Mang Fan Nde Un Jesus nga Ngongolen e Am?

NGAD sulod aram ko duw ni 32 C.E. Ke chugur ni nge m’ay reb e rran, ma Jesus ni ir fare Messiah ni un weliy murung’agen e goo kan nang ni bochan e be golnag e m’ar ma be faseg e yam’. Ma daba’ e ke gin bokum biyu’ e girdi’ ngak ni bochan e ke ngongliy e maang’ang ma ke fil e thin rok Got ngorad. Chiney e ke kieg fapi girdi’ u but’ kar yu ulunggad. Me meybil ngak Jehovah me duruw’iyrad u daken e maang’ang. Ma aram me kunuy e tin ni ke aw ko ggan ya nge dabi maadab. Ere mang e ke rin’ fapi girdi’?​—John 6:1-13.

Tomuren ni kar guyed e maang’ang ni ke ngongliy Jesus nge feni fel’ rogon ni ke yarmiyrad ma ke pi’ e tin nib t’uf rorad, ma aram mar lemnaged ni ir e ra fel’ ni nge mang pilung. (John 6:14) Dab ni gin ko n’en ni kar rin’ed, ya yad be athapeg ni mang yigi gagiyeg reb e pilung nib fel’ ni bod Jesus, ni bochan e ke gafgow e nam rorad u tan pa’ e pilung nu bang. Aram fan nra towasariyed Jesus ni nge mang pilung rorad. Am lemnag e n’en ni rin’ Jesus.

Be gaar e John 6:15: “Me nang Jesus ni yad be n’en ni ngar bad ngak ngar feked ngar tiyed ni ir e nge mang pilung rorad, ndemtrug ko ba adag Jesus fa dabun; ma aram me pagrad nge yan nga daken e burey ni go ir.” N’en ni rin’ Jesus e be tamilangnag ni dabun ni nge un nga ngongolen e am ko nam rok. De thilyeg e n’en ni dugliy. I yog ni ka aram e n’en nthingari rin’ pi gachalpen. (John 17:16) Mang nda i un Jesus nga ngongolen e am?

Mang Fan ni Mel’eg Jesus ni nge Par u Mathilin?

I par Jesus u mathilin ngongolen e am ko re fayleng ney ni bochan e be fol ko pi kenggin e motochiyel u Bible. Am lemnag e pi n’em.

“Bay boch e girdi’ . . . nib gel gelngirad ma boch e be gafgow u tan pa’rad.” (Eklesiastes 8:9, BT) Aram rogon e gagiyeg ni i tay e girdi’ ni kab kakrom i yib ke mada’ ko chiney. Dab mu pagtalin nu m’on ni yib Jesus nga fayleng ma immoy u tharmiy nib kan. (John 17:5) Ere manang ndabiyog ko girdi’ ni ngar gagiyegnaged yad, maku manang ni gathi aram fan ni sunmiy Got e girdi’. (Jeremiah 10:23) Manang Jesus ni gathi am ko girdi’ e ra pithig e magawon rorad.

“Tin ni ka ba’ e girdi’ nu fayleng e ke suweyrad Faanem nib Kireb.” (1 John 5:19) Kam gin ko re thin ney, fa? Boor e girdi’ ni aram rogon. Yad ma lemnag e girdi’ ni ma un nga ngongolen e am ni bochan e yad baadag ni ngar fal’eged e re fayleng ney nge fel’ e par riy. Machane, demtrug rogon ma dabiyog rorad ni ngar gelgad ngak faanem ni yog Jesus ni be “gagiyegnag e girdi’ nu fayleng.” (John 12:31; 14:30) Aram fan ni yog Jesus ngak reb i girdien e am kakrom ni gaar: “Gin nsuwog e dariy u roy u fayleng.” (John 18:36) Jesus e ir e Pilung ko Gil’ilungun Got u tharmiy. Ere faan gomanga i un nga ngongolen e am nu fayleng, ma aram e daki yul’yul’ ko am rok e Chitamangin nu tharmiy.

Ere gur, i yog Jesus ngak pi gachalpen ndab ra folgad ko am nu fayleng? Danga’, ya yog ngorad nthingar ra pied ngak Got e tirok Got mar pied ko am e tirok e am.

I Tay Jesus Fan e Am nu Fayleng

Nap’an ni be machib Jesus u tempel, meb e pi tatogopuluw ra guyed rogon ni ngar ninged e kanawo’ ngak ko thin ni aram e ra fithed ngak ko rib ga’ fan ni nge pi’ e girdi’ e tax fa danga’. Faan gomanga yog Jesus ni danga’, ma  ra yan i aw ni be togopuluw ko am ma be k’aring e girdi’ ni yad bay u tan e gagiyeg rok piyu Roma ni ngar togopuluwgad ko am. Machane faan gomanga yog e arrogon, ma boor e girdi’ nra lemnag nib m’agan’ ko gafgow ni yibe tay ngorad. Ere fulweg rok Jesus e rib puluw, ya gaar: “Mpied ngak e pilung nu Roma e tirok ban’en, mi gimed pi’ ngak Got e tirok Got ban’en.” (Luke 20:21-25) Ere ba tamilang ni bay boch ban’en nthingari rin’ pi gachalpen ni fan ngak Got nge am.

Am e ku ma yarmiy boch ban’en. Kar ted ni ngaun yul’yul’, ma ngaun pi’ e tax, ma ngaun fol ko motochiyel. Ere uw rogon ni i pi’ Jesus “ngak e pilung nu Roma e tirok ban’en”? Gallabthir rok Jesus e yow ba yul’yul’ ma ur folgow ko motochiyel ko am ni yugu aram rogon ni yu ngiyal’ e ba mo’maw’. Bod nnap’an nib diyen Maria mar milekaggow Josef u lan 90 e mayil nga Bethlehem u nap’an ni ngan matheeg girdi’. (Luke 2:1-5) Jesus e bod e gallabthir rok, ya ma fol ko motochiyel, ma i un i pi’ e tax ni yugu aram rogon nsusun e dabi pi’. (Matthew 17:24-27) Maku i gay rogon ndabi pag rogon e tin ni nga i rin’ ni fan ko am ya ra togopuluw ko motochiyel rok Got. (Luke 12:13, 14) Rayog ni nga dogned ni i tay Jesus fan e am nu fayleng, machane da i un ko n’en ni yima rin’ riy. Ere, mang e yip’ Jesus fan u nap’an ni yog ni ngad pied e “tirok Got ban’en” ngak Got?

Uw Rogon ni i Pi’ Jesus e “Tirok Got Ban’en” ngak Got

Immoy bayay nni fith ngak Jesus ko bin ngan e motochiyel ni ke pi’ Got ngak e girdi’ e th’abi ga’, me fulweg ni gaar: “Thingari t’uf rom Somol ni ir e Got rom u polo’ i gum’irchaem, ngu polo’ i  lanin’um, ngu polo’ i lem rom. Ereray e bin th’abi ga’ nge bin th’abi ga’ fan e motochiyel. Ma bin migid ngay e motochiyel ni ku ba ga’ fan e bod e biney ni gaar, ‘Gin’en ni ga ba’ riy e thingari t’uf rom e en ni ir e mmigid ngom ni gowe gur.’” (Matthew 22:37-39) I yog Jesus ni faanra ngad pied e “tirok Got ban’en” ngak Got, ma n’en th’abi som’on ni ngad pied e t’ufeg, nib muun ngay e liyor u polo’ i gum’ircha’dad.

Rayog ni ngan kieg e t’ufeg ni aray rogon? Rayog ni ngad yul’yul’gad boch ngak Jehovah nge am rok u tharmiy, ma kud yul’yul’gad boch ko am nu fayleng? I yog Jesus ni gaar: “Dariy be’ nrayog ni nge mang sib rok l’agruw i masta: ya ra fanenikay bagayow me t’uf bagayow rok.” (Matthew 6:24) Be weliy Jesus u roy murung’agen e yul’yul’ ngak Got nge fel’ rogon, machane ku be lemnag nre kenggin e motochiyel ney e ku bay rogon nga ngongolen e pi am ni bod rogon ni i lemnag pi gachalpen ko bin som’on e chibog.

Tin th’abi kakrom e babyor e be dag nda i un pi gachalpen Jesus nga ngongolen e am. Da ur uned nga lungun e am nge pilung nu Roma ni bod e salthaw, ara ngaun towaliyrad nga boch e liw nib tolang, ya kemus ni yigoo fare Got ni i liyor Kristus ngak e yad ma liyor ngak. Ba gel e gafgow ni un tay ngorad ni bochan e re n’ey. Yu ngiyal’ e ma t’ar e pi toogor rorad e thin nga dakenrad nga u rogned ni yad be fanenikay e girdi’. Riyul’ e pi thin ney, fa?

Tin Riyul’ e Kristiano e Ri Yad Ma Lemnag e Girdi’

Am lemnag e bin migid ko bin th’abi ga’ e motochiyel rok Got ni yog Jesus ni gaar: “Gin’en ni ga ba’ riy e thingari t’uf rom e en ni ir e mmigid ngom ni gowe gur.” Ere ba tamilang ndariy reb i gachalpen Kristus ni bay mat’awun ni nge fanenikay be’. Jesus e ba t’uf e  girdi’ rok, ma i maruwel nib gel ni fan ngorad, ma i ayuwegrad ko magawon rorad.​—Mark 5:25-34; John 2:1-10.

Uw rogon ni yi manang Jesus? Da un pining ni En Ta Golnagey, ara En Ma Duruw’iy Bokum Biyu’ e Girdi’, ara En Ta Faseg e Yam’ ni yugu aram rogon ni i rin’ e pi n’em. Machane, ba ga’ ni yima pining Tamachib ngak. Ma riyul’ ni aram rogon. (John 1:38; 13:13) I yog Jesus ni bin th’abi ga’ i fan ni yib nga fayleng e nge machibnag e girdi’ u murung’agen Gil’ilungun Got.​—Luke 4:43.

Aram fan ni tin riyul’ i gachalpen Kristus e yad ma fanay e tayim rorad ni ngar mu’naged fare maruwel ni i rin’ e Masta rorad u nap’an ni immoy u fayleng ni aram e i machibnag fare thin nib fel’ ni murung’agen Gil’ilungun Got ngak e girdi’. I tay Jesus chilen ngak e tin riyul’ e Kristiano ni ngar machibnaged ngak e girdi’ nu fayleng murung’agen e re n’em. (Matthew 24:14; 28:19, 20) Re am nem nra gagiyeg ni manemus e ra gagiyegnag gubin ban’en ni ke sunmiy Got u fithik’ e t’ufeg. Ra lebguy e tin nib m’agan’ Got ngay ni mus ko gafgow nge yam’ nra chuweg. (Matthew 6:9, 10; Revelation 21:3, 4) Aram fan ni be yog e Bible ni fare thin ni i machibnag Kristus e aram e “thin nib fel’”!​—Luke 8:1.

Ere faanra ga be gay e tin riyul’ i gachalpen Jesus Kristus u fayleng e ngiyal’ ney, ma uw rogon ni ga ra poyrad? Yad ma maathuk nga ngongolen e am ko re fayleng ney? Fa yad ma mon’eg e maruwel ni i rin’ Jesus ni aram e ngar machibnaged murung’agen Gil’ilungun Got ngak e girdi’?

Ga baadag ni ngkum nang boch murung’agen Gil’ilungun Got nge rogon nra yib angin ngom e chiney, fa? Rayog ni ngam non ngak e Pi Mich Rok Jehovah ko binaw rom ara mman ko Web site rorad ni www.watchtower.org.

[Picture on page 20]

Ma Ayuweg e Pi Mich Rok Jehovah e Girdi’ ko Binaw Rorad, Fa?

Pi Mich Rok Jehovah e yad ma par u mathilin ngongolen e am. Machane yad ma ayuweg e girdi’ ko binaw rorad ndemtrug ko be’ u kun nam. Mu lemnag boch e pi n’ey:

◼ Pi Mich Rok Jehovah e aram ba ulung i girdi’ nib pag e medlip milyon urngirad ni kar ognaged yad ni yad ma fanay boor ko 1.5 bilyon e awa u gubin e duw ni ngar filed e thin nu Bible ngak e girdi’ nge rogon nra ayuwegrad ni ngar paged boch e ngongol nge boch ban’en ni kar mechamgad ngay nib kireb, miki fel’ e tabinaw rorad nge par rorad.

◼ Yad ma pilyeg e babyor nga 500 mit e thin ngaur wereged ndariy puluwon nib muun ngay boch e thin ndawor ni yoloy nga babyor.

◼ Yad ma tay e skul ni ke ayuweg bokum milyon e girdi’ ni ngar nanged rogon ni ngar weliyed e thin rok Got nib tamilang mab fel’ rogon.

◼ Kar ngongliyed boch ban’en ni ke ayuweg bokum biyu’ e girdi’ u ga’ngin e fayleng ni ngar nanged rogon e beeg babyor nge yol.

◼ Kar yarmiyed boor ko 400 e ulung u ga’ngin e fayleng ni ngar skulnaged e girdi’ u rogon e dimow naun ya nge yog nra toyed boch e naun ni fan ko fol Bible. Ba pag 20,000 e Kingdom Hall ni kan toy u lan fa ragag i duw ni ke yan.

◼ Yad ma pi’ e ayuw ko Pi Mich nge piin gathi yad e Pi Mich u ga’ngin yang e fayleng ni kar gafgowgad ni bochan e yoko’, nge durru’, nge ku boch ban’en. Tomuren reb e yoko’ nib gel ni aw nga Meriken, ma boor e Pi Mich nra ognaged yad ni ngar pied e ayuw. Ma ba pag 90 e Kingdom Hall nge 5,500 e naun nra toyed.

[Picture on page 19]

Nap’an ni towasariy e girdi’ Jesus ni nge un nga ngongolen e am, “me pagrad nge yan nga daken e burey ni go ir”