Mu Sap Nga Fel’ngin E Ulung Rok Jehovah

“Bayi fel’ u wun’mad e pi n’en nib fel’ ni ba’ ko naun rom.”​—PSALM 65:4.

1, 2. (a) Mang e ra rin’ fapi yaram ko maruwel ni ngan tay ko tempel ngak e girdi’ rok Got? (b) Mang ayuw e pi’ David ni fan ko fare maruwel ko tempel?

 DAVID ni be’ nu Israel kakrom e ir be’ nrib gagiyel u fithik’ e piin ni bay murung’agrad u lan fare Hebrew Scriptures. Re tachugol saf ney, ta musik, profet, nge pilung e tay e pagan’ rok ni polo’ nga daken Jehovah Got. Tha’ ni bay u thilin David nge Jehovah e k’aring ni nge adag ni nge toy ba naun ni fan ngak Got. Re naun ney e ir e ra mang tagil’ e liyor u Israel. Manang David ni fapi yaram ni fan ko fare maruwel ko tempel e ra yibnag e felfelan’ nge tow’ath ngak e girdi’ rok Got. Ere tang David ni gaar: “Ba felan’ e piin ni kam [Jehovah] mel’egrad, ni kam fekrad ni ngar pired u lan e naun rom nib thothup! Bayi fel’ u wun’mad e pi n’en nib fel’ ni ba’ ko naun rom, ni tin ni bayi fel’ rogoy riy u lan e tempel rom nib thothup!”​—Psalms 65:4.

² Dan pag David ni nge yog rogon e maruwel ko fare naun rok Jehovah. Re maruwel nem e ntay ni fan ngak fak ni Solomon. De gun’gun’ David ni bochan e kan pi’ fare maruwel ngak yugu be’ ma ir rok e baadag ni nge rin’. N’en ni baga’ fan u wan’ e ngan toy fare tempel. I pi’ e ayuw ko fare maruwel ni aram e pi’ ngak Solomon rogon ni ngan toy fare tempel ni ke pi’ Jehovah. Tin ni kub muun ngay, e i yarmiy David bokum i biyu’ piyu Levites ngar yu ulunggad ko maruwel ngar pied boor e gol nge silber ko fare maruwel ko tempel.​—1 Kronicles 17:1, 4, 11, 12; 23:3-6; 28:11, 12; 29:1-5.

3. Mang ngongol e ma dag e pi tapigpig rok Got ko yaram ni fan ko bin nriyul’ e liyor?

³ Piyu Israel ni yad ba yul’yul’ e ra folgad ko fare yaram nni ngongliy ni fan ko bin nriyul’ e liyor u lan e naun rok Got. Gadad e pi tapigpig rok Jehovah e ngiyal’ ney, e ka gad ma fol ko pi yaram ni yima ngongliy ni fan ko liyor u lan e ulung rok Jehovah u fayleng. Ere gad ma dag ni taareb rogon e ngongol ni gad ma dag ko ngongol ni i dag David. Da da ma non nongad. Ya n’en ni gad ma rin’, e gad ma dag e tin nib fel’ ko ulung rok Got. Kaa yugu mu lemnag e pi n’en nib fel’ ni susun ni ngad pininged e magar riy? Ngad weliyed murung’agen boch.

 Ngad Pininged e Magar ko Piin ni Ma Ayuweg e Ulung

4, 5. (a) Uw rogon ni ma rin’ fare “tapigpig nib yul’yul’ mab gonop” e maruwel rok? (b) Uw rogon u wan’ boch e Pi Mich e pi ggan ni aram e thin rok Got ni ke yog ngorad?

⁴ Bay fan nsusun ni ngad pininged e magar ngak “fare tapigpig nib yul’yul’ mab gonop” ni ke tay Jesus ni ngii guy e pi n’en fen Jesus ni bay u fayleng. Pi Kristiano ney ni tapigpig ni kan dugliyrad e yad ma yog e thin u rogon e machib ni gad ma tay, maku ma yarmiy e muulung ni fan ko liyor, maku ma ngongliy e pi babyor ni bay e thin nu Bible riy ni ke pag 400 mit e thin. Bokum milyon e girdi’ u ga’ngin yang e fayleng ni yad ma fek e pi ggan ney ni aram e thin rok Got “ko ngiyal’ ni yima pi’ riy” ni yad be pining e magar. (Matthew 24:45-47) Ere ri dariy fan ni ngan gun’gun’nag murung’agen.

⁵ U lan boor e duw, ma ba pilibthir ni ir reb e Pi Mich Rok Jehovah ni Elfi fithingan e yib ngak e fel’ laniyan’ nge ayuw u nap’an ni fol ko pi fonow ko thin nu Bible u lan e pi babyor ni ma fal’eg fare tapigpig nib yul’yul’. Felfelan’ e k’aring Elfi nge yoloy ni gaar: “Mang e gu ra rin’ ni faanra de moy e ulung rok Jehovah?” Ba wu’ i yabgol ni Peter nge Irmgard fithingrow e ku ke yoor e duw ni kar mangew tapigpig rok Got. I dag Irmgard ni be pining e magar ni fan ko urngin e pi babyor ni ke fal’eg e “ulung rok Jehovah ni bay e t’ufeg riy.” Pi babyor ney e kub muun ngay boch ni kan ngongliy ni fan ngak e girdi’ ni dabiyog ni ngar guyed ban’en ara rung’aged ban’en.

6, 7. (a) Uw rogon ni yibe yarmiy fapi maruwel ko pi ulung u fayleng ni ga’ngin? (b) Mang e ka nog u murung’agen e ulung rok Jehovah ni bay u fayleng?

⁶ Fare Governing Body ko Pi Mich Rok Jehovah e ir owchen fare ‘tapigpig nib yul’yul’’ ni bochi ulung ni ba achig ni bay riy e piin ni kan dugliyrad ko kan ni thothup ni yad be pigpig u tochuch rok e Pi Mich Rok Jehovah ni bay u Brooklyn, u New York. Fare Governing Body e ma mel’eg e pi tapigpig rok Jehovah ni boor ban’en ni yad manang ni ngar maruwelgad ko pi branch ofis ni ma yaliy e maruwel ni yima rin’ ko pi ulung u ga’ngin yang e fayleng ni ke pag 98,000 u gubin. Pi pumoon ni ke yog ni ngar rin’ed e tin nib t’uf ni be yog e Bible ni thingar nrin’ e kan dugliyrad ni ngar manged e piin piilal nge ministerial servant ko pi ulung ney i yan. (1 Timothy 3:1-9, 12, 13) Piin piilal e yad be pow’iy mi yad be yal’uweg e girdi’ rok Got ni kan pag fan ngorad ni ngar ayuweged u lan e ulung. Rib ga’ e tow’ath riy ni ngan mang bang ko fare ulung min guy e t’ufeg nge taareb laniyan’ ni bay u fithik’ ‘pi cha’ ni ke mich Got u wan’rad’!​—1 Peter 2:17; 5:2, 3.

⁷ Girdi’ e baga’ ni yad ma pining e magar ko pi fonow ni ma pi’ e piin piilal ngorad u daken e t’ufeg ma da rura non non gad ni bochan. Ni bod Birgit, ni 30 e duw rok ma ir reb e leengiy  nib Kristiano. Nap’an ni kab fel’ yangaren, ma i chag ngak boch e girdi’ nib kireb me chugur ni nge un ko ngongol nib kireb. Machane pi fonow u lan e Bible nib tamilang ko piin piilal nge ayuw ni pi’ boch e piin ntaareb e michan’ rorad ngak e ayuweg ni nge siyeg e pi n’em nib kireb. Uw rogon laniyan’ Birgit e chiney? Ke yog ni gaar: “Rug be felfelan’ ni ka gag bang ko re ulung rok Jehovah ney nrib manigil.” Reb e pagal ni 17 e duw rok ni Andreas fithingan e gaar: “Riyul’ ni ireray e ulung rok Jehovah, bin nth’abi fel’ e ulung u ga’ngin yang e fayleng.” Gathi ngad felfelan’gad ko tin nib fel’ ko fare ulung rok Jehovah ni bay u fayleng?

Piin ni Yad Ma Ayuweg e Ulung e Ku Dar Flontgad

8, 9. Uw rogon e ngongol ni dag boch e girdi’ u nap’an David, ma mang e rin’ David ko pi ngongol nem?

⁸ Arrogon, piin ni kan dugliyrad ni ngar ayuweged e ulung e ku dar flontgad. Yad gubin ma yad ma oloboch, ma boch i yad e bay boch ban’en ni yad ba meewar riy ni yugu yad ma oloboch riy ni yad ma gay rogon ni ngar gelgad ngay. Ere susun ni ngad damumuwgad ni bochan e re n’ey fa? Danga’. Ya ki mus ngak e piin ni kun pi’ e maruwel ngorad u Israel kakrom e ku ra ngongliyed boch e oloboch nib ubchiya’. Nap’an ni kab pagal David, ma kan nog ngak ni nge maruwel ni ngii chubeg e musik ni nge fal’eg laniyan’ Saul ni Pilung. De n’uw nap’an boch nga tomur, me gay rogon Saul ni nge li’ David, ma aram me mil nge chuw.​—1 Samuel 16:14-23; 18:10-12; 19:18; 20:32, 33; 22:1-5.

⁹ Boch piyu Israel e yad ba sasaliyeb. Ni bod ni, en nib ga’ ko salthaw rok David ni Joab fithingan e li’ reb e girdi’ rok Saul ni Abner fithingan. I maruwel Absalom nib togopuluw ngak David ni chitamangin ni bochan e nge yog fare liw ko pilung ngak. Ma fa en ni ma fonownag David ni Ahithophel ni be’ nri ma pagan’ ngak e yognag. (2 Samuel 3:22-30; 15:1-17, 31; 16:15, 21) Machane de non non David ni bochan, ara digey e bin nriyul’ e liyor. Tin nriyul’ riy e ba thil e ngongol ni dag David. Gafgow e k’aring David ni nge par nib chugur ku Jehovah me par ni be dag e ngongol nib fel’ u nap’an ni mil nbochan Saul. U nap’an e re ngiyal’ i nem, me tang David ni gaar: “Mu runguyeg, O Got, mu runguyeg, ya gur e gu be naf ngom. Taglul’ u pom e kug naf ngay nge taw nga nap’an ni ke m’ay e gafgow rog.”​—Psalm 57:1, NW.

10, 11. Mang e n’en ni buch rok reb e Kristiano ni Gertrud fithingan u nap’an ni kab rugod, ma mang e yog u murung’agen e oloboch rok boch e piin taareb e michan’ rorad?

¹⁰ Dariy rogon ni ngad non nongad ni bochan e sasalap u lan e ulung rok Got e ngiyal’ ney. Mus ngak Jehovah nge pi engel rok nge piin ni yad ma gafaliy e ulung ni dab ra paged ni nge par e piin sasaliyeb u lan e ulung ko Kristiano. Yugu aram rogon, ma gad gubin ni gad ma mada’nag e pi oloboch ni bochan e dad flontgad​—ni tin ni gad ma ngongliy nge tin ni ma ngongliy boch e pi tapigpig rok Got.

¹¹ Gertrud, ni be’ ni ke n’uw nap’an ni ma liyor ngak Jehovah, e nap’an ni kab rugod min t’ar e thin nga daken nga nog ni be’ nib sasalap gathi reb e ta machib ko Gil’ilungun ni polo’ e tayim. Mang e n’en ni rin’ e re ppin ney? I gun’gun’ ni bochan e n’en ni yibe rin’ ngak fa? Danga’. De n’uw nap’an u m’on ni nge yim’ ko duw ni 2003 ni ke gaman 91 e duw rok, me yog ni gaar: “Pi n’ey ni buch rog nge ku boch ni buch nga tomuren e ke fil ngog ni yugu aram rogon ni be oloboch e pi girdi’ ney, ma ma fanay Jehovah e girdi’ nde flont ni nge yal’uweg e re maruwel rok ney nib ga’ fan.” Nap’an ni mada’nag Gertrud e oloboch rok yugu boch e tapigpig rok Got, me meybil nib gel ngak Jehovah.

12. (a) Mang boch ban’en nib kireb ni i rin’ boch e Kristiano ko bin som’on e chibog? (b) Mang e susun ni ngad tedan’dad ngay?

¹² Bochan ni pi Kristiano ni yad ba yul’yul’ e dar flontgad, ere nap’an ni ra oloboch reb e walag ni ma ayuweg e ulung, ma ngad ul’ulgad ni ngad “rin’ed urngin ban’en ndab ud gun’gun’gad.” (Filippi 2:14) Rib gel e kireban’ riy ni faanra ngad folwokgad ko n’en nib kireb ni rin’  boch e Kristiano u lan e ulung ko bin som’on e chibog! Rogon ni yog Jude ni reb i gachalpen, e pi tamachib ni googsur e ngiyal’ nem e “dariy fan u wan’rad e tin be yog Got ni ngar rin’ed; ma yad be yog e thin nib kireb ni fan ngak e pi engel nu tharmiy ni yad ba flaab.” Tin ni kub muun ngay e, “pi girdi’ nem e gubin ngiyal’ ni yad ma gun’gun’.” (Jude 8, 16) Mang e yugu da siyeged e kanawo’ ni ma lek e piin ni yad ma gun’gun’ mad tedan’dad ko tin nib fel’ ni ma yib ngodad u daken fare ‘tapigpig nib yul’yul’.’ Ere ngad felfelan’gad nga fel’ngin e ulung rok Jehovah mad “rin’ed urngin ban’en ndab ud gun’gun’gad.”

“Re Machib Ney e Kayigi Mo’maw’”

13. Mang e n’en ni rin’ boch pi gachalpen ni bochan boch e machib ku Jesus Kristus?

¹³ Boch e girdi’ ko bin som’on e chibog e ur gun’gun’gad nib togopuluw ko girdi’ ni ma ayuweg e ulung, ma boch e yad be gun’gun’nag e machib ni i tay Jesus. Rogon ni bay ko John 6:48-69, e yog Jesus ni gaar: “En nra kay e ufin u dowag me unum rachaeg e ke yog e yafos ndariy n’umngin nap’an ngak.” Nap’an ni ra rung’aged e pi thin ney, ma boor pi gachalpen ni lungurad: “Re machib ney e kayigi mo’maw’. Mini’ e ra motoyil ko tiney e thin?” Manang Jesus ni ‘pi gachalpen e yad be gun’gun’ ni fan e re thin nem ni ke yog.’ Bochan e re bugithin ney ni yog Jesus, ma aram e ‘boor [pi gachalpen] nra paged ni dakur uned ngak.’ Machane gathi gubin e pi gachalpen ni gun’gun’. Am guy e n’en ni buch u nap’an ni fith Jesus ko fa 12 i apostal ni gaar: “Ma gimed – gimed ba adag ni ngkum paged gag ngam marod?” Me fulweg apostal Peter ni gaar: “Somol, i mini’ e gamad ra yan ngak? Ya gur e bay fapi thin rom ni ir e ma pi’ e yafos ndariy n’umngin nap’an ngak e girdi’; ma chiney e ke mich u wan’mad ma kug nanged ni gur Faanem ni Gab Thothup ni mub rok Got.”

14, 15. (a) Mang fan ni bay boch e girdi’ ni ma chalbarad nga boch i rogon e machib ko Kristiano? (b) Mang e rayog ni ngad filed ko n’en ni ke buch rok be’ nib moon ni fithingan e Emanuel?

¹⁴ Chiney, e buchuuw e girdi’ u fithik’ e girdi’ rok Got ni ke chalbarad nga bochi ra rogon e machib ko Kristiano ma yad be gun’gun’nag e ulung rok Jehovah u ga’ngin yang e fayleng. Mang fan ni ma buch e re n’ey? Mit ney e gun’gun’ e baga’ ni ma sum ni bochan e bay boch e girdi’ ni dar ma nang fan nib fel’ rogon e n’en ni ma rin’ Got. Fa En Ta Sunumiy e be mon’og i yan rogon ni be dag e tin nriyul’ ko girdi’ rok. Arfan ni rogon e tamilangan’ rodad ko thin nu Bible e ba t’uf ni ngan yal’uweg u reb e tayim nge reb. Ma yooren e girdi’ rok Jehovah e yad ma felfelan’ ko re n’ey. Ma buchuuw e “der puluw rogon e lem rorad” ma yad damumuw ko pi n’en ni ma thil. (Eklesiastes 7:16, NW) Tolngan’ e ku rayog ni nge k’aring e re n’ey, ma boch i yad e ma thay nga lan fare wup ko lem ni der fol. Demtrug rogon, ma bay e riya’ ko gun’gun’, ni bochan e rayog ni nge fekdad biyay ko fayleng ngad sulod ko pi kanawo’ riy.

¹⁵ Emanuel, e ir reb e Pi Mich ni i thibthibnag boch ban’en ni beeg ko pi babyor ni ma fal’eg “fare tapigpig nib yul’yul’ mab gonop.” (Matthew 24:45) I tal i beeg e pi babyor rodad me de n’uw nap’an me yog ko piin piilal ko ulung ni ke dugliy ni nge dab ki mang reb e Pi Mich Rok Jehovah. Machane, de n’uw nap’an, me yibi nang ni pi machib ko ulung rok Jehovah e dariy ban’en nib oloboch riy. Ma aram me gay rogon ni nge non ngak e Pi Mich, me yog e kireb rok, ma aram me sul biyay ko ulung ngki mang biyay reb e Pi Mich Rok Jehovah. Ma angin e ke mang be’ nib felfelan’ biyay.

16. Mang e rayog ni nge ayuwegdad ni nge dabki maruwaran’dad nga boch e machib ko Kristiano?

¹⁶ Uw rogon ni faanra kan wawliydad ni ngad gun’gun’gad ni bochan boch e machib ko ulung rok Jehovah? Ma aram e ngad gum’an’gad. Fare ‘tapigpig nib yul’yul’’ e ku bay ra ngongliyed baken e babyor ni ra fulweg e pi deer rodad me ayuwegdad ni dabki maruwaran’dad. Bay e gonop riy ni ngan gay e ayuw ko piin piilal ni Kristiano. (Jude 22, 23) Meybil, fol Bible, nge chag ngak e girdi’ ni ba gel ko tirok Got ban’en e ku rayog ni nge ayuwegdad ni ngad chuweged e pi n’en ni be maruwaran’dad ngay ma rayog ni nge gelnag e felfelan’ rodad ko  pi thin nu Bible ni ma gelnagey ni kada filed ko gin ni ma non Jehovah ngodad riy.

Mu Par nib Fel’ e Lem Rom

17, 18. Mang ngongol e susun ni ngad daged ko bin ni nguud gun’gun’gad, ma mang fan?

¹⁷ Riyul’, ni girdi’ ni de flont e ba mom ngorad ni ngaur denengad, ma boch e girdi’ e baadag ni ngaur gun’gun’gad ndariy fan. (Genesis 8:21; Roma 5:12) Machane faanra nge mecham ngodad ni nguuda gun’gun’gad ni gubin ngiyal’, ma gad be tay e tha’ u thildad Jehovah nga thatharen e riya’. Ere arfan, ni ba t’uf ni ngad gayed rogon ni ngad ayuweged gadad ko gun’gun’.

¹⁸ Ba t’uf ni ngad daged reb e pangin nra pi’ e athamgil nga laniyan’ boch e girdi’ ko bin ni ngad gun’gun’naged murung’agen boch ban’en u lan e ulung, ma gad par ni kad mitgad ko maruwel nib gel u lan e ulung, me par nib fel’ rogon e michan’ rodad. (1 Korinth 15:58; Titus 2:1-5) Jehovah e ir e be gagiyegnag urngin ban’en u lan e ulung rok, ma manang Jesus e pi n’en ni yibe mon’ognag u lan gubin e ulung, ni taareb rogon ko n’en ni i rin’ ko bin som’on e chibog. (Revelation 1:10, 11) Mu sonnag Got nge Kristus ni ir Lolugen e ulung u fithik’ e gum’an’. Piin ni ma gafaliy e saf ni ma pagan’uy ngorad e rayog ni ngan fanayrad ni ngar yal’uweged e tin nib t’uf ni ngan yal’uweg.​—Psalm 43:5; Kolose 1:18; Titus 1:5.

19. Ra uw rarogon e fayleng u nap’an ni fare Gil’ilungun e ra gagiyegnag urngin ban’en ko girdi’, ma mang e thingar da sapgad ngay e chiney?

¹⁹ Dab ki n’uw nap’an ma bayi m’ay e re m’ag nib kireb ney, ma Gil’ilungun fare Messiah e ra yon’ lon e pi am ko girdi’. Ere rib ga’ fan ni nge bagadad me par ni be dag e pangin nib fel’! Re n’ey e ra ayuwegdad ni ngad nanged e tin nib fel’ ko piin ntaareb e michan’ rodad, ko bin ni ngad sapgad ko oloboch rorad. Faanra da sapgad ko tin nib fel’ u murung’agrad ma rayog ni nge yibnag e felfelan’ ngodad. Ma re n’ey e ra pi’ e athamgil nga lanin’dad mad ilalgad ko tirok Got ban’en ko bin ni nge mulan’dad ni bochan e gun’gun’.

20. Pangin nib fel’ e ra ayuwegdad ni ngad felfelan’gad ko mang flaab?

²⁰ Pangin nib fel’ e ra ayuwegdad nge yib ngan’dad e pi flaab ni boor ni gad ma felfelan’ ngay ni bochan e gad ma chag ko fare ulung rok Jehovah ni bay u fayleng. Kari mus e re ulung u fayleng nib yul’yul’ ko En Th’abi Tolang u ga’ngin yang e palpalth’ib. Uw rogon u wan’um e liyor ni ga be un ngay ni yibe tay ko bin riyul’ e Got ni aram Jehovah? Manga yu gum bod David ni tang ni gaar: “Ni bochan e ga be fulweg taban e meybil. Urngin e girdi’ e ngar bad ngom. Ba felan’ e piin ni kam mel’egrad, ni kam fekrad ni ngar pired u lan e naun rom nib thothup! Bayi fel’ u wan’mad e pi n’en nib fel’ ni ba’ ko naun rom.”​—Psalm 65:2, 4.

Ka Ga Manang?

• Mang fan ni ngad pininged e magar ko piin ni ma ayuweg e ulung?

• Mang e susun ni ngad rin’ed u nap’an ni ra oloboch e piin ni ma ayuweg e ulung?

• Susun uw rogon u wan’dad e fonow ni bay ko tamilangan’ u lan e Bible?

• Mang e rayog ni nge ayuweg reb e Kristiano ni dabki maruwaran’?

[Study Questions]

[Picture on page 28]

I pi’ David ngak Solomon rogon e maruwel ni ngan tay ko fare tempel me pi’ e ayuw ko fa bin nriyul’ e liyor ni yib u gum’irchaen

[Picture on page 31]

Piin piilal ni Kristiano e yad ma pi’ e ayuw ko tirok Got ban’en u fithik’ e felfelan’