KENGGIN E RE KE BABYOR NEY | MINI’ E PI MICH ROK JEHOVAH?
Mang e Ba Mich u Wan’ e Pi Mich Rok Jehovah?
Ba mich u wan’ e Pi Mich Rok Jehovah ni “urngin e thin ni bay u lan e babyor nib thothup e Got e yib i pi’ nga laniyan’ e girdi’ ngar yoloyed nga babyor, me ir e ba ga’ fan.” (2 Timothy 3:16) Gamad ma fanay e thin nu Bible ni nge pow’iymad ya nge yag ni gu filed murung’agen e En ni Ke Sunmiy urngin ban’en me yag ni nge fel’ e par romad.
Be gaar e Bible: “Nge nangem e girdi’ ni fithingam e Jehovah ni gur e Th’abi Tolang u ga’ngin yang e fayleng.” (Psalm 83:18, NW) Ere, kemus ni yigoo Jehovah Got e gamad ma liyor ngak, ma bochan ni gamad e Pi Mich rok ma aram fan ni gamad ma athamgil ni nggu weliyed fithingan ngan nang.—Isaiah 43:10-12.
Bochan ni gamad e Kristiano, mab mich u wan’mad ni yib Jesus ni “Fak Got” * nga fayleng, me ir e yib i mang fare Messiah. (John 1:34, 41; 4:25, 26) Tomuren ni yim’, min faseg ko yam’ me sul nga tharmiy. (1 Korinth 15:3, 4) Boch nga tomuren me mang Pilung u Gil’ilungun Got. (Revelation 11:15) Gil’ilungun Got e aram reb e am nriyul’ ni bay, maku aram e re am nra fal’eg e re fayleng ney nge mang Paradis. (Daniel 2:44) Be gaar e Bible: “Piin ni yad mmunguy e bay ra pired u daken e nam u fithik’ e gapas, mu ur pired u fithik’ e gapas ni yad ba felfelan’.”—Psalm 37:11, 29.
“Nap’an ni yad ra beeg e Bible, mab mich u wan’rad ni Got e be non ngorad. Nap’an ni yad ra mada’nag boch e magawon, ma yad ma fanay e Thin rok Got ni ngar gayed e fulweg ko pi magawon rorad. . . . Ba mich u wan’rad nib fas e Thin rok Got.”—Catholic clergyman Benjamin Cherayath, Münsterländische Volkszeitung newspaper, Germany
Ba mich u wan’ e Pi Mich Rok Jehovah ni pi kenggin e motochiyel u Bible e rayog ni nge ayuweg e girdi’ e ngiyal’ ney. (Isaiah 48:17, 18) Ere, aram fan ni gamad ma fol ko pi kenggin e motochiyel nem. Bod ni, be yog e Bible ni ngad siyeged e pi n’en ni ma alitnag e dowef nge lanin’uy. Ere, aram fan nda gur uned ko tamagow maku da gur fanayed boch e falay ni kireb. (2 Korinth 7:1) Ku gamad ma siyeg boch e ngongol nib kireb ni be yog e Bible ni bod rogon e chingaw, nge ngongol ndarngal, nge moro’ro’.—1 Korinth 6:9-11.
^ Ku be yog e Bible ni Jesus e ir “Fak Got ni kari maagirag rok” ni bochan e ir e som’on nni sunmiy, ma kemus ni yigoo ir e Jehovah e sunmiy.—John 3:18; Kolose 1:13-15.
You May Also Like
ESSENTIAL BIBLE TEACHINGS
Bay Fithingan Got Fa Dariy?
Boor e liw rok Got ni bod e, En Chitamangiy, En Tasunmiy, nge Somol. Re video ney e be weliy murung’agen fithingan Got ni kan tay nga lan e Bible nib pag 7,000 yay.
