1, 2. (a) Mang fan nde yag ngak 24,000 e girdi’ nu Israel fare tow’ath ni micheg Got nra pi’ ngorad? (b) Mang nib ga’ fan e re n’ey ngodad?

 DE N’UW nap’an u m’on ni yan piyu Israel nga lan fare Nam ni Kan Micheg, ma bokum biyu’ e pumoon nu Israel nra “pared e ppin nu Moab.” Wenegan ni yib riy e 24,000 e girdi’ ni li’rad Jehovah ngar m’ad. Am lemnag n’umngin nap’an ni kar songad ni nga ranod nga lan e re nam nem ni tow’ath rorad ni ke pi’ Got. Machane, de yag ni ngar pared ni yad ba yul’yul’ mi yad pag e ar’ar nib kireb nge waliyrad ngar uned ko ngongol ndarngal, me mul e tow’ath rorad u pa’rad.​—Num. 25:1-5, 9, BT.

² Kan tay murung’agen e re n’ey nga lan e Bible ni bochan e “nge mang ba ning chilen ngodad. Ya gadad be par u ba ngiyal’ ni ke chugur ni nge taw ko tungun.” (1 Kor. 10:6-11) Chiney ni gad bay u tungun e “tin tomren e rran” e kari chugur ni nge thap e pi tapigpig rok Got nga lan e bin nib beech e fayleng. (2 Tim. 3:1; 2 Pet. 3:13) Machane, ba gel e kireban’ riy ni bochan e bay boch i yad ni dakurur pared ni yad ba yul’yul’. Kar uned ko ngongol ndarngal ma ke yib wenegan nib kireb ngorad. Bochan e re n’ey, ma ke mul fare tow’ath u pa’rad ni aram e athap ko yafas ndariy n’umngin nap’an u Paradis u fayleng.

3. Mang fan nib t’uf ni nge ayuweg Jehovah e piin mabgol me pow’iyrad? (Mu guy e sasing ni bay u tabolngin e re article ney.)

 ³ Bochan ni ke garer e ngongol ndarngal u ga’ngin yang e fayleng, ma aram fan nib t’uf ni nge ayuweg me pow’iy Jehovah e piin mabgol ya nge yag ni par e mabgol rorad nib fel’. (Mu beeg e Psalm 127:1.) Chiney e ngad weliyed rogon nrayog ni nge ayuweg ba wu’ e mabgol e mabgol rorow ni nge par nib fel’. Ba t’uf ni ngar kol ayuwgow u rogon ni yow ma lem, mar chugurgow ngak Got, ma ron’ew nga dakenrow e bin nib beech e pangin, mi i par nib fel’ e numon u thilrow, me bagayow me pi’ e tin nib t’uf rok bagayow.

4. Mang e ke k’aring boch e Kristiano ni ngar uned ko ngongol ndarngal?

⁴ Uw rogon nrayog ni nge un reb e Kristiano ko ngongol ndarngal? Re n’ey e ba ga’ ni ma tabab ko pi n’en ni gad ma guy nga owchedad. I weliy Jesus ni gaar: “En nra sap ngak be’ ni ppin me finey ni manga yugu ra pirew, e ke kireb e rok, ni fan e kar pirew u fithik’ i laniyan’.” (Matt. 5:27, 28; 2 Pet. 2:14) Boor e Kristiano ni kar uned ko ngongol ndarngal ni bochan e yad ma yaliy yaan e ngongol ni puwlag, ma yad ma beeg boch e babyor ni be weliy murung’agen e ngongol ndarngal, ara yad ma yaliy yaan boch e ngongol nib kireb ko Internet. Ku bay boch e Kristiano ni yad ma yaliy boch e kachido ara boch ban’en ni yima pag u TV ni yaan e ngongol ndarngal. Ku bay boch i yad ni ma yan ko yungi n’en ni tafen e muun rrum nnep’ maku yima churu’ riy, nge yungi n’en ni yima yan ngay ni ngaun yaliy yaan e girdi’ ni be churu’ ndariy e mad u daken. Ku bay boch i yad ni ma yan nga boch e tafen e chamag ni yima rin’ boch ban’en riy nib kireb.

5. Mang fan nib t’uf ni ngad kol ayuwgad u rogon ni gad ma lem?

⁵ Boch e Kristiano e kar uned nga boch e ngongol nib kireb ni bochan e kaygi yoor e tayim ni yad be chagil ngak be’ ni gathi mabgol rorad. Gad be par u ba fayleng ni ke gel e kireb ko girdi’ riy ma yigoo tin nib kireb ban’en e yima rin’ riy. Ma bochan ni kub sasalap gum’ircha’dad, mab mom nrayog ni nge k’aringdad ni ngad adaged be’ nga wuru’ e mabgol rodad. (Mu beeg e Jeremiah 17:9, 10.) I yog Jesus ni gaar: “Laniyan’ be’ e ma yib e lem nib kireb riy ni ir e ma pingeg faanem nge li’ be’ ngem’, fa ra pirew be’ ni gathi mabgol rok, ma be rin’ yugu boch ban’en ni aram e ngongol ko darngal.”​—Matt. 15:19.

6, 7. (a) Mang e rayog ni nge buch ni faanra sum e ar’ar nib kireb u gum’irchaen be’? (b) Uw rogon nrayog ni ngad siyeged ndab da denengad nib togopuluw ngak Jehovah?

⁶ Nap’an ni yug ra sum e ar’ar nib kireb u gum’irchaen l’agruw ni’ ni yow baadagew yow ma rayog ni ngar tababgow ni ngaur weliyew boch ban’en ni kemus ni yigoo en mabgol rorow e rayog ni ngar weliyew ngak. Ra munmun ma ra ur taweygow nga boch ban’en ni bochan e ngar rin’ew boch ban’en u taabang. Ku ra ur parew ma yow be mada’, mu ur dake dar puruy’nigew ni ngar mada’gow. Ma nap’an nra gel e adag rorow ngorow, ma aram e ra mom ni ngar rin’ew ban’en nib kireb. Maku nap’an nra gel e chugur u thilrow, ma aram e ra gel e mo’maw’ riy ni ngar talgow ko n’en ni yow be rin’ ni yugu aram rogon ni yow manang nib kireb.​—Prov. 7:21, 22.

⁷ Nap’an nra gel e ar’ar nib kireb rorow ma aram e numon ni ur tew kafram e ra munmun me un boch ban’en ngay ni kemus ni yigoo piin mabgol e rayog ni ngaur rin’ed ngorad ni bod rogon ni ngaur kolew pa’row, ma yow be k’ad langarow, ma yow be mathmath ngorow u boch e kanawo’ nra pug e ar’ar rorow. Ra taw ko ngiyal’ nem ma kar pagew talin e pi motochiyel rok Jehovah u murung’agen rogon nsusun e ngaud ngongolgad. Kar ‘pagew yow ko n’en nib kireb ni yow be ar’arnag nge waliyrow ngar awgow ko wup.’ Ma nap’an nra diyen e tin nib kireb ni yow be ar’arnag ma aram me “gargeleg e denen,” ni aram e ngongol ndarngal. (Jas. 1:14, 15) Rib gel e kireb ko re n’ey, ya faan gomanga ra pagew Jehovah ni nge ayuwegrow u rogon ni ngar fal’egew e tha’ u thilin e mabgol rorow, ma rayog ni nge dab ra denengow nib togopuluw ngak. Machane, uw rogon nrayog ni nge rin’ be’ e re n’ey?

8. Faan gad ra par nib chugur e tha’ u thildad Jehovah, ma uw rogon nrayog ni nge ayuwegdad ndab da uned ko ngongol ndarngal?

⁸ Mu beeg e Psalm 97:10. Ra par nib chugur e tha’ u thildad Jehovah ma rayog ni nge ayuwegdad ni nge dab da uned ko ngongol ndarngal. Nap’an ni gad ra fil murung’agen pi fel’ngin Got ma gad guy rogon ni ngad ‘pired ni gadad be folwok rok Got, ni bochan e gadad pi fak ni gadad ba t’uf rok,’ ma aram e ra mom rodad ni ngad siyeged e ngongol ni “darngal” nge gubin mit e ngongol ni “golong.” (Efe. 5:1-4) Bochan ni manang e piin mabgol nra “gechignag Got e pi arorad ni be ngongliy e ngongol ko darngal nge piin ni yad be par e girdi’ ni gathi mabgol rorad,” ma aram fan ni yad ma guy rogon ni ngaur pared ni yad ba yul’yul’ ngorad.​—Heb. 13:4.

9. (a) Mang e ayuweg Josef ni nge par nib mudugil u nap’an ni kan waliy ko kireb? (b) Mang e gad ra fil ko n’en ni buch rok Josef?

⁹ Bay boch e Kristiano ni kar meewargad ko tirok Got ban’en ni bochan e yug yad ma chagil ngak boch e girdi’ ni gathi yad boch e Pi Mich Rok Jehovah u tomuren ni kar mu’gad ko maruwel. Ku rayog ni ngan waliydad ni ngad rin’ed boch ban’en nib kireb u tabon e maruwel. Aram e n’en ni buch rok Josef ko gin ni ma maruwel riy. I nang Josef ni baadag fare pin ni leengin e en ni ga’ ko maruwel rok ni ngar parew. Ma gubin e rran ni i guy rogon ni ngar parew Josef. Ere, yan i reb e rran me “yib fare pin i kol e mad rok Josef me gaar, ‘Moy nga darow nga chob rog.’” Machane me mil Josef rok. Ere, mang e ayuweg Josef ni nge par nib mudugil u nap’an ni yibe waliy ko kireb? I dugliy u wan’ ni nge par nib yul’yul’ ngak Got ma dabi rin’ ban’en nra kirebnag e tha’ u thilrow. Ma bochan ni par nib yul’yul’, ma aram min chuweg ko maruwel rok mi nin’ nga kalbus. Machane, tomur riy me tow’athnag Jehovah Josef. (Gen. 39:1-12; 41:38-43) Ere, piin Kristiano e thingar ra siyeged boch ban’en nra waliyrad ko kireb ndemtrug ko nap’an ni yad bay u tabon e maruwel ara u nap’an ni yad bay u bang ni yigoo yad.

10. Faan gad ra yon’ nga dakendad e bin nib beech e pangin, ma uw rogon nra ayuweg e mabgol rodad?

¹⁰ Bochan ni ‘bin nib beech i gadad e Got e sunumeg ni bod ir, ma ke gagiyel u daken e bin riyul’ e wok nib yal’uw ma mmat’aw,’ ma aram fan ni ireray e n’en nrayog ni nge ayuweg ba wu’ e mabgol ndab ra unew ko ngongol ndarngal. (Efe. 4:24) Piin ni ka ron’ed nga dakenrad e bin nib beech e pangin e kar “lied ngem’” e ar’ar ni be maruwel u fithik’ i dowrad, “ni aram e darngal, nge puwlag, nge ar’ar nib kireb ni ma waliy e girdi’ ko denen, nge chogow.” (Mu beeg e Kolose 3:5, 6.) Ra ngad “lied ngem’” e ar’ar u fithik’ i dowdad ma be yip’ fan ni ngad athamgilgad u rogon nrayog rodad ni ngad chamgad ko pi ar’ar nib kireb ni bay rodad. Aram fan ni gad ma siyeg boch ban’en nra k’aringdad ni ngad adaged be’ ni gathi mabgol rodad. (Job 31:1) Faan gad ra puluwnag e ngongol rodad ko tin nib m’agan’ Got ngay, ma aram e gad be fil rogon ni ngad “fanenikayed e tin nib kireb” mad ‘chichiiyed pa’dad ko tin nib fel’.’​—Rom. 12:2, 9.

11. Faanra yon’ l’agruw ni’ e bin nib beech e pangin nga dakenrow, ma uw rogon nra gelnag e tha’ ko mabgol rorow?

¹¹ Bin nib beech e pangin e ma m’ug riy rarogon Jehovah ni ir e ke ‘sum’ rok. (Kol. 3:10) Faanra i dag l’agruw ni’ e “runguy, nge gol, nge sobut’an’, nge sumunguy, nge gum’an’” ma ba ga’ angin nra yib ko mabgol rorow. (Kol. 3:12) Ku rayog ni ngar felfelan’gow mar parew nib taareban’row ni faan yow ra guy rogon ni ngar pagew e gapas ni ma pi’ Kristus ni ‘nge mang ir e ngi i gagiyegnag lanin’row.’ (Kol. 3:15) Kub ga’ fan ni nge ‘bagayow me t’uf bagayow rok’ me ‘pasiganrow ngay’ ni ‘nge bagayow mi i ta’ fan bagayow.’​—Rom. 12:10.

12. Mang boch e fel’ngin ni ga be lemnag nib ga’ fan u lan e mabgol?

¹² Nap’an nni fith be’ ni ka nog Sid ngak ko mang e ke ayuwegrow e en mabgol rok ni ngar parew ni yow ba felfelan’, me fulweg ni gaar: “T’ufeg e aram reb e fel’ngin nib ga’ ni gamow ma guy rogon ni ngaug dagew ngomow. Kug piriegew ni kub  ga’ fan ni ngaug sumunguygow ngomow.” Ki yog Sonja ni leengin ni gaar: “Ri kub ga’ fan e gol. Maku gamow ma guy rogon ni ngaug ngongolgow u fithik’ e sobut’an’, ni yugu aram rogon ni bay yu ngiyal’ nib mo’maw’.”

13. Mang reb e ban’en nra ayuweg e tha’ u thilin ba wu’ e mabgol ni nge par nib fel’, ma mang fan?

¹³ Numon u fithik’ e sumunguy e ku aram reb e ban’en nrayog ni nge ayuweg e mabgol rok l’agruw ni’ ni nge par nib fel’. Machane, rib gel e kireban’ riy ya bay boch e girdi’ nrib gel e thin ni yad ma yog ko en mabgol rorad, machane ri yad ma yog e thin nib sumunguy ko yug girdi’ ara gamanman rorad! Faanra i tolul l’agruw ni’ ngorow u ‘fithik’ e damumuw ara u rognew e thin nib kireb ngorow,’ ma aram e ra munmun ma ra kireb e mabgol rorow. (Efe. 4:31) Faanra i par be’ ma be gathibthibnag e en ni mabgol rok ma dabi fel’ e mabgol rok. Ere thingari guy e piin mabgol rogon ni ngaur nonad ngorad u fithik’ e sumunguy, nge gol, nge runguy, ya ireram e n’en nra ayuweg e mabgol rorad ni nge par nib fel’.​—Efe. 4:32.

14. Mang boch e ngongol nib fel’ ni ngan siyeg?

¹⁴ Be yog e Bible ni bay “ngal’an ni ngan th’ab gulungey.” (Ekl. 3:7) Re n’ey e der yip’ fan ni aram e nge dab ka i non ba wu’ e mabgol ngorow, ya ri kub ga’ fan ni nge fel’ e numon u thilin e piin mabgol. I yog reb i leengiy ni ma par u Chiyamen ni gaar: “Ga ra par ndab mu non ko en mabgol rom, ma kag ra kirebnag laniyan’.” Machane, ki yog ni gaar: “Yugu aram rogon nib mo’maw’ ni nge dab mu non u nap’an ni kam damumuw, machane ku de fel’ ni nga mog boch ban’en ndam lem u m’on riy ni bochan e kam damumuw. Ya rayog ni nga mog ara mu rin’ ban’en nra kirebnag laniyan’ e en mabgol rom, miki gel e ubchiya’ ko magawon romew.” Bin riyul’ riy e dabiyog ni nge pithig ba wu’ e mabgol e magawon rorow ni faanra ur tolulgow ngorow ara ra parew ndab ra nonow ngorow. Ya n’en nra ayuwegrow e ngar guyew rogon ni ngar pithigew e magawon u thilrow nib papey ma dab ra pagew boch ban’en nder taareban’row ngay ni nge k’aringrow ni ngar tugthingow.

15. Faanra ba fel’ e numon u thilin ba wu’ e mabgol, ma uw rogon nra ayuweg e mabgol rorow?

¹⁵ Ra i gay l’agruw ni’ rogon ni ngaur weliyew lanin’row ngorow ma rra chugur e tha’ u thilrow. Rib ga’ fan e n’en ni gad ma yog nge rogon ni gad ma yog fare n’em. Ere, mus ko ngiyal’ ni ke sum reb e magawon nib ga’, mab t’uf ni ngam guyew e en  mabgol rom rogon ni ngam nonow ngomew u fithik’ e sumunguy nge gol. Ya faan gimew ra rin’ ni aray rogon ma ra mom ni ngam motoyilgow ngomew. (Mu beeg e Kolose 4:6.) Faanra kemus ni “thin nra ayuweg be’” me pi’ e athamgil nga laniyan’ e ir e ma yog e piin mabgol ngorad, ma aram e rayog ni nga i par nib fel’ e numon u thilrad.​—Efe. 4:29.

16, 17. Mang nib ga’ fan ni nge bagayow fa wu’ i mabgol me pi’ e tin nib t’uf rok bagayow nrogon e piin mabgol?

¹⁶ Ku rayog ni nga i par e mabgol rok l’agruw ni’ nib fel’ ni faanra nge bagayow me pi’ e tin nib t’uf rok bagayow, ma dab i par bagayow ni yigoo ir e be lemnag ir. (Fil. 2:3, 4) Ere, en figirngiy e thingari pi’ ir ngak leengin nrogon figirngiy, ma en leengiy e thingari pi’ ir ngak figirngin nrogon leengiy, nge bagayow me fal’eg laniyan’ bagayow nrogon ni ke t’uf rok bagayow.​—Mu beeg e 1 Korinth 7:3, 4.

¹⁷ Ba gel e kireban’ riy ni bochan e bay boch e girdi’ ndubrad ni ngar daged ko en mabgol rorad ni yad ba t’uf rorad ara ra pied yad ko en mabgol rorad nrogon e piin mabgol. Maku reb e, bay boch e pumoon ndabun ni nge sumunguy ko ppin rok ni bochan e be lemnag ni faanra rin’ ni aray rogon ma aram e dakir ngongol u rogon ni ma ngongol e piin pumoon. Machane, be gaar e Bible: “Gimed e piin figirngiy e thingar mu guyed rogon ngam nanged rarogon pi leengimed.” (1 Pet. 3:7, Phillips) Thingari nang e piin pumoon nra nge pi’ be’ ir ngak e en mabgol rok ma gathi kemus ni be yip’ fan ni ngar parew. Piin leengiy e yad baadag ni nga i dag e piin figirngirad e t’ufeg ngorad ni gubin ngiyal’, ma gathi kemus nu nap’an ni ngar pared. Faanra i dag e en figirngiy nge en leengiy e t’ufeg nge tayfan ngorow, ma aram e rayog ni ngaur piew e tin nib t’uf rorow.

18. Uw rogon ni nge par nrib chugur e tha’ u thilin ba wu’ e mabgol?

¹⁸ Yugu aram rogon nib kireb ni nge dab ki yul’yul’ be’ ko en mabgol rok, machane faanra dab i dag be’ e t’ufeg nge sumunguy ko en mabgol rok, ma rayog ni nge munmun me gay e en mabgol rok be’ ni nge dag e pi n’ey ngak. (Prov. 5:18; Ekl. 9:9) Aram fan ni be fonownag e Bible e piin mabgol ni gaar: “Ra ba wu’ e mabgol ma dabi tel bagayow ir rok bagayow, ke mus ni faanra ke taareban’row ngay ni ngar talgow u rogon n’umngin nap’an ni yow ba adag.” Mang fan? Ya “ri fek Satan ban’en i yib ngak bagayow, ni ban’en nrayog ni nge pingeg faanem nge denen, ni bochan e dakiyog rok faanem ni nge k’adan’.” (1 Kor. 7:5) Rib gel e kireb riy ni faanra pag ba wu’ e mabgol Satan ni nge waliy bagayow ko kireb u nap’an ndakiyog rok ni nge ‘k’adan’’ me aw ko wup rok ngar parew be’ ni gathi mabgol rok. Ere, faanra i par fa wu’ i mabgol nra bagayow ma ‘gathi goo ir e be tafinaynag e tin nib fel’ ngak, ya ku be tafinaynag e tin nib fel’ ngak’ bagayow, ma ra bagayow ma be pi’ e tin nib t’uf rok bagayow ni bochan e t’ufeg ma gathi bochan e ban’en nthingari rin’, ma aram e ra par nib chugur e tha’ u thilrow.​—1 Kor. 10:24.

19. Mang e susun ni ngad dugliyed u wan’dad ni ngad rin’ed, ma mang fan?

¹⁹ Ke chugur ni ngad tawgad ko bin nib beech e fayleng ni tin nib mat’aw e bay riy. Aram fan ni faan gad ra paged gadad ko pi n’en nib kireb ni gad be ar’arnag, ma rayog ni nge buch rodad e n’en ni buch rok fa 24,000 e girdi’ nu Israel u nap’an ni ur moyed u daken e Tagapas nu Moab. Tomuren ni ke weliy e Thin rok Got murung’agen e re n’ey ni buch kakrom nrib gel e kireb riy, me yog ni gaar: “En nra finey ni ke par ni ke mudugil e nge ayuw ya ri mul.” (1 Kor. 10:12) Ere, rib ga’ fan ni ngad gelnaged e m’ag ko mabgol rodad ni aram e ngaud pared ni gad ba yul’yul’ ko Chitamangidad ni bay u tharmiy nge en mabgol rodad. (Matt. 19:5, 6) Ireray e ngiyal’ nib t’uf ni ngad ‘athamgilyed ngad pired ni gad mmachalbog ma dariy thibngidad u p’eowchen Got ma ngad pired nib aw e gapas u thildad Got.’​—2 Pet. 3:13, 14.