Ndem lé tchou’tè atseung-è nguia Abraham tè pô ghô ta’ ala’, mbing nguiè wôp mémbeu mi. A lé ping ntông-ô ala’ mèt é lè ‘Israël’, mbing ngheu tè pô ghô nda’ épouô épi kwa’ nguemtè Yi mbing ngwuè ashoung-nè zi. (Psaume 147:19, 20) Épouô méla’ ntseum shi’ tsia anè ala’ Israël tè pou jheuè apè.​—Tông-ô Genèse 22:18.

Ndem lé kang épouô Israël nguè pô tchi’ ménjheuè-njiô pi. Mézwing mépêté anè pôp tsuitè apè zi épouô ghô jheu afœu’ zi pô zing-è anè mémbeu Ndem. (Deutéronome 4:6) Ndôkô nguè, épouô ala’ ndè’è lé ghô é tsia anè épouô Israël té nzhè kwa’ Ndem.​—Tông-ô Isaïe 43:10, 12.

Méngou’ lé ping ntôk pô pii léssoo tsôp pô Ndem. Joovah lé ping ndôkô atchou’té mékritèn nkoupnè wôp. (Matthieu 21:43; 23:37, 38) A ping ngô anè aya’a, kwa’ mékritèn ghô ménjheuè-njiô Joovah épi gheumtè Yi anè aji’è épouô ala’a Israël.​—Tông-ô Actes 15:14, 17.

Yésso lé pèté mézingto pi nguè pô gheuô mbheu nkeu Lefô Ndem, mbing nkuité épouô méla’ ntseum lé tchi’è zôp mézingto pi. (Matthieu 10:7, 11; 24:14; 28:19, 20) Afa’ jiô mèt si mbou mbootè anè ménzôknzeum lé’é la’ mouô. A si ngô mvhô légheuô a mbou Joovah lé tchou’té épouô mémillion épi fhô méla’ ntseum a nteu tchôssi mbông. (Révélation 7:9, 10) Kwa’ mékritèn pou ntchou’té, nkuité mbing seumté ménèt môp. A nteu ngông ntseum, pô pou ngwuè ta’ atangté anè lé zi’nè Biible afœu’ zi pô tchou’té.​—Tông-ô Hébreux 10:24, 25.

A lè anè ngou’ 1870, mô’ meung-è gha’ nnô épouô pi lé nông nzi’nè Biible é jiô kwa’ anouneu zi mè lé leukné, tè mbô a nang tè’. Pô lé fhou poup nzhè nguè Yésso lé tseukné a mbou mékritèn nguè pô pheu nkeu Lefô Ndem, pô lèè nzii lé pheu nkeu Lefô Ndem a nteu ngông ntseum. A lé ping ngô anè ngou’ 1931, lézeung tsôp tchi’ lè: Ménjheuè-njiô Joovah.​—Tông-ô Actes 1:8; 2:1, 4; 5:42.

A lè mvhô ngou’ nkhœu, Yésso yè éshheu a mbou mô’ nnô mékritèn lé tshiè athouô mvhô, ntsang métchou’té éfœu’ mèt. (Actes 16:4, 5) A zeung ngô anè aya’a, nnô wô tshiè athouô mvhô mè tsang-a atchou’té ngông swhi. Pô si ngô ménfènè té ntseukné épi tsang-a afa’ anè ménguia émi mè sèné mékèté wou, mbing ngapté anè méshoung-né méla’ té tôkô  600. Nnô wouô mèt lôk méshoung-né émi fhô nteu Biible ntsang mbing seumté épouô anè ménguia atchou’té té ntôk 100 000 nteu ngông ntseum. A nteu éziè nguia atchou’té lè, mékritèn épi mbang-a mbing ntseukné anè nkô’ô jwakné mè ghô ménfènè. Pô lôk nkông-né té ntoung-né akèt Ndem.​—Tông-ô 1 Pierre 5:2, 3.

Ménjheuè-njiô Joovah pèté nèt ngueô mbheu nkeu Lefô Ndem, nzeung nkuité émô’ épouô lé tchi’ méghangto Yésso. Mpeuk pheu nkeu Lefô ménguia ménguia, pa’ méghangto la. (Actes 20:20) Mpeuk zi’nè Biible té zèté nkap mbou épouô pi si nkông-ô lé zhè anouneu. Téta’, Ménjheuè-njiô Joovah té lèè ngô atchou’té nda’a. Mpeuk zeung ngô ta’ atseung-è nguia, mbing ngwuè Mô’ô éyi wuè kwa’ nkông-né. Mpeuk si ngô épô mémia épi tsui nkông-né  a tsetsèrè pôp. (2 Thessaloniciens 1:3) Ménjheuè-njiô Joovah  tchou’té ngheu lékông Ndem, nkuité émô’ épouô, mbing ngô nda’ atseung-è nguia zi pou nang mé lékak a ndoo sitsa’.​—Tông-ô Psaume 33:12; Actes 20:35.