Le huracánoʼob, le tifónoʼob, le ciclónoʼob yéetel le tornadoʼoboʼ yaʼab nukuch loob ku beetkoʼob. Yaʼab tuʼux ku bulik, tsʼoʼoleʼ como jach kʼaʼam le iikʼoʼ u olasil le kʼáaʼnáaboʼ jach ku kaʼantaloʼob. Le kʼaʼamkach cháakoʼoboʼ ku beetik u yantal deslaves yéetel le u jaatsʼ le cháakoʼ ku beetik u yelel le kʼáaxoʼoboʼ. Tsʼoʼoleʼ yaʼab nukuch loobiloʼob ku yantal tu yoʼolal le sequíaoʼ, le sen ooxoloʼ yéetel le u sen kʼáaxal le nieveoʼ. U millonesil máakoʼob tsʼoʼok u afectartaʼaloʼob tumen le nukuch loobiloʼobaʼ. Kux túun tech, ¿tsʼoʼok wa u afectarkech?

 Tumen tsʼoʼok u jach peortal le climaoʼ yaʼab nukuch loobiloʼob ku yantal tiʼ tuláakal yóokʼol kaab. Tiʼ junpʼéel informe beetaʼabeʼ aʼalaʼab lelaʼ: «Cada kʼiin ku máaneʼ yaʼab tuʼux ku sen kʼáaxal cháak, ku búulul yéetel yoʼolal le sequíaoʼ yaʼab máaxoʼob ku pʼáatal minaʼan baʼal u jaantoʼob, minaʼan u yotochoʼob yéetel ku kʼaʼabéettal u binoʼob kajtal yaanal tuʼux» (Federación Internacional de Sociedades de la Cruz Roja y de la Media Luna Roja).

 Le máaxoʼob kajaʼanoʼob teʼ tuʼux ku yúuchul le nukuch loobiloʼoboʼ jach yaʼab u sufriroʼob. Yaʼabeʼ ku kʼastal u yotoch yéetel yaan horaeʼ hasta ku kíimil juntúul máax u yaabiltmoʼob.

 ¿Tsʼoʼok wa u yúuchul junpʼéel nojoch loobil tuʼux kajaʼanech? Wa beyoʼ míin jach tu beetaj a sufrir. Le Bibliaoʼ jach jeʼel u líiʼsik a wóoleʼ tumen ku tsʼáaik esperanza yéetel consejoʼob jach jeʼel u yáantkecheʼ. U jaajileʼ le Bibliaoʼ tsʼoʼok u yáantik u millonesil máakoʼob (Romanos 15:4). Tsʼoʼoleʼ ku núukik le preguntaʼobaʼ: ¿Baʼaxten ku chaʼik Dios u sufrir máak? ¿Táan wa u castigartik máak?

 Maʼ Dios beetik u sufrir máakiʼ tumen le Bibliaoʼ ku yaʼalik: «Dioseʼ maʼ tu páajtal u probartaʼal yéetel baʼaloʼob kʼaastak, mix letiʼ ku probartik máak» (Santiago1:13). Jeʼex túun k-ilkoʼ le Bibliaoʼ ku yaʼalikeʼ maʼ Dios beetik u peortal le climaoʼ.

 Le Bibliaoʼ ku yaʼalikeʼ úuchjeakileʼ tiʼ Dioseʼ meyajnaj le kʼaʼamkach cháak utiaʼal u castigartik le kʼasaʼan máakoʼoboʼ. ¿Dios wa túun beetik u yantal le nukuch loobiloʼob teʼ kʼiinoʼobaʼ? Maʼatech, tumen le nukuch loobiloʼob yaan bejlaʼoʼ u súutuk ku jáan antaloʼob. Tsʼoʼoleʼ ku beetik u sufrir utsul máakoʼob bey xan kʼasaʼan máakoʼob. Tsʼoʼoleʼ le nukuch loobiloʼob meyajnaj tiʼ Dios utiaʼal u castigartik le kʼasaʼan máakoʼob úuchjeakiloʼ desde antes ka tu yaʼalaj baʼaxten ken u beete, baʼax kʼiin ken u beete yéetel bix ken u kanáant le utsul máakoʼoboʼ. Por ejemploeʼ le ka taal le Diluvio tu kʼiiniloʼob Noéoʼ, Dioseʼ tu beetaj le óoxpʼéel baʼaloʼobaʼ: desde antes ka tu yaʼalaj baʼax ken u beete, baʼaxten ken u taas le diluviooʼ, tsʼoʼoleʼ tu kanáantaj Noé bey xan u familia (Génesis 6:13; 2 Pedro 2:5).

 Wa a kʼáat a wojéelt u maasileʼ ilawil le xook ich español, «¿Qué dice la Biblia sobre los desastres naturales?».

 Le Bibliaoʼ ku yaʼalikeʼ Dioseʼ a u yaabiltmoʼon yéetel ku yaatal u yóol kéen u yil táan k-sufrir. Bey u yeʼesik le kaʼapʼéel ejemploʼobaʼ.

•   Isaías 63:9: «Tuláakal le kʼiinoʼob táan u muʼyajoʼoboʼ letiʼeʼ yaachaj u yóol ka tu yilaj baʼax ku yúuchultiʼob».

   Baʼax u kʼáat u yaʼale: Jéeobaeʼ ku yaatal u yóol kéen u yil táan k-sufrir.

•   1 Pedro 5:7: «Letiʼeʼ jach taak u yáantkeʼex».

   Baʼax u kʼáat u yaʼale: Jéeobaeʼ u kʼáat ka xiʼiktoʼon maʼalobil.

 Jéeobaeʼ u yaabiltmaj le máakoʼoboʼ le oʼolal u kʼáat u yáantoʼob. ¿Bix túun u yáantik máak? Letiʼeʼ u tsʼaamajtoʼon le Bibliaoʼ, teʼeloʼ jach yaʼab consejoʼob yaniʼ. Tsʼoʼoleʼ le baʼax ku yaʼalikoʼ ku tsʼáaiktoʼon esperanza, ku yaʼalikeʼ ichil junpʼíit kʼiineʼ yaan u pʼáatal minaʼan nukuch loobiloʼob (2 Corintios 1:3, 4).

 Teʼ Bibliaoʼ Jéeobaeʼ ku prometertik toʼon lelaʼ: Yaan in beetik «ka xiʼikteʼex maʼalobil» yéetel «ka béeychajak le baʼax ka páaʼtkeʼexoʼ» (Jeremías 29:11). Dioseʼ maʼ u kʼáat ka muʼyajnakoʼon yoʼolal le climaoʼ, letiʼeʼ u kʼáat ka k-disfrutart le kuxtalaʼ yéetel ka kuxlakoʼon tiʼ junpʼéel paraíso way Luʼumeʼ (Génesis 1:28; 2:15; Isaías 32:18).

 Lelaʼ yaan u béeytal chéen yoʼolal u Reino Dios. ¿Baʼax u Reino Dios? Junpʼéel gobierno yaan teʼ kaʼanoʼ, u Reyileʼ Jesucristo (Mateo 6:10). Jesúseʼ u yojel bix jeʼel u controlartik le climaoʼ, bey tu yeʼesil ka taal way Luʼumeʼ (Marcos 4:37-41). Maʼ kun xáantaleʼ Jesúseʼ yaan u yeʼesik jach yaan u naʼat tumen yaan u kaʼanskoʼon k-kanáant le Luʼumaʼ yéetel tuláakal baʼax yaan ichil (Isaías 11:2). Le kéen káajak u gobernar Jesúseʼ yaan u maʼalobtal le climaoʼ.

 Wa taak a wojéeltik baʼax kʼiin ken úuchuk le baʼaloʼobaʼ ilawil le xook ku kʼaabaʼtik: «¿Baʼax kʼiin kéen gobernarnak u Reino Dios way Luʼumeʼ?».

 Le baʼax ku yaʼalik le Bibliaoʼ jeʼel u yáantkech antes u yantal junpʼéel nojoch loobil, le táan u yúuchloʼ yéetel le kéen tsʼoʼokok u yúuchul.

•   Anteseʼ: Líiʼsaba.

   Le Bibliaoʼ ku yaʼalik: «Le máax yaan u naʼatoʼ ku taʼakikuba kéen u yil junpʼéel peligro, pero le máax maʼ jach yaan u naʼatoʼ ku seguertik u beel, le oʼolal ku yilik u consecuenciail» (Proverbios 22:3).

   Baʼax u kʼáat u yaʼale: Tukult bey baʼax nukuch loobiloʼob jeʼel u yúuchul teʼ tuʼux kajaʼanechoʼ. Beyoʼ yaan u béeytal a jáan jóokʼol wa ku kʼaʼabéetchajal, tsʼoʼoleʼ yaan a kanáantik a familia.

   Junpʼéel baʼax uchaʼan: Tamara, kajaʼan California, Estados Unidoseʼ tu yaʼalaj: «Le máakoʼoboʼ jach sajakchajoʼob yéetel maʼ tu kaxtik baʼax u beetoʼob, u maʼalobileʼ toʼoneʼ listo k-mochila de emergencia, k-chʼaʼamaj xan jujunpʼéel tsʼaakoʼob yéetel nookʼoʼob».

•   Le táanoʼ: Tuukulnen tiʼ baʼax maas importante.

   Le baʼax ku yaʼalik le Bibliaoʼ: «Maʼ tu páajtal u manik u kuxtal máak yéetel le baʼaxoʼob yaantiʼoʼ» (Lucas 12:15).

   Baʼax u kʼáat u yaʼale: Maas jach unaj k-kanáantik k-kuxtal.

   Junpʼéel baʼax uchaʼan: Leslie, kajaʼan Filipinaseʼ tu yaʼalaj: «Ka kʼaskúuntaʼab k-otoch tumen le tifón Lawinoʼ b jach jaʼakʼ in wóol, maʼ tin kaxtik kaʼach baʼax in beete. Pero orarnajen tiʼ Jéeoba ka tin waʼalajtiʼ jach bix in wuʼuyikinba, tin tsʼáaj cuentaeʼ kex kʼaschaj k-otocheʼ láayliʼ kuxaʼanoʼoneʼ».

•   Kéen tsʼoʼokok: Maʼ a sen tuklik baʼax jeʼel u yúuchul sáamaleʼ.

   Le Bibliaoʼ ku yaʼalik: «Junpuliʼ maʼ a sen chiʼichnaktaleʼex yoʼolal u kʼiinil sáamal, tumen sáamaleʼ yaan xan u yantal baʼaloʼob jeʼel u beetik a chiʼichnaktaleʼexeʼ» (Mateo 6:34).

   Baʼax u kʼáat u yaʼale: Maʼ a sen chiʼichnaktal yoʼolal baʼax kun úuchul sáamal.

   Junpʼéel baʼax uchaʼan: Sally kajaʼan Florida, Estados Unidoseʼ tu yaʼalaj: «Ka taal le huracán Irmaoʼ jach tu bulaj in wotoch, leloʼ tu beetaj in sen estresar. Yaʼab baʼaxoʼob kʼaʼabéet in beetik kaʼachi, chéen baʼaleʼ maʼ in wojel tuʼux kin káajliʼ. Tin kʼaʼajseʼ le Bibliaoʼ ku yaʼalikeʼ maʼ unaj k-sen preocupar yoʼolal u kʼiinil sáamaliʼ, tin tsʼáaj cuenta bey tu yáantilen Jéeoba utiaʼal maʼ in sen tuklik le baʼax úuchtenoʼ».

 Wa a kʼáat a wojéelt u maasileʼ ilawil le xook ich español «Cuando golpea un desastre. Que hacer para sobrevivir».