Mu Skulnag Pi Fakam

De Pag Jeremiah e N’en ni Ka Nog Ngak

BAY yu ngiyal’ ni ma mulan’um mag lemnag ni ngam tal ko pigpig ku Got, fa?— * Boor e girdi’ ni aram rogon. Maku aram rogon Jeremiah. Machane, de tal ko pigpig ni bochan e n’en ni i yog e girdi’ ara n’en ni ur rin’ed. Ngad weliyed rogon feni ga’ fan Jeremiah u wan’ Got nge rogon ni lemnag ni nge tal ko pigpig.

U m’on nni gargeleg Jeremiah me mel’eg Jehovah ni nge mang reb e profet ni nga i ginang e piin ndarur folgad rok Got. Machane ga manang ko mang e yog Jeremiah ngak Jehovah u tomuren boch e duw ni ke yan?— “Da gu nang rogon e welthin; ya kayigi gel fanag bitir.”

Ga be lemnag ma uw rogon ni fulweg Jehovah lungun Jeremiah?— I fulweg nib sumunguy mab mudugil, ya gaar: “Dab mog ni kayigi gel fanam bitir, ya ngam man ngak e girdi’ ni bay gu piem ngam man ngorad, ma ga weliy ngorad urngin e tin ni bay gog ngom ni ngam weliy. Dab mu tamdag ngorad, ya bay ug un ngom nguug yoror rom.”​—Jeremiah 1:4-8.

Machane, faani munmun miki mulan’ Jeremiah ni bochan e moning ni yibe tay ngak. I gaar: ‘Urngin e girdi’ ni yad be minmin ngog.’ Ere ke lemnag ni nge tal. Me gaar: “Dab kug lemnag Somol ma dab kug weliy e thin rok ngak e girdi’.” Machane, rriyul’ ni tal, fa?

I gaar Jeremiah: “I gak’ e thin rom ni bod ba nifiy u fithik’ i lanin’ug ngu fithik’ e yil rog ni dabiyog ni nge chuw. Me ngochngochan’ug ni kug tay rog ndagur yog.” (Jeremiah 20:7-9) Yugu aram rogon ni i rus Jeremiah yu ngiyal’, machane de tal ni bochan e ba t’uf Jehovah rok. Ngad guyed rogon ni ayuweg Jehovah Jeremiah ni bochan e de tal ko pigpig ngak.

I yog Jehovah ngak Jeremiah ni nge yog ko girdi’ nu Jerusalem ni faanra dab ra thilyeged e ngongol rorad ma yira thangrad. Nap’an ni yog Jeremiah ngorad e n’en ni ke yog Jehovah mar damumuwgad mi yad gaar: “Re moon ney e ba’ tapgin ni ngan dugliy ni ngan li’ ngem’.” Machane me wenig Jeremiah  ngorad ni ngar “folgad ko thin rok Somol.” Ngemu’ miki gaar: ‘Faan gimed ra lieg nggum’, ma ra yan i aw nib kireb e romed ni bochan e kam thanged e pogofan rok be’ ndawori bucheg ban’en ya Somol e ke l’ugeg ni nggu weliy urngin e pi n’ey ngomed.’ Ga manang ko mang e buch?—

Be gaar e Bible: “Piin ni yad be yog e thin nge girdi’ e lungurad ngak e pi prist nge pi profet, ‘Re moon ney e dab ni dugliy ni ngan li’ ngem’, ni bochan e ke welthin ngodad u fithingan Somol ni ir e Got rodad.’” Ere ke ayuweg Jehovah Jeremiah ni bochan e de pag e n’en ni ka nog ngak. Ngad guyed e n’en ni buch rok reb e profet ni Urijah fithingan.

Be yog e Bible ni, ‘I welthin [“Urijah,” NW] nib togopluw ngak yu Jerusalem ni bod rogon ni ke rin’ Jeremiah.’ Machane, ga manang ko mang e rin’ u nap’an ni damumuw Jehoiakim ni Pilung ngak?— I rus ma daki rin’ e n’en ni yog Got ngak, me mil nga Egypt. Ma aram me l’og fare pilung boch e pumoon ni nga ranod ra koled ngar pied ngak. Ga manang ko mang e rin’ fare pilung ngak Urijah?— I li’ ko sayden ngem’!​—Jeremiah 26:8-24.

Mang fan ni ayuweg Jehovah Jeremiah ma de ayuweg Urijah?— Dabisiy ni rus Jeremiah ni bod Urijah, machane de tal ko pigpig ngak Jehovah maku de mil. Ere mang e gad ra fil ko n’en ni rin’ Jeremiah?— Yu ngiyal’ e ba mo’maw’ ni ngad rin’ed e n’en ni ke yog Got machane thingari pagan’dad ngak ma ud folgad rok.

[Footnote]

Boch e Deer:

○ Mang maruwel e pi’ Jehovah ngak Jeremiah?

○ Mang fan ni lemnag Jeremiah ni nge dab ki rin’ e n’en ni ka nog ngak?

○ Mang fan ni ayuweg Jehovah Jeremiah ma de ayuweg Urijah?

○ Mang e kam fil ko n’en ni rin’ Jeremiah?