Chepin e Girdi’, Ma Gathi Yat

“Kug fal’eg i gayiy murung’agen e pi n’ey ni gubin aram ko tabolngin.”​—LUKE 1:3.

UW ROGON NIB THIL E BIBLE? Yat nge chep e ma weliy murung’agen boch ban’en nib fel’, machane dan weliy murung’agen e gin ni buch ban’en riy, nge ngiyal’, nge girdi’ ni ur moyed e ngiyal’ nem. Ma Bible e ba thil, ya boor ban’en ni be weliy nib tamilang u murung’agen chepin e girdi’ nib muun fithingan e girdi’ ngay ni ur moyed e ngiyal’ nem. Re n’ey e ra ayuweg e girdi’ ni nge pagan’rad ni “def ko thin rom e ba riyul’.”​—Psalm 119:160, NW.

BOD ROGON NI: Be yog e Bible ni “yib Nebukadnezzar nga Jerusalem . . . me fek Nebukadnezzar Jehoyakin [Pilung nu Judah] nga Babylon ni ke kalbus.” Tomur riy “u lan e re duw ni pilung Evil-merodak nu Babylonia, me runguy Jehoyakin ni Pilung nu Judah nge pag u kalbus.” Me munmun “ma gubin e rran u n’umngin nap’an e yafas rok [Jehoyakin] ni un pi’ e salpiy ni nge yog ngak.”​—2 Kings 24:11, 15; 25:27-30, BT.

NEN NI KE PIRIEG E PIIN NI YAD MA GAY MURUNG’AGEN BOCH BAN’EN KAKROM: Piin ni yad ma gay murung’agen boch ban’en kakrom e kar pirieged boch e babyor ko am u nap’an Nebukadnezzar II ni Pilung u fithik’ e pi naun nu Babylon ni ke puth. Pi babyor nem e bay riy murung’agen chi urngin e ggan ni ngan pi ngak e pi kalbus nge piin yad bang ko fare tabinaw ko fare pilung. Pi babyor nem e ku bay fithingan “Yaukin [Jehoyakin],” ni ir e “pilung ko fare nam nu Yahud (Judah),” nge chon e tabinaw rok. Ma uw rogon Evil-merodak ni ir faanem nib migid ngak Nebukadnezzar ni Pilung? Ni pirieg tafen ban’en nni ngongliy ko but’ ni kan ker e yol nga downgin ko fare mach nib chugur nga Susa, ma yol ni bay ko re n’em e gaar: “Tafen e Pilung ni aram e Amil-Marduk [Evil-merodak], ni Pilung nu Babylon, ni fak Nebukadnezzar.”

MANG E GA BE LEMNAG? Ku bay reb e babyor ko teliw ni ma weliy murung’agen chepin e girdi’ kakrom mab puluw e thin riy mab tamilang, fa? Ara Bible e ba thil nga yugu boch e babyor?

[Blurb on page 5]

“Thin ni bay ko Bible e be weliy e ngiyal’ nge gin’en ni buch boch ban’en riy, mab puluw e thin riy, nrayog ni ngan pagan’uy ngay ko thin u yugu boch e babyor kakrom.”​—A SCIENTIFIC INVESTIGATION OF THE OLD TESTAMENT, BY ROBERT D. WILSON

[Picture on page 5]

BABYOR KO AM NI BE WELIY MURUNG’AGEN JEHOYAKIN NI PILUNG NU JUDAH

[Picture Credit Line on page 5]

© bpk, Berlin/Vorderasiatisches Museum, SMB/Olaf M. Tessmer/Art Resource, NY