Nge Pagan’um Ngak Jehovah Ya Ke Chugur e Tomur
Nge Pagan’um Ngak Jehovah Ya Ke Chugur e Tomur
“Nge pagan’uy ngak Somol ni . . . gubin ngiyal’.”—ISA. 26:4, BT.
1. Mang e ba thil u thilin e pi tapigpig rok Got nge girdi’ nu fayleng?
GAD be par u ba fayleng ni bokum milyon e girdi’ riy e dakur nanged ko mini’ ara mang e nge pagan’rad ngay, ni bochan e sana ke yoor yay ni ke buch boch ban’en ni ke kireban’rad ngay. Machane, pi tapigpig rok Jehovah e yad ba thil! Yad be pag e gonop rok Got ni nge pow’iyrad, ma der pagan’rad ko re fayleng ney ara “pi tolang” riy. (Ps. 146:3, BT) Kar paged farad ngak Jehovah, ya yad manang ni yad ba t’uf rok ma gubin ngiyal’ ni ma lebguy e Thin rok.—Rom. 3:4; 8:38, 39.
2. Uw rogon ni micheg Joshua nrayog ni nge pagan’uy ngak Got?
2 Joshua e micheg nrayog ni nge pagan’uy ngak Got. Nap’an ni ke chugur ni nge yim’, me gaar ngak piyu Israel: “Gimed gubin ni ra bigimed ma manang u lan gum’irchaen ngu fithik’ i laniyan’ ni Somol ni Got romed e ke pi’ urngin e tin ni ba manigil ngomed ni micheg ni ra pi’. Urngin e tin ni micheg e goo ke rin’ ni rogon; dariy reb ni pag.”—Josh. 23:14.
3. Fithingan Got e be dag e mang u rarogon?
3 Jehovah e ma lebguy e tin ni ke micheg ni gathi kemus ni bochan e ba t’uf rok e pi tapigpig rok, ya ku bochan fithingan. (Ex. 3:14; 1 Sam. 12:22) Thin ni bay u tabolngin ba ken e Bible ni yoloy J. B. Rotherham u murung’agen fithingan Got e be gaar: “Re ngachal nem e bay rogon nga rogon ni ma lebguy e tin ke micheg, ma ma m’ug fel’ngin riy; maku rayog ni nge thilyeg rarogon ya nge puluw nga reb e magawon ni ke sum . . . Re ngachal nem e ban’en ni kan micheg, . . . ma be weliy murung’agen Got ngodad, ma ma ayuwegdad ni nge dab da paged talin. Ba yul’yul’ Got ko re Ngachal nem; ma dariy ba ngiyal’ nra tamra’ ngay.”—The Emphasized Bible.
4. (a) Mang e be yog e Isaiah 26:4 ni ngad rin’ed? (b) Mang e gad ra weliy ko re article ney?
4 Am fithem ni nge lungum: ‘Gu manang Jehovah nib fel’ rogon nrayog ni nge pagan’ug ngak, fa? Ba pagan’ug ko gabul nge langlath ya gu manang ni Jehovah e ra gagiyegnag gubin ban’en, fa? Be gaar e Isaiah 26:4, BT: “Nge pagan’uy ngak Somol ni manemus, gubin ngiyal’ ni bay i yoror rodad.” Ngiyal’ ney e dakir ma gagiyegnag Got e girdi’ ni bod ni i rin’ kakrom. Machane, rayog ni nge pagan’uy ngak ni bochan e “gubin ngiyal’” ni ma “Yoror rodad.” Uw rogon ni ma ayuweg e Got rodad ni ma pagan’uy ngak e pi tapigpig rok nib yul’yul’ e ngiyal’ ney? Ngad weliyed dalip e kanawo’: Ma pi’ gelngidad u nap’an ni gad ra ning e ayuw ngak ko ngiyal’ ni be yan ni ngad rin’ed ban’en nib kireb, ma ma ayuwegdad u nap’an ni kad mada’naged e togopuluw ara girdi’ ni dubrad e machib, maku ma pi’ gelngidad ko ngiyal’ ni kari magafan’dad. Nap’an ni gad be weliy e pi n’ey, ma ngam fal’eg i lemnag rogon ni ngam gelnag e pagan’ rom ngak Jehovah.
Mu Pagan’um Ngak Got ko Ngiyal’ ni Be Yan ni Ngam Rin’ e Kireb
5. Mingiyal’ e ra mo’maw’ ni nge pagan’dad ngak Got?
5 Ba thil e bin baaray ni nge pagan’um ko Paradis nge fas ko yam’ ni ke micheg Jehovah, ko bin ni nge pagan’um ngak ko ngiyal’ ni ngam turguy ko ngam fol ko motochiyel rok fa danga’. Ya Paradis nge fas ko yam’ e ban’en ni kad m’ad ni bochan, machane motochiyel rok Got e thingari mich u wan’dad ni faan gad ra fol riy mab fel’, ma gad ra felfelan’. I yoloy Solomon ni Pilung ni gaar: “Mu pagan’um ngak Somol u polo’ i lanin’um, ma ri dab mu tor ko tin ni ga be finey ni ga manang. Nguum lemnag Somol u fithik’ urngin ban’en ni ga be rin’, me dag ngom e bin nib mat’aw e kanawo’.” (Prov. 3:5, 6) Mu tay fanam i yan riy ni kan weliy murung’agen e pi n’en ni gad ma “rin’” nge “kanawo’” rodad. Ere gathi kemus ni athap rodad e nge m’ug riy ni be pagan’dad ngak Got, ya ku thingari m’ug u gubin ban’en ni gad ma rin’. Ere uw rogon ni nge m’ug ni be pagan’dad ngak Got u nap’an ni be yan ni ngad rin’ed ban’en nib kireb?
6. Uw rogon me yog nda siyeged e lem nib kireb?
6 Lanin’uy e som’on ni nge siyeg e kireb. (Mu beeg e Roma 8:5; Efesus 2:3.) Ere, uw rogon me yog ni ngam siyeg e lem nib kireb? Baaray lal e kanawo’: 1. Mu ning e ayuw ngak Got u daken e meybil. (Matt. 6:9, 13) 2. Mu fal’eg i lemnag e n’en ni be yog e Bible u murung’agen boch e girdi’ ni ur folgad rok Jehovah nge boch nda ur folgad. Ngemu’ ma ga tay fanam i yan ko n’en ni buch rorad. (1 Kor. 10:8-11) 3. Mu fal’eg i lemnag gelngin e kireban’ ni gimed ra tay e piin ni yad ba t’uf rom ni faan ga ra denen. 4. Mu lemnag rogon laniyan’ Got u nap’an nra rin’ reb e tapigpig rok reb e denen nib ubchiya’. (Mu beeg e Psalm 78:40, 41.) 5. Mu lemnag gelngin e felfelan’ ni ma tay Jehovah u nap’an nra guy reb e tapigpig rok ni ke siyeg e tin nib kireb, ke rin’ e tin nib fel’ ndemtrug ko yibe guy fa danga’. (Ps. 15:1, 2; Prov. 27:11) Ere ku rayog ni nge m’ug ni be pagan’um ngak Jehovah.
Mu Pagan’um Ngak Got u Nap’an ni Kam Mada’nag e Togopuluw nge Girdi’ Ndubrad e Machib
7. Mang boch e skeng ni i yib ngak Jeremiah, ma uw rogon laniyan’ yu ngiyal’?
7 Boor pi walagdad ni yad ma pigpig u boch e nam nib mo’maw’ e machib riy. Aram rogon fare nam nu Judah u nap’an ni ke chugur ni ngan gothey. Ma aram e gin ni i machib Jeremiah ni profet riy. Gubin e rran ni un skengnag e michan’ rok ni bochan e i machibnag murung’agen e pufthin ni bayi tay Got ko fare nam. Ku immoy ba ngiyal’ ni i gun’gun’ Baruk ni ir e ta yol rok ni be yog ndakir yog ni nge toffan. (Jer. 45:2, 3) Ke mulan’ Jeremiah, fa? Bay yu ngiyal’ ni i kireban’ me gaar: “Mu bucheg waathan e rofen nni gargelnigeg riy! Mang fan ni kan gargelnigeg? Gur ke mus ni fan e ngi i yib e gafgow ngog mu gu par ni be kireban’ug, mu gu par ni yibe darifannigeg nge mada’ ko ngiyal’ ni ku gum’?”—Jer. 20:14, 15, 18.
8, 9. Faanra ngad boded e gek’iy ni ma yib wom’engin nib fel’, ma mang e thingar da rin’ed nrogon nib puluw ko Jeremiah 17:7, 8 nge Psalm 1:1-3?
8 De mulan’ Jeremiah, ya ki par ni be pagan’ ngak Jehovah. Ma angin ni yib ngak e guy feni riyul’ e thin rok Jehovah ni bay ko Jeremiah 17:7, 8, BT ni gaar: “Machane gu ra tow’athnag be’ ni gag e ke pagan’ ngog. Ra bod ba ke gek’iy ni tugul u charen e lul’ ni pi’ lik’ngin nga fithik’ e ran. Ni der ma yib e marus ngak u ngal’an e yal’, ni bochan yuwan ni be par nib galunglung; der ma magafan’ ko n’uw ni dakir aw; yug be par ni bay e mak’uf riy.”
9 I par Jeremiah ni bod ba ke gek’iy ni kan yung nga “charen e lul’,” ara bangi ban’en nder m’ay e ran riy ma gubin ngiyal’ ni yugu be “k’uf.” De pag ni nge af daken e pi tamoning e ngiyal’ nem ngak, ya i par nib chugur ngak e En ni ma pi’ e “ran” ko yafas ni aram Jehovah ma i fol u gubin ban’en ni i yog ngak. (Mu beeg e Psalm 1:1-3; Jer. 20:9) Rib fel’ e n’en ni rin’ Jeremiah nrayog ni ngad folwokgad riy, nib ga’ ni pi arodad ni ma pigpig u boch e nam nib mo’maw’ e machib riy. Faanra ireray e n’en ni be buch rom, ma thingari pagan’um ngak Jehovah ya ir e ra ayuwegem ngam athamgil i ‘pining e magar nga fithingan.’—Heb. 13:15.
10. Mang boch e tow’ath ni bay rodad, ma mang e thingar da fithed gadad riy?
10 Boor ban’en ni ke pi’ Jehovah nrayog ni nge ayuwegdad ko pi n’en nra ud mada’naged nib mo’maw’ ko tin tomuren e rran. Reb e aram e Thin rok ni Bible ni kan pilyeg nga boor mit e thin. Maku be pi’ gadad ko ngiyal’ ni ngan pi’ riy u daken fare tapigpig nib yul’yul’ ma ba gonop. Maku ke ngongliy rogon e pi muulung nge assembly ni aram e gin nrayog ni ngad chaggad pi walagdad riy u taabang. Ga be tiyan’um nga urngin e pi n’ey ni ke pi’ Jehovah, fa? Piin ni yad be tedan’rad ngay e bay ur “tangniged e felfelan’.” Machane, piin ndab ra folgad rok Got e ‘bay ur yorgad ni kari mooch’och lanin’rad.’—Isa. 65:13, 14, BT.
Mu Pagan’um ngak Got u Nap’an ni Ke Magafan’um
11, 12. Bochan ni ke gel e magawon u fayleng, ma uw e gad ra pirieg e bin riyul’ e gonop riy?
11 Boor e magawon ni be yib ko girdi’ ni bod ni kan yiiynag. (Matt. 24:6-8; Rev. 12:12) Chiney ni be gel e magawon i yan e boor e girdi’ ni yad be taga’ ko salpiy, nge am, nge teliw, nge llowan’ ko girdi’. Machane, dariy reb e pi n’ey nrayog ni nge ayuwegrad. (Jer. 17:5, 6) Pi tapigpig rok Jehovah e bay ban’en ni yad be taga’ ngay nriyul’ nra ayuwegrad ni aram e, faen ni ma ‘Yoror rorad.’ (Isa. 26:4) I yog fare psalmist ni gaar: “Kemus ni [Jehovah] e be yororiyeg mma mat’awnigeg ngak; ir e ma n’ufegeg, ni dariy e n’en nra rin’ mu gu war.” (Mu beeg e Psalm 62:6-9.) Uw rogon ni ngad taga’gad ngak Jehovah ni ir e ma Yororiydad?
12 Gad ma par ni gad ba chugur ngak Jehovah u nap’an ni gad ra fol ko Thin rok nib thil ko gonop ko girdi’. (Ps. 73:23, 24) Bod ni girdi’ ni be gagiyegnagrad e gonop ko girdi’ e ma lungurad: ‘Kemus e yafas rom aray; ere mu rin’ e tin nrayog rom.’ ‘Mu gay e maruwel nib fel’.’ ‘Mu yognag e salpiy ni boor.’ ‘Mu chuw’iy e biney, mu kum chuw’iy e binem.’ ‘Mu un ko chur; ngam sebal boch u fayleng.’ Machane, gonop rok Got e ba puluw ko fare fonow ni gaar: “Piin ni yad be ngongliy e tin nu fayleng ban’en e ngar pired ndabi mang ir e nge m’on u wun’rad. Ya re fayleng ney ni bod rogon e chiney ni ba’ e dabi par, ya bayi chuw.” (1 Kor. 7:31) Ki tay Jesus chilen ngodad ni ngad m’oneged e liyor ni gad be tay ngak Jehovah ma gad ‘ulunguy e flaab rodad’ nga tharmiy, ya aram e gin ndabi kireb riy.—Matt. 6:19, 20.
13. Mang e ngad fithed gadad riy nrogon nib puluw ko 1 John 2:15-17?
13 Rogon e re “fayleng” ney u wan’um nge pi n’en nib “mil fan” ngay e be dag nrib pagan’um ngak Got, fa? (1 John 2:15-17) Kab ga’ fan u wan’um rogon ni nge yoor e tayim rom ko pigpig ngak Jehovah ko pi n’en ni be ognag e fayleng, fa? (Fil. 3:8) Ga be athamgil ni nge par nib ‘fel’ lan owchem’ ara ga be m’oneg e tirok Got ban’en, fa? (Matt. 6:22) Riyul’ ni dabun Got ni ngam pag e n’en nib milfan ngom, nib ga’ ni faanra bay e tabinaw rom ni ngam ayuweg. (1 Tim. 5:8) Machane, baadag ni nge pagan’ e pi tapigpig rok ngak, ma gathi re fayleng rok Satan ney.—Heb. 13:5.
14-16. Mang angin ni ke yib ngak boch e girdi’ ni bochan e kar pared nib ‘fel’ lan owcherad’ ma yad be m’oneg e liyor ni yad be tay ngak Jehovah?
14 Am lemnag e n’en ni rin’ Richard nge Ruth ni bay dalip e bitir rorow. I gaar Richard: “Gu manang u wan’ug ni ku rayog ni nggu yoornag e tayim rog ni fan ngak Jehovah. Ba fel’ rogon e par rog. Machane, gu ra lemnag ma gowa gu be pi’ ngak Got e tin ke aw ko tin bay rog. Tomuren ni kug meybilgow Ruth ma kug fal’egew i lemnag, ma aram me m’agan’mow ngay ni nggu wan gguy e en ga’ ko maruwel rog nggog ngak ni nge lichnag e rran ni gu ma maruwel riy ni yugu aram rogon ni ke buchuuw e salpiy ko nam. De gaman reb e pul, ma aram me fel’ e babyor rog nrayog ni nge lich e rran ni nggu maruwel riy.” Ere uw rogon laniyan’ Richard e chiney?
15 I gaar: “Reliw’ e pasent ni ke chuw u puluwog, machane chiney e ke mun 50 e rran ko tayim rog u reb e duw ni fan ko tabinaw rog, nge tayim ni nggu llowan’nag e bitir rog. Ke yog ni nge yoor boch e tayim rog ko machib, ma kki yoor e girdi’ ni gu be fil e Bible ngorad, ma kug be ayuweg e ulung. Ma bochan ni ke yoor e tayim nrayog ni nggu ayuweg Ruth riy ni fan ko bitir, ma ke yog ni nge un ko pioneer ni ayuw yu ngiyal’. Kug dugliy u wan’ug ni nggu fol ko re n’ey u n’umngin nap’an nrayog rog.”
16 Roy nge Petina ni ka bay reb e bitir rorow ni ma par u tabinaw e ke yog ni ngar lichnagew e rran ni yow ma maruwel riy ya nge yog nra unew ko pioneer. I gaar Roy: “Dalip yay u reb e wik ni gu ma maruwel, me Petina e l’agruw. Ma kug chuwgow u reb e naun nib ga’, kug warow gu parew nga reb e naun nib achig nib mom i ayuweg. Ug pioneergow ndawor gu fakayew e bitir, ma dawor gu dabuyew e pioneer. Ere nap’an ni ke ilal e bitir romow ma kug sulow bayay ko pioneer. Tow’ath ni ke yog ngomow e dabiyog i taareb rogonnag ko salpiy.”
Mu Pag e “Gapas rok Got” nge Yororiy Gum’irchaem
17. Uw rogon ni ke ayuwegem e thin nu Bible ni nge par nib gapas lanin’um ni yugu aram rogon ndam nang e n’en nra buch gabul?
17 Dariy bagadad ni manang e n’en nra buch gabul ni bochan e “ngal’an nge pi n’en ni ma buch ko girdi’ e dan nang.” (Ekl. 9:11, NW) Machane, susun ndabi wagey lanin’dad ni bod e piin nder pagan’rad ni bochan e de fel’ e tha’ u thilrad Got. (Matt. 6:34) I yoloy apostal Paul ni gaar: “Dariy ban’en ni nge magafan’med ngay, machane faan gimed ra meybil ngak Got mi gimed ning ngak e tin ni nge yog ngomed, ma gubin ngiyal’ ni nguum ninged ngak ni gimed be pining e magar ngak u lanin’med. Ma gapas rok Got ndabi chuchugur ni nge nang e girdi’ fan e ra yororiy gum’ircha’med nge tafinay romed ngi i par rok Kristus Jesus.”—Fil. 4:6, 7.
18, 19. Mang boch e kanawo’ ni ma gapasnag Got lanin’dad riy? Mu weliy rogon.
18 Boor e walag ni keb e skeng ngorad ni ke ayuwegrad Jehovah ni nge gapas lanin’rad. I yog reb e walag nib pin ni gaar: “Immoy reb e togta ni ma sey e girdi’ ni i guy rogon ni nggu fanay e racha’. Som’on ni guyeg, ma n’en ni yog e, ‘Mang e tinir e thin ndab ni fanay e racha’?’ Ngiyal’ nem e ug par ni gu be meybil u lanin’ug ngak Jehovah, ma aram mi ri gapas lanin’ug. Kug par ni gub gel. Yugu aram rogon ni ke war e racha’ rog, machane ke yog rog ni nggu weliy boch e thin nu Bible ni be weliy fan ndab ni fanay e racha’.”
19 Bay yu ngiyal’ ni ma fanay Got e pi walag nge thin rok ni nge gapasnag lanin’dad. Dabisiy ni kam rung’ag ni ke yog reb e walag ni gaar: “Re thin ney e rib puluw ngog. Gowa kan yoloy ni fan ngog!” Arrogon, demtrug e magawon nra yib ngodad, ma ra t’ufegdad Jehovah ni faanra pagan’dad ngak. Bin riyul’ riy e gadad e “saf” rok ni gad be fek fithingan.—Ps. 100:3; John 10:16; Acts 15:14, 17.
20. Mang fan nra par e pi tapigpig rok Jehovah nib pagan’rad u nap’an ni yira thang e re fayleng rok Satan ney?
20 Nap’an ni be chugur i yib fare “rran” ko damumuw rok Jehovah, ma gubin ban’en ni be pagan’ e fayleng rok Satan ngay e goo yira kirebnag. Gol, nge silber, nge ku boch ban’en nib ga’ fan u wan’rad e dabiyog ni nge ayuwegrad. (Zef. 1:18; Prov. 11:4) Kemus ni yigoo en ni ma “Yoror rodad” e rayog ni nge ayuwegey. (Isa. 26:4) Ere, chiney e aray e ngiyal’ ni ngari pagan’dad ngak Jehovah ni aram e nga u darod ko kanawo’ rok nib mat’aw, ma gad be machibnag murung’agen Gil’ilungun ni yugu aram rogon ni gad ma mada’nag e piin ni dubrad e machib nge piin ni yad ma togopuluw, ma gad pag urngin e magafan’ rodad ngak. Faan gad ra rin’ urngin e pi n’ey ma aram e rayog ni ngaud ‘pared nib pagan’dad ndariy rogon ni ngad rusgad.’—Prov. 1:33.
Rayog ni Ngam Weliy?
Uw rogon ni nge pagan’dad ngak Got
• u nap’an ni be yan ni ngad rin’ed ban’en nib kireb?
• u nap’an ni kad mada’naged e togopuluw ara girdi’ ni dubrad e machib?
• u nap’an ni kari magafan’dad?
[Study Questions]
[Picture on page 15]
Gad ra fol ko pi motochiyel rok Got ma gad ra felfelan’
[Picture on page 17]
Jehovah e “gubin ngiyal’ ni bay i yoror rodad”