Boor e girdi’ u ga’ngin yang e fayleng nib t’uf e ggan rorad nge bang ni ngar pared riy. Machane bay boch e girdi’ ni kemus nib t’uf ni nge yag e athap ngorad ni fan ko gabul nge langlath. Baadag Got ni ngad ayuweged e piin ke t’uf e ayuw rorad, ma faan gad ra rin’ e re n’ey ma ra tow’athnagdad.

“Ga ra pi’ ban’en ngak e gafgow, ma bod ni Somol e ka mu pi’ ngak, ra sulweg Somol puluwon ngom.”​—PROVERBS 19:17, BT.

I weliy Jesus murung’agen be’ nib moon ni yib i og bogi moro’ro’ ngak mi yad pirdiiy, ngemu’ mi yad pag ni ke chugur ni nge yim’. (Luke 10:29-37) Ma aram me yib yugu reb e moon ndar nangew yow i tal ngak fare moon ni ke maad’ad me ayuweg. I ayuweg e re moon nem ni yugu aram rogon nib thil e gin kar bow riy.

Re moon nem e gathi kemus ni ayuweg fare moon ni ke maad’ad nge tafalaynag e maad’ad rok miki pi’ e tin nib t’uf rok, ya ki fal’eg laniyan’ me ayuweg ni nge dabki kireban’.

Ere mang e gad be fil ko re fanathin ney? Be tamilangnag Jesus nsusun e ngad ayuweged e piin ke t’uf e ayuw rorad u rogon kanawoen nrayog rodad. (Proverbs 14:31) Be fil fare Babyor nib Thothup ngodad ndab ki n’uw nap’an ma bayi museg Got e gafgow ni be tay e girdi’. Machane sana rayog ni ngad lemnaged ko uw rogon nra rin’ Got e re n’ey, ma mingiyal’ e ra rin’ riy? Bin migid e article e be weliy murung’agen boch e tow’ath nra pi’ e En Ke Sunmiydad ngom boch nga m’on.