Mateo 15:1-39
15 Ka tsʼoʼokeʼ jujuntúul fariseoʼob yéetel escribaʼob tiʼ u kaajil Jerusaléneʼ+ taaloʼob tu yiknal Jesúseʼ ka tu yaʼaloʼobtiʼ:
2 «¿Baʼaxten a discípuloʼobeʼ ku mixbaʼalkúuntikoʼob le baʼax suuk u beetaʼal tumen le úuchben máakoʼoboʼ? Letiʼobeʼ táanil tiʼ u janaloʼobeʼ maʼatech u pʼoʼik u kʼaboʼob jeʼex unajeʼ».*+
3 Jesúseʼ tu núukajtiʼob: «¿Baʼaxten teʼexeʼ ka mixbaʼalkúuntikeʼex le baʼax u yaʼalmaj Dios ikil a beetkeʼex le baʼax suukaʼan u beetaʼal tumen le úuchben máakoʼoboʼ?+
4 Dioseʼ u yaʼalmaj: ‹Unaj a respetartik a papá bey xan a maama›,+ u yaʼalmaj xan: ‹Le máax ku kʼaakʼastʼaan tu contra u papá wa u maamaeʼ unaj u kíimsaʼal›.+
5 Chéen baʼaleʼ teʼexeʼ ka waʼalikeʼexeʼ juntúul máakeʼ jeʼel u páajtal u yaʼalik tiʼ u papá wa tiʼ u maamaeʼ: ‹Maʼ tu páajtal in wáantkech, tumen tuláakal baʼax yaanteneʼ in kʼubmaj tiʼ Dios›,+
6 yéetel leloʼ teʼexeʼ táan a waʼalikeʼex maʼ unaj u yáantik u papá wa u maama máaki’. Chéen baʼaleʼ yoʼolal leloʼ teʼexeʼ táan a mixbaʼalkúuntikeʼex le baʼax u yaʼalmaj Diosoʼ tumen táan a beetkeʼex le baʼax kaʼansaʼanteʼexoʼ.+
7 J-kaʼapʼéel icheʼex, jach jaaj le baʼax tu yaʼalaj le profeta Isaías ta woʼolaleʼexaʼ:+
8 ‹Le kaajaʼ chéen yéetel u chiʼ ku alabarken, chéen baʼaleʼ u puksiʼikʼaleʼ jach náach yanil tiʼ teen.
9 Chéen kunel u seguer u adorarken, tumen le baʼaxoʼob ku kaʼansikoʼ chéen tiʼ máakoʼob u taal›».+
10 Ka tsʼoʼokeʼ tu tʼanaj le yaʼabkach máakoʼoboʼ ka tu yaʼalajtiʼob: «Chʼenxikinteʼex yéetel chʼaʼnuʼukteʼex baʼax u kʼáat u yaʼal lelaʼ:+
11 maʼ letiʼe baʼax ku yokol tu chiʼ máak beetik u kʼastal máakoʼ, baʼaxeʼ letiʼe baʼax ku jóokʼol tu chiʼoʼ».+
12 U discípuloʼob túuneʼ náatsʼoʼob tu yiknaleʼ ka tu yaʼaloʼobtiʼ: «¿Ta wilaj wa kʼuuxilnaj le fariseoʼob yoʼolal le baʼax ta waʼaloʼ?».+
13 Jesúseʼ tu núukaj: «Tuláakal paakʼal maʼ in Taata yaan teʼ kaʼan pakʼmiloʼ yaan u joʼokol.
14 Maʼ a beetkeʼex u cuentailoʼob. Letiʼobeʼ beyoʼob jeʼex le máakoʼob chʼóopoʼob ku nuʼuktikoʼob uláakʼ máakoʼoboʼ. Le oʼolaleʼ wa juntúul chʼóop ku nuʼuktik u yéet chʼóopileʼ tu kaʼatúulal kun lúubloʼob tiʼ junpʼéel jool».+
15 Pedroeʼ tu yaʼalaj tiʼ Jesús: «Tsoltoʼon baʼax u kʼáat u yaʼal le baʼax ta tsikbalteʼ».*
16 Jesús túuneʼ tu yaʼalaj: «¿Tak wa teʼex maʼ ta naʼateʼexiʼ?+
17 ¿Maʼ wa ta wilkeʼexeʼ tuláakal baʼax ku yokol tu chiʼ máakeʼ ku bin tu choochel, ku tsʼoʼokoleʼ ku máansik?
18 Chéen baʼaleʼ le baʼaxoʼob ku jóokʼol tu chiʼ máakoʼ tu puksiʼikʼal máak ku taal, le baʼaloʼobaʼ letiʼe baʼax kʼaskúuntik máakoʼ.+
19 Tu puksiʼikʼal máakeʼ ku jóokʼol le kʼaakʼas tuukuloʼobaʼ:+ u kíimsik u yéet máakil, u tusik u núup,* u núupkʼebantal,* u yookol, u yaʼalik baʼaloʼob maʼ jaajtak tu contra wa máaxiʼ yéetel u poochʼil.
20 Tuláakal le baʼaloʼobaʼ letiʼe kʼaskúuntik máakoʼ, chéen baʼaleʼ u janal máak maʼ u pʼoʼomaj u kʼabeʼ maʼ tu kʼaskúuntik máak».
21 Ka lukʼ Jesús teʼeloʼ bin tu luʼumil Tiro yéetel Sidón.+
22 Ka túun taal juntúul koʼolel feniciail kajaʼan teʼeloʼ, ka tu kʼaʼam aʼalajtiʼ: «Chʼaʼten óotsilil Yuumtsil, u Paal David, in hijaeʼ okaʼan juntúul demonio tiʼ yéetel jach yaj bix u beetaʼal u muʼyaj».+
23 Chéen baʼaleʼ Jesúseʼ mix baʼal tu núukajtiʼ. Ka túun tu natsʼuba u discípuloʼob tu yiknaleʼ ka tu yaʼaloʼobtiʼ: «Aʼaltiʼ ka xiʼik, tumen maʼ tu xuʼulul u taal u yawat t-paach».
24 Letiʼeʼ tu yaʼalaj: «Teneʼ chéen túuxtaʼaben utiaʼal ka in wáant le israelitaʼob beyoʼob tamanoʼob saatloʼoboʼ».+
25 Le koʼoleloʼ náatsʼ tu yiknaleʼ ka xolaj táan u kʼáat óoltiktiʼ: «¡Yuumtsil, áanteniʼ!».
26 Letiʼeʼ tu núukajtiʼ: «Maʼ maʼalob ka chʼaʼabak u yoʼoch waaj le paalaloʼob utiaʼal ka tsʼaʼabak tiʼ le mejen peekʼoʼoboʼ».
27 Le koʼoleloʼ tu yaʼalaj: «Jaaj a tʼaan Yuumtsil, chéen baʼaleʼ le mejen peekʼoʼoboʼ ku jaantikoʼob u xiixel le waaj ku júutul yáanal u mesa u yuumiloʼoboʼ».+
28 Jesús túuneʼ tu núukajtiʼ: «Koʼolel, jach táaj nojoch a fe. Úuchuk le baʼax ta kʼáatoʼ». Tiʼ le súutuk jeʼeloʼ u hijaeʼ utschaji.
29 Jesúseʼ lukʼ teʼeloʼ ka bin naatsʼ tiʼ le Mar de Galileaoʼ.+ Ka tsʼoʼokeʼ naʼak tiʼ junpʼéel montañaeʼ ka pʼáat kutaliʼ.
30 Teʼeloʼ kʼuch yaʼabkach máakoʼobiʼ, letiʼobeʼ tu taasoʼob yiknal Jesús máakoʼob maʼ tu páajtal u xíimbaloʼob, móochoʼob, chʼóopoʼob, mudoʼob* yéetel yaʼab uláakʼ kʼojaʼanoʼob, ka túun tu láaj tsʼakoʼob.+
31 Le oʼolaleʼ le yaʼabkach máakoʼoboʼ jaʼakʼ u yóoloʼob le ka tu yiloʼob táan u tʼaan le mudoʼoboʼ, le móochoʼoboʼ táan u yutstaloʼob, le móoch u yookoʼoboʼ táan u xíimbaloʼob yéetel le chʼóopoʼoboʼ táan u paakatoʼob, ka túun tu alabartoʼob u Diosil Israel.+
32 Chéen baʼaleʼ Jesúseʼ tu tʼanaj u discípuloʼobeʼ ka tu yaʼalajtiʼob: «Kin chʼaʼik óotsilil tiʼ le yaʼabkach máakoʼobaʼ+ tumen tsʼoʼok óoxpʼéel kʼiin pʼáatkoʼob tin wiknal yéetel maʼ u jaantoʼob mix baʼaliʼ. Le oʼolal maʼ in kʼáat in waʼaltiʼob ka xiʼikoʼobiʼ, tumen bik desmayarnakoʼob teʼ bejoʼ».+
33 Chéen baʼaleʼ u discípuloʼobeʼ tu yaʼaloʼobtiʼ: «Mix máak kajakbal wayeʼ, le oʼolaleʼ, ¿tuʼux jeʼel k-chʼaʼik yaʼabkach waaj utiaʼal k-tséentik le bukaʼaj máakoʼobaʼ?».+
34 Jesús túuneʼ tu kʼáatajtiʼob: «¿Jaypʼéel waaj yaanteʼex?». Letiʼobeʼ tu núukoʼob: «Siete u pʼéelal, yéetel wa jaytúul mejen kayoʼob».
35 Ka tsʼoʼok u yaʼalik tiʼ le yaʼabkach máakoʼob ka kulakoʼob teʼ luʼumoʼ,
36 tu chʼaʼaj le siete waajoʼob yéetel le kayoʼoboʼ, tu tsʼáaj gracias tiʼ Dios, tu xetʼoʼobeʼ ka joʼopʼ u tsʼáaik tiʼ u discípuloʼob, letiʼob túuneʼ tu tʼoxoʼob tiʼ le yaʼabkach máakoʼoboʼ.+
37 Tuláakal jaanoʼob yéetel naʼajchajoʼob, ka moʼol le u xéexetʼal pʼáatoʼ chuʼup siete xúuxakoʼob.+
38 Tsʼoʼoleʼ le máaxoʼob jaanoʼoboʼ 4,000 xiiboʼob, ichiloʼobeʼ maʼ xokaʼan le koʼoleloʼoboʼ mix le paalaloʼoboʼ.
39 Ka tsʼoʼok túun u yaʼalik Jesús tiʼ le máakoʼob jeʼel u páajtal u binoʼoboʼ, letiʼeʼ naʼak teʼ barcooʼ ka bin tu luʼumil Magadán.+
Notas
^ Lelaʼ maʼ u kʼáat u yaʼal wa jach tu jaajil éekʼ u kʼaboʼobiʼ, baʼaxeʼ u kʼáat u yaʼal maʼ u pʼoʼomoʼob jeʼex suuk u beetik le judíoʼob tu religiónoʼoboʼ.
^ Wa «le kettʼaan ta waʼaleʼ».
^ Lelaʼ u kʼáat u yaʼal u yantal baʼax u yil juntúul íichamtsil wa juntúul atantsil yéetel máax maʼ u núupiʼ.
^ Ilawil página 2573.
^ Wa «tootoʼob».
