AZI’NÉ 01
O ghô jheuè aziè apè anè Biible?
Mpè métseum pou ngwè ménzèté anè lénang, anè ngueô’, anè legwheu, mbô anè pa’ ézôô é shi’ ghô poup. Mpè zeung ngô élé’é tseum, éfhœuté anè pa’ mpè ghô gheu poup té ngwè nkap, mbô anè ajoumi mpè ghô gheu té ndôk nang-a mbông-ô a nteu atseung-è nguia. Épouô té nzaané é jiô léghè Biible a té lèè ntsô’ô mémia ménzèté môp nda’a, a zeung nguiè wôp ménteukné mi é ghô kuitè wôp élé’é tseum anè lénang tsôp. Tè o si nzhè mmô’ gning yi Biible a ghô kuitè yi zii?
1. Émô’ ménzèté émi Biible a wè méntsô’ô éwou, é si ngô émiè?
Biible a tsô’ mémia ménzèté mouô mi é tseukné: Lénang é lé zii lèkô? Mpè ngông mela’akô? Mela’akô émô’ épouô é jiô ngueô’ ndem-ndem? Gning a kwheu pa’a, ntchi’è akô? Awuè-wuè a si mbou ntsaa yi a lénang mé mbouèné, méntchou é ping mbou ngô éji’ tseum mela’akô? Ndoo éssi atsetsa’ é shi’ tchi’ lèkô anè mélé’é mi é si shi’è? Biible a seumtè yimpè a léfa’ méntsô’ô anè ménzèté pa’ mouô mèt la. Épouô té ngô mémillion é lé ping njou’ô léghè, méntsô’ô mi Biible a yè anè ménzèté mèt, é kwa’ ngô anouneu.
2. Biible a ghô kuitè yimpè a léwè lénang mbông, é lèkô?
Biible a yè yimpè ménteukné mbông. Mpè pè éfœu’: A zi’né métseung-è nguia pa’ pô ghô gheu poup té nkwa’ ngô mé lékak, a zeung nguiè yimpè ménteukné mi é ghô kuitè yimpè afœu’ zi mpè si meukè, nzeung nkuitè yimpè a léghô mé lékak afœu’ zi mpè si ngôkô afa’. Mpè nông-ô zi’nè akèté jiô é lôkô gheuô mé mvhô, o jiô ajoumi Biible a zi’né anè métsoo mouô mèt. A ghô mmô’, o la’ ngué zôkô mveung-è léghè, ‘nkwa mékwangté [ajouô tseum zi a nteu Biible,] . . . é ghô kuitè wou jou.’—2 Timothée 3:16.
Akèté jiô a ké té Biible. A si seumtè wou, wou ngnwèt, a lélôk ajou athou ntsa’a Biible, njou’ô ajoumi a si ndeuè. Poup tè, mpeukè si seumtè wou a légheuô a nteu Biible, mbou ntông nkwa méleung mi mè nghiitè nteu akèté jiô, ndôk njiô kèè ajoumi o si nzi’nè a si ngô anouneu lè.
TCHHI-NÈT NTSA’A MBÔNG-Ô
Tra a lézhè pa’ Biible a lé kuité émô’ épouô poup, nzeung ntra a lézhè pa’ o ghô gheu poup té ntông-ô Biible élé’é tseum, mbô pa’ a si nzètè nguè mè kuitè wou poup, tè o lôk njou’.
3. Biible a kou’ a létsang-a yimpè mbông-ô
Biible a pa’ mia mia nka’ yi é pou nkè’è éji’ tè’ la. A kuitè yimpè a lélôk léghi té nkia ajoumi mpè gheu, nzeung nkuitè yimpè a lézhè ajoumi a mvhô nzu’tè yimpè.
Tông-ô Psaume 119:105, mbing ntsô’ ménzèté mouô:
-
Gning yi a lé tii psaume wouô mèt, a lè njiô Biible é lèkô?
-
Wou ngnwèt jou, o ping njiô Biible é lèkô?
4. Biible a kou’ a létsô’ ménzèté mimpè
Mmô’ méngwi a éwou éyi Biible a lé tsô’ ménzèté mi é lé nông ntaka athouô zi, té fhô méngou’. Jiô VIDÉO wouô, mbing ntsô’ ménzèté mi é paaté.
-
O jiô a nteu vidéo nguè, émiè ménzèté é lé nông ntaka athouô méngwi wouô mèt-é?
-
Méngwi mèt a lé zi’nè Biible, a ping nkuitè yi é lèkô?
Biible a seumtè yimpè a lézèté métsoo mi mpè té si nzhè. Tông-ô Matthieu 7:7, mbing ntsô’ nzèté jiô zi é paaté:
-
O wè émiè ménzèté mi o si fa’a wou lézhè kèè Biible a ghô tsô’ lè?
5. O ghô kông-ô wou a létông-ô Biible éfœu’ métseum
Épouô té nzaané, é nkông-ô wôp a létông-ô Biible. Pô ping ndeu nguè pô jheuè apè éwou. Jiô VIDÉO wouô, mbing ntsô’ ménzèté mi é paaté.
-
O jiô nteu vidéo wouô nguè, létông-ô azou a lè mbou émô’ méngwèsso, ngô é lèkô?
-
A zi ngô yi pô té kông-ô létông-ô ajouô, mbô pô ping nkông-ô wôp a létông-ô Biible mela’akô?
Biible a zi’né métsoo mi é ghô seumtè yimpè, mbing nzeung nkuitè yimpè a léghé nang, énông nzu’tè métsoo mbông. Tông-ô Romains 15:4, mbing ntsô’ nzèté jiô:
-
Tè a pông-ô wou a lézhè nguè Biible a ghô seumtè yimpè, mbing nzeung nkuitè yimpè a léghé nang, énông nzu’tè métsoo mbông?
6. Émô’ épouô é ghô kuitè yimpè a léjou’ô Biible mbông-ô
Émô’ épouô é tông-ô Biible, nké mbing njiô léghè mè kuitè wôp a létchhi-nèt njou’, tè pô kwa’ njheuè apè éwou. Tông-ô Actes 8:26-31, mbing ntsô’ nzèté jiô:
-
Mpè ghô gheu é lèkô té njou’ô Biible mbông-ô?—Jiô léleung 30 pô 31.
Gning ala’ Éthiopie a lé veung-è léghè mè kuitè yi a léjou’ô Biible mbông-ô. Épouô té nzaané é anè aya’a, ngô zôp mé lékak éfœu’ zi mè kuitè wôp a léjou’ô Biible
ÉMÔ’ ÉPOUÔ É LEU NGUÈ: “Lézi’nè Biible a ghôô apii njheu.”
-
O ping ndeuè jou nguè akô? O leuè poup mela’akô?
KIMTÉ
Biible a yè ménteukné mi é ghô kuitè yimpè élé’é tseum, ntsô’ mémia ménzèté mi mpè wè, nsuité nteu épouô, mbing nzeung nkuitè wôp a léghé nang, énông nzu’tè nguè ézôô é shi’ pông.
O ghô tsô’ é lèkô?
-
O ghô jiô ménteukné anè akô a nteu Biible?
-
Émô’ ménzèté mi Biible a tsô’é, é si ngô émiè?
-
O si nkông-ô wou léfhô a nteu Biible, nzi’nè akô?
KU’NÈ FA’A LÉZHÈ
Jiô pa’ Biible a ghô kuitè wou anè aya’a poup.
“Mézi’né Biible—Azhènou zi a kuité éfœu’ métseum” (La Tour de Garde n° 1 2018)
Jiô pa’ Biible a lé kuité mmô’ gning mbang-a yi a lè té nông nkông-ô a lénang ngông-ô, té fhou pa’ a lé zèè môô.
Jiô pa’ Biible a ghô kuitè wou a lénang-a mbông-ô a nteu atseung-è nguia poup.
“Métsoo 12 mi é ghô kuité a lénang-a mbông-ô a nteu atseung-è nguia” (Réveillez-vous! n° 2 2018)
Awô mè si nkwa’a sa’a ngông jiô tsetsông-ô? Jiô pa’ Biible a tsô’ nzèté jiô mèt poup.
