Deuteronomio 25:1-19
-
Jaytéen jeʼel u páajtal u jaʼatsʼal máakeʼ (1-3)
-
Maʼ u piʼixil u chiʼ le wakax tsʼatsʼaʼchaʼatik trigooʼ (4)
-
U tsʼoʼokol u beel máak yéetel u cuñada (5-10)
-
Koʼolel ku cháachik juntúul máak tu xiibil (11, 12)
-
Unaj exacto le nuʼukuloʼob utiaʼal pʼiisoʼ (13-16)
-
Unaj u xuʼulsaʼal le amalekitaʼoboʼ (17-19)
25 Wa jujuntúul xiiboʼob ku baʼateloʼobeʼ, letiʼobeʼ jeʼel u páajtal u binoʼob tu táan le juezoʼoboʼ,+ letiʼob túuneʼ yaan u juzgaroʼob, le máax justooʼ yaan u yaʼalikoʼob inocente, yéetel le máax beet baʼax kʼaasoʼ yaan u yaʼalikoʼob culpable.+
2 Wa le kʼasaʼan máak ku merecertik u jaʼatsʼaloʼ,+ le juezoʼ yaan u yaʼalik ka beetaʼak u noktal luʼum, yéetel yaan u jaʼatsʼal tu táan. Le jaytéen kun jatsʼbiloʼ yaan yil yéetel le bukaʼaj kʼaasil le baʼax tu beetoʼ.
3 Le máakoʼ yaan u páajtal u jaʼatsʼal tak 40 u téenel,+ pero maʼ maas tiʼ leloʼ. Wa ku seguer u jaʼatsʼaleʼ yaan u mixbaʼalkúuntaʼal a sukuʼun ta táan.
4 Maʼ unaj a pixik u chiʼ juntúul wakax tsʼaʼan u tsʼatsʼaʼchaʼat le trigo* utiaʼal u jóoʼsaʼal u neekʼoʼ.+
5 Wa tiʼ junpʼéel lugar kajaʼan junjaats sukuʼunoʼob, yéetel juntúul tiʼ letiʼob ku kíimil pero maʼ yanchaj mix juntúul u hijoeʼ, u yatan le máakaʼ maʼ kun páajtal u tsʼoʼokol u beel yéetel juntúul xiib ku pertenecer tiʼ uláakʼ familia. U cuñado túun le koʼoleloʼ unaj u bin tu yiknal yéetel unaj u chʼaʼik u yatante, unaj u tsʼoʼokol u beel tu yéetel jeʼex ku páaʼtaʼal ka u beet juntúul cuñadotsileʼ.+
6 Le u yáax hijo le koʼolel kun síijiloʼ yaan u yilaʼal bey u hijo le u yíicham kíimoʼ,+ beyoʼ u kʼaabaʼ le máakaʼ maʼ kun saʼatal ichil u kaajil Israel.+
7 Chéen baʼaleʼ wa le máak maʼ tu yóotik tsʼoʼokol u beel yéetel u yatan u sukuʼun kíimoʼ, le u yatan u sukuʼunoʼ unaj u bin tu táan u nuuktakil le kaaj yanoʼob tu joonajil le kaajoʼ, yéetel unaj u yaʼaliktiʼob: ‹U sukuʼun in wíichameʼ maʼ u kʼáat ka pʼáatak u kʼaabaʼ u sukuʼun ichil u kaajil Israeliʼ. Letiʼeʼ maʼ tu yóotik tsʼoʼokol u beel tin wéetel jeʼex ku páaʼtaʼal ka u beet juntúul cuñadotsileʼ›.
8 U nuuktakil túun le kaaj tuʼux yaan le máakoʼ unaj u tʼaanoʼob tu yéetel. Pero wa letiʼ maʼ tu yóotik u yuʼub u tʼaanoʼob yéetel ku yaʼalik: ‹Maʼ in kʼáat tsʼoʼokol in beel tu yéeteliʼ›,
9 u yatan túun u sukuʼun kíimoʼ unaj u náatsʼal tu yiknal, unaj u luʼsik u xaanab le máakoʼ,+ yéetel unaj u túubik u táan u yich yéetel unaj u yaʼalik: ‹Lelaʼ letiʼe baʼax unaj u beetaʼal tiʼ le máax maʼ u kʼáat ka yanak u familia u sukuʼunoʼ›.
10 U kʼaabaʼ túun u familia* le máak tu kaajil Israeloʼ yaan u kʼaj óoltaʼal beyaʼ: ‹U familia le máax luʼsaʼab u xaanaboʼ›.
11 Wa kaʼatúul máakoʼob táan u baʼateloʼob, yéetel u yatan juntúul tiʼ letiʼob ku yokol u defendert u yíicham tiʼ le máax jatsʼik, pero le koʼolel ku cháachik tu xiibil le máakoʼ,
12 le koʼolel beet leloʼ unaj a kúulxotʼtik u kʼab. Maʼ unaj a chʼaʼik óotsililiʼ.
13 Maʼ unaj u yantal ichil a bolsa kaʼapʼéel tuunich jejeláas u pesoʼobiʼ,+ junpʼéel nojochiʼ yéetel junpʼéel chichaniʼ.
14 Ta wotocheʼ maʼ unaj u yantaltech kaʼapʼéel nuʼukuloʼob jejeláas u medidaʼobiʼ,*+ junpʼéel nojochiʼ yéetel junpʼéel chichaniʼ.
15 Le baʼax kun meyajtech utiaʼal a pesartik wa baʼaxoʼ kʼaʼabéet exacto yéetel jeʼex unajoʼ, le baʼax xan kun meyajtech utiaʼal a pʼisik wa baʼaxoʼ kʼaʼabéet exacto yéetel jeʼex unajoʼ. Wa ka beetik beyoʼ yaan a kuxtal yaʼab tiempo teʼ luʼum táan u tsʼáaiktech Jéeoba a Diosoʼ.+
16 Jéeoba a Dioseʼ jach u pʼekmaj tuláakal le máaxoʼob ku beetkoʼob baʼax maʼ tubeeloʼ.+
17 Maʼ u tuʼubultech le baʼax tu beetajtech Amalek teʼ bej le ka jóokʼech tu luʼumil Egiptooʼ,+
18 letiʼ kaʼacheʼ tiaʼan tu jáal le bejoʼ ka tu atacartaj le máaxoʼob pʼaatal paachil jach kaʼanaʼanoʼob yéetel luubul u muukʼoʼoboʼ. Letiʼeʼ maʼ tu chʼaʼaj saajkil tiʼ Diosiʼ.
19 Le kéen u beet Jéeoba a Dios a jeʼelel tiʼ tuláakal a enemigoʼob yanoʼob ta baʼpach teʼ luʼum táan u tsʼáaiktech Jéeoba a Dios bey a herenciaoʼ,+ techeʼ unaj a tupik u kʼaabaʼ Amalek utiaʼal maʼ u suut kʼaʼajsbil way luʼumeʼ.+ Techeʼ maʼ unaj a tuʼubsik lelaʼ.
Notas
^ Wa maʼ xaaneʼ cebada.
^ Wa «U kʼaabaʼ le máaxoʼob yanoʼob ichil u yotochoʼ». Ich hebreoeʼ ku yaʼalaʼal kaʼach «U kʼaabaʼ».
^ Ich hebreoeʼ ku yaʼalaʼal kaʼach «ta wotocheʼ junpʼéel efá yéetel junpʼéel efá». Ilawil «Efá», página 2561.
