Rogon Nra Ayuwegdad fare Biyul

“En nra mich u wan’ e en ni Fak Got e aram e ke yog e yafos ndariy n’umngin nap’an ngak; ma en ndabi fol rok e en ni Fak Got e dabiyog e yafos ngak, machane be par e damumuw rok Got u daken ndariy n’umngin nap’an.”​—JOHN 3:36.

1, 2. Mang reb i fan nni tabab i ngongliy fare Zion’s Watch Tower?

 KEN ni aningeg ko pi babyor ney nni ngongliy ko October 1879 e be gaar: “Faanra fal’eg be’ i fil e Bible, ma ra nang feni ga’ fan e yam’ ni tay Kristus.” U tungun e re article nem e nni tay e pi thin ni baaray ngay ni gaar: “Ngad kol ayuwgad ko pi n’en ni be dag ni yam’ ni tay Kristus e gathi ba maligach ni fan ko denen rodad.”​—Mu beeg e 1 John 2:1, 2.

² Reb i fan nni tabab i ngongliy fare Zion’s Watch Tower ko July 1879 e bochan ni nge ayuweg fare machib u murung’agen fare biyul. Thin nni yoloy ngay e taareb rogon ko ggan ni yima pi’ “ko ngiyal’ ni yima pi’ riy,” ni bochan e nap’an ni chugur nga tungun e bin 18 e chibog ma boor e girdi’ ni yad ma yog ni yad e Kristiano e ra guyed rogon ni nge maruwar u wan’ e girdi’ fare biyul ni pi’ Jesus. (Matt. 24:45) Ngiyal’ nem e ku boor e girdi’ ni mich u wan’rad fare machib ni evolution ni aram reb e machib nib togopuluw ko fare machib ni riyul’, ni girdi’ e dakur flontgad. Piin ni ke mich e machib ni evolution u wan’rad e yad ma fil ni girdi’ e yad be mon’og ma de t’uf rorad e biyul. Aray e n’en ni ginang apostal Paul Timothy riy ni gaar: “Mu ayuweg e n’en ni gur e kan pag fan ngom ni ngam ayuweg. Dab mu un i yog e thin ni ma yog e piin ndariy fan Got u wun’rad nge tugthin ndariy fan ni murung’agen e llowan’ ni ke balyang boch e girdi’ ka rogned e llowan’ ngay. Ya boch e girdi’ e ka rogned ni bay e re llowan’ nem  rorad, ma wenegan ni be yib ngorad e kar olobochgad da ku ranod u rogon kanawoen nib mich Got u wun’uy.”​—1 Tim. 6:20, 21.

3. Mang boch e deer ni ngad weliyed e fulweg riy e chiney?

³ Dariy e maruwar riy ni kam tay u wan’um ndab mu ‘oloboch nge dab kum man u rogon kanawoen nib mich Got u wan’um.’ Faanra nge par e michan’ rom nib gel, ma ba fel’ ni ngam fal’eg i lemnag e pi deer ni baaray ni gaar: Mang fan nib t’uf ni ngan biyuliyeg? Mang e pag Jehovah nge Jesus fan ni bochan e ngar piew fare biyul? Mang angin e re tow’ath ney ngog nra ayuwegeg ko damumuw rok Got?

Rayog ni Ngan Ayuwegdad ko Damumuw rok Got

4, 5. Mang e be micheg ni be par e damumuw rok Got u daken e re m’ag nib kireb ney?

⁴ Bible nge chepin e girdi’ e be dag ni ka nap’an ni denen Adam ma ke par e damumuw rok Got ‘u daken’ e girdi’. (John 3:36) Riyul’ e re n’ey ni bochan e ka ma yim’ e girdi’. Gagiyeg ni be tay Satan e der yog ni nge ayuweg e girdi’ ko gafgow ni ma yib ngorad, maku dariy reb e am ko girdi’ ni be yog rok ni nge pi’ e tin nib t’uf ko girdi’. (1 John 5:19) Ere ka be gafgow e girdi’ ni bochan e mahl, nge bugel, nge ku boch ban’en nib kireb.

⁵ Ba tamilang nder ayuweg Jehovah e re m’ag nib kireb ney. Ke yog Paul ni “damumuw rok Got e ke m’ug ni be yib u tharmiy i yib nga daken urngin e denen nge kireb ni be ngongliy e girdi’.” (Rom. 1:18-20) Ere piin ndarur folgad rok Got ma dab ra kalgadngan’rad e dabiyog ni ngar thaygad ko damumuw rok Got. Chiney e yibe pufthinnag e girdi’ nu fayleng u daken fare thin ni yibe wereg ni murung’agen e damumuw rok Got, maku be m’ug e pi thin ney u lan e pi babyor rodad ni yima ngongliy nib puluw e thin riy ko Bible.​—Rev. 16:1.

6, 7. (a) Mang maruwel e be pow’iy e pi Kristiano ni kan dugliyrad? (b) Mang e ka bay nrayog ni nge rin’ e piin ni yad bang ko re fayleng rok Satan ney?

⁶ Ere gur, re n’ey e be yip’ fan ni kaygi sagaal ni nge chuw e girdi’ nu fayleng u tan e gagiyeg rok Satan ngar fel’gad u wan’ Got? Danga’, ya kab mab e kanawo’ ngak urngin e girdi’ nrayog ni ngar fel’gad u wan’ Jehovah. Fapi Kristiano ni kan dugliyrad ni yad e yad be ‘weliy e thin rok Kristus’ ngodad e yad be pow’iy fare maruwel ni machib ni ir e yibe pining e girdi’ ngay ni yibe gaar: “Ngam paged Got nge pingegmed e toogor rok ngam manged pi tafager rok!”​—2 Kor. 5:20, 21.

⁷ I yog apostal Paul ni ke chuwegdad Jesus ko “damumuw rok Got ni bay fini yib.” (1 Thess. 1:10) Ra m’ug e bin tomur e damumuw rok Jehovah u nap’an nra thang e piin ni yad ba kireb ndab ra kalgadngan’rad. (2 Thess. 1:6-9) Ere mini’ e ra thay ko re gechig ney? Be gaar e Bible: “En nra mich u wan’ e en ni Fak Got e aram e ke yog e yafos ndariy n’umngin nap’an ngak; ma en ndabi fol rok e en ni Fak Got e dabiyog e yafos ngak, machane be par e damumuw rok Got u daken ndariy n’umngin nap’an.” (John 3:36) Arrogon, ra taw nga tungun e re m’ag ney ma urngin e piin ni yad be maruweliy e michan’ rorad ngak Jesus nge fare biyul ni pi’ e rayog ni ngar thaygad ko damumuw rok Got.

Fel’ngin fare Biyul

8. (a) Mang e tow’ath ni immoy rok Adam nge Efa? (b) Uw rogon ni micheg Jehovah ni ir reb e Got nib mat’aw?

⁸ Kan sunmiy Adam nge Efa ni yow ba flont. Faan gomanga ra folgow ma re fayleng ney e ke sugnag pi fakrow ni yad be par u paradis u fithik’ e felfelan’. Machane, gal ga’ rodad e ra th’abew e motochiyel rok Got ni lem rorow. Wenegan ni yib riy e ni turguy ni ngar m’ow min tharbogrow nga wuru’ e paradis. Nap’an ni fakay Adam nge Efa e bitir ma ke af e denen ngak urngin e girdi’, me munmun mar pilibthirgow ngar m’ow. Jehovah e der ma thilyeg e thin rok. Maku ir reb e Got nib mat’aw. Ke ginang Adam u m’on riy ni faanra kay wom’engin fare ke gek’iy ma ra yim’, ma aram e n’en ni buch rok.

9, 10. (a) Mang fan ni ma yim’ pi fak Adam? (b) Uw rogon ni ngad thaygad u pa’ e yam’?

⁹ Bochan ni gad pi fak Adam, ma aram fan  nda da flontgad, ma gad ma denen, ma gad ma yim’. Nap’an ni denen Adam, me af e denen rok ngodad, ya ir e kad bad rok. Ere nap’an ni ka nog ngak nra yim’, ma ka gad ba muun ngay. Faan gomanga de pi’ Jehovah fare biyul ni nge yan nga puluwon e yam’ ni ke af ngodad, ma aram e de yul’yul’ ko thin rok. I non Paul ni pa’dad ni gaar: “Gadad manang ni fare Motochiyel e yib rok Got; machane gag e gub girdi’ ni gu ra yim’, ni kan pieg ni chuway’ ngak e denen ni bod rogon ba sib. Ere kar gu gafgow! I mini’ e ra chuwegeg u pa’ e re dowef ney ni ir e be fekeg i yan ko yam’?”​—Rom. 7:14, 24.

¹⁰ Kemus ni goo Jehovah Got e rayog ni nge pi’ ban’en nib puluw ko motochiyel nrayog ni nge chuwegdad ko denen nge yam’. I rin’ e re n’ey ni aram e pi’ Fak ni kari maagirag rok u tharmiy ngeb nga fayleng ngan gargeleg nib girdi’ me pi’ e yafas rok ni nge biyuliydad. Jesus e de bod Adam, ye par nib flont. Arrogon, “dariy e denen ni ngongliy.” (1 Pet. 2:22) Rayog ni nge fakay Jesus e bitir nib flont. Machane, i pi’ e yafas rok nga pa’ e pi toogor rok Got ya nge yog e yafas ngak e piin ni yad ra maruweliy e michan’ rorad ngak. Be gaar e Bible: “Ri taareb e Got ni ba’, ma ri taabe’ e ba’ ni ir e ma chagiy Got nge girdi’ nga taabang, ni aram fare girdi’ ni Kristus Jesus, ni ir e pi’ ir nge biyuliy urngin e girdi’ ngak Got.”​—1 Tim. 2:5, 6.

11. (a) Uw rogon ni yira susunnag fel’ngin fare biyul? (b) Mini’ e ra yib angin fare biyul ngak?

¹¹ Rogon fel’ngin fare biyul e rayog ni ngan susunnag nga ba ulung i girdi’ ni immoy e salpiy rorad u ba bank ni ke m’ay e salpiy riy. Piin ferad fare bank e ka nin’rad nga kalbus. Ere mang e nge rin’ e piin ni immoy e salpiy rorad ko fare bank? Dakuriy e n’en ni ngar rin’ed nge taw ko ngiyal’ ni ke fek be’ nib fel’ rogorad fare bank nge maruweliy me sulweg e salpiy ko piin ni immoy e salpiy rorad riy. Re n’ey e rayog ni ngan taareb rogonnag ko n’en ni ke rin’ Jehovah Got. Bod ni kar chuw’iyew Jesus pi fak Adam ma kar thangew e malfith rorad nga rachaen Jesus ni map’. Aram fan ni weliy John ni Tataufe murung’agen Jesus ni gaar: “Baaram fare Fak e Saf rok Got ni ir e nge chuweg e denen rok e girdi’ nu fayleng!” (John 1:29) Ere gathi kemus ni yigoo piin ni yad ba fas e yira n’ag fan e denen rorad, ya kub muun e piin ni kar m’ad ngay.

N’en ni Kan Pag Fan ni Bochan fare Biyul

12, 13. Mang e gad ra fil u rogon ni m’agan’ Abraham ngay ni nge pi’ Isak ni fak ni maligach?

¹² Dabiyog ni ngad nanged gelngin e kireban’ ni tay Jehovah ni bochan fare biyul ni pi’ Fak nrib t’uf rok. Machane bay boch ban’en ni buch kakrom ni kan tay nga Bible nra ayuwegdad ni ngad fal’eged i lemnag e re n’ey. Bod e n’en ni buch rok Abraham. Am lemnag rogon laniyan’ u lan fa dalip i rran ni milekag nga Moriah ni nge rin’ e n’en ni ke yog Got ngak ni gaar: “Mu fek fare pagel ni fakam ni Isak, ni kari maagirag rom, ma ba t’uf rom, ngam marow ko fa gi binaw ni Moriah. U daken bburey ni bay fini gu dag ngom u rom e ir e thingar mu li’ riy ma ga urfiy ngam pi’ ni maligach.”​—Gen. 22:2-4.

¹³ I taw Abraham ko gin ni ka nog ngak ni nge yan ngay. Am lemnag gelngin e kireban’ ni tay u nap’an ni be m’ag pa’ nge ay Isak ni nge  tay nga daken fare altar ni ke ngongliy. Ma ri kab gel e amith ni tay laniyan’ u nap’an ni furuy fa gi yar ni nge rugoy ngak fak! A kum lemnag rogon laniyan’ Isak u nap’an ni bay u daken fare altar ni be son ni ngan li’ ngem’. Ka chingiyal’ nem me taleg e engel rok Jehovah Abraham. N’en ni rin’ Abraham nge Isak e rofen nem e ra ayuwegdad ni ngad nanged gelngin e amith ni tay laniyan’ Jehovah u nap’an ni pag fapi girdi’ ni be gagiyegnagrad Satan ni ngar lied Fak. Fol ni tay Isak e be dag rogon ni m’agan’ Jesus ngay ni nge gafgow nge yim’ ni fan ngodad.​—Heb. 11:17-19.

14. Mang e buch rok Jakob nra ayuwegdad ni ngad nanged gelngin e kireban’ ni tay Jehovah u nap’an ni pi’ Jesus fare biyul?

¹⁴ Gelngin e amith ni tay laniyan’ Jehovah ni bochan fare biyul e ku rayog ni ngan taareb rogonnag ko n’en ni buch rok Jakob. U fithik’ urngin e pagel ni fak Jakob, ma Josef e rib t’uf rok. Machane, fapi pagel ni walagen Josef e ke awan’rad ngak ma yad be fanenikan. Machane, nap’an ni l’og Jakob Josef ni nge yan i nang salaprad, me yan. Ma ngiyal’ nem e yad bay u bang i ban’en ni yad be gafaliy e saf rok Jakob. Ma re gin’em e 60 e mayel ko lel’uch palogin ko tabinaw rorad u Hebron. Am lemnag rogon laniyan’ Jakob u nap’an ni sul fapi pagel ni bay e mad rok Josef u pa’rad ni ke sugnag e racha’! I gaar: “Ir e fen. Ba gamanman ni maloboch e ke li’. Kan popof Josef!” Rib gel e kireban’ ni tay Jakob ya boor e rran ni i par ni be yornag Josef. (Gen. 37:33, 34) Jehovah e der ma sap ko magawon ni bod rogon ni ma sap e girdi’ ngay. Machane, faan gad ra fal’eg i lemnag e n’en ni buch rok Jakob, ma ra ayuwegdad ni ngad nanged rogon laniyan’ Got u nap’an ni un gafgownag Fak nrib t’uf rok ngemu’ min li’ nge yim’.

Angin fare Biyul Ngodad

15, 16. (a) Uw rogon ni dag Jehovah ni ke m’agan’ ko fare biyul? (b) Mang angin fare biyul ngom?

¹⁵ I faseg Jehovah Got Fak nib yul’yul’ nga reb e dowef ni downgin e kan. (1 Kor. 15:20, 44) Nap’an ni fas Jesus ko yam’ ma 40 e rran ni i m’ug ngak pi gachalpen, nga i gelnag e michan’ rorad ma be fal’eg rogorad ni fan ko fare  maruwel ni machib. Ma aram me yan nga tharmiy. Mu rom e ognag riy fel’ngin rachaen ni map’ nga but’ ni fan ngak e tin riyul’ i gachalpen ni piin ni yad ba maruweliy e michan’ rorad ko fare biyul. I dag Jehovah Got ni ke m’agan’ ko fare biyul ni pi’ Kristus ma aram me pi’ mat’awun ni nge puog gelngin Got nib thothup nga daken pi gachalpen nra muulunggad nga Jerusalem ko rofen ni Pentekost ko duw ni 33 C.E.​—Acts 2:33.

¹⁶ Pi gachalpen Kristus ney ni kan dugliyrad e ra tababgad i machibnag ko girdi’ ni ngar guyed rogon ni ngar thaygad ko damumuw rok Got ni aram e ngan taufenagrad nga fithingan Jesus Kristus ni fan e nge yog nni n’ag fan e denen rorad. (Mu beeg e Acts 2:38-40.) Aram nap’an i yib ke mada’ ko chiney ma bokum milyon e girdi’ ko pi nam ni ke yog ni nge fel’ e tha’ u thilrad Got u daken e michan’ rorad ko fare biyul ni maligach ni pi’ Jesus. (John 6:44) Ere chiney e ba t’uf ni ngad weliyed l’agruw e deer: Bay bagadad ni ke yog e athap ko yafas ni manemus ngak ni bochan e tin ni ke rin’ nib fel’, fa? Faanra yog e re athap ney ngodad, ma ku rayog ni nge mul u pa’dad, fa?

17. Susun ni nge uw rogon u wan’um ni kam mang fager rok Got?

¹⁷ Dariy rogon ni ngan biyuliydad. Machane bochan ni bokum milyon e girdi’ e ngiyal’ ney ni kar maruweliyed e michan’ rorad ko re biyul ney, ma aram fan ni ke yog ni ngar manged fager rok Got mar athapeged e yafas ni manemus u paradis u fayleng. Machane, gathi yugu demtrug e n’en ni ngaud rin’ed. Ya faanra ngad thaygad ko damumuw rok Got ma thingar ud ted fan fare biyul ni pi’ ‘Kristus Jesus, ni ir e ke pithigdad rok e denen.’​—Rom. 3:24; mu beeg e Filippi 2:12.

Ngaum Maruweliy e Michan’ Rom ko fare Biyul

18. Mang e ba muun ko ngan maruweliy e michan’ ko fare biyul?

¹⁸ Fare thin ko John 3:36 ni bay u tabolngin e re thin ney e be dag ni faanra ngad maruweliyed e michan’ rodad ngak Somol Jesus Kristus, ma ba muun ngay ni ngaud folgad rok. Faanra ba fel’ u wan’dad fare biyul ma ra k’aringdad ni ngad folgad ko pi n’en ni i machibnag Jesus nib muun ngay rogon e ngongol nib fel’. (Mark 7:21-23) “Damumuw rok Got e ra yib nga daken” urngin e piin ni yad ma ngongliy e ngongol ko darngal, ma yad ma yog e thin ni yima tamra’ ngay, ma yad ma un ko ngongol ni “golong,” ma dab ra kalgadngan’rad. Re n’ey e ba muun ngay ni ngan yaliy yaan e ngongol ni puwlag.​—Efe. 5:3-6.

19. Mang boch e kanawo’ nrayog ni nge m’ug riy ni ke mich fare biyul u wan’dad?

¹⁹ Faanra ba ga’ fan fare biyul u wan’dad, ma aram e gadad ra ‘pied gadad nga pa’ Got.’ (2 Pet. 3:11) Ngad ted boor e tayim ni fan ko meybil, nge fol Bible ni goo gadad, nge muulung, nge fol Bible ni tabinaw, nge machib. Ma manga yugu ‘dab da paged talin ni ngad rin’ed e tin nib fel’ ma nge bagadad mi i ayuweg bagadad, ya ereray e pi maligach nib m’agan’ Got ngay.’​—Heb. 13:15, 16.

20. Mang tow’ath e rayog ni nge nameg e piin ni yad be maruweliy e michan’ rorad ni fan ko fare biyul?

²⁰ Nap’an nra puog Jehovah e bin tomur e damumuw rok nga daken e re m’ag nib kireb ney, mar ra felfelan’ e piin ni ur maruweliyed e michan’ rorad ko fare biyul ma yad be dag nib ga’ fan u wan’rad! U lan fa bin nib beech e fayleng rok Got ni ke micheg e ri gad ra felfelan’ ko re tow’ath ney ni biyul ni pi’ ni ir e ke ayuwegdad ko damumuw rok.​—Mu beeg e John 3:16; Revelation 7:9, 10, 13, 14.

Uw Rogon ni Ga Ra Fulweg?

• Mang fan nib t’uf ni ngan biyuliydad?

• Mang e pag Jehovah nge Jesus fan ni bochan fare biyul?

• Mang angin fare biyul ngodad?

• Uw rogon ni ngad maruweliyed e michan’ rodad ko fare biyul ni maligach ni pi’ Jesus?

[Study Questions]

[Picture on page 15]

Kab mab e kanawo’ ngak urngin e girdi’ nrayog ni ngar fel’gad u wan’ Jehovah

[Picture on page 16]

Faan gad ra fal’eg i lemnag e n’en ni buch rok Abraham, nge Isak, nge Jakob, ma ra ayuwegdad ni nge ga’ fan u wan’dad e n’en nni pag fan ni bochan fare biyul