Oníwàásù 1:1-18
1 Àwọn ọ̀rọ̀ akónijọ,*+ ọmọ Dáfídì, ọba ní Jerúsálẹ́mù.+
2 Akónijọ sọ pé, “Asán* pátápátá gbáà!”
“Asán pátápátá gbáà! Asán ni gbogbo rẹ̀!”+
3 Èrè wo ni èèyàn rí jẹ nínú gbogbo iṣẹ́ àṣekára rẹ̀
Èyí tó ń fi gbogbo agbára rẹ̀ ṣe lábẹ́ ọ̀run?*+
4 Ìran kan ń lọ, ìran kan sì ń bọ̀,Àmọ́ ayé wà* títí láé.+
5 Oòrùn ń yọ,* oòrùn sì ń wọ̀;Lẹ́yìn náà, ó ń yára* pa dà sí ibi tí á tún ti yọ.+
6 Ẹ̀fúùfù ń lọ sí gúúsù, ó sì ń yí lọ sí àríwá;Yíyí ló ń yí po nígbà gbogbo; ẹ̀fúùfù ń yí po ṣáá.
7 Gbogbo odò* ló ń ṣàn lọ sínú òkun, síbẹ̀ òkun kò kún.+
Ibi tí àwọn odò ti ṣàn wá, ibẹ̀ ni wọ́n ń pa dà sí, kí wọ́n tún lè ṣàn jáde.+
8 Ohun gbogbo ló ń kó àárẹ̀ báni;Kódà, ó kọjá ohun téèyàn lè sọ.
Ìran kì í sú ojú;Bẹ́ẹ̀ ni etí kì í kọ gbígbọ́.
9 Ohun tó ti wà ni yóò máa wà,Ohun tí a sì ti ṣe la ó tún pa dà ṣe;Kò sí ohun tuntun lábẹ́ ọ̀run.*+
10 Ṣé ohun kan wà tí a lè sọ pé: “Wò ó, tuntun ni”?
Ó ti wà tipẹ́tipẹ́;Ó ti wà ṣáájú àkókò wa.
11 Kò sí ẹni tó ń rántí àwọn èèyàn ayé àtijọ́;Kò sì sí ẹni tó máa rántí àwọn tó ń bọ̀;Bẹ́ẹ̀ ni àwọn tó máa wá nígbà tó bá yá kò ní rántí àwọn náà.+
12 Èmi, akónijọ, ló ti ń jọba lórí Ísírẹ́lì ní Jerúsálẹ́mù.+
13 Mo fi ọgbọ́n+ ṣe ìwádìí àti àyẹ̀wò ohun gbogbo tí a ti ṣe lábẹ́ ọ̀run,+ ìyẹn iṣẹ́ tó ń tánni lókun tí Ọlọ́run fún ọmọ aráyé tó ń mú kí ọwọ́ wọn dí.
14 Mo rí gbogbo iṣẹ́ tí a ṣe lábẹ́ ọ̀run,*
Sì wò ó! asán ni gbogbo rẹ̀, ìmúlẹ̀mófo.*+
15 Ohun tó ti wọ́, a kò lè mú un tọ́,Ohun tí kò sì sí, a kò lè kà á.
16 Nígbà náà, mo sọ lọ́kàn mi pé: “Wò ó! Mo ti ní ọgbọ́n tó pọ̀ gan-an ju ẹnikẹ́ni tó wà ṣáájú mi ní Jerúsálẹ́mù,+ ọkàn mi sì ti kó ọgbọ́n àti ìmọ̀+ tó pọ̀ gan-an jọ.”
17 Mo fi ọkàn mi sí mímọ ọgbọ́n àti mímọ ìwà wèrè* àti mímọ ìwà ẹ̀gọ̀,+ èyí pẹ̀lú jẹ́ ìmúlẹ̀mófo.
18 Nítorí ọ̀pọ̀ ọgbọ́n máa ń mú ọ̀pọ̀ ìbànújẹ́ wá,Tó fi jẹ́ pé ẹni tó ń fi ìmọ̀ kún ìmọ̀ ń fi ìrora kún ìrora.+
Àlàyé Ìsàlẹ̀ Ìwé
^ Tàbí “apenijọ.”
^ Tàbí “Òtúbáńtẹ́.”
^ Ní Héb., “lábẹ́ oòrùn?”
^ Ní Héb.,“dúró.”
^ Tàbí “tan ìmọ́lẹ̀.”
^ Tàbí “sáré tete.”
^ Tàbí “odò ìgbà òtútù; odò abágbàrìn.”
^ Ní Héb., “lábẹ́ oòrùn.”
^ Ní Héb., “lábẹ́ oòrùn.”
^ Tàbí “lílépa ẹ̀fúùfù.”
^ Tàbí “ìwà òmùgọ̀ tó burú jáì.”
