Mang Fan ni Ngad Paged Gelngin Got nib Thothup Nga i Pow’iydad?

“Gelngim nib thothup e ba fel’; manga yigi pow’iyeg u lan fare nam ni tin nib mat’aw e ngongol e yima rin’ riy.”​—PS. 143:10, NW.

1. Uw rogon ma gelngin ban’en e rayog ni nge pow’iy be’?

 KA AM fanay e compass bayay ni nge pow’iyem ko gin ni ngam sor ngay? Compass e ban’en ni yima fanay ni nge pow’iyey ko gin ni ngan sor ngay. Bay e chaygar riy ni ma par nib sap ko lel’uch. Re chaygar nem e bay e gamig riy ni ir e ma mithmitheg. Kab kafram i yib ni ma fanay e piin ni yad ma milekag e compass ni nge pow’iyrad ko milekag ni yad ma tay u arow ngu maday.

2, 3. (a) Mang reb e gelngin ni maruwel Jehovah ngay kakrom? (b) Uw rogon ni kad nanged nrayog ni nge pow’iydad gelngin Got nib thothup e ngiyal’ ney?

² Ku bay reb e gelngin ni dabiyog ni ngan guy nib ga’ fan ni ngki pow’iydad. Mang e re n’em? Ireram e re gelngin ni kan weliy murung’agen u tabolngin e Bible. Be weliy e Genesis murung’agen e n’en ni rin’ Jehovah kakrom ni gaar: “Aram ko tabolngin ni tabab Got i sunmiy e fayleng nge urngin ban’en ni bay u lan e lang.” Ma gad manang ni bay reb e gelngin nib gel ni maruwel ngay nge sunmiy urngin e pi n’ey, ya be gaar e Bible: “Ma [“gelngin Got nib thothup,” NW] e ke gapopow nga daken e day.” (Gen. 1:1, 2, BT) Mang e re gelngin nem ni i maruwel Got ngay? Aram gelngin nib thothup. Ri gad be pining e magar ngak Jehovah ni ke fanay e re gelngin nem ni nge sunmiydad nge gubin e tin ni ka bay ban’en.​—Job 33:4; Ps. 104:30.

³ Gad manang ni maruwel Jehovah nga gelngin nib thothup ni nge sunmiydad. Machane gur, rayog ni nge pow’iydad e re gelngin ney u yugu boch e kanawo’? I yog Jesus nrayog, ya gaar ngak pi gachalpen: “Ngiyal’ nra yib [“gelngin Got nib thothup,” NW] . . . e bayi pow’iymed ngam nanged urngin e tin riyul’.” (John 16:13) Ere, uw rogon ma gad nang ko mang e re gelngin ney, ma mang fan ni ngad adaged ni nga i pow’iydad?

Rarogon Gelngin Got nib Thothup

4, 5. (a) Uw rogon gelngin Got nib thothup u wan’ e piin nib mich e Trinitas u wan’rad? (b) Uw rogon ni ga ra weliy e tin riyul’ u rarogon gelngin Got nib thothup?

⁴ Dabisiy ni bay boch e girdi’ ni ga ma mada’nag u nap’an e machib nib mich u wan’ e Kan ni Thothup ni aram e n’en ni bay u lan e Bible ni thin nu Waab. Piin nib mich e Trinitas u wan’rad e yad ma lemnag nre n’ey e ba kan ni taareb rogorow Got ni Chitamangiy.​—1 Kor. 8:6.

⁵ Ere, mang e re n’em ni kan pilyeg ni Kan ni Thothup? Thin ni bay ko footnote ko Genesis 1:2 ko ken nib beech e Bible ni thin nu Waab e be gaar: “Kan Nthothup rok Got; ara fare gelngin Got; ara nifeng ni yib rok Got.” Fare bugithin ni Hebrew ni ruʹach ni kan fanay u roy e kun pilyeg nga boch e thin ni be yip’ fan reb e gelngin ni ma maruwel ndabiyog ni ngan guy. Gelngin Got nib thothup e dabiyog ni ngan guy machane bay gelngin ni ma maruwel, ni bod e nifeng ndabiyog ni ngan guy machane rayog ni ngan thamiy. Re gelngin ney e ma yib rok Got ngak e girdi’ ara boch ban’en ya nge lebug e tin nib m’agan’ ngay. Ere, gur ba mo’maw’ ni nge mich u wan’uy nre gelngin ney nrib gel e ke yib rok Got ni Gubin Ma Rayog Rok? Danga’.​—Mu beeg e Isaiah 40:12, 13.

6. Mang e wenignag David ngak Jehovah ni nge rin’?

⁶ Rayog ni nga i fanay Jehovah gelngin nib thothup ni nge pow’iydad, fa? I micheg David ni psalmist ni gaar: “Bay gu fil ngom e kanawo’ ni ir e ngam man riy; bay gog ngom e tin ni ngam rin’  ma bay gu fonownigem.” (Ps. 32:8) Aram e n’en ni baadag David, fa? Arrogon, ya meybil ngak Jehovah ni gaar: “Mu fil ngog rogon ni nggu rin’ e tin nib m’agan’um ngay, ya gur e Got rog. Gelngim nib thothup e ba fel’; manga yigi pow’iyeg u lan fare nam ni tin nib mat’aw e ngongol e yima rin’ riy.” (Ps. 143:10, NW) Ku er rogodad ni susun e ngkud adaged ni nga i pow’iydad gelngin Got nib thothup. Mang fan? Baaray aningeg i fan.

Dabiyog ni Ngad Pow’iyed Gadad

7, 8. (a) Mang fan ndabiyog ni ngad pow’iyed gadad ndabi ayuwegdad Got? (b) Mu susunnag fan nde fel’ ni ngad pow’iyed gadad u lan e re m’ag nib kireb ney.

⁷ Bin som’on i fan ni susun e ngad adaged ni nga i pow’iydad gelngin Got nib thothup e bochan ndabiyog ni ngad pow’iyed gadad. Ra “ngan pow’iy” be’ ma be yip’ fan ni “ngan dag ngak e bin nib mat’aw e kanawo’ ni nge lek.” Machane, de sunmiydad Jehovah ni ngaud pow’iyed gadad. Ma bochan dawor da flontgad, ma aram fan ni gad ma oloboch u nap’an ni gad ra guy rogon ni ngad pow’iyed gadad. I yoloy Jeremiah ni profet rok Jehovah ni gaar: “Somol, gu manang ni dariy bagamad ni ir e ga’ ko gin nge sor e yafos rok ngay; dariy be’ ni bay gafan e yafos rok u pa’.” (Jer. 10:23, BT) Mang fan ni aray rogon? Ke yog Got u daken Jeremiah ni gaar: “Mini’ e rayog ni nge nang fan laniyan’ e girdi’? Dakuriy yugu reb e ban’en ni aram feni sasaliyeb.”​—Jer. 17:9, BT; Matt. 15:19.

⁸ Mu susunnag be’ ni be yan u fithik’ bangi gerger nde nang fan ara be’ ni be milekag u maday. De fel’ ni nge milekag ni goo ir ndabi fek e compass. Ya faanra de nang rogon ni nge par nib fas u bangi ban’en ni aram rogon maku de nang rogon ni nge pirieg kanawoen, ma rayog ni nge magawon. Ere, ku aram rogon be’ ni be lemnag nrayog ni nge pow’iy ir u lan e re fayleng nib kireb ney ndabi pag Got ni nge dag ngak e bin nib mat’aw e kanawo’ ni nge yan riy. Kemus nrogon me yog ni ngad pared ko re m’ag nib kireb ney e ngad ninged e ayuw ngak Jehovah ni bod David ni gaar: “Gubin ngiyal’ ni gu ma yan u kanawoem, ma dawor gu chef riy nga orel ba ngiyal’.” (Ps. 17:5, BT; 23:3) Uw rogon me yog ni ngan pow’iydad ni aray rogon?

9. Uw rogon nrayog ni nge pow’iydad gelngin Got nib thothup nrogon ni bay ko sasing ko page 18?

⁹ Faanra ba sobut’an’dad ma gad baadag ni ngaud taga’gad ngak Jehovah, ma aram e ra pi’ gelngin nib thothup ni nga i pow’iydad. Uw rogon nra ayuwegdad e re gelngin nem? I yog Jesus ngak pi gachalpen nra ayuwegrad gelngin Got nib thothup nge mit ngorad urngin ban’en ni ke fil ngorad. (John 14:26) Faanra ud filed e Thin rok Got nge pi n’en ni i fil Kristus ni gubin ngiyal’, ma gad be meybil, ma aram e rayog ni nge ayuwegdad gelngin Got nib thothup ni ngad nanged fan e gonop rok Jehovah nib toar, ya nge yog ni ud folgad rok. (1 Kor. 2:10) Maku reb e nap’an nra buch ban’en rodad nda ud lemnaged nra buch, ma ra ayuwegdad gelngin Got nib thothup ni ngad nanged e n’en ni ngad rin’ed, ya ra yibnag boch e kenggin e motochiyel nu Bible ngan’dad ni kad filed, miki ayuwegdad u rogon ni ngad maruwelgad ngay ya nge yog ni ngad dugliyed e n’en nib fel’ ni ngad rin’ed.

 I Pow’iy Gelngin Got nib Thothup Jesus

10, 11. Mang e lemnag Jesus ni nge rin’ gelngin Got nib thothup ngak, ma uw rogon ni ayuweg?

¹⁰ Bin l’agruw i fan ni susun e ngad adaged ni nga i pow’iydad gelngin Got nib thothup e bochan ni aram e n’en ni i pow’iy Fak Got. U m’on ni yib nga fayleng, ma manang fare yiiy ni gaar: “Fare [“gelngin Got nib thothup,” NW] e ba’ rok ni bay i pi’ e gonop ngak, nge llowan’ nge salap ni nge maruwel ngay ngi i gagiyegnag e tirok e girdi’ ngay. Bayi nang e tin nib m’agan’ Somol ngay mi i par ni bay madgun u wan’.” (Isa. 11:2) Ra mo’maw’ e par rok Jesus u fayleng. Ere, mu lemnag gelngin nri baadag ni nge ayuweg gelngin Got nib thothup.

¹¹ I riyul’ e thin rok Jehovah. Be yog e Gospel e n’en ni buch u tomuren ni kafin taufenag Jesus ni gaar: “Me sul Jesus u Jordan nib sug [“nga gelngin Got nib thothup,” NW], me mang [“gelngin Got nib thothup,” NW] e pow’iy nga daken e ted.” (Luke 4:1) Nap’an ni bay Jesus u rom ni ke pag e abich, ma be meybil, ma be fal’eg i lemnag boch ban’en, ma dabisiy ni i yog Jehovah boch ban’en ngak ma be ayuweg ko pi n’en nra buch rok boch nga m’on. I gagiyegnag gelngin Got nib thothup laniyan’ nge gum’irchaen, me pow’iy e lem rok nge pi n’en ni i dugliy. Ere, angin ni yib riy e gubin ban’en ni i buch rok, ma manang ko mang e nge rin’ ngay nrogon ni baadag e Chitamangin.

12. Mang fan nib t’uf ni ngad ninged gelngin Got nib thothup ni nga i pow’iydad?

¹² Bochan ni manang Jesus gelngin e ayuw ni i tay gelngin Got nib thothup ngak, ma aram fan ni pi’ e athamgil nga laniyan’ pi gachalpen ni ngaur ninged gelngin Got nib thothup ma yad be pag ni nga i pow’iyrad. (Mu beeg e Luke 11:9-13. a) Mang fan nrib t’uf ni ngad ninged gelngin Got nib thothup ni nge pow’iydad? Bochan nrayog ni nge pingeg lanin’dad nge bod laniyan’ Kristus. (Rom. 12:2; 1 Kor. 2:16) Faan gad ra pag gelngin Got nib thothup ni nge pow’iydad, ma aram e rayog ni ngaud lemgad ni bod Kristus mu ud folwokgad rok.​—1 Pet. 2:21.

Lem nu Fayleng e Rayog ni nge Pow’iydad nga Bang nib Kireb

13. Mang e lem nu fayleng, ma mang e ma k’aring e girdi’ ni ngar rin’ed?

¹³ Bin dalip i fan ni ngad adaged ni nga i pow’iydad gelngin Got nib thothup e bochan nrayog ni nge pow’iydad e lem nu fayleng nga bang nib kireb. Re lem ney e be gagiyegnag boor e girdi’ nu fayleng e ngiyal’ ney, ma ma pow’iyrad ni ngaur ngongolgad nib togopluw nga rogon ni ma pow’iyey gelngin Got nib thothup. Lem nu fayleng e der ma ayuweg e girdi’ ni ngaur lemgad ni bod Kristus, ya ma k’aringrad ni ngaur lemgad ma yad be ngongol ni bod Satan ni ir e be gagiyegnag e re fayleng ney. (Mu beeg e Efesus 2:1-3; b Titus 3:3.) Faanra pag be’ ir ko re lem ney nga i gagiyegnag nga i rin’ e tin ni be ar’arnag,  ma wenegan nra yib riy ngak e aram e dabi un nga Gil’ilungun Got.​—Gal. 5:19-21.

14, 15. Uw rogon ni ngad togopuluwgad ko lem nu fayleng?

¹⁴ Ke pi’ Jehovah boch ban’en nra ayuwegdad ni ngad togopuluwgad ko lem nu fayleng. I yog apostal Paul ni ‘ngad taab girdi’gad ngak Somol ngi i gelnagdad nga gelngin nrib gel . . . ya nge taw ko chirofen ni ke taw e kireb riy, ma rayog ni ngad ayuweged gadad rok e toogor rodad ni be cham ngodad.’ (Efe. 6:10, 13) Ma ayuwegdad Jehovah u daken gelngin nib thothup ya nge yog nda togopuluwgad ngak Satan u nap’an ni be guy rogon ni nge pow’iydad nga bang nib kireb. (Rev. 12:9) Ba gel e lem nu fayleng, ere dabiyog ni ngar da siyeged ni polo’. Machane rayog ni ngad gelgad ngay ni bochan e ba gel gelngin Got nib thothup, ma rayog ni nge ayuwegdad.

¹⁵ I weliy apostal Peter murung’agen e piin ni kar digeyed e tin riyul’ u nap’an e bin som’on e chibog ni gaar: “Kar paged fare pa’ i kanawo’ nib k’iy kar olobochgad.” (2 Pet. 2:15) Ri gad ba felfelan’ ni “gathi lem nu roy u fayleng e ir e ke yog ngodad; ya [“gelngin Got nib thothup,” NW] ni Got e l’og e ir e ke yog ngodad.” (1 Kor. 2:12) Faan gad ra pag gelngin Got nib thothup ni nga i pow’iydad ma gad be maruwel ko pi n’en ni ke pi’ Jehovah nra ayuweg e tha’ u thildad ngak, ma aram e rayog ni ngad rin’ed e tin nib mat’aw ma gad siyeg e lem ko re fayleng nib kireb ney.​—Gal.  5:16.

Gelngin Got nib Thothup e Ma Yib Wom’engin nib Fel’

16. Mang wom’engin e rayog ni nge sunumeg gelngin Got nib thothup u lanin’dad?

¹⁶ Bin aningeg i fan ni ngad adaged ni nge pow’iydad gelngin Got nib thothup e bochan ni ma ayuweg e piin ni ma pow’iyrad ni nge m’ug wom’engin ko ngongol rorad. (Mu beeg e Galatia  5:22, 23. c) Mini’ e arodad ndabun ni nge gel e t’ufeg rok, nge felfelan’, me gapas thilrad boch e girdi’? Mini’ e arodad ndabun ni nge nang rogon ni nga i gum’an’, ma be gol, ma be rin’ e tin nib fel’ ngak e girdi’? Mini’ e arodad ndabi ayuweg e michan’ nib gel, nge sumunguy, nge t’ar laniyan’? Gelngin Got nib thothup e ma sunumeg u lanin’dad boch e fel’ngin nra yib angin ngodad, nge chon e tabinaw rodad, nge girdi’ u lan e ulung. Ra nge m’ug e re wom’engin ney ko ngongol rodad ma ba t’uf ni ngad maruwelgad nib gel, ya gubin ngiyal’ nib t’uf ni ngad maruweliyed ni nge yog ngodad miki m’ug ko ngongol rodad.

17. Uw rogon ni ngad maruweliyed ni nga i m’ug wom’engin gelngin Got nib thothup ko ngongol rodad?

¹⁷ Ere gad ba gonop ni ngad fal’eged i yaliyed gadad ngad guyed ko rriyul’ ni be m’ug ko thin nge ngongol rodad ni be pow’iydad gelngin Got nib thothup ma be m’ug wom’engin ko ngongol rodad fa danga’. (2 Kor. 13:5a; Gal. 5:25) Faanra kad guyed nib t’uf ni ngad maruweliyed boch e fel’ngin ni ma sunumeg wom’engin gelngin Got nib thothup, ma aram e rayog ni ngkud gayed boch e kanawo’ nrayog ni nge pow’iydad riy ya nge yog ni m’ug e pi n’ey ko ngongol rodad. Rogon ni ngad rin’ed e re n’ey e aram e ngad filed murung’agen e pi fel’ngin ney u lan e Bible nge pi babyor rodad. Faan gad ra rin’ ni aray rogon ma aram e rayog ni ngad nanged ko uw rogon ni nga i m’ug wom’engin gelngin Got nib thothup ko ngongol rodad u gubin e rran ma gad athamgil ni ngad folgad riy. Nap’an ni gad ra guy angin gelngin Got nib thothup ni be yib ngodad nge pi walagdad ni Kristiano, ma aram e rayog ni ngari tamilang u wan’dad fan nib t’uf ni nga i pow’iydad.

Ga Be Pag Gelngin Got nib Thothup ni Nga i Pow’iyem, Fa?

18. Mang e gad ra fil rok Jesus u rogon ni i pag gelngin Got nib thothup nga i pow’iy?

¹⁸ Bochan ni Jesus e ir e en nib “salap i maruweliy ban’en” ni i ayuweg Got ni ngar sunumiyew urngin ban’en ni bay u palpalth’ib, ma aram fan ni manang urngin ban’en u murung’agen fare gamig ni ma ayuweg e girdi’ u nap’an ni yad be fanay e compass. (Prov. 8:30; John 1:3) Dariy e mich riy u Bible ni i fanay Jesus e re gelngin nem ni nge pow’iy u nap’an ni immoy u fayleng. Machane, be yog ni i ayuweg gelngin Got nib thothup u nap’an ni immoy u fayleng nib girdi’. I pag e re gelngin nem ni nge pow’iy me ngongol nib puluw ngay. (Mark 1:12, 13; Luke 4:14) Ku er rogom, fa?

19. Mang e thingar da rin’ed ma aram e rayog ni nga i pow’iydad gelngin Got nib thothup?

¹⁹ Ngiyal’ ney e ka ma pow’iy gelngin Got nib thothup e piin ni yad baadag ni nge pow’iyrad. Ere uw rogon ni ngam pag nge pow’iyem ko bin nib mat’aw e kanawo’? Aram e ngaum meybil ngak Jehovah ni nge pi’ e re gelngin ney ngom me ayuwegem ni ngaum fol u rogon ni be pow’iyem. (Mu beeg e Efesus 3:14-16. d) Mu ngongol nib puluw ko n’en ni ga be yibilay ni aram e ngaum fil e Bible, ni Got e thagthagnag e thin riy u daken gelngin nib thothup. (2 Tim. 3:16, 17) Mu fol ko fonow riy ma ga pag gelngin Got nib thothup ni nga i pow’iyem. Faan ga ra rin’ e pi n’ey, ma aram e be m’ug nib mich u wan’um nrayog ni nge pow’iyem Jehovah u lan e re fayleng nib kireb ney.

[Footnotes]

Ka Ga Manang e Tin nib Ga’ Fan Riy?

• Uw rogon nrayog ni nge pow’iydad gelngin Got nib thothup?

• Mang aningeg i fan ni ngad adaged ni nga i pow’iydad gelngin Got nib thothup?

• Uw rogon ni ngam pag gelngin Got nib thothup ni nge pow’iyem ko bin nib mat’aw e kanawo’?

[Study Questions]

[Picture on page 17]

Gelngin Got nib thothup e aram e n’en ni i pow’iy Jesus

[Picture on page 18]

Gelngin Got nib thothup e ma maruwel u lanin’uy nge gum’irchaey mi i pow’iyey