Boch e girdi’ e yad ma lemnag nib mo’maw’ ni nge t’uf Got rorad. Yad ma lemnag nib mo’maw’ ni ngan nang fan rarogon ara ir be’ nde ga’ fadad u wan’. Am lemnag e thin ni ke yog boch e girdi’:

• “Gu ma meybil ngak Got ni nge ayuwegeg, machane gu ma lemnag ni ir be’ nib mo’maw’ ni ngan chugur ngak. Gu ma lemnag ni Got e gathi bod be’ ni ma felfelan’, ara ma kireban’, ara ma damumuw.”​—Marco, Italy.

• “Yugu aram rogon nri gu baadag ni nggu pigpig ngak Got, machane gu ma lemnag ni dabiyog ni nge chugur e tha’ u thilmow, ma ir reb e Got nder ma runguy e girdi’ ya kemus ni ma gechignagey, ma da ug lemnag ni ma lemnagdad.”​—Rosa, Guatemala.

• “Nap’an ni ku gub bitir, mab mich u wan’ug ni ma fal’eg Got i yaliy e oloboch rodad, ma ke fal’eg rogon ni nge gechignagdad ni faanra ba t’uf ni nge rin’. Munmun mu ug lemnag ni dabiyog ni nge chugur e tha’ u thilmow Got, ya gowa bod reb e tayugang’ ko am ni ma gagiyegnag girdien reb e nam, machane de ga’ farad u wan’.”​—Raymonde, Canada.

Uw rogon ni ga be lemnag? Rayog ni ngan t’ufeg Got, fa? Ke yan bokum e duw ni ma fith e piin Kristiano e re deer ney. Bin riyul’ riy e nap’an e pi duw ni 500 nge yan i mada’ ko 1500 C.E., ma yooren e girdi’ ko Pi Yurba’ i Teliw ko Kristiano ni Googsur e da ur meybilgad ngak Got ni Gubin ma Rayog Rok. Mang fan? Ya yad ma rus ngak. Will Durant ni be’ ni ma fil murung’agen chepin e girdi’ e yog ni gaar: “Uw rogon ni nge meybil be’ nib tadenen ngak be’ ni aram feni tolang ma ma k’aring e marus ko girdi’?”

Ere mang e ke rin’ ma ma lemnag e girdi’ ni Got e ir be’ ni ma “k’aring e marus ko girdi’”? Mang e ri be fil e Bible u murung’agen Got? Faan ga ra nang e tin riyul’ u murung’agen Got, ma uw rogon nra ayuwegem ni nge t’uf Got rom?