Bíbélì jẹ́ ká mọ ọ̀nà tó dáa jù lọ tí a lè gbà ṣe ìpinnu. Ó lè jẹ́ ká “ní ọgbọ́n [àti] òye.” (Òwe 4:5) Láwọn ìgbà míì, ó máa ń sọ ìpinnu tó dáa jù lọ tá a lè ṣe fún wa. Nígbà míì sì rèé, ìmọ̀ràn tó máa jẹ́ ká lè ṣe ìpinnu tó mọ́gbọ́n dání ló máa fún wa.

Nínú àpilẹ̀kọ yìí

•  Àwọn ohun tó máa jẹ́ kó o lè ṣe ìpinnu tó mọ́gbọ́n dání

•  Ṣé kí n yí ìpinnu tí mo ti ṣe pa dà?

•  Tí mo bá ti ṣe ìpinnu kan tí kò dáa, tí mi ò sì lè yí i pa dà ńkọ́?

•   Má kánjú ṣèpinnu. Bíbélì sọ pé: “Aláròjinlẹ̀ máa ń ronú lórí ìgbésẹ̀ kọ̀ọ̀kan.” (Òwe 14:15) Tó o bá kánjú ṣèpinnu, o lè má fọkàn sáwọn ohun tó ṣe pàtàkì. Torí náà, ronú dáadáa nípa àwọn ohun tó o fẹ́ ṣe kó o tó ṣèpinnu.​—1 Tẹsalóníkà 5:21.

•   Má fi bí nǹkan ṣe rí lára ẹ ṣèpinnu. Bíbélì kìlọ̀ fún wa pé ọkàn wa ò ṣeé fìgbà gbogbo gbẹ́kẹ̀ lé. (Òwe 28:26; Jeremáyà 17:9) Bí àpẹẹrẹ, tá a bá ń bínú, tá a rẹ̀wẹ̀sì, tí nǹkan tojú sú wa, tára wa ò balẹ̀ tàbí tó rẹ̀ wá tẹnutẹnu a lè má ṣèpinnu tó dáa nírú àwọn àkókò yìí.​—Òwe 24:10; 29:22.

•   Máa gbàdúrà fún ọgbọ́n. (Jémíìsì 1:5) Irú àdúrà tí Ọlọ́run máa ń fẹ́ dáhùn nìyẹn. Bàbá onífẹ̀ẹ́ ni, kò sì fẹ́ káwọn ọmọ ẹ̀ kó sínú ìṣòro bó bá ti lè ṣeé ṣe tó. “Jèhófà fúnra rẹ̀ ló ń fúnni ní ọgbọ́n; ẹnu rẹ̀ ni ìmọ̀ àti ìfòyemọ̀ ti ń wá.” a (Òwe 2:6) Inú Bíbélì tó jẹ́ ọ̀rọ̀ rẹ̀, ló ti ń fún wa ní ọgbọ́n yìí.​—2 Tímótì 3:16, 17.

•   Ṣe ìwádìí. Kó o tó lè ṣèpinnu tó mọ́gbọ́n dání, ó yẹ kó o mọ àwọn ohun tó ṣe pàtàkì. Bíbélì sọ pé, “ọlọ́gbọ́n máa ń fetí sílẹ̀, á sì kọ́ ẹ̀kọ́ sí i.” (Òwe 1:5) Ibo lo ti lè rí àlàyé tó máa ràn ẹ́ lọ́wọ́ tó sì ṣeé gbára lé?

   Kọ́kọ́ wo ohun tí Bíbélì sọ nípa ohun tí o fẹ́ ṣe. Ẹlẹ́dàá wa mọ ohun tó dáa jù lọ fún wa, inú Ọ̀rọ̀ rẹ̀ la sì ti lè rí ìmọ̀ràn tó ṣeé gbára lé jù lọ. (Sáàmù 25:12) Tá a bá fẹ́ ṣe àwọn ìpinnu kan, Bíbélì sọ òfin tàbí àṣẹ tá a máa tẹ̀ lé, ìyẹn sì lè jẹ́ ká mọ ohun tó yẹ ká ṣe ní tààràtà. (Àìsáyà 48:17, 18) Bẹ́ẹ̀ sì rèé, lọ́pọ̀ ìgbà, Bíbélì lè má sọ ohun tó yẹ ká ṣe ní tààràtà. Kàkà bẹ́ẹ̀, ó lè fi àwọn ìlànà kan tọ́ wa sọ́nà. Èyí máa jẹ́ ká lè ṣèpinnu tó tọ́, bó tiẹ̀ jẹ́ pé ohun tá a yàn lè yàtọ̀ sí ti ẹlòmíì. Tó o bá fẹ́ rí ìmọ̀ràn tó wúlò nínú Bíbélì, ṣèwádìí nínú àwọn àpilẹ̀kọ tàbí ìtẹ̀jáde tó dá lórí Bíbélì, irú àwọn tó wà lórí ìkànnì yìí. b

   Kó o tó ṣe àwọn ìpinnu kan, ó lè gba pé kó o wo ohun táwọn míì sọ àmọ́, rí i dájú pé ọ̀rọ̀ wọn ṣeé gbára lé. Bí àpẹẹrẹ, kó o tó kówó lé ọjà kan pàápàá tó bá jẹ́ olówó ńlá, ó máa dáa kó o kọ́kọ́ ṣèwádìí nípa ẹ̀ àtàwọn tó ṣe é, títí kan àdéhùn tó wà lórí ẹ̀ bóyá wọ́n máa gbà á pa dà tí ò bá dáa àti iye ọdún tó máa lò kó tó nílò àtúnṣe. Bákan náà, ó yẹ kó dá ẹ lójú bóyá ohun tó o fẹ́ rà náà máa lè ṣe ohun tó o fẹ́.

   Bíbélì sọ pé: “Láìsí ìfinúkonú, èrò á dasán.” (Òwe 15:22) Torí náà, kó o tó ṣèpinnu, fọ̀rọ̀ lọ àwọn tó ṣeé gbẹ́kẹ̀ lé. Bí àpẹẹrẹ, ó máa bọ́gbọ́n mu kó o fọ̀rọ̀ lọ dókítà tó o bá fẹ́ yan irú ìtọ́jú tó yẹ kó o gbà. (Mátíù 9:12) Nígbà míì, ó lè gba pé kó o fọ̀rọ̀ lọ àwọn tó ti ṣe irú nǹkan tíwọ náà fẹ́ ṣe rí. Àmọ́ fi sọ́kàn pé, ìwọ ló máa pinnu ohun tó o máa ṣe, ìwọ náà lo sì máa kórè àbájáde ẹ̀, kì í ṣe àwọn tó o fọ̀rọ̀ lọ̀.​—Gálátíà 6:4, 5.

•   Gbé gbogbo ohun tó jẹ mọ́ ọ̀rọ̀ náà yẹ̀ wò dáadáa. Látinú ìwádìí tó o bá ṣe, o lè kọ àwọn ohun tó o lè ṣe sílẹ̀, kó o sì tún kọ àǹfààní àtàwọn ìṣòro tó máa yọjú lórí ọ̀kọ̀ọ̀kan wọn. Tún ronú nípa àwọn ohun tó ṣeé ṣe kí ìpinnu tó o ṣe yọrí sí. (Diutarónómì 32:29) Bí àpẹẹrẹ, ipa wo ni ohun tó o fẹ́ yìí máa ní lórí ẹ, ìdílé ẹ, àtàwọn míì? (Òwe 22:3; Róòmù 14:19) Tó o bá fi ohun tí Bíbélì sọ ṣàyẹ̀wò ìdáhùn rẹ sáwọn ìbéèrè yìí, ó máa jẹ́ kó o lè ṣèpinnu tó mọ́gbọ́n dání tó sì máa fi hàn pé o nífẹ̀ẹ́ àwọn míì.

•   Pinnu ohun tó o máa ṣe. Nígbà míì, a lè má fẹ́ ṣèpinnu torí pé ohun tá a fẹ́ ṣe ò dá wa lójú. Àmọ́ tá ò bá ṣèpinnu, àǹfààní tá a ní lè bọ́ mọ́ wa lọ́wọ́, kí ohun tí a ò fẹ́ sì ṣẹlẹ̀ sí wa. Torí náà, a lè sọ pé, bí ìpinnu tí kò dáa ò ṣe bọ́gbọ́n mu náà ni àìṣe ìpinnu kankan ò ṣe bọ́gbọ́n mu. Bíbélì fi ẹni tó fẹ́ ṣiṣẹ́ ọ̀gbìn ṣàpèjúwe ọ̀rọ̀ yìí pé: “Ẹni tí ń wo ojú afẹ́fẹ́ kò ní fún irúgbìn kankan, ẹni tí ó bá sì ń wo ṣúṣú òjò kò ní kórè.”​—Oníwàásù 11:4, Bíbélì Ìròhìn Ayọ̀.

 Máa rántí pé kò sí bí ìpinnu kan ṣe dáa tó, tí ò ní níbi tó kù sí. Tá a bá ti yan ohun kan, ó lè gba pé ká pa ìkejì tì. Ohun tá ò retí sì lè ṣàdédé ṣẹlẹ̀. (Oníwàásù 9:11) Torí náà, fi ohun tó o rí nínú ìwádìí rẹ pinnu èyí tó o rí pé ó máa ṣàṣeyọrí.

 Kì í ṣe gbogbo ìpinnu ni kò ṣeé yí pa dà. Nǹkan lè yí pa dà, tàbí kó jẹ́ pé ibi tó o fojú sí, ọ̀nà ò gbabẹ̀. Torí náà, ó lè gba pé kó o tún ọ̀rọ̀ náà gbé yẹ̀ wò, kó o sì yan ohun míì tó máa jẹ́ kọ́wọ́ ẹ lè tẹ ohun tó o fẹ́.

 Àmọ́, àwọn ìpinnu kan wà tí kò yẹ kó o yí pa dà. (Sáàmù 15:4) Bí àpẹẹrẹ, Ọlọ́run retí pé káwọn tọkọtaya má yẹ àdéhùn tí wọ́n ṣe nínú ẹ̀jẹ́ ìgbéyàwó wọn. c (Málákì 2:16; Mátíù 19:6) Tíṣòro bá dé nínú ìdílé, ńṣe ló yẹ kí àwọn méjèèjì sa gbogbo ipá wọn láti yanjú ẹ̀ dípò kí wọ́n tú ìgbéyàwó wọn ká.

 Lẹ́ẹ̀kọ̀ọ̀kan, gbogbo wa la máa ń ṣe ìpinnu tí kò dáa tàbí tí kò bọ́gbọ́n mu. (Jémíìsì 3:2, àlàyé ìsàlẹ̀ ìwé) Èyí sì lè jẹ́ ká kábàámọ̀ tàbí ká máa dá ara wa lẹ́bi, kò burú tó bá ń ṣe wá bẹ́ẹ̀. (Sáàmù 69:5) Kódà, tí ọkàn wa bá ń dá wa lẹ́bi lẹ́ẹ̀kọ̀ọ̀kan, ó lè má jẹ́ ká ṣàṣìṣe kan náà nígbà míì! (Òwe 14:9) Àmọ́, Bíbélì gbà wá níyànjú pé ká má máa dá ara wa lẹ́bi kọjá bó ṣe yẹ lọ, torí ó lè mú kí nǹkan tojú sú wa tàbí ká má lè ronú bó ṣe tọ́. (2 Kọ́ríńtì 2:7) d Bíbélì sọ pé: “Aláàánú ni Jèhófà, ó sì ń gba tẹni rò.” (Sáàmù 103:8-13) Nítorí náà, kẹ́kọ̀ọ́ látinú ìpinnu tí kò dáa tí kò sì ṣeé yí pa dà tó o ṣe, kó o sì sapá láti ṣe ohun tágbára ẹ gbé kó o lè máa ṣe nǹkan lọ́nà tó dáa sí i.