1 Pedro 3:1-22
3 Bey xan teʼex, atantsileʼex, tsʼáabaʼex yáanal u páajtalil a wíichameʼex,+ utiaʼal beyoʼ wa yaan tiʼ letiʼob maʼ tu tsʼoʼokbeskoʼob u tʼaan Dioseʼ ka káajak u tsʼoʼokbeskoʼob tu yoʼolal bix a kuxtaleʼex kex maʼ a waʼalikeʼex mix baʼal.+
2 Tumen yaan u yilkoʼob táan a biskeʼex junpʼéel toj kuxtal+ yéetel jach ka respetarkeʼexoʼob.
3 A jatsʼutsileʼexeʼ maʼ u yantal yóoʼkabil, maʼ a sen jiʼijitʼikeʼex u tsoʼotsel a pooleʼex, a tsʼáaikeʼex baʼaloʼob beetaʼan yéetel oro+ wa a búukintikeʼex koʼokoj nookʼoʼob.
4 Baʼaxeʼ a jatsʼutsileʼexeʼ unaj u yantal tu tsʼuʼ a puksiʼikʼaleʼex, junpʼéel jatsʼutsil maʼatech u kʼastal tumen kabal a wóoleʼex yéetel jeetsʼel u yóol a puksiʼikʼaleʼex.+ Lelaʼ letiʼe baʼax jach koʼoj u tojol tu táan Diosoʼ.
5 Tumen úuchjeakileʼ bey úuchik u jatsʼutskíintkuba le koʼoleloʼob jach u kʼubmaj u yóoloʼob tiʼ Diosoʼ, tu tsʼáajubaʼob yáanal u páajtalil u yíichamoʼob.
6 Bey tu beetil Saraoʼ, letiʼeʼ tu yuʼubaj u tʼaan Abrahán, tsʼoʼoleʼ «yuumtsil» u yaʼalik kaʼach tiʼ.+ Teʼexeʼ u hijaʼex Sara wa maʼ tu xuʼulul a beetkeʼex baʼax uts yéetel wa maʼ ta sajaktaleʼex.+
7 Teʼex xaneʼ, íichamtsileʼex, seguernak a chʼaʼikeʼex en cuenta bix u yuʼubikuba a wataneʼex.* Respetarteʼex le koʼolel jeʼex unaj u beetaʼaloʼ,+ tumen le koʼoleloʼoboʼ beyoʼob junpʼéel vaso maas séeb u paʼapajal ke teʼexeʼ. Tsʼoʼoleʼ maʼ u tuʼubulteʼexeʼ yaan a múul tiaʼalintkeʼex tu yéeteloʼob+ le kuxtal kun siibilteʼex tu yoʼolal u nojoch utsil Diosoʼ. Beeteʼex beyoʼ utiaʼal maʼ u kʼatkuba mix baʼal tu beel a oracióneʼex.
8 Tu tsʼookeʼ sukuʼuneʼex, ilawileʼex ka junpʼéeliliʼchajak a tuukuleʼex,+ muʼyajnakeʼex yéetel máax táan u muʼyaj, yaabiltabaʼex jeʼex u yaabiltikuba sukuʼuntsiloʼobeʼ, jach chʼaʼex óotsilil tiʼ u maasil+ yéetel maʼ a taaskabaʼex nojbaʼalil.+
9 Maʼ a sutkeʼex le kʼaas ku beetaʼalteʼexoʼ,+ maʼ a pochʼkeʼex le máax pochʼkeʼexoʼ,+ baʼaxeʼ tʼaneʼex maʼalob a wéet máakileʼex,+ tumen le oʼolal tʼaʼaneʼex utiaʼal ka kuxlakeʼex beyaʼ. Bey túunoʼ Dioseʼ yaan u yeʼesikteʼex u yutsil.
10 Tumen «jeʼel máaxak u kʼáat u yaabilt le kuxtalaʼ yéetel u kʼáat kuxtal ich kiʼimak óolaleʼ, unaj u kanáantik u yaakʼ utiaʼal maʼ u yaʼalik baʼax kʼaas+ bey xan u chiʼ utiaʼal maʼ u tuus.
11 Unaj u náachkuntkuba tiʼ baʼax kʼaas+ yéetel unaj u beetik baʼax uts.+ Unaj u kaxtik jeetsʼelil yéetel unaj u yilik maʼ u xuʼulul u yantaltiʼ.+
12 Tumen Jéeobaeʼ táan u paktik le máaxoʼob beetik baʼax maʼalob utiaʼal u kanáantkoʼoboʼ, yéetel ku chʼenxikintikoʼob le kéen kʼáat óolnakoʼob.+ Pero Jéeobaeʼ tiaʼan tu contra le máaxoʼob ku beetkoʼob baʼaloʼob kʼaastakoʼ».+
13 U jaajileʼ, ¿máax jeʼel u beetikteʼex kʼaas wa táan a tsʼáaik a wóoleʼex a beeteʼex baʼax maʼalobeʼ?+
14 Chéen baʼaleʼ kex ka muʼyajnakeʼex ikil a beetkeʼex baʼax tojeʼ yaan u kiʼimaktal a wóoleʼex.+ Maʼ a sajaktaleʼex tiʼ le baʼax ku sajaktal le uláakʼ máakoʼoboʼ mix u péek a wóoleʼex.+
15 Baʼax unaj a beetkeʼexeʼ a kʼamkeʼex Cristo ta puksiʼikʼaleʼex bey Yuumtsileʼ yéetel bey juntúul máax santoeʼ. Mantatsʼ unaj a líiʼskabaʼex utiaʼal a tʼaaneʼex tu táan jeʼel máaxak ka u kʼáatteʼex baʼax oʼolal yaanteʼex le esperanzaaʼ, chéen baʼaleʼ beeteʼex yéetel jeetsʼelil+ bey xan yéetel respeto.*+
16 Maʼ u xuʼulul u yantalteʼex junpʼéel maʼalob conciencia,+ beyoʼ jeʼel baʼalak ka aʼalaʼak ta contraʼexeʼ ka suʼlakchajak+ le máaxoʼob aʼalikteʼex baʼal le kéen u yiloʼob le maʼalob baʼaloʼob ka beetkeʼex ikil a tsaypachtikeʼex Cristooʼ.+
17 Tumen wa bey u kʼáat Diosoʼ maas maʼalob ka muʼyajnakeʼex ikil a beetkeʼex baʼax maʼalob+ ke ka muʼyajnakeʼex ikil a beetkeʼex baʼax kʼaas.+
18 Tumen tak Cristoeʼ kíim juntéeniliʼ tu yoʼolal u kʼebanoʼob wíinik.+ Bey túunoʼ juntúul máak toj u kuxtaleʼ kíim tu yoʼolal máakoʼob maʼ toj u kuxtaloʼobiʼ+ utiaʼal beyoʼ ka u natsʼoʼob tu yiknal Dios.+ Letiʼeʼ kíim bey wíinikeʼ,+ chéen baʼaleʼ kaʼa kuxkíintaʼab yéetel junpʼéel wíinklil utiaʼal u kuxtal teʼ kaʼanoʼ.+
19 Letiʼ túuneʼ bin u yaʼal tiʼ le ángeloʼob kʼalaʼanoʼob le baʼax kun úuchultiʼoboʼ.*+
20 Le ángeloʼobaʼ letiʼe máaxoʼob maʼ tu yuʼuboʼob u tʼaan Dios tu kʼiiniloʼob Noéoʼ.+ Teʼ kʼiinoʼob jeʼeloʼ Dioseʼ jach chúukpaj u yóol u páaʼt u tsʼoʼoksaʼal le arcaoʼ,+ le arca tuʼux tu salvartuba junpʼíit máakoʼoboʼ, chéen ocho u túulal tu salvartubaʼob tiʼ u jaʼil le Búulkabaloʼ.+
21 Le baʼax úuchoʼ ku keʼetel yéetel le okjaʼoʼ, yéetel bejlaʼeʼ táan u salvarkeʼex úuchik u kaʼa kuxkíintaʼal Jesucristooʼ. (Le okjaʼoʼ maʼ utiaʼal u luʼsik le baʼax éekʼkuntik a wíinklileʼexoʼ, baʼaxeʼ utiaʼal a kʼáatkeʼex tiʼ Dios ka yanakteʼex junpʼéel maʼalob conciencia).+
22 Letiʼeʼ tiʼ yaan tu x-noʼoj kʼab Dioseʼ+ tumen bin teʼ kaʼanoʼ. Tsʼoʼoleʼ yáanal u kʼabeʼ tsʼaʼab ángeloʼob, autoridadoʼob bey xan páajtaliloʼob.+
Notas
^ Wa «a kajtaleʼex yéetel a wataneʼex yéetel kʼaj óolalil».
^ Wa «nojoch respeto».
^ Wa «tu yaʼalaj tiʼ le ángeloʼob baʼax juicioil kun taal tu yóokʼoloʼoboʼ».
