Ga Manang Murung’agen e Re N’ey, Fa?
Mang fan ni mang boch e girdi’ ni gathi yad piyu Israel boch e salthaw rok David ni Pilung?
BOCH e salthaw rok David ni gathi yad e girdi’ nu Israel e ba muun ngay Zelek nu Ammon, nge Uriah nreb e Hittite, nge Ithmah nu Moab. a (1 Kron. 11:39, 41, 46) Kub muun ngay e “pi Kerethite nge pi Pelethite . . . [nge] fa 600 i salthaw nra uned ngak David u Gath.” (2 Sam. 15:18) Bod ni pi Kerethite nge pi Pelethite e bay rogorad piyu Filistia. (Ezek. 25:16) Ma pi Gittite e yad e girdi’ nu Gath nreb e mach nib milfan ko pi Filistine.—Josh. 13:2, 3; 1 Sam. 6:17, 18.
Mang fan nrayog ni nge fek David e pi girdi’ ney ni ngar manged boch e salthaw rok? Ba pagan’ ngay ni yad ba yul’yul’ ngak ma bin th’abi ga’ fan riy e yad ba yul’yul’ ngak Jehovah. Be weliy ba ken e dictionary ko Bible murung’agen e pi Kerethite nge pi Pelethite ni be gaar: “Ra pared ni yad ba yul’yul’ ngak David u fithik’ e tin th’abi mo’maw’ e magawon ni i mada’nag u nap’an e gagiyeg ni i tay.” Ni uw rogon? Nap’an ni digey “piyu Israel” David ni Pilung ngar uned ngak be’ “nde fel’ ngongolen ni Sheba fithingan,” ma pi Kerethite nge pi Pelethite e ra pared ni yad ba yul’yul’ ngak David mar ayuweged ni nge tal e togopuluw ni ke tababnag Sheba. (2 Sam. 20:1, 2, 7, BT) Ku bay bayay ni guy Adonijah ni fak David ni Pilung rogon ni nge mang pilung. Machane me par e pi Kerethite nge pi Pelethite ni yad ba yul’yul’ ngak David mar ayuweged ni nge pilung Solomon ni ir e en ke mel’eg Jehovah ni nge yan nga lon David.—1 Ki. 1:24-27, 38, 39.
Ku reb e girdi’ ni gathi ir be’ nu Israel e aram Ittai nreb e Gittite. I ayuweg Ittai nge fa 600 i salthaw nra uned ngak David ni Pilung u nap’an ni chel Absalom ni fak David nge togopuluw ngak, me guy rogon ni nge k’aring e pi pumoon nu Israel ni ngar togopuluwgad ko en pilung. Som’on e yog David ngak Ittai nde t’uf ni nge un ko cham ni bochan e gathi ir be’ nu Israel. Machane me gaar Ittai: “Gu be micheg ngom u daken fithingan Somol ni gubin ngiyal’ ni bay ug un ngom ndemturug e gin ni ga be yan riy i yan, ni mus ni faanra ngad m’ow.”—2 Sam. 15:6, 18-21.
Ba yul’yul’ Ittai ngak David ni ir e en ke dugliy Jehovah ni nge mang pilung
Yugu aram rogon ni pi Kerethite, nge pi Pelethite, nge pi Gittite e gathi yad e girdi’ nu Israel, machane yad manang ni Jehovah e ir e bin riyul’ e Got ma David e ir e en ke dugliy Jehovah ni nge mang pilung. Ere ba mudugil nib felfelan’ David ngay ni i ayuweg e pi pumoon ney ni yad ba yul’yul’!
a Motochiyel rok Got ni bay ko Deuteronomy 23:3-6 e be yog ndabiyog ni nge mang piyu Ammon nge piyu Moab boch e girdi’ nu Israel. Machane bod nre motochiyel ney e be yip’ fan ndabiyog ni nge taareb rogon mat’awrad nge pi n’en nrayog ni ngar rin’ed ngak piyu Israel, machane gathi be yip’ fan ndabiyog ni ngar chaggad ara ra pared u fithik’ e girdi’ rok Got. Mu guy e Insight on the Scriptures, Volume 1 ko p. 95.
