“Bochan ba Pagel ni Mereb e Duw Rok”

GUBIN ngiyal’ ni ma yib e Pi Mich Rok Jehovah nga tabinaw rok, Wiesława, ni ma par u len yimuch u Poland, me pining e magar ngorad me yog ngorad ni ngar chuwgad. Reb e rran me yib Samuel ni mereb e duw rok nge chitiningin nga tabinaw rok fare pin. Ya ney e motoyil Wiesława ko fare thin me fek reb e magazine ni murung’agen e paradis u fayleng.

Bochan ni ke chuchugur fare Puguran ko yam’ ni tay Jesus Kristus, ma ba adag Samuel ni nge pining Wiesława ko re madenom nem nib ga’ fan. Ere un e chitiningin ngak nga ranow ra guyew fare pin bayay, ni ya ney e kar fekew bangi babyor ni kan yoloy ni fan ko ngan pining e girdi’. Me guy Wiesława fare pagel ni ke chuw nga mad nib fel’ rogon, me yog ni ngan son buchuuw me yan nge yan i chuw ko mad nib fel’. Ma nap’an ni sul, me motoyil ku Samuel, me adag fare pong, me fith ni gaar: “Rayog ni gub ni goo gag fa ra un e pumoon rog?” Miki ul’ul ngay nge gaar: “Ku ra dabi un e pumoon rog, ma gu ra yib. Samuel, nggu rin’ nbocham.” Me felfelan’ Samuel ngay, ya rin’ ni bod ni ke yog.

Nap’an fare Puguran me par Samuel nga charen Wiesława nga i dag ngak e thin nu Bible ni yibe weliy. Re n’ey e ri baadag fare pin. Ri felfelan’ ko fare Puguran ma ri baadag fare welthin ni un weliy ni thin nib mom. Ma ki felan’ ni yibe pining e magar ngak nge t’ufeg ko re ulung nem ni kan dag ngak. Ma ka aram nap’an, mi i dag Wiesława ni ke adag i yan e tirok Got ma ke tabab ni nga i chag ngak e Pi Mich Rok Jehovah ni gubin ngiyal’. Kafin ni yog ni gaar: “Kug tamra’ ni da ugu motoyil ngomed ko som’on nim bad nga tabinaw rog. Ma ngar gog ni kemus ni kug motoyil ko thin romed nbochan bochi pagel ni mereb e duw rok, bochan Samuel.”

Boor e Pi Mich Rok Jehovah ni fel’ yangaren, ni taareb rogon ngak Samuel nu Poland ni yad be pining e sorok ngak Got u l’ugunrad nge daken pangirad nib fel’. Faanra gur reb e fel’ yangaren, maku rayog rom ni ngam ayuweg e girdi’ nib yul’yul’ nga ra adaged fel’ngin e thin rok Got.