2 Timoteo 2:1-26
2 Le oʼolaleʼ in paal,+ seguernak a chʼaʼik a muukʼ tiʼ le nojoch utsil ku taal tiʼ Cristo Jesúsoʼ.
2 Le baʼaxoʼob ta wuʼuyaj in waʼalik yéetel uʼuyaʼab tumen u maasileʼ kin kʼáatiktech ka a kaʼans tiʼ máaxoʼob chúukaʼan u yóoloʼob,+ beyoʼ letiʼobeʼ yaan u noʼojaʼantaloʼob utiaʼal ka u kaʼansoʼob tiʼ uláakʼ máakoʼob.
3 Kʼaʼajaktecheʼ tumen juntúul jach maʼalob soldadoech+ tiʼ Cristo Jesúseʼ yaan xan a muʼyajtik jejeláas baʼaloʼob.+
4 Juntúul máak táan u beetik u soldadoileʼ utiaʼal ka páajchajak u lúubul utsil tiʼ le máax tʼan u beet u soldadoiloʼ mix juntéen ku yoksikuba tiʼ yaanal baʼaloʼob.*
5 Tsʼoʼoleʼ tak le máax ku táakpajal tiʼ junpʼéel competenciaeʼ maʼ tu tsʼaʼabal le corona tiʼ wa maʼ tu beetaj jach jeʼex aʼalaʼaniloʼ.+
6 Juntúul kolnáal jach ku tsʼáaik u yóol meyajeʼ yáax letiʼ unaj u jaantik u yich u paakʼal.
7 Tuukulnen mantatsʼ tiʼ le baʼaxoʼob kin waʼaliktechaʼ, Yuumtsil túuneʼ yaan u tsʼáaiktech naʼatil tiʼ tuláakal baʼal.
8 Kʼaʼajaktecheʼ Jesucristoeʼ líiʼsaʼab ichil le kimenoʼoboʼ+ yéetel tiʼ u chʼiʼibal* David u taal,+ lelaʼ letiʼe baʼaloʼob maʼalobtak kin máan in tsikbaltoʼ.+
9 Tu yoʼolal le baʼax kin tsikbaltikaʼ táan in muʼyaj, kʼaxaʼanen yéetel cadenaʼob bey juntúul kʼasaʼan máakeʼ.+ Chéen baʼaleʼ u tʼaan Dioseʼ maʼ kʼaxaʼan yéetel cadenaʼobiʼ.+
10 Le oʼolal táan u chúukpajal in wóol in muʼyajt tuláakal baʼal utiaʼal u yutsil le máaxoʼob yéeyaʼanoʼoboʼ,+ utiaʼal beyoʼ ka yanaktiʼob salvación bey xan le kiʼichkelem kuxtal minaʼan u xuul ku taal tu yoʼolal Cristo Jesúsoʼ.
11 Le baʼax ku yaʼalaʼalaʼ jach jaaj: wa k-kíimil junmúuchʼeʼ junmúuchʼ xan ken k-kuxtal.+
12 Wa ku chúukpajal k-óol muʼyajeʼ junmúuchʼ xan ken k-reinar.+ Wa k-aʼalik maʼ k-kʼaj óoleʼ letiʼeʼ yaan xan u yaʼalik maʼ u kʼaj óoloʼoniʼ.+
13 Chéen baʼaleʼ kex wa maʼ tu chúukpajal k-óol k-beet baʼax ku yaʼalik Dioseʼ letiʼeʼ mantatsʼ ku beetik baʼax ku yaʼalik, tumen maʼ tu páajtal u bin tu contra le baʼax ku yaʼalikoʼ.
14 Seguernak a kʼaʼajsiktiʼob le baʼaloʼobaʼ yéetel kaʼanstiʼob tu táan Dios maʼ unaj u baʼateloʼob tu yoʼolal chéen tʼaanoʼobiʼ, tumen lelaʼ maʼ tu taasik mix junpʼéel utsil, baʼaxeʼ ku beetik u kʼastal u tuukul le máaxoʼob uʼuyikoʼ.
15 Beet tuláakal le ku páajtal utiaʼal ka u kʼamech Dios jeʼex juntúul máak jach meeyjil minaʼan baʼax oʼolal u chʼaʼik suʼtaleʼ, juntúul máak ku kaʼansik yéetel ku tsolik tubeel u tʼaaniloʼob le jaajoʼ.+
16 Náachkuntaba tiʼ le máaxoʼob ku yaʼalikoʼob chéen kunel tʼaanoʼob ku binoʼob tu contra le baʼax santooʼ,+ tumen le tʼaanoʼob beyaʼ ku beetik u náachtal máak tiʼ Dios.
17 U kaʼansajoʼob xaneʼ yaan u kʼiʼitpajal jeʼex u bin u jaantaʼal u wíinklil máak tumen pujeʼ. Himeneo yéetel Filetoeʼ táakaʼanoʼob ichil le máakoʼob+
18 tsʼoʼok u kʼéechloʼob tiʼ le jaajoʼ. Letiʼobeʼ táan u yaʼalikoʼobeʼ tsʼokaʼan u yantal le kaʼa kuxtaloʼ+ yéetel táan u kʼaskúuntikoʼob u fe tsʼeʼetsʼek máakoʼob.
19 Kex beyoʼ le chuunpakʼ u tsʼaamaj Diosoʼ láayliʼ jeetsʼel yanileʼ. Tu yóokʼoleʼ tsʼaʼan junpʼéel sello ku yaʼalik beyaʼ: «Jéeobaeʼ u kʼaj óol le máaxoʼob u tiaʼaloʼoboʼ»,+ yéetel: «Tuláakal máax ku chʼaʼchiʼitik u kʼaabaʼ Jéeobaeʼ+ unaj u pʼatik le baʼaloʼob kʼaastak ku beetkoʼ».
20 Ichil junpʼéel nojoch najeʼ maʼ chéen nuʼukuloʼob de oro yéetel de plata yaniʼ, baʼaxeʼ yaan xan nuʼukuloʼob de cheʼ yéetel de kʼatiʼ. Yanoʼobeʼ ku meyaj utiaʼal baʼax maʼalob, chéen baʼaleʼ uláakʼoʼobeʼ utiaʼal baʼax maʼ maʼalobiʼ.
21 Le oʼolaleʼ le máax ku náachtal tiʼ le u tsʼook nuʼukuloʼobaʼ yaan u kʼuchul u beetuba jeʼex junpʼéel nuʼukul ku meyaj utiaʼal baʼax maʼalobeʼ. Yaan u kʼuchul u beetuba junpʼéel nuʼukul santo, maʼalob u meyaj tiʼ u yuumil yéetel beetaʼan utiaʼal tuláakal maʼalob meyaj.
22 Teech túuneʼ náachkuntaba tiʼ le tsʼíibolaloʼob ku taasik le táankelmiloʼ. Xeen tu paach le justiciaoʼ, le fejoʼ, le yaabilajoʼ yéetel le jeetsʼeliloʼ, xeen junmúuchʼ yéetel le máaxoʼob maʼ kʼaschajaʼan u puksiʼikʼaloʼob ku chʼaʼchiʼitkoʼob u kʼaabaʼ Yuumtsiloʼ.
23 Náachkuntaba xan tiʼ le baʼateltʼaanoʼob mix baʼal u biilaloʼoboʼ,+ tumen jeʼex a wojlileʼ le baʼaloʼobaʼ chéen ku beetkoʼob u yantal baʼatelil.
24 Tumen u esclavo Yuumtsileʼ minaʼan baʼax oʼolal u baʼateʼel, baʼaxeʼ kʼaʼabéet u yeʼesik u yutsil tiʼ u maasil,*+ kʼaʼabéet noʼojaʼan utiaʼal kaʼansaj, kʼaʼabéet u yojel u controlartuba le kéen beetaʼak wa baʼax tiʼ,+
25 tsʼoʼoleʼ kʼaʼabéet u kaʼansik yéetel jeetsʼelil le máaxoʼob maʼ u kʼáat u yuʼuboʼob tʼaanoʼ.+ Tumen wa ku beetik beyoʼ maʼ xaaneʼ jeʼel u yáantaʼaloʼob tumen Dios utiaʼal u kʼexik u tuukuloʼob yéetel utiaʼal ka u kʼaj óoltoʼob tubeel le jaajoʼ.+
26 Bey túunoʼ yaan u kʼaʼajal u yiikʼoʼob yéetel yaan u púutsʼloʼob tiʼ u léech le Kʼaasilbaʼaloʼ,* yaan u tsʼáaikoʼob cuenta chukaʼanoʼob kaʼach tumen le Kʼaasilbaʼal utiaʼal ka u beetoʼob baʼax u kʼáatoʼ.+
Notas
^ Uláakʼ bix u traducirtaʼaleʼ «tiʼ u baʼalubaʼob le kuxtalaʼ».
^ Wa «descendencia».
^ Wa «u kanáantik bix u tʼanik u maasil».
^ Ich griegoeʼ ku yaʼalaʼal kaʼach «Diablo». Ilawil «Kʼaasilbaʼal», página 2568.
