1-2. Mini’ Zadok? (1 Kronicles 12:​22, 26-28)

 MU SUSUNNAG e n’en be buch. Ba pag 340,000 e pumoon ni kar muulunggad ni ngar ayuweged David ni nge mang pilung u ga’ngin yu Israel. Dalip e rran ni par e pi pumoon ney u daken e pi burey nib chugur nga Hebron ni yad be minmin, ma yad be sabethin, ma yad be tang u fithik’ e felfelan’ ni yad be pining e sorok ngak Jehovah. (1 Kron. 12:39) Dabisiy nib mo’maw’ ni nge gagiyel be’ nib pagel ni ka nog Zadok ngak u fithik’ e pi girdi’ nem ni kar muulunggad ni aram urngirad. Yugu aram rogon, ma ke guy Jehovah rogon ni ngad nanged ni immoy u rom. (Mu beeg e 1 Kronicles 12:​22, 26-28. a) Ere mini’ Zadok?

² Zadok e ir reb e prist ni ur maruwelgow Abiathar ni ir e Th’abi Tolang ko Prist u taabang. Ku ir be’ nrayog ni nge nang e n’en nib m’agan’ Got ngay ma kub ga’ e tamilangan’ ni kan pi’ ngak. (2 Sam. 15:​27, NW) Ma yan e girdi’ ngak u nap’an nra t’uf e fonow rorad ni bay e gonop riy. Ku ir be’ nder ma rus. Aram e re fel’ngin ni immoy rok ni gad ra weliy murung’agen ko re article ney.

3. (a) Mang fan nib t’uf ni nge par e pi tapigpig rok Jehovah ndab rrusgad? (b) Mang e gad ra weliy ko re article ney?

³ Be gelnag Satan e cham ni be tay ko girdi’ rok Got e ngiyal’ ney ko tin tomuren e rran. (1 Pet. 5:8) Ere ba t’uf ndab da rusgad u nap’an ni gad be sonnag Jehovah ni nge thang Satan nge re m’ag  rok ney nib kireb. (Ps. 31:24) Chiney e ngad weliyed dalip e kanawo’ nrayog ni ngad folwokgad rok Zadok riy ni par nder rus.

MU AYUWEG GIL’ILUNGUN GOT

4. Mang fan nib t’uf ndabi rus e girdi’ rok Jehovah ya nge yag nra ayuweged Gil’ilungun Got? (Kum guy e sasing.)

⁴ Gadad e girdi’ rok Jehovah e gad ma ayuweg Gil’ilungun Got u polo’ i gum’ircha’dad, machane ba ga’ nib t’uf ni nge dab da rusgad ya nge yag nda rin’ed e re n’ey. (Matt. 6:33) Bod nib t’uf ni nge dab da rusgad ni ngad folgad ko pi motochiyel rok Jehovah ma gad machibnag fare thin nib fel’ ni murung’agen Gil’ilungun Got. (1 Thess. 2:2) Kub ga’ nib t’uf ni nge dab da rusgad u nap’an nra t’uf ni ngad pared u mathilin ngongolen e am ko ngiyal’ ney ni ke ruw raba’ e re m’ag ney. (John 18:36) Boor e girdi’ rok Jehovah ni kar magawongad ko salpiy, ara yibe gafgownagrad, ara kan kalbusnagrad ni bochan e darur uned nga ngongolen e am ara ra uned ko salthaw.

5. Mang fan nib t’uf ndabi rus Zadok ni nge ayuweg David?

⁵ Gathi kemus ni yan Zadok nga Hebron ni nge un i madnomnag David ni ke pilung. Ke yan ngaram ni ke fek talin e cham rok ma ke fal’eg rogon ni fan ko cham. (1 Kron. 12:38) Ba m’agan’ ngay ni nge un ngak David ko cham me ayuweg yu Israel u pa’ e pi toogor rorad. Sana rayog ni gathi ir reb e salthaw nib falu’, machane ir be’ nder ma rus.

6. Uw rogon ni dag David e kanawo’ nib fel’ nrayog ni nge folwok Zadok riy u rogon ni par nder rus? (Psalm 138:3)

⁶ Mang e rin’ me mang e re prist ney be’ nri der ma rus? Boor e pumoon ni manangrad ni yad ba gel ma darur rusgad. Dariy e maruwar riy ni fil ban’en ko n’en ur rin’ed. Bod nrogon nda i rus David ni nge “gafaliy e girdi’ nu Israel ko mahl” e k’aring urngin e girdi’ nu Israel ni ngar ayuweged u polo’ i gum’ircha’rad. (1 Kron. 11:​1, 2, BT) Gubin ngiyal’ ni i taga’ David ngak Jehovah ni nge ayuweg u pa’ e pi toogor rok. (Ps. 28:7; mu  beeg e Psalm 138:3.) Ki fil Zadok ban’en rok boch e pumoon ndarur rusgad ni bod Jehoiada, nge Benaiah ni fak ni ir reb e salthaw nib falu’, nge fa 22 i pumoon nra ayuweged David. (1 Kron. 11:​22-25; 12:​26-28) Gubin e pi pumoon ney nra dugliyed u wan’rad ni ngar ayuweged David ni nge mang pilung.

7. (a) Mini’ e piin kar daged e ngiyal’ ney ndarur rusgad nrayog ni ngad filed ban’en rorad? (b) Mang e ga be fil ko n’en ni rin’ Brother Nsilu nrogon ni kan dag ko fare video?

⁷ Nap’an ni gad ra lemnag murung’agen e piin ur ayuweged e gagiyeg rok Jehovah ndarur rusgad, ma ma yib gelngidad miki ayuwegdad ndab da rusgad. Kristus Jesus ni Pilung rodad e siyeg ni nge un nga ngongolen e am ko re fayleng rok Satan ney. (Matt. 4:​8-11; John 6:​14, 15) Gubin ngiyal’ ni i taga’ ngak Jehovah ni nge pi’ gelngin. Ku boor e pagel e ngiyal’ ney ni kar siyeged ni ngar uned ko salthaw ara ngongolen e am. Mang ndab mu beeg murung’agrad ko jw.org? b

MU AYUWEG PI WALAGEM

8. Mingiyal’ e sana ra t’uf ni nge dabi rus e piin piilal ni ngar ayuweged pi walagrad?

⁸ Ri baadag e girdi’ rok Jehovah ni ngar ayuweged yad. (2 Kor. 8:4) Machane yu ngiyal’ e ba t’uf ndab rrusgad ni ngar rin’ed e re n’ey. Bod nnap’an ni yibe mahl ma manang e piin piilal nib t’uf ni ngan pi’ e athamgil nga laniyan’ e pi walag, min ayuwegrad, min pi’ e tin nib t’uf rorad ko tirok Got ban’en ara tin nib t’uf ko par rorad. Piin piilal e yad ma tay e yafos rorad nga thatharen e riya’ ni ngar pied e tin nib t’uf ko pi saf rok Got ni bochan e yad ba t’uf rorad. (John 15:​12, 13) Aray rogon ni yad ma folwok rok Zadok ni dag nder rus.

9. Mang e yog David ngak Zadok ni nge rin’ nrogon ni bay ko 2 Samuel 15:​27-29? (Kum guy e sasing.)

⁹ Ke par e yafos rok David nga thatharen e riya’. Ke dugliy Absalom ni fak u wan’ ni nge mang ir e nge pilung. (2 Sam. 15:​12, 13) Ere ba t’uf ni nge chuw David u Jerusalem ni ka chingiyal’ nem! I gaar ngak e pi tapigpig rok: “Thingar da milgad e chiney ni faanra gadad ba adag ni ngad thaygad u  pa’ Absalom!” (2 Sam. 15:14) Nap’an ni be chuw fapi tapigpig, me nang David nib t’uf ni nge par be’ u rom ni nga i yib i yog ngak e n’en be lemnag Absalom ni nge rin’. Ere yog ngak Zadok nge yugu boch e prist ni ngar sulod ko re mach nem ni ngar manged damit rok. (Mu beeg e 2 Samuel 15:​27-29.) Ba t’uf ni ngar ra kol ayuwgad, ya bay e riya’ ko n’en ni yog David ngorad ni ngar rin’ed. Absalom e ir be’ nib ta cham, ma yigoo ir e ma lemnag ir, ma de par nib yul’yul’ ko chitamangin. Ere am lemnag e n’en nra rin’ ngak Zadok nge fapi prist ni faan gomanga nang e n’en yad be rin’ ni fan e ngar ayuweged David!

10. Mang e rin’ Zadok nge piin yad ba mang ngak ni ngar ayuweged David nde buch ban’en rok?

¹⁰ I tanomnag David e n’en ngar rin’ed Zadok nge Hushai ni ku ir reb e fager rok nib yul’yul’. (2 Sam. 15:​32-37) I ngongol Hushai nib dake be ayuweg Absalom miki fonownag u rogon ni nge cham ngak David, ma aram me mab e kanawo’ ngak David ni nge fal’eg rogon ni fan ko re cham nem. Ngemu’ me yog Hushai ngak Zadok nge Abiathar e n’en ke lemnag Absalom ni nge rin’. (2 Sam. 17:​8-16) Ma aram me pi’ e gal pumoon nem e thin nge yan ngak David. (2 Sam. 17:17) Bochan ni ayuweg Jehovah Zadok nge fapi prist ma aram me yag nra ayuweged David nde buch ban’en rok.​—2 Sam. 17:​21, 22.

11. Uw rogon nrayog ni ngad folwokgad u rogon nde rus Zadok u nap’an ni gad be ayuweg pi walagdad?

¹¹ Faanra nog ngodad ni ngad ayuweged pi walagdad ni ke par e yafos rorad nga thatharen e riya’, ma uw rogon ni ngad daged ndarud rusgad ni bod Zadok? (1) Mu fol ko yaram ni kan ngongliy. Nap’an nra buch boch ban’en ni aray rogon, mab ga’ fan ni ngad pared nib taareban’dad. Ere mu fol ko yaram ni ke yib ko branch ofis ko gin ga ma par riy. (Heb. 13:17) Gubin ngiyal’ nsusun e nga i sul e piin piilal u daken e pi n’en kan yarmiy u rogon ni ngan fal’eg rogoy ni fan ko pi n’en ma buch ni yima gafgow riy nge n’en ngan rin’ u nap’an ni ke buch e pi n’em. (1 Kor. 14:​33, 40) (2) Dab mu rus machane ngkum kol ayuw. (Prov. 22:3) Mu lem u m’on ni ngam rin’ ban’en. Dab mu rin’ boch ban’en nde t’uf ni ngam rin’ nra tay e yafos rom nga thatharen e  riya’. (3) Mu taga’ ngak Jehovah. Dab mu pagtalin ni baadag Jehovah ni ngam pared pi walagem ndabi buch ban’en romed. Rayog ni nge ayuwegem u rogon ni ngam ayuweg pi walagem u reb e kanawo’ ndabi buch ban’en romed riy.

12-13. Mang e kam fil ko n’en ni buch rok Viktor nge Vitalii? (Kum guy e sasing.)

¹² Am lemnag e n’en ni rin’ Viktor nge Vitalii ni l’agruw e walag ni pumoon u lan e ulung ni u ranow ra piew e ggan nge ran ko pi walag u Ukraine. I yog Viktor ni gaar: “Gubin yang ni ug gayew e ggan riy. Ba ga’ ni bay e girdi’ ni be chubeg e boyoch u toobmow. Bay reb e walag ni pumoon ni pi’ e ggan u kantin rok ni nge kay e pi walag ndariy puluwon. Pi ggan ney e ayuweg boor e walag u lan ba ngiyal’. Nap’an ni gamad be af e pi ggan nem nga lan e karrow romow, me yib i aw ba donmach nga bangi ban’en nsogonap’an 66 e fit palogin ko gin gamad bay riy. Yug gu par e rofen nem nug be meybil ngak Jehovah ni nge ayuwegeg ndab kug rus ya nge yag ni nggu ulul i ayuweg e pi walag.”

¹³ Vitalii e yog ni gaar: “Rib t’uf ndab gu rusgow. Yay nsom’on e milekag nug tay e fek 12 e awa. Nap’an nug be milekag i yan ngaram ma gu be meybil ngak Jehovah.” De rus Vitalii, machane ki kol ayuw. Ki yog ni gaar: “Ug wenig ngak Jehovah ni nge pi’ e gonop ngog mug nang e gin nggu mus riy. Kemus ni yu pa’ i kanawo’ ni ke yog e am nrayog ni ngan milekag riy e ir e ug wan riy. Nap’an nug guy rogon ni be maruwel e pi walag u taabang, ma aram me gel e michan’ rog. Ra chuweged boch ban’en u lan e kanawo’, mu kur kunuyed e ggan, nge mad, nge ku boch ban’en nib ga’ fan mar pied e ayuw ngomow ni ngan tay nga karrow, mu kur pied e ggan ni nggu wew nge bang ni nggu toffangow riy.”

MU PAR NI GAB YUL’YUL’ NGAK JEHOVAH

14. Mang e rayog ni nge buch rodad ni faanra daki yul’yul’ be’ nib t’uf rodad ngak Jehovah?

¹⁴ Reb e skeng nrib mo’maw’ nrayog ni ngad mada’naged e nap’an nra digey reb i girdien e tabinaw rodad ara reb e fager rodad nib chugur thildad Jehovah. (Ps. 78:40; Prov. 24:10) Faanra rib chugur thildad facha’, ma rayog ni ngari mo’maw’ ngodad ni nge m’agan’dad ko n’en ke buch. Faanra ke buch e re n’ey rom ni kari gafgownag lanin’um, ma rogon e yul’yul’ ni tay Zadok e rayog ni nge pi’ gelngim.

15. Mang fan nib t’uf ni nge dabi rus Zadok ya nge yag ni par nib yul’yul’ ngak Jehovah? (1 Kings 1:​5-8)

¹⁵ I par Zadok nib yul’yul’ ngak Jehovah u nap’an ni mel’eg Abiathar nreb e fager rok nrib chugur thilrow ndab ki yul’yul’. I buch e re n’ey u tungun e gagiyeg rok David. Nap’an ni chugur ni nge yim’ David me guy Adonijah ni fak rogon ni nge mang ir e nge mang pilung ni yugu aram rogon ni ke mel’eg Jehovah Solomon ni nge mang pilung. (1 Kron. 22:​9, 10) I mel’eg Abiathar ni nge ayuweg Adonijah. (Mu beeg e 1 Kings 1:​5-8.) Nap’an ni rin’ e re n’ey, ma aram e gathi kemus ni yigoo David e daki yul’yul’ ngak ya kub muun Jehovah ngay! Rayog ni ngam lemnag gelngin e kireban’ ni tay Zadok ni bochan e re n’ey, fa? Ya ba pag 40 e duw ni ur maruwelgow Abiathar u taabang ni yow l’agruw e prist. (2 Sam. 8:17) Ur ayuwegew “fare kahol ko m’ag” u taabang. (2 Sam. 15:29) Som’on e ur ayuwegew David ni ir e pilung rorow maku boor ban’en ni ur rin’ew u taabang ni fan ko pigpig rorow ngak Jehovah.​—2 Sam. 19:​11-14.

16. Mang e rayog ni ayuweg Zadok ni nge par nib yul’yul’?

¹⁶ I par Zadok nib yul’yul’ ngak Jehovah ni yugu aram rogon ndaki par Abiathar nib yul’yul’. Dariy ba ngiyal’ ni maruwar u wan’ David ko ra par Zadok nib yul’yul’ fa danga’. Nap’an ni gagiyel e n’en ke lemnag Adonijah ni nge rin’, ma aram me mel’eg David Zadok, nge Nathan, nge Benaiah ni ngar liyfed e gapgep nga lolugen Solomon ni aram e ke mang pilung. (1 Ki. 1:​32-34) Bochan ni i chag Zadok ko pi tapigpig rok Jehovah ni yad ba yul’yul’ ni bod Nathan nge ku boch  e girdi’ ni ur ayuweged David ni Pilung, mab mudugil ni aram e n’en ni pi’ gelngin miki pi’ e athamgil nga laniyan’. (1 Ki. 1:​38, 39) Nap’an ni pilung Solomon me “tay Zadok ni prist nga luwan Abiathar.”​—1 Ki. 2:​35, BT.

17. Faanra mel’eg be’ nib t’uf rom ni nge digey Jehovah ma uw rogon nrayog ni ngam folwok rok Zadok?

¹⁷ Uw rogon nrayog ni ngam folwok rok Zadok? Faanra mel’eg be’ nib t’uf rom ni nge digey Jehovah, mag tamilangnag ko mini’ e ngam yul’yul’ ngak. (Josh. 24:15) Ra pi’ Jehovah gelngim me ayuwegem ni nge dab mu rus. Mu taga’ ngak u daken e meybil mag par ni gab chugur ko pi walag. Ba ga’ fan u wan’ Jehovah e yul’yul’ rom ma ra tow’athnagem.​—2 Sam. 22:26.

18. Mang e kam fil ko n’en ni buch rok Marco nge Sidse?

¹⁸ Am lemnag e n’en ni rin’ Marco nge Sidse ni leengin ni digey l’agruw e ppin ni fakrow e tin riyul’. I yog Marco ni gaar: “Ka rofen nni gargeleg pi fakam nri yad ba t’uf rom. Demtrug ban’en ni ga ra rin’ ni ngam ayuwegrad ndabi buch ban’en rorad. Ere nap’an ni yad ra mel’eg ni ngar digeyed Jehovah, ma rib gel e kireban’ riy.” Ki ulul ngay ni gaar: “Machane gubin ngiyal’ ni be ayuwegmow Jehovah. Ma guy rogon ni nge par leengig nib gel u nap’an ni kug meewar mug par ni gub gel u nap’an ni ke meewar leengig.” Ki gaar Sidse: “Faan gomanga de pi’ Jehovah gelngimow, ma dabiyog ni nggu athamgilgow. Ug par nib kireban’ug ni bochan e gu lemnag ni gag e kireb rog, ere gu weliy lanin’ug ngak Jehovah. De n’uw nap’an nga tomuren me yib reb e walag nib pin ni ke yoor e duw ndawor gu mada’gow i tay pa’ nga daken pog, me sap ngog, me gaar: ‘Sidse, dab mu pagtalin ni gathi gur e kireb rom!’ Ke yag ni nggu par ni gub felfelan’ ko pigpig nug be tay ngak Jehovah ni bochan e be ayuwegeg.”

19. Mang e kam dugliy u wan’um ni ngam rin’?

¹⁹ Baadag Jehovah ni nge par urngin e tapigpig rok ndab rrusgad ni bod Zadok. (2 Tim. 1:7) Machane dabun ni ngad taga’gad nga gelngidad, ya baadag ni ngad taga’gad ngak. Ere nap’an nra buch ban’en rom nib t’uf ni ngam par ndab mu rus, mag taga’ ngak Jehovah. Faan ga ra rin’ e re n’ey, ma rayog ni nge pagan’um ngay nra ayuwegem ni ngam par ndab mu rus ni bod Zadok!​—1 Pet. 5:10.