1 Crónicas 10:1-14
-
Ku kíimil Saúl bey xan u hijoʼob (1-14)
10 Juntéenjeakeʼ le filisteoʼoboʼ táan kaʼach u baʼateloʼob tu contra Israel. U soldadoiloʼob Israeleʼ púutsʼoʼob tu táan le filisteoʼoboʼ, yaʼab tiʼ letiʼobeʼ kíimsaʼaboʼob teʼ Montaña Guilboaoʼ.+
2 Le filisteoʼoboʼ joʼopʼ u chʼaʼpachtikoʼob Saúl yéetel u hijoʼob, ka túun tu kíimsoʼob Jonatán, Abinadab yéetel Malki-suwa,+ u hijoʼob Saúl.
3 Saúl túuneʼ joʼopʼ u maas atacartaʼal, le ka ilaʼab tumen le arqueroʼoboʼ chʼiʼin yéetel flechaʼobeʼ ka loobiltaʼabi.+
4 Saúl túuneʼ tu yaʼalaj tiʼ le máax kuchik u armaʼoboʼ: «Jóoʼs a espadaeʼ ka a táatsʼlomten, utiaʼal beyoʼ maʼ in maltratartaʼal+ tumen le máakoʼob maʼatech u meyajtikoʼob Diosaʼ».* Chéen baʼaleʼ le máax kuchik u armaʼoboʼ maʼ tu yóotaj u beetiʼ tumen jach sajak. Le oʼolaleʼ Saúleʼ tu chʼaʼaj u espadaeʼ ka lúub tu yóokʼol.+
5 Le máax kuchik u armaʼoboʼ le ka tu yilaj tsʼoʼok u kíimil Saúleʼ tu chʼaʼaj xan u espadaeʼ ka lúub tu yóokʼol, ka kíimi.
6 Teʼ kʼiin túun jeʼeloʼ, kíim Saúl, tu yóoxtúulil u hijoʼob bey xan tuláakal le máaxoʼob yanoʼob tu yéeteloʼ.+
7 Le ka tu yilaj le israelitaʼob yanoʼob teʼ táax luʼum de ke tsʼoʼok u púutsʼul u soldadoiloʼob Israel yéetel tsʼoʼok u kíimil Saúl bey xan u hijoʼobeʼ joʼopʼ u jóokʼloʼob tiʼ u kaajaloʼob utiaʼal u púutsʼloʼob. Le filisteoʼob túunoʼ taaloʼobeʼ ka pʼáatoʼob kajtaliʼ.
8 Le ka sáaschaj tuláakʼ kʼiineʼ, le ka taal le filisteoʼob u chʼaʼob le baʼaloʼob yaan tiʼ le máakoʼob tu kíimsoʼoboʼ, tu yiloʼobeʼ Saúl yéetel u hijoʼobeʼ tiʼ jáayunjáayoʼob teʼ Montaña Guilboaoʼ.+
9 Letiʼobeʼ tu chʼaʼajoʼob le baʼaxoʼob yaantiʼoʼ, tu kúulxotʼtoʼob u pool yéetel tu luʼsoʼob u armaduraeʼ ka tu túuxtoʼob aʼalbil tiʼ tuláakal le luʼum tuʼux kajaʼan le filisteoʼob le baʼax úuchoʼ, utiaʼal ka ojéeltaʼak tu templo u imagenoʼob+ bey xan ichil le kaajoʼ.
10 Le ka tsʼoʼokeʼ tu tsʼáajoʼob u armadura Saúl tu templo u diosoʼob, yéetel u pooleʼ tu chʼuykíintoʼob tu templo Dagón.+
11 Tuláakal u kajnáaliloʼob Jabés,+ le kaaj yaan tu luʼumil Galaadoʼ, tu yuʼuboʼob le baʼax beetaʼab tiʼ Saúl tumen le filisteoʼoboʼ.+
12 Tuláakal túun u soldadoʼobeʼ líikʼoʼobeʼ ka bin u chʼaʼob u kimen wíinklil Saúl yéetel u kimen wíinklil u hijoʼob. Suunajoʼob tu kaajil Jabéseʼ ka tu mukoʼob u baakeloʼob yáanal junkúul nuxiʼ cheʼ yaan teʼ Jabésoʼ,+ ka ayunarnajoʼob* durante siete días.
13 Bey úuchik u kíimil Saúloʼ, kíim tumen tu traicionartaj Jéeoba, tumen maʼ tu yóotaj u beet le baʼax tu yaʼalaj Jéeobaoʼ,+ bey xan tumen tu kʼáataj u yáantaj juntúul koʼolel ku tʼaan yéetel le kimenoʼoboʼ+
14 tu lugar u kʼáatik u yáantaj Jéeoba. Tu yoʼolal le jeʼeloʼ Dioseʼ tu xuʼulsaj tiʼ Saúl ka tu tsʼáaj le reino tiʼ David u hijo Jeséoʼ.+
