Ebrewita 10:1-39
10 Nyãse kua Deus nyenga kuximawara sangawa kuerate ae kua purangawaa uriwaa kuri, nyãse timaa umukame kua puranga piriwaa, timairame upuderi umukaturu kuaita uxariwaita Deus supe kuaita aintauxariwaita ixupe panye akayu yaweyawe, yawewarawate.
2 Upuderi rame maa umukaturu ainta, ape timaa aintaupitu kuaita aintauxariwaita ixupe aintapekadu resewara, kuaita umanduariwaita ae; umuyasuka rame maa aintasui aintapekadu, timaa aintapekadu uiku aintarese.
3 Nyãse kuaita uxariwaita aintapekadu resewara, aintauxari aintaumanduari aintapuxuwerasawa muiri akayu;
4 Nyãse timaa nimbawa ruwi upuderi umburi yanepekadu.
5 Kristu uri irumu kua mundu kiti unyee: Timaa resikari seirumu haxariwaita prezenti, nimbawa yuiri, maa remunyana ixe arama sepira;
6 Timaa yasapiwaita yaxariwaita yuiri yanepekadu resewara umusuuri inde.
7 Asui hambeu ixupe:
—Xukui ixe, hayuiri hamunya arama kuaye reputariwaa yawe inde Deus, kuaye aintaumpinimawaa yawe serese livru upe.
8 Asui umbeu rire kuaita sakuerawaraita: Timaa reputari seirumu, timaa reputari kuaita haxariwaita prezenti, nimbawa yuiri, yasapiwaita pekadu resewara, nyãse timaa aintaumusuuri inde kuaita aintaumunyawaita Deus nyenga kuximawara rese.
9 Asui umbeu yuiri: Xukui ixe, hayuiri hamunya arama kuaye reputariwaa yawe inde Deus. Asui remburi kua kuximawara remusanta arama kua pisasua.
10 Kuiri yande purangawaita nyãse Deus uputari umunya yawe Jesus Kristu uxari resewara ipirá yepe viaji anyu aramawaa.
11 Nyãse panye kuaita saserdutita aintaupuraki muiri ara, aintauxari yuiri kua aintauxariwaita, kua tiwa upuderi umusasawa aintasui aintapekadu;
12 Maa Kristu uyuxariwaa rireana yepe viajinyu, yepenyute uxariwaa aintapekadu resewara, asui kuiri uwapika Deus katusawa upe;
13 Asui usaru aintauxari ixupe ipi rendawa panye kuaita umuruanyanawaita ae.
14 Nyãse irumu kua yepenyuwaa uxariwaa pekadu resewara umukaturu arama panye kuaita iyaraita.
15 Asui kua Espiritu Santu umbeu yuiri yande arama sesewara, umbeu rireana;
16 Yaneruixawa unyee:
—Aete kua hambeuwaa ainta supe, hamunya kuri ainta supe ae; nyã ara upe kuri haxari kuri ainta supe senyenga aintapia upe, hampinima kuri senyenga aintaumanduarisawa upe.
17 Asui umbeu xinga yuiri:
—Timaa kuri hamanduari yuiri aintapuxuwerasawa, panye aintaumunyawaita puxi.
18 Ape umburi rame yanesui yanepuxuwerasawa, tikuri yaxari mukuĩsawa ixupe yaxariwaita yanepekadu resewara.
Yapuderi yapurandu Deus irumu
19 Ape semuita, yapuderi yawike Deus ruka purangawaa upe, tiwaita usikie yawe, suwi irumu kua Jesus;
20 Yawike arama ipupe kua pee pisasua upakawaa, uyupirariwaa yanerunde veu irumu, yawesawa ipira irumu.
21 Yariku yepe saserduti kirimbawawaa Deus ruka upe.
22 Ape yarikute yamusuaki ae yanepia supiwa irumu, yaruyari resewara puranga, ikiaimawaa yanepia panye puxuwerawa sui, ikiaimawaa yuiri yanepira ii ikiaimawaa irumu.
23 Ape yarikute yaiku santa sese kua yasaruwaa, tiarama mukuĩ yamanduarisawa, nyãse kua umbeuwaa yande arama ae umunya kuaye umbeuwaa yawe.
24 Ape yarikute yuiri yamanduari puranga amuita irumu, yayugustari arama puranga, yamunya arama yuiri puranga.
25 Ape tiyapuderi timaarese yande isui kua yayumuatiriwaa upe kuaye aintayawe kuaita yepeyepe, maa yarikute yambeu ainta supe kirimbawa kuaye kutarawaa yawe usika sangawa kua mundu.
Umpurarakari puxuwerawaita
26 Nyãse yaputari rame yaiku yanepekadu rese yakuawa rireana kua nyenga supiwa, tikuri umburi yanesui yanepekadu;
27 Anyunte usaru yande kua yawaitewaa yapurarawaa kuri, kua ipiaiwasawa turusuwaa uxariwaa kuri aintaukanyemu kuaita umuruanyanawaita ae.
28 Tikuri pirasua aintaumaa umanu kua tiwa uruyari Muize nyenga, aintaumbeu rire sesewara kuaita mukuĩ u musapiri.
29 Muiritaa pemanduari turusu kuri upurara kua apigawa upiruwaa Deus raira rese? Kua apigawa umbeuwaa puxi sese kua Kristu ruwi Deus umbeuwaa uxariwaa yepe ixupe aramawaa ae, kua apigawa umpiaiwawaa kua Espiritu purangawaa.
30 Yakuawate kua umbeusara, umbeuwaa: Ixe kuri hamunya ainta supe kuaye aintaumunyawaa yawe; ixe kuri hapagari ainta sikuyara kua aintaumunyawaa puxi. Asui umbeu yuiri: Aintaruixawa kuri umbeu aintaresewara kuaita imiraita.
31 Puxuwera kuri yasasawa umpurarakari rame yande ipu irumu kua Deus upakawaa.
Tepemburi uruyarisawa
32 Pemanduari maye kuera pepurara, maitaa yuiri aintaumuruanyana penye umuturi rire pepia upe kua nyenga.
33 Amu rame aintaukasuari penye, aintaumpurarakari yuiri penye aintaumaawaa upe panye, asui amu rame pepurara yuiri aintairumu kuaita aintaumpurarakariwaita.
34 Nyãse pirasua pemaa kuaita aintaumprezuwaita, nyãse pexari suuri aintapia aintaumuaiwa rame pemaa, nyãse perikute pemaa puranga piri isui tiwa ukanyemu.
35 Ape tepemburi kua uruyarisawa purangawaa, nyãse ipupe kuri periku turusu purangawaa.
36 Nyãse watari penye arama pasiensia pemunya arama kuaye Deus uputariwaa yawe, periku arama kuri kua umbeuwaa.
37 Nyãse watarire kuairantu senunde sangawa uri arama kutara kua uriwaa kuri;
38 Maa kua ixe aramawaa purangawaa uiku kuri uruyari resewara, maa uyuiri rame sakuera kiti timaa umusuuri sepia.
39 Maa tiaintasuiwara yande kuaita uyuiriwaita aintarakuera kiti aintaukanyemu arama, maa aintasuiwara yande kuaita urikuwaita kua uruyarisawa umukaturuwaa aintapia.
