GURUY NI 40
Uw Rogon ni Ngad Beechgad u P’eowchen Got?
Mu susunnag reb e matin ni be fal’eg rogon bochi pagel ni fak ni nge yan nga skul. Ke guy rogon ni nge maluk fare tir me chuw ko mad nib beech. Re n’ey e ra ayuweg fare tir ni nge palog ko m’ar, maku ra guy e girdi’ ma yad ra nang ni be tiyan’ e gallabthir rok ngak. Ku arrogon Jehovah ni Chitamangidad ni baadag ni nge beech e dowef, nge lem, nge thin, nge ngongol rodad. Faan gad ra par ni gad bbeech ma ra yib angin ngodad, maku yira pining e sorok riy ngak.
1. Uw rogon ni nge beech e dowef rodad?
Be gaar Jehovah ngodad: “Thingar mpired ni gimed ba thothup.” (1 Peter 1:16) Ra ngad pared ni gad ba thothup mab muun ngay ni nge beech e dowef, nge lem, nge thin, nge ngongol rodad. Rayog ni ngad pared ni gad bbeech ni faanra ud malukgad ni gubin e rran, ma be par e mad, nge naun, nge karrow rodad nib beech. Ku rayog ni ngad pied e ayuw i klinnag Tagil’ e Liyor rodad. Gad ra rin’ e pi n’ey, ma aram e gad be pining e sorok ngak Jehovah.—2 Korinth 6:3, 4.
2. Ra ngad beechgad, ma mang boch e ngongol ni yima mecham ngay nsusun e ngad siyeged?
Be pi’ e Bible e athamgil nga lanin’dad ni ngad “pithiged gadad u urngin ban’en ni ma alitnag e dowef nge lanin’uy.” (2 Korinth 7:1) Re n’ey e be yip’ fan nsusun e ngad siyeged urngin ban’en nra kirebnag e dowef rodad nge lanin’dad. Susun e ngad guyed rogon ni nge m’agan’ Jehovah ko pi n’en gad ma lemnag. Ere gad ma athamgil u rogon nrayog rodad ndab kud lemnaged boch e ngongol nib alit. (Psalm 19:14) Ku gad ma guy rogon ni nge beech e thin rodad.—Mu beeg e Kolose 3:8.
Mang e ku rayog ni nge alitnag e dowef, ara lem, ara thin, ara ngongol rodad? Bay boch ban’en ni yima fanay nrayog ni nge alitnag e dowef rodad. Aram fan ni gad ma siyeg boch ban’en ni bod e tamagow, nge langad, nge boch e falay ni kireb. Gad ra siyeg e pi n’ey, ma aram e rayog ni ngad paloggad u boch e m’ar mu kud daged ni gad be tayfan e yafos ni kan pi’ ngodad nib tow’ath. Ku gad ma guy rogon ni nge par e ngongol rodad nib beech ni aram e gad ma siyeg boch e ngongol nib alit ni bod e masturbation a nge ngaun yaliy yaan e ngongol ni puwlag. (Psalm 119:37; Efesus 5:5) Rayog nib mo’maw’ ni ngad digeyed e pi ngongol ney, machane rayog ni nge ayuwegdad Jehovah.—Mu beeg e Isaiah 41:13.
KUM FIL BOCH BAN’EN U MURUNG’AGEN
Mu fil rogon nrayog ni ngad pininged e sorok ngak Jehovah ni faanra gad bbeech, nge rogon ni ngam digey boch e ngongol nib alit.
3. Ra gad bbeech, ma gad ra pining e sorok ngak Jehovah
Gad ra nang ni baadag Jehovah ni ngan par ni yib beech u daken e pi motochiyel ni pi’ ngak piyu Israel. Mu beegew e Exodus 19:10 nge 30:17-19, mi gimew weliy e fulweg ko gal deer ni baaray:
-
Uw feni ga’ fan u wan’ Jehovah ni ngan par ni yib beech nrogon ni be tamilangnag e pi verse ney?
-
Mang e rayog ni ngam rin’ ni gubin e rran ya nge yag nim par ni gab beech?
Ba t’uf e tayim nge athamgil ya nge yag nda pared ni gad bbeech. Machane yugu demtrug e gin gad ma par riy ara gad ba flaab ara gad ba gafgow, ma rayog ni ngad rin’ed e re n’ey. Mu yaliyew e re VIDEO ney, mi gimew weliy e fulweg ko re deer ni baaray.
-
Mang fan nra tay e piin gad ma machibnag fan Jehovah ni faanra ud ted e chugum rodad nib beech?
4. Mu digey boch e ngongol nib kireb
Rayog ni nge ayuwegdad Jehovah ni ngad taleged ba mit e ngongol nib kireb ni kad mechamgad ngay
Faanra ga ma tamagow ara ga ma fanay boch e falay ni kireb, ma sana ga manang nib mo’maw’ ni ngan digey e pi n’ey. Ere mang e ra ayuwegem? Mu lemnag rogon ni be magawonnagem e re n’ey. Mu beegew e Matthew 22:37-39, mi gimew weliy rogon nrayog ni nge magawonnag e tamagow ara falay ni kireb . . .
-
e tha’ u thilin be’ nge Jehovah.
-
chon e tabinaw rok be’ nge girdi’ u tooben.
Mu nameg ni ngam digey ba mit e ngongol nib kireb ni kam mecham ngay. b Mu yaliyew e re VIDEO ney.
Mu beegew e 2 Korinth 4:7, mi gimew weliy e fulweg ko re deer ni baaray:
-
Uw rogon nrayog ni nge digey be’ ba mit e ngongol nib kireb ni ke mecham ngay ni faanra i meybil, ma be fil e Bible rok, ma be un ko muulung?
5. Dab kum lemnag ma dab kum rin’ boch e ngongol nib alit
Mu beegew e Kolose 3:5, mi gimew weliy e fulweg ko pi deer ni baaray:
-
Uw rogon ni kad nanged nib alit yaan e ngongol ni puwlag, nge sexting, c nge masturbation u wan’ Jehovah?
-
Ga be lemnag nrayog ni nge beech e ngongol rodad ni bod rogon ni baadag Jehovah, fa? Mang fan?
Mu guy rogon nrayog ni ngam tal ndab kum lemnag boch e ngongol nib alit. Mu yaliyew e re VIDEO ney.
I weliy Jesus ba fanathin ni nge dag nthingar da rin’ed e n’en nib t’uf ni ngad rin’ed ya nge yag nda pared nib beech e ngongol rodad. Mu beegew e Matthew 5:29, 30, mi gimew weliy e fulweg ko re deer ni baaray:
-
Yugu aram rogon nder yog Jesus ni ngad rin’ed ban’en ngodad ni ngad gafgowgad riy, machane be yip’ fan ni bay ban’en nib t’uf ni ngad rin’ed. Ere mang e rayog ni nge rin’ be’ ya nge dabki lemnag boch e ngongol nib alit? d
Faanra ga be guy rogon ndab kum lemnag boch e ngongol nib alit, mab ga’ fan u wan’ Jehovah e athamgil ni ga be tay. Mu beegew e Psalm 103:13, 14, mi gimew weliy e fulweg ko re deer ni baaray:
-
Faanra be mo’maw’ ngom ni ngam digey ba mit e ngongol nib alit ni kam mecham ngay, ma uw rogon ni be pi’ e re thin nu Bible ney e athamgil ngom ndabi mulan’um?
Dabi mulan’um!
Sana ba mom ni nge lungum u wan’um, ‘De yag ni nggu talegeg riy, ere kab fel’ ni nggu pageg ngay.’ Machane baaray ban’en ni ngam lemnag: Ra paraw be’ ni be un ko sagreng, ma gathi aram e be yip’ fan ni ke war ko fare sagreng, ara ba t’uf ni nge sul nga tomur ngki tabab bayay. Ere ku arrogon ni faanra kam pagem nga ban’en ni ga be guy rogon ni ngam digey, ma gathi aram e be yip’ fan ndabkiyog ni ngam digey fare n’em fa ke aw nib m’ay fan e athamgil ni ka um tay. Re n’ey e ka ban’en ni ma buch. Ere dabi mulan’um ya ra ayuwegem Jehovah ni ngam digey e re n’em ni kam mecham ngay.
MA GAAR BOCH E GIRDI’: “Dabkiyog ni nggu taleg ya kug mecham ngay.”
-
Mang thin nu Bible e rayog ni ngam fanay ni ngam dag ngak facha’ nrayog ni nge ayuweg Jehovah ni nge taleg e n’en nib kireb ni ke mecham ngay?
N’EN KAN FIL
Ra i par e dowef rodad, nge lanin’dad, nge ngongol rodad nib beech, ma aram e gad be felfelan’nag Jehovah.
Ngan Sul u Daken
-
Mang nrib ga’ fan ni ngaud pared ni gad bbeech?
-
Uw rogon ni nge beech e dowef rom?
-
Uw rogon ni nge par e lem nge ngongol rom nib beech?
MU GAY MURUNG’AGEN
Mang boch ban’en nrayog ni ngam rin’ ya nge par e dowef rom nib beech ni yugu aram rogon nib gafgow e par rom?
Mu beeg murung’agen boch ban’en nrayog ni ngam rin’ ya nge yag nim taleg e tamagow.
Mu beeg murung’agen wenegan nra yib riy ni faanra un yaliy yaan e ngongol ni puwlag.
“Pornography—Harmless or Toxic?” (The Watchtower, August 1, 2013)
Mu beeg rogon ni yag rok be’ nib pumoon ni nge tal i yaliy yaan e ngongol ni puwlag.
“I Failed Many Times Before I Succeeded” (The Watchtower No. 4 2016)
a Masturbation e aram e yibe rin’ boch ban’en ko yungi n’en nib mith u dowey ya nge pug e ar’ar.
b Fare article ni “How to Quit Smoking” ni bay u tan fare thin ni Mu Gay Murung’agen ko re guruy ney e be weliy rogon ni nge digey be’ boch e ngongol ni ke mecham ngay.
c Sexting e be yip’ fan ni ngan yoloy boch e thin ni puwlag, ara ni fek boch e sasing, ara ni ngongliy boch e video ni yaan e puwlag ngan pi’ ngak be’ u cell phone ara tablet.
d Mu guy e guruy ni 25 ni kenggin e “How Can I Conquer the Habit of Masturbation?” ni bay ko fare ke babyor ni Questions Young People Ask—Answers That Work, Volume 1 ni be weliy rogon ni nge digey be’ e masturbation.
