Rogon Ni Nge M’ay E Re M’ag Ney
Rogon Ni Nge M’ay E Re M’ag Ney
“Dakumur pired u fithik’ e lumor, ere dabiyog ni ngam da’da’gad ko re Rran nem ni bod ba moro’ro’ ni mda’da’gad ngak.”—1 THESS. 5:4.
RAYOG NI NGAM WELIY?
Mang boch ban’en ndawori buch ni yibe weliy ko pi thin nu Bible ni baaray?
1. Mang e ra ayuwegdad nge yag ni ngad tedan’dad mad k’adedan’dad ko pi skeng nra yib ngodad?
DABKI n’uw nap’an ma ra buch boch ban’en u fayleng ni yira gin ngay. Ke lebug e pi yiiy u Bible, ma re n’ey e be micheg nriyul’ ni aram rogon, ere ba t’uf ni ngad tedan’dad ko matanag. Mang e ra ayuwegdad ni nge yag ni ngad tedan’dad? Ke yog apostal Paul ni “pi n’en ndanir guy nga owchey” e susun ni nge l’agan’dad ngay. Thingar dab da paged talin ni yira pi’ e yafas ni manemus ngodad nyugu demtrug ko gad ra yan nga tharmiy ara gad ra par u roy u fayleng. Ke yoloy Paul e pi thin ney ni nge pi’ e athamgil nga laniyan’ e pi Kristiano ni ngar tedan’rad nga angin nra yib ngorad ya bochan ni kar pared ni yad ba yul’yul’. Maku ra ayuwegrad e re n’ey ni nge yag ni ngar k’adedan’rad ko skeng nge gafgow nra yib ngorad.—2 Kor. 4:8, 9, 16-18; 5:7.
2. (a) Mang e thingar da rin’ed ni nge yag ni nge par nib gel e michan’ rodad? (b) Mang e gad ra weliy ko re article ney nge bin migid?
2 Fonow ni ke pi’ Paul e be fil boch ban’en ngodad: Gathi kemus ni ngad tedan’dad ko pi n’en nrayog ni ngad guyed ni fan e nge gel e athap rodad. Ba t’uf ni ngad yiluyed owchedad ko pi’ n’en ni bay yib nib ga’ fan ma dabiyog ni ngan guy e ngiyal’ ney. (Heb. 11:1; 12:1, 2) Ere gad ra weliy murung’agen ragag ban’en ndawori buch ni bay rogon ko athap rodad ni aram e yafas ni manemus. *
MANG E RA BUCH U M’ON NI NGE TABAB FARE RRAN ROK JEHOVAH?
3. (a) Mang e be yog e 1 Thessalonika 5:2, 3 nra buch boch nga m’on? (b) Mang e ra rin’ e pi tayugang’ ko am, ma mini’ e ra un ngorad?
3 Ke yoloy Paul murung’agen reb ko pi n’en ni bay yib ko fare babyor ni pi’ ngak piyu Thessalonika. (Mu beeg e 1 Thessalonika 5:2, 3.) Ke weliy murung’agen e “Rran rok Somol.” Re “Rran rok Somol” ney e ra tabab u nap’an ni yira gothey e pi yurba’ i teliw ni googsur ma ra m’ay u nap’an e Armageddon. Machane, u m’on ni nge tabab e re rran rok Jehovah nem ma pi tayugang’ ko am e yad ra yog ni “ke gapas ndariy ban’en nra buch!” Re n’ey e rayog ni nge buch ni taab yay ara boor yay. Ra lemnag e pi nam ni ke chugur ni nge yag ni ngar pithiged e magawon rorad nib ga’. Ma uw rogon e pi tayugang’ ko teliw? Ku yad bang ko fayleng, ere rayog ni ngar uned ko pi tayugang’ ko am nga rogned ni aram rogon. (Rev. 17:1, 2) Ere pi tayugang’ ko teliw e yad bod e pi profet ni googsur u Judah kakrom. Ke yog Jehovah u murung’agrad ni gaar: “Yad [be] gaar, ‘Gubin ban’en nib fel’ rogon,’ ni yug aram rogon ni dariy ban’en ni kab fel’ rogon.”—Jer. 6:14; 23:16, 17, BT.
4. Mang e n’en ni ke tamilang u wan’dad ndawori tamilang u wan’ yooren e girdi’?
4 Yugu demtrug ko mini’ e nge un i yog ni “ke gapas ndariy ban’en nra buch!” ma re n’ey e be micheg ni ke tabab fare rran rok Jehovah. Ere aram fan nrayog rok Paul ni nge yog ni gaar: “Pi walageg ni girdien Kristus, e dakumur pired u fithik’ e lumor, ere dabiyog ni ngam da’da’gad ko re Rran nem ni bod ba moro’ro’ ni mda’da’gad ngak. Ya gimed gubin ni kam manged girdien e tamilang ni gimed girdien e rran.” (1 Thess. 5:4, 5) Yooren e girdi’ e dawori tamilang u wan’rad fan e pi n’en ni be buch u fayleng e ngiyal’ ney, machane gadad e gad manang fan. Uw rogon ni nge lebug fare yiiy ni girdi’ e yad ra yog ni “ke gapas ndariy ban’en nra buch!”? Thingar da sonnaged mad guyed. Aram fan ni gad ra dugliy u lanin’dad ni “nguud pired ni gadad be od ma ba tamilangan’dad.”—1 Thess. 5:6; Zef. 3:8.
PI YURBA’ I TELIW NI GOOGSUR E DARUR NANGED NI YIRA KIREBNAGRAD
5. (a) Uw rogon ni nge tabab fare “gafgow” nib ga’? (b) Mini’ e en ni bod e “pilung” ni be lemnag ndariy e chirofen nra kireban’?
5 Mang e ra buch boch nga m’on ndawor ni guy? I weliy Paul ni gaar: “Ngiyal’ nem e ra gaar e girdi’ e ke gapas ndariy ban’en nra buch, ma yad ra da’da’ ni ke taw e riya’ ngorad.” Re riya’ ney ara mogothgoth e ra tabab u nap’an ni yira cham ngak urngin e pi yurba’ i teliw ni googsur. Be yog e Bible ni pi yurba’ i teliw ni googsur e aram fare Babylon nib Gilbuguwan ara fare pin ni ma pi’ ir ni “chuway’.” (Rev. 17:5, 6, 15) Nap’an ni yira cham ngak urngin e pi yurba’ i teliw ni googsur nib muun ngay e Kristiano ni googsur, ma aram e ke tabab fare “gafgow” nib ga’. (Matt. 24:21; 2 Thess. 2:8) Nap’an nra buch e re n’ey ma ra gin boor e girdi’ ngay. Mang fan? Ya ki mada’ ko ngiyal’ nem ma fare pin ni ma pi’ ir ni chuway’ e be lemnag ni ir e “pilung” ma ‘dariy e chirofen nra kireban’.’ Ke lemnag ndariy ban’en nra buch rok. Machane ka chingiyal’ nem ma ra nang nde puluw e n’en ni be lemnag. Yira gothey nrib pay ni bod ni “lan taareb e rran.”—Rev. 18:7, 8.
6. Mini’ e ra gothey e pi yurba’ i teliw ni googsur?
6 Thin rok Got e be dag ni fare “gamanman” ni “ragag e gagey rok” e ir e ra cham ngak fare pin ni ma pi’ ir ni chuway’. Fare babyor ni Revelation e be dag ni fare gamanman e aram fare United Nations (UN). Ma fa “ragag e gagey” e be yip’ fan urngin e pi am nu fayleng ni yad be ayuweg fare “gamanman nib row.” * (Rev. 17:3, 5, 11, 12) Uw rogon feni gel e cham nra tay? Pi am ni yad bang ko fare UN e yad ra iring e chugum rok faen ma pi’ ir ni chuway’, ma yad ra dag ngak e girdi’ feni kireb e ngongol rok, ma yad ra longuy e ufin u downgin “mi yad li’ ko nifiy ngem’.”—Mu beeg e Revelation 17:16.
7. Uw rogon ni nge tababnag fare “gamanman” e cham ngak fare pin?
7 Maku be dag e yiiy u Bible ko wuin e ra tabab e re cham ney. Ra gagiyegnag Jehovah e pi tayugang’ ko am ni ngar “ngongliyed e tin ni be finey,” ara n’en ni baadag ni ngar rin’ed, ni aram e ngar gotheyed e pi yurba’ i teliw ni googsur. (Rev. 17:17) Ma k’aring e pi yurba’ i teliw ni googsur ni nge yoor e mahl ma yad be yoornag e magawon ko fayleng. Ere, be lemnag e pi nam nra fel’ rogorad riy ni faanra ngar gotheyed fare pin ni ma pi’ ir ni chuway’. Bin riyul’ riy, e nap’an nra cham e pi tayugang’ ko am ko fare pin ni ma pi’ ir ni chuway’ ma yad ra lemnag ni yad be rin’ e tin nib m’agan’rad ngay. Machane, ra fanayrad Got ni ngar gotheyed urngin e pi yurba’ i teliw ni googsur. Ere, ra kirebnag e pi am e pi yurba’ i teliw ni googsur, ma yad gubin ni yad bang ko fare m’ag rok Satan, ma dabiyog ni nge ayuwegrad Satan.—Matt. 12:25, 26.
YIRA CHAM NGAK E GIRDI’ ROK GOT
8. Mang fare cham nra tay Gog u daken e but’ nu “Magog”?
8 Tomuren ni kan gothey e pi yurba’ i teliw ni googsur, ma pi tapigpig rok Got e ka yad be par “ni dariy ban’en ni be buch rorad” machane bod ni yad be par u bang ni “dariy e yoror nge rungrung riy.” (Ezek. 38:11, 14, BT) Mang e ra buch rok e pi tapigpig rok Jehovah ney ni ka yad be ulul ko pigpig ngak Got ni gowa dariy ban’en ni be yororiyrad? Be m’ug riy ni ‘boor’ e girdi’ ni yad ra cham ngorad. Be yog e Bible nra cham Gog u daken e “but’ nu Magog.” (Mu beeg e Ezekiel 38:2, 15, 16, BT.) Uw rogon u wan’dad e re cham nem?
9. (a) Mang e n’en nrib ga’ fan u wan’ e Kristiano? (b) Mang e pi n’en nthingar da rin’ed ni nge yag ni ngad gelnaged e michan’ rodad?
9 Gad manang ni yira cham ngak e girdi’ rok Got, machane susun dabi magafan’dad nib gel. Ba ga’ fan ni ngad mageygad ni gad ba fas, machane n’en th’abi ga’ fan u wan’dad e ngan thothupnag fithingan Got me tamilang u wan’ e girdi’ ni ir e en th’abi tolang. Boor ko 60 yay ni ke yog Jehovah ni gaar: “Bayi mich u wan’rad ni Gag Somol.” (Ezek. 6:7) Ri gad baadag ni ngad guyed ko uw rogon ni nge lebug e re yiiy rok Ezekiel ney. Ma be pagan’dad ni manang Jehovah rogon ni “nge ayuweg e piin ni yad ma fol rok ko gafgow ni ma yib ngorad.” (2 Pet. 2:9) Ngiyal’ ney e ngaud athamgilgad ni ngad gelnaged e michan’ rodad ya nge yag ni ngad pared ni gad ba yul’yul’ ngak Jehovah ni yugu demtrug e skeng nra yib ngodad. Mang e thingar da rin’ed? Thingar da meybilgad, ma ngad filed mad fal’eged i lemnag e Thin rok Got, ma ngad machibnaged fare thin nib fel’ ngak e girdi’. Gad ra rin’ ni aram rogon, ma gad be gelnag e athap rodad ko yafas ni manemus, ni nge bod ba “angkar.”—Heb. 6:19; Ps. 25:21.
BA T’UF NI NGE NANG E PI NAM KO MINI’ JEHOVAH
10, 11. Uw rogon ni nge tabab e Armageddon, ma mang e ra buch u nap’an e re mahl nem?
10 Mang e n’en nra buch u nap’an ni yira cham ngak e pi tapigpig rok Jehovah? Ra fanay Jehovah Jesus nge pi engel rok u tharmiy ni ngar ayuweged e girdi’ rok. (Rev. 19:11-16) Ireray fare “mahl ni fan ko fare rran ni ba ga’ fan, ni Rran rok Got ni Gubin ma Rayog Rok” ni ka nog e Armageddon ngay.—Rev. 16:14, 16.
11 Ke weliy Jehovah murung’agen e re mahl nem u daken Ezekiel ni gaar: “Bay gu k’aring e marus ngak [Gog] ko urngin e pi n’en ni yima rus ngay. I Gag Somol ni Th’abi Tolang e gu be non. Pi salthaw rok e bay i mang yad e ra chelgad ngar yip’ed e sayden rorad ngorad.” Ma piin ni bay u ba’ rok Satan e ra balyangan’rad mar lied yad ngar m’ad. Ke yog Jehovah ni gaar: “N’uw ni gel nge ayis ni be mul u lang, ni ba muun e nifiy nge sulfur ngay, ni bay i map’ nga daken nge nga daken e raba’ i salthaw rok nge nga daken e pi nam ni yoor ni yad ba fol ngak.” (Ezek. 38:21, 22, BT) Ma tomur riy ma mang e ra buch?
12. Mang e ra nang e pi nam?
12 Thingari nang e pi nam ni yira thang e pogofan rorad ya bochan Jehovah e ke yog ni ngan rin’. Ma aram e girdi’ ni yad bay u ba’ rok Satan e rayog ni nga rogned e thin ni ke yog piyu Egypt u nap’an ni kar lol’iged piyu Israel ni lungurad: “Be cham Somol ngodad ni pa’rad”! (Ex. 14:25) Arrogon, ra nang e pi nam ko mini’ Jehovah. (Mu beeg e Ezekiel 38:23.) Wuin e ra tabab ni nge buch e pi n’ey?
DAKURIY YUGU REB E AM NIB GEL LUNGUN U FAYLENG NRA SUM
13. Mang e gad ra nang u murung’agen fa gin lal ko fare liyos ni ke weliy Daniel murung’agen?
13 Reb e yiiy ni bay ko babyor rok Daniel e ra ayuwegdad ngad nanged feni chugur fare gafgow nib ga’. Ke weliy Daniel murung’agen reb e liyos ni bod yaan e girdi’ ni kan ngongliy u boor mit e wasey. (Dan. 2:28, 31-33) Re n’em e be yip’ fan e pi am nib gel lungurad u fayleng ma kar rin’ed boch ban’en ngak e girdi’ rok Got ni kab kakrom i yib. Pi nam nem e aram yu Babylon, nge Medo-Persia, nge Greece, nge Roma. Ma bin tomur e aram e am nib gel lungun u fayleng e ngiyal’ ney. Ma kad nanged ko yiiy rok Daniel ni rifrifen nge buguli ay fare liyos e be yip’ fan fa bin tomur e am nib gel lungun u fayleng. Nap’an e Bin Som’on e Mahl ko Fayleng, ma yu Ngalis nge yu Meriken e kar maruwelgow u taabang. Ere, fa gin lal ko fare liyos ni ke guy Daniel e aram e yu Ngalis nge yu Meriken ma ra mang ba am nib Gel Lungun u fayleng. Rifrifen ay e aram e gin tomur ko fare liyos. Ere, re n’ey e be dag ni dakuriy yugu reb e am nra sum ni nge mang am nib gel lungun u fayleng. Rifrifen nge buguli ay fare liyos ni kan ngongliy ko wasey nib maathuk e but’ ngay e be yip’ fan ni bay ban’en ko fare Am ni yu Ngalis nge yu Meriken nib meewar.
14. Bin ngan e am e ra par nib gel lungun u fayleng u nap’an nra yib fare Armageddon?
14 U lan e re yiiy ney, e yibe weliy murung’agen e malang ni mul u taban bangi war nib tolang ara burey ni be yip’ fan Gil’ilungun Got ni ke tabab ko gagiyeg ko duw ni 1914. Re burey ney e be yip’ fan mat’awun Jehovah ko gagiyeg. Dabki n’uw nap’an me aw e re malang ney nga rifrifen ay fare liyos. Nap’an e Armageddon ma yira bilbilig rifrifen ay nge urngin yang ko fare liyos. (Mu beeg e Daniel 2:44, 45.) Ere, nap’an nra yib fare Armageddon ma yu Ngalis nge yu Meriken e ka be par ni ir e am nib gel lungun u fayleng. Ri gad baadag ni ngad guyed u nap’an nra lebug e re yiiy ney! * Machane, mang e ra rin’ Jehovah ngak Satan?
MANG E RA BUCH ROK PILUNGEN E TOOGOR ROK GOT?
15. Mang e ra buch rok Satan nge pi moonyan’ rok u tomuren e Armageddon?
15 Som’on e ra guy Satan ni yira gothey e ulung rok u fayleng ni polo’. Tomur riy, maku bay ban’en nra buch rok Satan. Be weliy apostal John u murung’agen e re n’ey. (Mu beeg e Revelation 20:1-3.) Jesus Kristus ni ir fare “engel . . . ni bay e kiy ko fare low nib toar u pa’” e ra yin’ Satan nge pi moonyan’ rok nga lan fare low nib toar ma yad ra par u rom u lan biyu’ e duw. (Luke 8:30, 31; 1 John 3:8) Ere ireray e tayim ni yira tabab ni ngan pirdiiy lolugen fare porchoyog. *—Gen. 3:15.
16. Nap’an ni yira yin’ Satan nga lan “fare low nib toar” ma mang e ra buch rok?
16 Mang “fare low nib toar” ni Satan nge pi moonyan’ rok e yira yin’rad ngay? Ireray e gin ndariy be’ nrayog ni nge taw ngay, ya goo Jehovah nge fare engel ni “bay e kiy ko fare low nib toar u pa’.” Mu rom, e ri dakuriy ban’en nrayog ni nge rin’, ere “dabkiyog ni nge bannag girdien e pi nam.” Satan e “bod ba layon ni be tolul,” ma ra ngiyal’ nem ma dabkiyog ni nge rin’ ban’en!—1 Pet. 5:8.
BOCH BAN’EN NRA BUCH U M’ON NI NGE YIB E GAPAS
17, 18. (a) Mang e pi n’en ni kad weliyed ndawori buch? (b) Mang e ra tabab u tomuren ni ke buch e pi n’ey?
17 Ke chugur ni nge buch boch ban’en ni yira gin ngay mab ga’ fan. Gad baadag ni ngad guyed ko uw rogon ni nge lebug fare yiiy nra gaar e girdi’, “Ke gapas ndariy ban’en nra buch!” Ma gad ra guy u nap’an ni yira gothey fare Babylon nib Gilbuguwan, ma ra cham Gog nu Magog, nge fare mahl ni Armageddon, ma yira yin’ Satan nge pi moonyan’ rok nga lan fare low nib toar. Ma tomur riy, ma urngin e tin nib kireb e dakuriy. Ma nap’an e Gagiyeg rok Kristus u Lan fare Biyu’ i Duw ma ra thil rarogon e par rodad. Ngiyal’ nem ma gad ra par “u fithik’ e gapas.”—Ps. 37:10, 11.
18 U lan e re article ney, ma kad filed murung’agen lal ban’en “ndanir guy nga owchey” ara boch ban’en ndawori buch. Ma ka bay boch ban’en ni ku “ndanir guy nga owchey” ni gad baadag ni ngad ‘guyed.’ Yira weliy murung’agen e pi n’ey ko bin migid e article.
[Footnotes]
^ Re article ney nge bin migid e ra weliy ragag ban’en ni bay yib.
^ Mu guy fare Revelation—Its Grand Climax at Hand! ko page 251-258 ni thin nu Meriken.
^ Fare yiiy ni bay ko Daniel 2:44 e be yog ni Gil’ilungun Got e ra “thirif u but’ urngin e pi pilung nem nge gagiyeg ni yad be tay.” Re yiiy ney e goo pi am ni kan fanathinnag ko fare liyos e ir e be weliy murung’agen. Machane thin nu Bible e ku be yog nra muulung e “pi pilung nu fayleng ni polo’” nga taabang ni ngar chamgad ngak Jehovah u nap’an fare “rran rok Got ni Gubin ma Rayog Rok.” (Rev. 16:14; 19:19-21) Ere gathi goo pi am ni kan fanathinnag ko fare liyos e yira thangrad u nap’an e Armageddon, ya kub muun gubin e am ko girdi’ ngay.
^ U nap’an nra m’ay fare biyu’ e duw ma yira yin’ Satan nge pi moonyan’ rok “nga lan fare lipath i nifiy nge sulfur” ma ireray e tayim ni gowa kan pirdiiy lolugen fare porchoyog ni polo’.”—Rev. 20:7-10; Matt. 25:41
[Study Questions]
[Box on page 8]
LAL BAN’EN NI BAY YIB:
1 Ra gaar e girdi’ “Ke gapas ndariy ban’en nra buch!”
2 Ra cham e pi nam mar gotheyed fare “Babylon nib Gilbuguwan”
3 Yira cham ngak e girdi’ rok Got
4 Mahl ni Armageddon
5 Yira yin’ Satan nge pi moonyan’ rok nga lan fare low nib toar
