GURUY NI 17

Uw Rarogon Jesus?

PLAY

Uw Rarogon Jesus?

Nap’an ni gad be fil murung’agen e pi n’en ni i yog Jesus nge pi n’en ni i rin’ u nap’an ni immoy u fayleng, ma gad ra pirieg boch i fel’ngin nra chugurnagdad ngak nge Jehovah ni Chitamangin. Mang boch e pi fel’ngin ney ni immoy rok? Ma uw rogon nrayog ni ngad folwokgad rok ko pi n’en gad ma rin’?

1. Uw rogon nib taareb rogon Jesus ngak e Chitamangin?

Nap’an ni immoy Jesus u tharmiy, ma bokum bilyon e duw ni i yaliy e Chitamangin ma be fil boch ban’en rok. Aram fan ni ma lem ma ma ngongol ni bod e Chitamangin. (Mu beeg e John 5:19.) Bin riyul’ riy e, rib fel’ rogon ni i m’ug rarogon e Chitamangin rok. Ere aram fan ni gaar: “Cha’ ni ke guyeg e ke guy e en ni Chitamangiy.” (John 14:9) Ga ra nang rarogon Jesus, ma aram e ga ra nang Jehovah nib fel’ rogon. Bod nrogon ni i runguy Jesus e girdi’ e be dag rogon ni ma lemnagem Jehovah.

2. Uw rogon ni ke dag Jesus nib t’uf Jehovah rok?

I gaar Jesus: “Girdi’ nu fayleng e thingar ra nanged nib t’uf rog e en ni Chitamangiy; aram fan ni kug rin’ urngin ban’en ni bod rogon ni ke yog ngog.” (John 14:31) Nap’an ni immoy Jesus u fayleng, me dag nrib t’uf e Chitamangin rok ni aram e i fol rok ngki mada’ ko ngiyal’ nib mo’maw’ ngak. Ku baadag Jesus ni ma weliy murung’agen e Chitamangin me ayuweg e girdi’ ni ngar manged fager rok Got.—John 14:23.

3. Uw rogon ni ke dag Jesus nib t’uf e girdi’ rok?

Be yog e Bible nrib ‘fel’ e girdi’ u wan’’ Jesus. (Proverbs 8:31) I dag e re t’ufeg ney u rogon ni i pi’ e athamgil nga laniyan’ e girdi’ ma be pag fan ir ni nge ayuwegrad. Pi maang’ang ni i ngongliy e gathi kemus ni be dag nib gel gelngin, ya ku be dag ni ma runguy e girdi’. (Mark 1:40-42) Ba gol ko girdi’ ma de laniyan’. Thin ni i yog e i fal’eg laniyan’ e piin nriyul’ ni yad baadag ni ngar nanged e tin riyul’ ni ur motoyilgad ngak, me pi’ e l’agan’ ngorad. Ba m’agan’ ngay ni nge gafgow me yim’ ni bochan e ba t’uf urngin e girdi’ rok. Machane piin yad ma fol ko pi n’en ni i fil e aram e piin nri yad ba t’uf rok.—Mu beeg e John 15:13, 14.

KUM FIL BOCH BAN’EN U MURUNG’AGEN

Kum fil boch ban’en u rarogon Jesus, nge rogon ni ngam dag e t’ufeg nge gol ni bod ir.

4. Jesus e ba t’uf e Chitamangin rok

N’en ni i rin’ Jesus e be fil ngodad rogon ni ngad daged nib t’uf Got rodad. Mu beegew e Luke 6:12 nge John 15:10; 17:26. Tomuren ni kam beegew reb ko pi thin nu Bible ney, mi gimew weliy e fulweg ko re deer ni baaray:

Uw rogon ni ngad daged nib t’uf Jehovah rodad ni bod Jesus?

Jesus e ba t’uf e Chitamangin rok ni bay u tharmiy, mab ga’ ni ma non ngak u daken e meybil

5. Ma lemnag Jesus e piin nib t’uf e ayuw rorad

Ma m’oneg Jesus e tin nib t’uf rok yugu boch e girdi’ mfini migid. Mus ko ngiyal’ ni ke aw parwon, ma ka ma fanay e tayim rok nge gelngin ni nge ayuweg e girdi’. Mu beegew e Mark 6:30-44, mi gimew weliy e fulweg ko pi deer ni baaray:

Mang boch e kanawo’ ni dag Jesus riy ni be lemnag yugu boch e girdi’ nrogon ni bay ko re thin nu Bible ney?—Mu guy e verse 31, 34, 41, nge 42.
Mang e k’aring Jesus ni nge ayuweg e girdi’?—Mu guy e verse 34.
Bochan ni i m’ug rarogon Jehovah rok Jesus, ma mang e be fil e pi n’ey ngom u murung’agen Jehovah?
Mang boch e kanawo’ nrayog ni ngad folwokgad rok Jesus riy u rogon ni ma lemnag e girdi’?

6. Jesus e ir be’ nib gol

Yugu aram rogon nde yoor ban’en rok Jesus machane ma gol ko girdi’, miki pi’ e athamgil ngodad ni ngaud golgad. Mu beegew e Acts 20:35, mi gimew weliy e fulweg ko re deer ni baaray:

Uw rogon nrayog ni ngad felfelan’gad nrogon ni yog Jesus?

Mu yaliyew e re VIDEO ney, mi gimew weliy e fulweg ko re deer ni baaray.

VIDEO: “There Is More Happiness in Giving”—Excerpt (4:00)

Mang boch e kanawo’ nrayog ni ngad golgad riy ni yugu aram rogon nde yoor ban’en rodad?

Baaray murung’agen ban’en

Be yog e Bible ni ngad meybilgad ngak Jehovah u daken fithingan Jesus. (Mu beeg e John 16:23, 24.) Nap’an ni gad ra meybil ni aray rogon, ma aram e gad be dag nib ga’ fan u wan’dad e n’en ke rin’ Jesus ni nge ayuwegdad ni ngad manged fager rok Jehovah.

MA GAAR BOCH E GIRDI’: “Der lemnag Got e gafgow ni gad be tay.”

Bochan ni i m’ug rarogon e Chitamangin Jesus rok, ma uw rogon ni be micheg e re n’ey ni ma lemnagdad Jehovah?

N’EN KAN FIL

Ba t’uf Jehovah nge girdi’ rok Jesus. Bochan ni Jesus e bod e Chitamangin ma aram fan nnap’an nra yoor ban’en nim nang u murung’agen, ma aram e ku ra yoor ban’en nim nang u murung’agen Jehovah.