Ngam Athamgil ni Nge Yog e Tow’ath Rok Jehovah Ngom

“Ma ra tow’athnag [Got] e piin ni yad be gayiy.”​—HEB. 11:6.

1, 2. (a) Uw rogon ni be gay boor e girdi’ e tow’ath rok Got? (b) Mang fan nri gad baadag ni nge tow’athnagdad Jehovah?

 “RA TOW’ATHNAGEM Got.” U boch e nam e boor e girdi’ e ma yog e thin ni aram rogon u nap’an nra rung’ag ni ke wa’ngis be’. Pi tayugang’ ko pi yurba’ i teliw e yad ma yibilay e girdi’, nge gamanman, nge ku boch ban’en. Girdi’ ni ma milekag e yad ma yan ko yungi n’en ni yima yog nib thothup ni ngan yibilayrad. Girdien e am e yad ma yibilay e nam rorad. Gur, ga be lemnag nib puluw ni yad be yibilay ni nge tow’athnagrad Got? Riyul’ nra yib angin ngorad? Mini’ e riyul’ nra pi’ Got e tow’ath ngak, ma mang fan?

² Ke yog Jehovah ni tin tomuren e rran, e bay e girdi’ rok nra par nib beech ma yad ba gapas ni kar bad u urngin e nam. Yad ra machibnag fare thin nib fel’ u ga’ngin yang e fayleng ni yugu aram rogon ni yibe togopluw ngorad. (Isa. 2:2-4; Matt. 24:14; Rev. 7:9, 14) Gadad e piin ni ke fel’ u wan’dad ni ngad uned ko re maruwel ney e ba t’uf rodad e tow’ath rok Got, ya faanra dabi ayuwegdad Got ma dabi yib angin ngodad. (Ps. 127:1) Machane uw rogon me yog e re tow’ath ney ngodad?

Ba Mudugil ni Yira Tow’athnag e Piin ni Yad Ma Fol

3. Faanra fol piyu Israel rok Got ma mang angin?

³ Mu beeg e Proverbs 10:6, 7. U m’on ni nge yan piyu Israel nga lan fare Binaw ni Kan Micheg, me yog Jehovah ngorad nra tow’athnagrad ma ra yororiyrad ni faan yad ra fol ko thin rok. (Deut. 28:1, 2) Gathi kemus nra yib e tow’ath rok Jehovah ngak e girdi’ rok, ya ba mudugil ni yira ‘fal’eg waathrad.’

4. Mang e ba muun ngay ni ngan fol?

⁴ Susun uw rogon ni nge fol piyu Israel rok Got? Motochiyel rok Got e be yog ni dabi felfelan’ Jehovah ni faanra dabi pigpig e girdi’ rok ngak u “fithik’ e felfelan’ nge fel’ laniyan’.” (Mu beeg e Deuteronomy 28: 45-47.) Bay rogon ni ngad folgad rok Jehovah u fithik’ e t’ufeg, ma gathi yibe towasariydad ni bod e n’en ni yima rin’ ko gamanman nge pi moonyan’. (Mark 1:27; Jas. 3:3) T’ufeg ngak Got e ir e ra k’aringdad ni ngad folgad u fithik’ e yul’yul’. Susun bay e felfelan’ riy ya ke mich u wan’dad ni pi motochiyel rok e de mo’maw’ “ma ra tow’athnag e piin ni yad be gayiy Got.”​—Heb. 11:6; 1 John 5:3.

5. Uw rogon ma rayog rok be’ ni nge fol ko motochiyel ni bay ko Deuteronomy 15:7, 8 ni bochan e be pagan’ ko tin ni ke micheg Jehovah?

⁵ Am lemnag rogon nra yib angin ni faanra ngan fol ko thin ni bay ko Deuteronomy 15:7, 8 u fithik’ e yul’yul’ nge felfelan’. (Mu beeg.) Ra ngan fol ni dariy an’uy riy ma sana ra ayuweg e piin nib gafgow, machane gur, rayog ni nge fal’eg e re n’ey e tha’ u thilin e girdi’ rok Got? Maku faan gad ra rin’ ni aram rogon ma gur, be m’ug riy ni be pagan’dad ngak Jehovah nra pi’ urngin ban’en nib t’uf ko pi tapigpig rok, ma gad baadag ni ngad folwokgad rok ni ir e Got nib gol? Danga’! Manang Got e en nib gol ma ke micheg nra tow’athnag ko pi n’en nra rin’. (Deut. 15:10) Re n’ey e ra k’aringdad ni ngad folgad rok Got ma ra tow’athnagdad.​—Prov. 28:20.

6. Mang e be micheg fare thin nu Hebrews 11:6 ngodad?

⁶ Hebrews 11:6 e gathi kemus ni be weliy murung’agen e pagan’ rodad ngak Jehovah nra tow’athnag e pi tapigpig rok, ya ku be tamilangnag reb e fel’ngin nib t’uf ni ngad maruweliyed ni faanra nge tow’athnagdad. Mu tay fanam i  yan riy nra tow’athnag Jehovah e piin “ni yad be gayiy Got.” Re thin ney ni ke fanay Paul e be yip’ fan ni ngan athamgil. Re n’ey e be micheg ngodad ni riyul’ e pi tow’ath ney! Ya bin riyul’ e Got e “der ma ban.” (Titus 1:2) Bokum biyu’ e duw ni ke yan ma ke gagiyelnag Got ni urngin e tin ni ke micheg e rayog ni nge pagan’uy ngay. Thin rok e dabi aw nib m’ay fan, ya ra riyul’. (Isa. 55:11) Ere kari mudugilan’dad ni faanra riyul’ ni bay e michan’ rodad ngak Got ma ra tow’athnagdad.

7. Uw rogon me yog ngodad e tow’ath u daken e “piin owchen” Abraham?

⁷ Jesus Kristus e ir e en nth’abi ga’ fan ko “piin owchen” Abraham. Pi Kristiano ni kan dugliyrad e yad e piin migid ko en th’abi ga’ fan ni “owchen” Abraham. Maruwel rorad e ngar “wereged murung’agen e n’en nrib fel’ ni ke ngongliy Got, ni ir e piningmed u fithik’ e lumor ngam bad nga fithik’ e tamilang rok nrib fel’.” (Gal 3:7-9, 14, 16, 26-29; 1 Pet. 2:9) Dabiyog ni nge fel’ e tha’ u thildad Jehovah, ni faanra dab ni fol ko piin ni ke mel’egrad Jesus ni nge milfan urngin ban’en rok ngorad. Faanra dariy e ayuw rok “fare tapigpig nib yul’yul’ ma ba gonop” ma dabiyog ni ngad nanged fan nib fel’ rogon e thin rok Got u Bible, maku dabda nanged rogon ni ngad folgad riy. (Matt. 24:45-47) Rayog ni nge pagan’dad nra tow’athnagdad Got, ni bochan e gad be maruweliy e pi n’en ni gad be fil u Bible.

Ngan Tiyan’uy ko N’en nib M’agan’ Got Ngay

8, 9. Uw rogon ni ke maruweliy Jakob nib elmerin nrogon nib puluw ko n’en ni ke ning?

⁸ Rayog ni nge yib ngan’dad Jakob ni ir be’ ni ke athamgiliy ni nge yog e tow’ath rok Got ngak. De nang ko uw rogon nra lebug e tin ke micheg Jehovah ngak Abraham, machane ke mich u wan’ nra yoornag Jehovah e piin owchen Abraham ni yad ra mang ba nam nib ga’. Ere nap’an e duw ni 1781 B.C.E., ke milekag Jakob nga Haran ni nge gay reb e ppin ni nge leengiy. Gathi kemus ni nge gay reb e ppin ni nge fel’ e tha’ u thilrow ya ke gay reb e tapigpig rok Jehovah ni ke ilal ko tirok Got ban’en nra mang reb e matin nib fel’.

⁹ Gad manang ni ke mada’nag Jakob Rachel ni girdi’ rok, mi ri t’uf Rachel rok me adag ni nge  leengiy ma aram me m’agan’ ngay ni nge maruwel rok Laban u lan medlip e duw. Re n’ey e gathi kemus ni chep u murung’agen e adag. Ya manang Jakob e n’en ni ke micheg Got ngak Abraham maku ke yog ngak Isak ni chitamangin. (Gen. 18:18; 22:17, 18; 26:3-5, 24, 25) Me yog Isak ngak Jakob ni fak ni gaar: “I Got ni Urngin ma Rayog rok e nge fal’eg waatham ko mabgol rom nge pi’ ngom e bitir ni pire’, ngam mang chitamangin boor e nam. Me fal’eg waatham nge piin ni owchem ni bod rogon ni fal’eg waathan Abraham, ma ga tafanay e re nam ney ni kam par riy, ni Got e pi’ ngak Abraham.” (Gen. 28:3, 4) Ere fare maruwel ni ke tay Jakob ni fan e nge gay reb e ppin nib fel’ me yog e tabinaw ngorow e be dag ni kari pagan’ ko tin ke yog Jehovah.

10. Mang fan nib m’agan’ Jehovah ngay ni nge tow’athnag Jakob?

¹⁰ De lemnag Jakob ni nge fel’ rogon e tabinaw rok ko tin nu fayleng ban’en, ya i tiyan’ ko tin nib m’agan’ Jehovah ngay nge fare n’en ni kan micheg ngak ni fan ngak e piin ni owchen. Ke dugliy Jakob ni nge rin’ e tin ni rayog rok ni fan e nge yog e tow’ath rok Got ngak, ni demtrug e magawon nra yib ngak. I lem ni aram rogon ni ki mada’ ko ngiyal’ ni ke pilibthir, me tow’athnag Jehovah ni bochan e n’en ni ke rin’.​—Mu beeg e Genesis 32:24-29.

11. Mang e thingar da rin’ed nib puluw ko tin nib m’agan’ Got ngay?

¹¹ Dawori tamilang u wan’dad ko uw rogon nra lebug e tin nib m’agan’ Jehovah ngay, ni bod rogon Jakob. Machane, gad ra fil e thin rok Got ma rayog ni ngad nanged boor ban’en u murung’agen fare “rran rok Somol.” (2 Pet. 3:10, 17) Riyul’ ni dawor da nanged ko wuin e ra yib e re rran nem, machane gad manang ni ke chuchugur. Gad manang ni riyul’ e n’en ni be yog e thin rok Got, ni faanra ngad wereged fare thin rok Got nib fel’ rogon ma rayog ni ngad ayuweged e yafas rodad nge yafas rok e piin nra motoyil ngodad.​—1 Tim. 4:16.

12. Mang e ke mudugil u lanin’dad?

¹² Gad manang nra yib e tomur, machane dawor da nanged ko wuin, ma dabi son Jehovah ni nge taw e machib ngak urngin e girdi’ u fayleng. (Matt. 10:23) Maku yibe fil ngodad rogon ni ngad wereged e re machib ney nib fel’ rogon. Gad ma rin’ e re maruwel ney u rogon ni rayog rodad ni gad be fanay e tin ni bay rodad. Machane gur, kemus ni ngad machibgad ko pi binaw ni baadag e girdi’ e machib riy? Uw rogon ni ngad nanged e girdi’ nra mon’og me mang tapigpig rok Got? (Mu beeg e Eklesiastes 11:5, 6.) Gadad e pi tamachib e ngad rin’ed e maruwel rodad, ma be pagan’dad nra tow’athnagdad Jehovah. (1 Kor. 3:6, 7) Gad manang ni be guy e athamgil ni gad ma tay, ma ra fil ngodad e n’en nib t’uf ni ngad rin’ed u daken gelngin nib thothup.​—Ps. 32:8.

 Ngan Ning Gelngin Got nib Thothup

13, 14. Uw rogon ma fare gelngin Got nib thothup e ke ayuweg e pi tapigpig rok Got?

¹³ Uw rogon ni faanra gad be lemnag ni dabiyog ni ngad lebuguyed e re maruwel ney? Thingarda ninged ngak Jehovah gelngin nib thothup, ma ra ayuwegdad ni ngad salapgad ko machib. (Mu beeg e Luke 11:13.) Rayog ni nge ayuwegdad gelngin Got nib thothup nge yog ni ngad rin’ed reb e maruwel ni dawor da uned ngay. Ni bod ni tomuren ni chuw piyu Israel u Egypt, ma gelngin Got nib thothup e ke ayuweg e pi tachugol saf nge pi sib ni ngar gelgad ngak e pi toogor rorad, ni yugu aram rogon ni dar salapgad ko mahl. (Ex. 17:8-13) Ma de n’uw nap’an nga tomuren ma re gelngin Got nib thothup nem e ki ayuweg Bezalel nge Oholiab ni nge yog ni ngar rin’ew fare maruwel nib mo’maw’ ni bay rogon ko fare tabernacle.​—Ex. 31:2-6; 35:30-35.

¹⁴ Maku re gelngin Got nem nib thothup e ki ayuweg boch e pi tapigpig rok Got ni ngar rin’ed ban’en nib ga’ fan u nap’an ni ke yib e tayim nib t’uf ni ngar tababgad i fal’eg e pi babyor rorad. U lan reb e babyor ni i yoloy Brother R. J. Martin ni ir e ba ga’ ko re maruwel nem e yog e pi n’en ni kan rin’ ko duw ni 1927. “Fel’ ngal’an ni yog ngomad reb e masin ni ma fal’eg e babyor, ma da gu nanged ko uw rogon ni nggu maruwelgad ngay. Machane manang fare Somol rogon ni nge pi’ e salap ngak e piin ni kar pied e tin ni th’abi fel’ rorad ngak. . . . Kemus nu lan in e wik ma ka fin gu nanged rogon ni nggu maruwelgad ngay; ma ke mada’ ko chiney ma be fal’eg boch e maruwel ni mus ko piin ni kar ngongliyed fare masin ma dar nanged nrayog ni nge rin’ e biney e maruwel.” Ma ka be ulul Jehovah ni be tow’athnag e maruwel ni aram rogon ke mada’ ko chiney.

15. Uw rogon ma fare thin nu Roma 8:11 e rayog ni nge pi’ e athamgil nga laniyan’ e piin ni yibe waliyrad ko kireb?

¹⁵ Gelngin Jehovah nib thothup e ma maruwel u boor e kanawo’. Urngin e tapigpig rok Jehovah e rayog ngorad e re gelngin Got nib thothup nem ni nge ayuwegrad ko pi magawon rorad. Machane uw rogon ni faanra kaygi gel e lumel ni be yib ngodad? Rayog ni nge ayuwegdad e thin rok Paul ni bay ko Roma 7:21, 25 nge 8:121 (NW). Arrogon, “fare gelngin nib thothup ni ke faseg Jesus ko yam’” e rayog ni ayuwegdad ni nge dabi gel e ar’ar nib kireb ngodad. Pi thin ney e kan yoloy ni fan ngak e pi Kristiano ni kan dugliyrad, machane ku bay rogon ngak urngin e pi tapigpig rok Got. Gad gubin nra yog ngodad e yafos ni manemus ni faanra gad be maruweliy e michan’ rodad ngak Kristus, ma gad be athamgil ni ngad paged e ar’ar nib kireb, ma gad be fol u rogon ni be pow’iydad fare gelngin Got nib thothup.

16. Mang e thingarda rin’ed me yog gelngin Got nib thothup ngodad?

¹⁶ Rayog ni ngad lemnaged nra pi’ Got gelngin nib thothup ngodad ni faanra dabda maruweliyed? Danga’. Gathi kemus ni ngad yibilayed ya ku thingarda filed e Thin rok Got nib fel’ rogon. (Prov. 2:1-6) Maku gelngin Got nib thothup e bay ko ulung ni Kristiano. Ere faan gad ra un ko muulung ni gubin ngiyal’ ma be m’ug riy ni ri gad baadag ni ngad ‘motoyilgad’ ko n’en nra yog. (Rev. 3:6) Ma ku thingar da folgad ko n’en ni kad filed. Be fonownagdad e Proverbs 1:23 ni gaar: “Mu telmed ngog ko ngiyal’ ni gu ra puwan’ ngomed, ya gu ra pi’ e fonow nib fel’ ngomed.” Riyul’ nra pi’ Got gelngin nib thothup “ngak e piin ni yad be fol rok.”​—Acts 5:32.

17. Angin e pigpig ni gad ma tay e kan taareb rogonnag ko mang?

¹⁷ Riyul’ nib t’uf ni ngad maruweliyed ni nge yog e pi tow’ath rok Got ngodad, machane ka bay boch ban’en nib t’uf. Pi tow’ath ni ma pi’ Got ngodad e rayog ni ngan taareb rogonnag nga rogon ni ma yib angin e ggan ni gad ma kay nga fithik’ i dowdad. Ke sunmiydad Got ni ngad felfelan’gad ko pi n’en ni gad ma kay, ma ra fel’ fithik’ i dowdad, maku ir e be pi’ gadad. Dada nanged ko uw rogon e yobung ni bay u fithik’ e pi n’en ni gad ma kay, ma yooren i gadad e dabiyog ni nge weliy rogon ni ma pi’ e pi ggan nem gelngidad. Kemus ni gad manang ni faanra ngad ked boch e ggan nib fel’, ma ra yib angin  ngodad. Ku aram rogon Jehovah, ke yog boch ban’en ni thingarda rin’ed ni fan ni nge yog e yafos ni manemus ngodad, ma ke ayuwegdad ni nge yog ni ngada rin’ed e pi n’em. Ba tamilang ni boor e ayuw ni ma pi’ ngodad ko pi n’em ere bay rogon ni ngad pininged e sorok ngak. Machane thingarda rin’ed ban’en nib puluw ko tin nib m’agan’ Got ngay ma rayog ngodad e pi tow’ath nem.​—Hag. 2:18, 19.

18. Mang e kam dugliy ni ngam rin’, ma mang fan?

¹⁸ Ere ngam rin’ u rogon ni rayog rom nge yog ni ngam lebguy urngin e maruwel ni kan pi’ ngom. Nge pagan’um ngak Jehovah ni gubin ngiyal’ nra ayuwegem. (Mark 11:23, 24) Ga ra rin’ ni aram rogon ma dab mu pagtalin ni “en nra gay e ra pirieg.” (Matt. 7:8) Piin ni kan dugliyrad e “yira pi’ e yafos” ngorad u tharmiy. (Jas. 1:12) Ma “yugu boch e saf” rok Kristus, ni ku yad be athamgil ni nge yog e tow’ath ngorad u daken e piin ni owchen Abraham, e yad be felfelan’ ni ngar motoyilgad ngak Faen ni be gaar: “Gimed e piin ni ke fal’eg e Chitamag waathmed mired! Mired ngan pi’ e gin nsuwon Got ngomed, ni kan ngongliy rogon kan tay ni fan ngomed ni ka nap’an e ngiyal’ nsunumiy e fayleng riy.” (John 10:16; Matt. 25:34) “Piin ni ke fal’eg Got waathrad e bay ra tafned e binaw, . . . me par ni taferad ni dariy n’umngin nap’an.”​—Ps. 37:22, 29.

Rayog ni Ngam Weliy?

• Mang e ba muun ngay ni ngan fol u fithik’ e yul’yul’?

• Mang e ba t’uf ni ngad rin’ed me yog e tow’ath rok Got ngodad?

• Uw rogon me yog ngodad gelngin Got nib thothup, ma uw rogon nra yib angin ngodad?

[Study Questions]

[Picture on page 11]

Ke fathal Jakob nge reb e engel ni nge yog e tow’ath rok Jehovah ngak.

Ga be athamgil ni bod e n’en ni rin’ Jakob?

[Picture on page 12]

Gelngin Got nib thothup e ke ayuweg Bezalel nge Oholiab ni nge yog e salap ngorow