Efesios 5:1-33
5 Tumen u paalaleʼex Dios yéetel u yaabiltmeʼexeʼ, beeteʼex jeʼex u beetik letiʼoʼ.+
2 Maʼ u xuʼulul xan a weʼeskeʼex yaabilaj+ jeʼex úuchik u yaabiltikoʼon* Cristoeʼ.+ Letiʼeʼ tu kʼububa t-oʼolal,* tu kʼububa bey junpʼéel ofrenda yéetel bey junpʼéel sacrificio jach kiʼibok tu táan Dioseʼ.+
3 Ichileʼexeʼ maʼ unaj u yúuchul tʼaan+ tiʼ le núupkʼebanoʼ,* tiʼ tuláakal u jejeláasil baʼaloʼob kʼaastak bey xan tiʼ u píitmáan u tsʼíiboltaʼal wa baʼax, tumen ichil le máaxoʼob santoʼoboʼ maʼ unaj u yantal le baʼaloʼobaʼ.+
4 Maʼ unaj xan u beetaʼal baʼaloʼob suʼtsiltakiʼ mix u yaʼalaʼal tʼaanoʼob minaʼan u biilaloʼob, mix u yaʼalaʼal kʼaakʼas báaxal tʼaanoʼob,+ baʼax unajeʼ u tsʼaʼabal gracias.+
5 Tumen a wojleʼex yéetel ka tsʼáaikeʼex cuentaeʼ le máax ku núupkʼebantal, le máax ku beetik baʼaloʼob kʼaastak,+ le máax chéen ku chʼíikil u tsʼoʼokbes u tsʼíibolaloʼoboʼ+ —lelaʼ láayliʼ bey ka adorartaʼak imagenoʼobeʼ—, mix juntúul tiʼ letiʼob kun tiaʼalintik u Reino Cristo yéetel Diosiʼ.+
6 Mix máak ka u tuseʼex yéetel tʼaanoʼob minaʼan u biilaloʼob, tumen tu yoʼolal le baʼaloʼobaʼ yaan u taal u pʼujaʼanil Dios tu yóokʼol le máaxoʼob maʼ u kʼáat u yuʼuboʼob tʼaanoʼ.
7 Le oʼolaleʼ maʼ a beetkeʼex jeʼex u beetkoʼoboʼ,
8 tumen kaʼacheʼ ka máaneʼex ich éeʼjochʼeʼenil, chéen baʼaleʼ beoraaʼ táan a máaneʼex ich sáasilil+ tumen u tiaʼaleʼex Yuumtsil.+ Seguernak a máaneʼex bey u paalaleʼex le sáasiloʼ.
9 Juntúul máak ku kuxtal ich sáasileʼ ku yeʼesik u yutsil tiʼ tuláakal baʼal, ku beetik baʼax toj yéetel ku kuxtal jeʼex u yaʼalik u jaajiloʼ.+
10 Seguernak a jach ilkeʼex baʼax maʼalob+ tu táan Yuumtsil.
11 Xuʼuluk xan a táakpajleʼex tiʼ baʼaloʼob minaʼan u biilaloʼob ku taal tiʼ le éeʼjochʼeʼeniloʼ,+ baʼaxeʼ eʼeseʼex jach maʼ maʼalobtakoʼobiʼ.
12 Tumen jach suʼtsil tak chéen u yúuchul tʼaan tiʼ le baʼaxoʼob ku taʼakikuba u beet le máakoʼoboʼ.
13 Chéen baʼaleʼ tuláakal le baʼaloʼoboʼ ku chíikpajal jach bixoʼob tu yoʼolal le sáasiloʼ, tumen tuláakal le baʼaxoʼob ku chíikpajloʼoboʼ ku pʼáatloʼob ich sáasil.
14 Le oʼolal ku yaʼalaʼal: «Teech táan a weenleʼ, aajkech yéetel líiʼkech ichil le kimenoʼoboʼ,+ Cristo túuneʼ yaan u juul u sáasilil ta wóokʼol».+
15 Le oʼolaleʼ jach kanáanteʼex maʼ a máaneʼex bey máaxoʼob minaʼan u naʼatoʼobeʼ, baʼaxeʼ bey máaxoʼob yaan u naʼatoʼobeʼ.
16 Ilawil u meyajteʼex tubeel le tiempo*+ yaanteʼexoʼ tumen jach kʼasaʼan le kʼiinoʼobaʼ.
17 Le oʼolal xuʼuluk a beetkabaʼex j-maʼ naʼatil, baʼaxeʼ seguernak a jach ilkeʼex baʼax u kʼáat Jéeoba.+
18 Maʼ a káaltaleʼex xan yéetel vino+ tumen ku kʼaskúuntik* u kuxtal máak, baʼaxeʼ seguernak a chupkabaʼex yéetel espíritu santo.
19 Utiaʼal a paklan líiʼsik a wóoleʼexeʼ kʼayeʼex salmos, alabanzaʼob bey xan kʼaayoʼob utiaʼal a adorarkeʼex Dios. Kʼaayneneʼex+ tiʼ Jéeoba+ bey táan a paaxeʼex+ ichil a puksiʼikʼaleʼexeʼ,
20 yéetel tu kʼaabaʼ k-Yuumtsil Jesucristoeʼ+ mantatsʼ tsʼáaʼex gracias+ tiʼ k-Dios yéetel k-Taata tu yoʼolal tuláakal baʼal.
21 Tumen jach ka respetarkeʼex Cristoeʼ cada juntúul tiʼ teʼexeʼ u tsʼáauba yáanal u páajtalil u maasil.+
22 Le atantsiloʼoboʼ ka u tsʼáaubaʼob yáanal u páajtalil u yíichamoʼob+ jeʼex u tsʼáaikubaʼob yáanal u páajtalil Yuumtsileʼ,
23 tumen le íichamtsiloʼ letiʼ u poolil u yatan,+ jeʼex Cristoeʼ u poolil le múuchʼuliloʼ.+ Le múuchʼuliloʼ u wíinklil Cristo yéetel letiʼ salvartik.
24 Jeʼex le múuchʼulil u tsʼaamuba yáanal u páajtalil Cristooʼ, bey xan unaj u tsʼáaikuba le atantsiloʼob yáanal u páajtalil u yíichamoʼob tiʼ tuláakal baʼaloʼ.
25 Íichamtsileʼex, maʼ u xuʼulul a yaabiltikeʼex a wataneʼex+ jeʼex yaabiltaʼabik le múuchʼulil tumen Cristo ka kʼuch tak u kʼububa tu yoʼolaloʼ.+
26 Letiʼeʼ tu beetaj beyoʼ utiaʼal u pʼatik santoil. Tu limpiokíintaj yéetel u tʼaan Dios, bey ka u pʼoʼo yéetel jaʼeʼ.+
27 Beyoʼ le kéen u bis le múuchʼulil tu táanoʼ kiʼichpan, minaʼan mix junpʼéel mancha tiʼ, minaʼan u yuʼuyuchʼil yéetel mix baʼal kʼaskúuntmil,+ baʼaxeʼ santo yéetel minaʼan mix junpʼéel baʼal kʼaas tiʼ.+
28 Bey túun xanoʼ le íichamtsiloʼoboʼ unaj u yaabiltikoʼob u yatanoʼob jeʼex u yaabiltikoʼob u wíinkliloʼobeʼ. Máax u yaabiltmaj u yataneʼ u yaabiltmuba xan.
29 Tumen mix máak ku pʼektik u wíinklil, baʼaxeʼ ku tséentik yéetel ku kanáantik jeʼex u beetik Cristo yéetel le múuchʼuliloʼ,
30 letiʼeʼ ku beetik beyoʼ tumen táakaʼanoʼon tiʼ u wíinklil.+
31 U Tʼaan Dioseʼ ku yaʼalik: «Tu yoʼolal lelaʼ le xiiboʼ yaan u pʼatik u papá yéetel u maama utiaʼal u pʼáatal* yéetel u yatan, yéetel tu kaʼatúulaloʼobeʼ yaan u suutoʼob junpʼéeliliʼ wíinklil».+
32 Le baʼal taʼakaʼanoʼ*+ junpʼéel baʼal jach kʼaʼanaʼan. Beoraaʼ táan in tʼaan tiʼ Cristo yéetel tiʼ le múuchʼuliloʼ.+
33 Chéen baʼaleʼ cada juntúul tiʼ teʼexeʼ u yaabilt u yatan+ jeʼex u yaabiltmilubaeʼ. Le atantsil xanoʼ unaj u jach respetartik u yíicham.+
Notas
^ Uláakʼ bix u traducirtaʼaleʼ «yaabiltikeʼex».
^ Uláakʼ bix u traducirtaʼaleʼ «ta woʼolaleʼex».
^ Ilawil página 2573.
^ Ich griegoeʼ ku yaʼalaʼal kaʼach «a manikeʼex le tiempooʼ».
^ Wa «ku pʼáatal maʼ tu páajtal u controlarkuba máak».
^ Wa «utiaʼal ka u nupuba».
^ Wa «baʼal santo taʼakaʼanoʼ».
