Ba Ga’ Fan ni Ngan Nang e Pi Fulweg, Fa?

“Ma bay mu nanged e tin riyul’, ma tin riyul’ e ir e bayi ayuwegmed nge dab kum pired ni gimed e sib.”​—JOHN 8:32.

BIBLE e ireram e gin ni ga ra pirieg e tin riyul’ riy nra chuwegdad ni dab da manged sib ko machib nde riyul’ u murung’agen Jesus. Ba ga’ fan e n’en nib mich u wan’dad u murung’agen? Arrogon , ba ga’ fan. Ba ga’ fan u wan’ Jehovah. Maku ba ga’ fan u wan’ Jesus. Ere susun ngki ga’ fan u wan’dad.

● Mang nib ga’ fan u wan’ Jehovah? Bin nib ga’ fan e “Got e ba t’uf e girdi’ rok.” (1 John 4:8) Baadag Jehovah ni ngad pared ni gad ba felfelan’ ni manemus. I yog Jesus ni gaar: ‘Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak . . . e ke yog e yafos ndariy n’umngin nap’an ngorad.’ (John 3:16) Ke pi’ Got Fak ni nge mang En ni nge Biyuliydad me bing e kanawo’ nrayog ni ngad pared u Paradis u fayleng ni manemus nrogon nib m’agan’ ngay ko tabolngin. (Genesis 1:28) Baadag Got ni nge pi’ fare tow’ath ni yafas ni manemus ko piin ni kar filed e tin riyul’ u murung’agen Fak mar ngongolgad nrogon nib m’agan’ ngay.​—Roma 6:23.

● Mang nib ga’ fan u wan’ Jesus? Ba t’uf urngin e girdi’ rok Jesus. Ke dag rogon ni gad ba t’uf rok u nap’an ni ke pi’ ir ni maligach ni nge yim’ ni fan ngodad. (John 15:13) Ya manang e n’en ni nge rin’ ni ireram kanawoen me thapegdad ngak Got. (John 14:6) Ere dab da gingad ngay ni baadag Jesus ni nge guy boor e girdi’ ni ra yib angin fare biyul ni pi’ ngorad, fa? Aram fan ni yog ngak e tin riyul’ i gachalpen ni ngar skulnaged e girdi’ u ga’ngin yang e fayleng u murung’agen e n’en nib m’agan’ Got ngay.​—Matthew 24:14; 28:19, 20.

● Mang ni nge ga’ fan u wan’dad? Mu lemnag boch ban’en ni dabisiy ni ba ga’ fan u wan’um, ni bod rogon ni nge par fithik’ i dowam nib fel’ nge rogon e tabinaw rom. Ga baadag ni nge fel’ rarogon e yafas rom nge rarogon e yafas ko girdi’ nib t’uf rom? Jehovah e ke pi’ ngom nge piin ni yad ba t’uf rom fare athap ni ngan par ndariy e m’ar nge yafas ni manemus u lan e bin nib beech e fayleng ni dariy e amith nge gafgow riy u daken Jesus. (Psalm 37:11, 29; Revelation 21:3, 4) Ri ga baadag e binem e athap, fa? Faanra arrogon ma bay ban’en nib t’uf ni ngam rin’.

Mu sap bayay ko fare thin nu Bible ni kan uneg nge kenggin e biney e article: “Ma bay mu nanged e tin riyul’, ma tin riyul’ e ir e bayi ayuwegmed nge dab kum pared ni gimed e sib.” Tin riyul’ u murung’agen Jesus nge maruwel rok ni nge lebguy e n’en nib m’agan’ Got ngay ni nge chuwegdad ni nga dabkud manged sib ko denen nge yam’. Ma faanra dab kum mang e sib ma ba t’uf ni ngam ‘nang e tin riyul’.’ Mang ni dab mu fil boch ban’en u murung’agen e tin riyul’ nge rogon nrayog ni nge yib angin ngom nge tabinaw rom? Pi Mich Rok Jehovah e yad ra felfelan’ ni ngar ayuweged gur.