼob naatsʼoʼ. Pero ka máan kʼiineʼ tu yaʼalajtiʼob: «Yaan a tʼaaneʼex tin woʼolal [...] tak tu maas náachil le luʼumaʼ» (Hechos 1:8; Lucas 10:1).

¿Baʼax tu beetaj le yáax cristianoʼoboʼ? U discípuloʼob Jesúseʼ tu séebaʼanil tu beetoʼob le baʼax aʼalaʼabtiʼoboʼ. Hechos 5:42, ku yaʼalik: «Letiʼobeʼ maʼ xuʼul u kaʼanskoʼob yéetel u tsikbaltikoʼob le maʼalob baʼaloʼob yaan yil yéetel Jesús, le Cristooʼ. Lelaʼ bey u beetkoʼob kaʼach sáamsamal teʼ templooʼ bey xan joonaj joonajil». Le meyajaʼ maʼ chéen wa jaytúul máak beetiʼ, baʼaxeʼ tuláakal le discípuloʼob beetoʼ. Le historiador August Neanderoʼ tu yaʼaleʼ: «Celsoeʼ jach u pʼekmaj le yáax cristianoʼob kaʼachoʼ, tsʼoʼoleʼ jach ku burlarkoʼob ikil u kaʼanskoʼob le Evangeliooʼ. Ku yaʼalikeʼ jach ignoranteʼob yéetel maʼ xooknajaʼanoʼobiʼ tumen letiʼob kaʼacheʼ chéen ku meyajtikoʼob kʼéewel, ku beetkoʼob xanaboʼob yéetel chéen ku kʼosikoʼob u tsoʼotsel tamanoʼob». Jean Bernardieʼ tu tsʼíibtaj junpʼéel libro tuʼux ku yaʼalik: «Le cristianoʼoboʼ unaj kaʼach u kaʼanskoʼob tuláakal máak yéetel unaj u kaʼansajoʼob tuláakal tuʼux, teʼ bejoʼoboʼ, teʼ kaajoʼoboʼ, teʼ kʼíiwikoʼoboʼ yéetel tu yotoch le máakoʼoboʼ. Kex maʼ chéen chʼaʼabileʼ unaj u beetkoʼob kaʼach le meyajaʼ» (Les premiers siècles de L’Église). Le máakaʼ tu yaʼaleʼ kex maʼ chéen chʼaʼabileʼ unaj u kaʼansajoʼob «tak tu maas náachil le Luʼumaʼ».

Teʼ kʼiinoʼobaʼ, ¿máaxoʼob beetik beyoʼ? Juntúul párroco anglicano ku kʼaabaʼtik David Watsoneʼ tu yaʼaleʼ «yaʼab máakoʼob tsʼoʼok u náachtaloʼob tiʼ Dios tumen le iglesiaʼoboʼ maʼ tu jóoʼskoʼob u tiempoil utiaʼal u kaʼanskoʼob tubeel le máakoʼoboʼ». Tiʼ le libro ¿Por qué se van los católicos?, tsʼíibtaʼab tumen José Luis Pérez Guadalupeoʼ, tu yaʼaleʼ le evangelicoʼob, le adventistaʼob yéetel le máakoʼob yanoʼob tiʼ uláakʼ religiónoʼoboʼ maʼatech u binoʼob kaʼansaj «joonaj joonajil» jeʼex u beetik u testigoʼob Jéeobaoʼ.

Tiʼ junpʼéel informe tu beetaj Jonathan Turleye’ tu yaʼalaj: «Yaʼab máakoʼobeʼ le kéen u yuʼuboʼob u yaʼalaʼal u testigoʼob Jéeobaeʼ, ku jaan taal tu tuukuloʼob le máaxoʼob ku binoʼob tu yotochoʼob jach teʼ súutukil maʼ unajoʼ. Le Testigoʼoboʼ ku binoʼob joonaj joonajil maʼ chéen utiaʼal ka ojéeltaʼak baʼaxoʼob ku kaʼanskoʼobiʼ, baʼaxeʼ ku beetkoʼob yoʼolal le nojoch fe yaantiʼoboʼ» (Cato Supreme Court Review, 2001-2002).

[Cuadro]

¿A wojel wa máaxoʼobiʼ?

Le xookoʼob tsʼoʼok k-ilkoʼ ku yeʼesik jujunpʼéel baʼaloʼob ku yaʼalik le Biblia eʼesik máax le jaajil cristianoʼoboʼ. ¿A wojel wa máaxoʼobiʼ? Teʼ kʼiinoʼobaʼ yaan u milesil grupoʼob yéetel religiónoʼob ku yaʼalikubaʼob cristianoʼob. Chéen baʼaleʼ kʼaʼajaktech le baʼax tu yaʼalaj Jesúsoʼ: «Maʼ tuláakal le máaxoʼob aʼalikten ‹Yuumtsil, Yuumtsil› kun ookloʼob tu Reinoil le kaʼanoʼ, baʼaxeʼ chéen le máaxoʼob ku beetkoʼob baʼax u kʼáat in Taata yaan teʼ kaʼanoʼ» (Mateo 7:21). Utiaʼal k-disfrutartik le bendiciónoʼob ken u taas u Reino Diosoʼ, unaj k-ilik máax le u jaajil cristianoʼoboʼ utiaʼal ka ookkoʼon ichiloʼob. Wa taak a wojéeltik baʼaxoʼob ken u beet u Reino Dioseʼ tʼaanen yéetel juntúul u testigo Jéeoba (Lucas 4:43).