Báwo Ni Jésù Ṣe Ń Gbani Là?
Ohun Tí Bíbélì Sọ
Jésù gba àwọn tó jẹ́ olóòótọ́ là nígbà tó fi ẹ̀mí ara rẹ̀ lélẹ̀ láti rà wọ́n pa dà. (Mátíù 20:28) Ìdí nìyẹn tí Bíbélì fi pe Jésù ní “Olùgbàlà ayé.” (1 Jòhánù 4:14) Bíbélì tún sọ pé: “Kò sí ìgbàlà kankan nínú ẹnikẹ́ni mìíràn, nítorí kò sí orúkọ mìíràn lábẹ́ ọ̀run tí a ti fi fúnni láàárín àwọn ènìyàn nípasẹ̀ èyí tí a ó fi gbà wá là.”—Ìṣe 4:12.
Jésù “tọ́ ikú wò fún olúkúlùkù ènìyàn” tó gbà á gbọ́. (Hébérù 2:9; Jòhánù 3:16) Lẹ́yìn náà, “Ọlọ́run gbé [Jésù] dìde kúrò nínú òkú,” ó sì pa dà sí ọ̀run gẹ́gẹ́ bí ẹ̀dá ẹ̀mí. (Ìṣe 3:15) Ibẹ̀ sì ni Jésù ti ń ‘gba àwọn tí ń tọ Ọlọ́run wá nípasẹ̀ rẹ̀ là pátápátá, nítorí tí òun wà láàyè nígbà gbogbo láti jírẹ̀ẹ́bẹ̀ fún wọn.’—Hébérù 7:25.
Kí nìdí tá a fi nílò Jésù láti jírẹ̀ẹ́bẹ̀ fún wa?
Ẹlẹ́ṣẹ̀ ni gbogbo wa. (Róòmù 3:23) Ẹ̀ṣẹ̀ ló jẹ́ ká jìnnà sí Ọlọ́run, òun náà ló fàá tá a fi ń kú. (Róòmù 6:23) Àmọ́ Jésù ló ń ran àwọn tó bá ní ìgbàgbọ́ nínú ẹbọ ìràpadà lọ́wọ́. (1 Jòhánù 2:1) Ó ń bá wọn bẹ̀bẹ̀ lọ́dọ̀ Ọlọ́run, pé kí Ọlọ́run wo ọlá ìràpadà, kó dáhùn àdúrà wọn, kó sì dárí ẹ̀ṣẹ̀ wọn jì wọ́n. (Mátíù 1:21; Róòmù 8:34) Ọlọ́run máa ń gbọ́ ẹ̀bẹ̀ Jésù torí pé ohun tó ń béèrè fún bá ìfẹ́ Ọlọ́run mu. Ọlọ́run rán Jésù wá sáyé “kí a lè gba ayé là nípasẹ̀ rẹ̀.”—Jòhánù 3:17.
Ṣé tá a bá ṣáà ti nígbàgbọ́ nínú Jésù, a máa rí ìgbàlà?
Rárá. Lóòótọ́, a gbọ́dọ̀ gba Jésù gbọ́ ká tó lè rí ìgbàlà, àmọ́ ohun púpọ̀ ṣì wà tó yẹ ká ṣe. (Ìṣe 16:30, 31) Bíbélì sọ pé: “Gẹ́gẹ́ bí ara láìsí ẹ̀mí ti jẹ́ òkú, bẹ́ẹ̀ pẹ̀lú ni ìgbàgbọ́ láìsí àwọn iṣẹ́ jẹ́ òkú.” (Jákọ́bù 2:26) Ká a tó lè rí ìgbàlà, a gbọ́dọ̀:
Kẹ́kọ̀ọ́ nípa Jésù àti Jèhófà Baba rẹ̀.—Jòhánù 17:3.
Ní ìgbàgbọ́ nínú wọn.—Jòhánù 12:44; 14:1.
Máa tẹ̀lé àṣẹ wọn torí ìyẹn ló máa fi hàn pé a nígbàgbọ́ nínú wọn. (Lúùkù 6:46; 1 Jòhánù 2:17) Jésù kọ́ wa pé, kì í ṣe gbogbo àwọn tó bá ń pe òun ní “Olúwa” ló máa rí ìgbàlà, ó sọ pé àwọn tó bá ń “ṣe ìfẹ́ Baba [òun] tí ń bẹ ní ọ̀run.”—Mátíù 7:21.
Máa fi hàn pé a ní ìgbàgbọ́, láìka bí nǹkan ṣe le sí. Ohun tí Jésù ní lọ́kàn gan-an nìyẹn nígbà tó sọ pé: “Ẹni tí ó bá fara dà á dé òpin ni ẹni tí a ó gbà là.”—Mátíù 24:13.
O Tún Lè Wo
OHUN TÍ BÍBÉLÌ SỌ
Ṣé Èèyàn Máa Rí Ìgbàlà Tó Bá Ṣáà Ti Gba Jésù Gbọ́?
Bíbélì sọ̀rọ̀ nípa àwọn kan tó gba Jésù gbọ́ àmọ́ tí wọn ò ní rígbàlà. Báwo ló ṣe lè rí bẹ́ẹ̀?
OHUN TÍ BÍBÉLÌ SỌ
Ṣé Bíbélì Kọ́ni Pé ‘Téèyàn Bá Ti Rígbàlà Lẹ́ẹ̀kan, Ó Ti Rígbàlà Títí Ayé Nìyẹn’?
Jésù ṣe àpèjúwe kan tó jẹ́ ká mọ ìdáhùn sí ìbéèrè yẹn.
ÀLÀYÉ ÀWỌN ẸSẸ BÍBÉLÌ
Àlàyé Nípa Jòhánù 3:16—“Torí Ọlọ́run Nífẹ̀ẹ́ Ayé Gan-an”
Báwo ni Jèhófà Ọlọ́run ṣe jẹ́ ká mọ̀ pé òun nífẹ̀ẹ́ wa àti pé òun fẹ́ ká wà láàyè títí láé?
ÀWỌN Ẹ̀KỌ́ PÀTÀKÌ INÚ BÍBÉLÌ
Kí Nìdí Tí Jésù Fi Kú?
Bíbélì jẹ́ ká mọ̀ pé ikú Jésù ṣe pàtàkì gan-an. Ṣé àǹfààní kankan wà nínú ikú Jésù?
ILÉ ÌṢỌ́
Bó O Ṣe Lè Gbé Ìgbé Ayé Tó Dára Jù Lọ
“Ọ̀nà” kan wà tó o lè gbà tó o bá fẹ́ gbádùn irú ìgbé ayé tí Ọlọ́run ń ṣètò fún àwọn tó nífẹ̀ẹ́ rẹ̀.
