2 Corintios 5:1-21
5 Tumen k-ojleʼ wa ku paʼabal* le naj de nookʼ, le tuʼux kajaʼanoʼon way luʼumeʼ,+ Dioseʼ yaan u tsʼáaiktoʼon junpʼéel naj teʼ kaʼanoʼ. Le naj jeʼelaʼ yaan u pʼáatal utiaʼal mantatsʼ, tsʼoʼoleʼ maʼ beetaʼan tumen u kʼab wíinikoʼobiʼ.+
2 Tumen teʼ naj tuʼux kajaʼanoʼonaʼ chéen áakam k-sen beetik, yéetel táan k-sen tsʼíiboltik k-okol teʼ naj beetaʼantoʼon teʼ kaʼanoʼ,+ lelaʼ yaan u pixkoʼon jeʼex u piʼixil máak tumen junpʼéel nookʼeʼ.
3 Le kéen kʼuchuk u kʼiinil k-búukintkeʼ maʼ ken k-pʼáatal x-maʼ nookʼil.
4 U jaajileʼ toʼon máaxoʼon kajaʼanoʼon teʼ naj de nookʼaʼ k-áakam yéetel k-sen chiʼichnaktal. Maʼ tumen wa maʼ k-kʼáat ka u pixoʼon le najaʼ, baʼaxeʼ maas k-kʼáat ka u pixoʼon le uláakʼoʼ,+ utiaʼal beyoʼ le baʼax ku kʼastaloʼ ka jeelintaʼak tumen le baʼax maʼatech u kʼastaloʼ.+
5 Bey túunoʼ Dioseʼ letiʼe máax tsʼáa u páajtalil u yúuchultoʼon lelaʼ,+ yéetel letiʼ tsʼáatoʼon le espíritu santo utiaʼal u yeʼesiktoʼon* jach tu jaajil yaan u béeytal le baʼax ku taal u kʼiinil u yúuchloʼ.+
6 K-ojleʼ mientras kajaʼanoʼon tiʼ le wíinklilaʼ minaʼanoʼon tu yiknal Yuumtsil,+ kex beyoʼ mantatsʼ ku líikʼil k-óol,
7 tumen táan k-xíimbal yoʼolal fe maʼ yoʼolal baʼax k-ilkiʼ.
8 Le beetik ku líikʼil k-óol yéetel maas maʼalob k-ilik ka k-pʼat le wíinklilaʼ utiaʼal ka xiʼikoʼon kajtal tu yiknal Yuumtsil.+
9 Le oʼolaleʼ kex tiaʼanoʼon tu yiknal wa kex minaʼanoʼon tu yiknaleʼ, baʼax k-kaxtikeʼ k-lúubul utsil tiʼ letiʼ.
10 Tumen tuláakloʼoneʼ yaan k-waʼatal tu táan Cristo, teʼ lugar tuʼux kun kutal juzgaroʼ, utiaʼal beyoʼ ka tsʼaʼabak tiʼ cada juntúul le baʼax ku náajmatik tu yoʼolal le baʼaxoʼob tu beetaj le kuxaʼan yéetel u luʼumkabil wíinkliloʼ, kex wa utstak wa kʼaastak le baʼaxoʼob tu beetoʼ.+
11 Tumen k-ojel kʼaʼabéet u respetartaʼal Yuumtsileʼ maʼ tu xuʼulul k-áantik le máakoʼob utiaʼal ka u kʼex u tuukuloʼoboʼ. Chéen baʼaleʼ toʼoneʼ tsʼoʼok k-kʼaj óoltaʼal tubeel tumen Dios. K-páaʼtik xaneʼ teʼexeʼ ka a kʼaj óoltoʼoneʼex tubeel.
12 Toʼoneʼ maʼ táan k-kaʼa aʼalik ta táaneʼex baʼaloʼob maʼalobtak t-oʼolaliʼ, baʼaxeʼ táan k-tsʼáaik baʼax oʼolal a nojbaʼalkúuntkabaʼex t-oʼolal, utiaʼal beyoʼ ka páajchajak a núukikeʼex u tʼaan le máaxoʼob ku nojbaʼalkúuntkubaʼob chéen yoʼolal le baʼax chíikaʼan u yilaʼaloʼ,+ maʼ yoʼolal le baʼax yaan tu puksiʼikʼal máakoʼ.
13 Tumen wa tsʼoʼok u pʼáatal maʼ t-óol yanoʼoneʼ+ leloʼ úuch utiaʼal k-natsʼkeʼex tiʼ Dios, wa xan maʼalob k-tuukuleʼ leloʼ utiaʼal k-áantkeʼex.
14 Tumen u yaabilaj Cristoeʼ ku péeksikoʼon k-beet tuláakal baʼal, tumen jach k-ojleʼ juntúul máakeʼ kíim tu yoʼolal tuláakal máak,+ bey túunoʼ tuláakloʼob kimenoʼob kaʼachi.
15 Letiʼeʼ kíim tu yoʼolal tuláakal máak, utiaʼal beyoʼ le máaxoʼob kuxaʼanoʼoboʼ maʼ u kuxtaloʼob utiaʼal u beetkoʼob chéen baʼax u kʼáatoʼob,+ baʼaxeʼ ka kuxlakoʼob utiaʼal ka u beetoʼob baʼax u kʼáat le máax kíim tu yoʼolaloʼob yéetel kaʼa kuxkíintaʼaboʼ.
16 Tu yoʼolal túun lelaʼ desde beoraaʼ toʼoneʼ maʼ táan k-ilik máak chéen jeʼex u yilaʼal tumen u maasil máakoʼobeʼ.+ Tsʼoʼoleʼ wa yaan tiʼ toʼon kʼuch u yil Cristo chéen jeʼex u yilaʼal tumen wíinikeʼ, u jaajileʼ maʼ bey k-ilik beoraaʼ.+
17 Bey túunoʼ wa juntúul máak junmúuchʼ yanil yéetel Cristoeʼ le máakaʼ junpʼéel túumben baʼal beetaʼan tumen Dios.+ Le úuchben baʼaloʼoboʼ tsʼoʼok u máanoʼob, ¡ileʼex!, túumben baʼaloʼob tsʼoʼok u yantaloʼob.
18 Chéen baʼaleʼ tiʼ Dios u taal tuláakal baʼal. Dioseʼ tsʼoʼok u usartik Cristo utiaʼal u páajtal k-kaʼa bisikba tu yéetel,+ tsʼoʼok xan u kʼubéentiktoʼon junpʼéel meyaj: k-áantik uláakʼ máakoʼob u kaʼa bisubaʼob tu yéetel.+
19 Leloʼ u kʼáat u yaʼaleʼ Dioseʼ, tu yoʼolal Cristoeʼ, tu beetaj u kaʼa biskuba tuláakal wíinik tu yéetel.+ Letiʼeʼ maʼ tu chʼaʼaj en cuenta le baʼaxoʼob kʼaastak u beetmoʼob tu contraoʼ,+ yéetel tsʼoʼok u kʼubéentiktoʼon ka k-tsʼáa ojéeltbil jeʼel u páajtal u kaʼa biskuba máak tu yéeteleʼ.+
20 Le oʼolaleʼ, toʼoneʼ túuxtaʼanoʼon tʼaan+ tu kʼaabaʼ* Cristo,+ u kʼáat u yaʼaleʼ bey Dios ku kʼáat óolal tiʼ le máakoʼoboʼ. Tumen túuxtaʼanoʼon tʼaan tu kʼaabaʼ Cristoeʼ táan k-kʼáat óoltik: «Bisabaʼex tu kaʼatéen yéetel Dios».
21 Cristoeʼ mix juntéen kʼebanchaji.+ Letiʼeʼ kʼuʼub tumen Dios bey junpʼéel sacrificio tu yoʼolal k-kʼebanoʼobeʼ, utiaʼal beyoʼ tu yoʼolal letiʼeʼ ka ilaʼakoʼon tumen Dios bey máakoʼob toj u kuxtaloʼobeʼ.+
Notas
^ Wa «ku juʼutul».
^ Wa «bey junpʼéel garantía de ke».
^ Ich griegoeʼ ku yaʼalaʼal kaʼach «tu jeel».
