Àṣẹ Ọlọ́run tó sọ pé ‘bọlá fún baba àti ìyá rẹ’ fara hàn ní ọ̀pọ̀ ìgbà nínú Bíbélì. (Ẹ́kísódù 20:12; Diutarónómì 5:16; Mátíù 15:4; Éfésù 6:2, 3) Àṣẹ yẹn gba pé kéèyàn ṣe nǹkan mẹ́rin kan.

1.   Mọyì wọn. Wàá fi hàn pé ò ń bọlá fún bàbá àti ìyá rẹ tó o bá ń dúpẹ́ gbogbo ohun tí wọ́n ti ṣe fún ẹ. O lè fi hàn pó o mọyì wọn tó o bá ń tẹ̀lé ìmọ̀ràn tí wọ́n fún ẹ. (Òwe 7:1, 2; 23:26) Bíbélì sọ pé kó o máa rí àwọn òbí rẹ bí “ẹwà” rẹ, ìyẹn ni pé kó o máa rí wọn dunnú.—Òwe 17:6.

2.   Gbọ́ràn sí wọn lẹ́nu. Ọlọ́run ló fún àwọn òbí ẹ ní ọlá àṣẹ lórí ẹ, torí náà ó yẹ kó o bọlá fún bàbá àti ìyá rẹ, pàápàá nígbà tó o ṣì kéré yìí. Kólósè 3:20 sọ fún àwọn ọmọ pé: “Ẹ jẹ́ onígbọràn sí àwọn òbí yín nínú ohun gbogbo, nítorí èyí dára gidigidi nínú Olúwa.” Kódà, Jésù náà gbọ́ràn sáwọn òbí ẹ̀ lẹ́nu nígbà tó wà lọ́mọdé.—Lúùkù 2:51.

3.   Bọ̀wọ̀ fún wọn. (Léfítíkù 19:3; Hébérù 12:9) Èyí kan irú ọ̀rọ̀ tó o máa ń sọ sí wọn àti bó o ṣe máa ń sọ ọ́. Lóòótọ́, nígbà míì àwọn òbí kan máa ń ṣe ohun tó lè mú kó ṣòro láti bọ̀wọ̀ fún wọn. Láìka ìyẹn sí, àwọn ọmọ ṣì lè rí i pé àwọn ò sọ̀rọ̀ àrínfín tàbí hùwà àìlọ́wọ̀ sí wọn, ìyẹn máa fi hàn pé wọ́n ń bọlá fún àwọn òbí wọn. (Òwe 30:17) Bíbélì jẹ́ ká mọ̀ pé ẹ̀ṣẹ̀ ńlá ni téèyàn bá ń sọ̀rọ̀ àwọn òbí ẹ̀ láìda.—Mátíù 15:4.

4.   Pèsè ohun tí wọ́n nílò. Táwọn òbí ẹ bá darúgbó, wọ́n máa nílò kó o ṣe àwọn nǹkan kan fún wọn. Wàá fi hàn pó o bọlá fún wọn tó o bá ṣe gbogbo ohun tó o lè ṣe láti pèsè ohun tí wọ́n bá nílò. (1 Tímótì 5:4, 8) Bí àpẹẹrẹ, nígbà tó ku díẹ̀ kí Jésù kú, ó ṣètò ẹni táá máa tọ́jú ìyá rẹ̀.—Jòhánù 19:25-27.

 Àṣìlóye: Kó o lè bọlá fún bàbá àti ìyá rẹ, o gbọ́dọ̀ lọ́wọ́ sí àṣà ìṣẹ̀dálẹ̀ wọn.

 Òótọ́: Bíbélì sọ pé: “Jèhófà Ọlọ́run rẹ ni ìwọ gbọ́dọ̀ jọ́sìn, òun nìkan ṣoṣo sì ni ìwọ gbọ́dọ̀ ṣe iṣẹ́ ìsìn ọlọ́wọ̀ fún.” (Lúùkù 4:8) Ẹni tó bá ń jọ́sìn àwọn baba ńlá ń ṣe ohun tí Ọlọ́run kò fẹ́. Àti pé, Bíbélì sọ pé ‘àwọn òkú kò mọ nǹkan kan rárá.’ Wọn ò mọ̀ bóyá ẹnì kan ń jọ́sin àwọn, bẹ́ẹ̀ ni wọn ò lè ràn wá lọ́wọ́ tàbí kí wọ́n ṣe ìpalára fún ẹnikẹ́ni.​—Oníwàásù 9:5, 10; Aísáyà 8:19.