Ma Chuweg Jehovah E Piin Ni Ke Gafgow Ko Gafgow

“En nib mat’aw e boor e gafgow ni ma yib ngak, machane i Somol e ma chuweg u fithik’ ni gubin.”​—PSALM 34:19.

1, 2. Mang magawon e pirieg reb e Kristiano nib yul’yul’, ma mang fan nrayog ni nge yib e lem ngodad ni aram rogon?

 REB e ppin ni Keiko fithingan a e ke mang reb e Pi Mich Rok Jehovah ni ke pag 20 e duw. Ba ngiyal’, ma i pigpig nib regular pioneer ara tamachib ko gil’ilungun nib polo’ e tayim. Rib t’uf rok e re maruwel nem. Machane, dawori n’uw nap’an ni ke yan me kireban’ nib gel ni be lemnag ni dabkiyog ni i rin’ ban’en ma ke par ni goo ir. Me gaar, “Kemus ni goo yor e gu be tay.” Rogon ni nge taleg e lem rok ni ke kireb, e pi’ Keiko e tayim rok ni boor ko fol Bible. Me yog ni gaar, “Machane, ku de yog rog ni gu thilyeg rarogog. Ke ni taw ko gin ni baaray ni kugu adag ni nggum’.”

² Kaay yu gu mu magawon ko lem ni aram rogon ni urngin ban’en ma der fel’? Ra gur reb e Pi Mich Rok Jehovah, ma boor fan ni nga mu felfelan’ ya pigpig ku Got e “ba ga’ fan ko biney e tamilang nge binem e tamilang.” (1 Timothy 4:8) Chiney, e ga be par u lan ba paradis nib spiritual! Machane, aram e be yip’ fan ni kan yororiyem ndabkib urngin mit e gafgow ngom? Danga’! Be yog e Bible ni: “En nib mat’aw e boor e gafgow ni ma yib ngak.” (Psalm 34:19) Re n’ey e dab ni gin ngay, “ya urngin e girdi’ nu fayleng e ke suweyrad Faanem nib Kireb,” Satan ni Moonyan’. (1 John 5:19) Gad gubin ma kad pirieged angin e re n’em u reb e kanawo’ ngu reb.​—Efesus 6:12.

Angin e Gafgow

3. Mog boch e pi tapigpig rok Got u Bible nra pirieged e mochuch nib gel.

³ Mochuch nib n’uw nap’an e rayog ni nge magawonnag e lem rodad nib polo’. (Proverbs 15:15) Mu lemnag fare moon ni Job nib yal’uw. U fithik’ e skeng nib elmerin, me gaar Job: “Girdi’ ni gargeleg e ppin, e ba ngoch nap’an e yafas rok ma ke sug ko gafgow.” (Job 14:1, NW) Felfelan’ rok Job e ke m’ay nga bang. Ba ngiyal’, e ki lemnag ni ke digey Jehovah. (Job 29:1-5) Gathi goo Job e tapigpig rok Got ni ma pirieg e kireban’ nib gel. Be yog e Bible ngodad ni Hannah e “ri kireban’” ni bochan ni de diyen. (1 Samuel 1:9-11) Bochan e kireban’ nga ban’en ko tabinaw, me gaar Rebekah: “Ke ngochngochan’ug.” (Genesis 27:46) Ma nap’an ni i lemnag David e pi oloboch rok me gaar: “U gu wan ni polo’ e rran ni gub kireban’.” (Psalm 38:6, NW) In ney e ban’en e be tamilangnag ni pumoon nge ppin ni bay madgun Got rorad u m’on  ko ngiyal’ ko Kristiano e ku ranod yu ngiyal’ u fithik’ e mochuch nib gel.

4. Mang fan ndab ni gin ngay ni bay e girdi’ u fithik’ e piin Kristiano ni yad be “mochuch” e ngiyal’ ney?

⁴ Ma uw rogon e pi Kristiano? I pirieg apostal Paul nib ga’ fan ni nga nog ngak piyu Thessalonika ni ngar “fal’eged laniyan’ e piin ni ke mochuch.” (1 Thessalonika 5:14, NW) Reb e babyor e yog ni fare thin nu Greek ni kan piliyeg ni “girdi’ ni ke mochuch” e ku rayog ni nga nog ngak e piin ni “bochi ngiyal’ me ingrad e magafan’ ko yafas.” Thin rok Paul e be yip’ fan ni boch e piin ni kan dugliyrad u lan e ulung nu Thessalonika e ke mochuchan’rad. Ku bay e girdi’ u fithik’ e piin ni Kristiano ni ke mochuch e ngiyal’ ney. Machane mang fan ni kar mochuchgad? Ngada lemnaged dalip ban’en ni baga’ ni ir e ma k’aring.

Rogon ni Gad Ba Tadenen e Rayog ni Mochuchnagdad

5, 6. Mang fel’ laniyan’ e rayog ni ngan fek ko Roma 7:22-25?

⁵ De taareb rogon ko girdi’ ni kireb ni “kar paged yad nga pa’ e kireb,” tin riyul’ e Kristiano e yad ma gafgow nbochan rarogorad ko denen. (Efesus 4:19) Rayog ni ngar lemgad ni bod Paul ni yoloy ni gaar: “Lanin’ug e ri ba adag fare motochiyel rok Got. Machane reb e motochiyel nib thil ko biney e gu be guy ni be maruwel u fithik’ i dowag reb e motochiyel ni be togopuluw ko bin baaram e motochiyel ni ba adag lanin’ug. Ir e ke tiyeg ni gag e kalbus ko tin ni ba adag e denen ni ir e be maruwel u fithik’ i dowag.” Mi ri yog Paul ni gaar: “Ere kar gu gafgow!”​—Roma 7:22-24.

⁶ Kaamu thamiy rom ni bod ni rin’ Paul? De kireb ngom ni ngar um nang feni da mu flont, ya re n’ey e ra gelnigem ko gelngin e denen ma rayog ni pi’ gelngin lanin’um ngam pilo’ ko kireb. Machane de t’uf ni nga yugu um par ni be kireban’um ko pi oloboch rom. Fapi thin ko mochuch ni ke sul Paul u daken, e puthuy ngay ni gaar: “Ke magar Got u daken e Somol rodad i Jesus Kristus!” (Roma 7:25) Arrogon, ba pagan’ Paul ni rachaen Jesus ni map’ e rayog ni n’ag fan e denen ni ke af ngodad.​—Roma 5:18.

7. Mang e ra ayuweg be’ nge dabi mochuch nbochan nib mom ngak ni nge denen?

⁷ Faanra ga be thamiy ni ke ingem rarogom ni gab tadenen, ma ngam fal’eg lanin’um ko thin rok apostal John, ni yoloy ni gaar: “Ma faanra chey nge denen be’, ma ba’ Jesus Kristus, ni be’ nib mat’aw, ni ma wenignagdad ngak e en ni Chitamangiy. Yu daken Kristus e ir e be n’ag Got fan e denen rodad riy, ni gathi ke mus ni denen rodad, ya ku er rogon e denen rok urngin e girdi’.” (1 John 2:1, 2) Faanra kam mochuch nbochan rarogom nib mom ni ngam denen, ma dab mu pag talin ni yim’ Jesus ni fan ngak pi tadenen, gathi piin flont. Riyul’, “ya ke denen urngin e girdi’, kar pired ni yad mmal’af rok Got ke mul e flaab rok u pa’rad.”​—Roma 3:23.

8, 9. Mang fan ni thingar da paged e lem ni gad be kirebnagdad?

⁸ Machane, susuna kam denen kafram nib ubchiya’. Ma dariy e maruwar riy, ni ka mog ere n’ey ngak Jehovah u fithik’ e meybil, ni sana boor yay. Ke yog e ayuw ngom ko tirok Got ni ke pi’ e piin piilal ni Kristiano. (James 5:14, 15) Ma riyul’ ni kam kalngan’um ma aram e ga ra par ni ka gur reb i gothon e ulung. Ara sana kam digey e ulung rok Got ba ngiyal’, me taaboch riy mag kalngan’um nga kum beech bayay. Demtrug reb e gali ney, ma denen ni kam rin’ e ku ra yib ngan’um me mochuchnigem. Faanra ke buch ni aram rogon, ma dab mu pag talin ni Jehovah e “ba gur ni nge n’ag fan” e kireb ko piin riyul’ ni kar kalgadngan’rad. (Isaiah 55:7) Maku reb riy, e dabun ni ngam lemnag ni ka rim kireb. Ya aram e n’en nib m’agan’ Satan ngay ni nge buch. (2 Korinth 2:7, 10, 11) Fare Moonyan’ e bay ni kirebnag ya aram e n’en nib fel’ ngak, machane baadag ni ngam lemnag ni taareb rogon e gechig ni ngeb ngomew. (Revelation 20:10) Dab mu pag Satan nge fel’ rogon ko re liyeb ney me gothey e michan’ rom. (Efesus 6:11) N’en ni ngam rin’, e “ngam togopuluw ngak fare moonyan’” ko re n’ey, ni bod ni ga ma rin’ u boch e kanawo’.​—1 Peter 5:9.

⁹ U Revelation 12:10, e kan pining ku Satan “faanem ni ma egnag pi walagdad”​—pi Kristiano ni kan dugliyrad. Ma “egnagrad ni rran nge nep’” u p’eowchen Got. Ga ra lemnag ere thin  nem ma rayog ni ayuwegem ni Satan, ni faan ni tama eg ni be ban, e ra felfelan’ ni ngam lemnag ni gab kireb mag kirebnigem, ni yugu aram rogon ni gathi arrogon ni ke rin’ Jehovah. (1 John 3:19-22) Mang fan ni nga yugu um par nga um amith i lemnag e pi kireb rom nge ni taw ko ngiyal’ ni dabkiyog rom? Dab mu pag Satan nge kirebnag e tha’ romew Got. Ri dab mu pag fare Moonyan’ nge malmitnigem ko n’en riyul’ ni Jehovah e “ma runguy e girdi’ ma ma kireban’ ngorad, ni gathi mmachreg ni ma yib e puwan’ ngak, ma ma t’ufeg e girdi’ ma ma yul’yul’ ngorad.”​—Exodus 34:6.

Gin Gad Ma Mus Riy e Ku Ra Muleg Gan’dad

10. Mang kanawo’ e rayog ni gin gad be mus riy e ra muleg gan’dad?

¹⁰ Boch e Kristiano e ma mulan’rad nbochan ni gin yad be mus riy e ke aw angin ko pigpig rorad ku Got. Riyul’ ni aram rogom fa? Rayog ni ba m’ar nib ubchiya’, fa pilibthir ara yugu boch ban’en e be talegnem ni ngam pi’ oren e tayim rom ko machib ni bod rogon ni ku um rin’ kafram. Riyul’, ni pi Kristiano e yibe pi’ e athamgil nga lanin’rad ni ngar pied e tayim nib ga’ ko pigpig ku Got. (Efesus 5:15, 16) Machane uw rogon ni faanra gin ni ga be mus riy e be talegnem ni nge dabi yoor e machib nim un ngay ma ireray tapgin ni ke mulan’um?

11. Uw rogon nra fel’ rogodad ko fonow rok Paul u Galatia 6:4?

¹¹ Bible e be tay gelngin ngodad ni dab da samalmalgad ya ngad pired ni gadad “bod e piin nib mich Kristus u wan’rad ma ba gum’an’rad, ma aram fan ni ke yog ngorad e tin ni yog Got nra pi’.” (Hebrews 6:12) Rayog nda rin’ed e re n’ey ni ke mus ni faan gad ra fal’eg i guy e n’en ni ur rin’ed nib fel’ ma gad gay rogon ni ngad folwokgad ko michan’ rorad. Machane, da bib angin ngodad ni faan gad ra taarebnag rogodad ngak boch e girdi’ ma der fel’ u wan’dad ma gad tay ndariy ban’en ni gad be rin’ nib fel’ rogon. Arfan, nib fel’ ni ngad folgad ko fonow rok Paul ni gaar: “Ra be’ ma nge mang ir e changar ngak nge fal’eg i yaliy e ngongol rok ara pangin. Ma faanra ba fel’ e ngongol rok, me ere rayog ni nge felfelan’ ko ngongol ni ke rin’, me siy i puluwnag e ngongol rok ko ngongol ni ke rin’ yugu be’.”​—Galatia 6:4.

12. Mang fan nrayog ni ngad felfelan’gad ko pigpig ni gad be tay ngak Jehovah?

¹² Piin Kristiano e bay fan nib fel’ ni ngar felfelan’gad, ni ku yugu ra bay boch ban’en ni dabkiyog rorad nbochan e magawon ko m’ar nib gel. Be micheg e Bible ngodad ni: “Got e gathi ba laniyan’. Gathi bayi pag talin e maruwel ni kam ngongliyed.” (Hebrews 6:10) Rayog ni boch ban’en ni dabiyog nim rin’ ban’en ngay e ke mo’maw’nag ni nga ku um rin’ ban’en ni bod ni um rin’ ba ngiyal’ ni um felfelan’ ngay. Machane, bochan e ayuw rok Jehovah, ma rayog ni ngam rin’ boch ban’en ko machib ni ma tay e Kristiano, ni bod e machib u telefon nge nga uni yoloy e babyor. Rayog ni nge pagan’um ni Jehovah Got e ra tow’athnigem nbochan e pigpig rom ni polo’ i lanin’um nge t’ufeg rom ngak e piin ni buguli yoror rom.​—Matthew 22:36-40.

“Ngiyal’ nib Mo’maw’” e Rayog ni Warnagdad

13, 14. (a) Mang boch e kanawo’ nra k’aring e re ngiyal’ ney ni “ke mo’maw’ e par” e gafgow riy ngodad? (b) Uw rogon ni ke gagiyel ni ke m’ay e t’ufeg e chiney?

¹³ Yugu aram rogon, ni gad be sonnag e yafas u lan e bin nib beech e fayleng rok Got nib mat’aw u fithik’ e felfelan’, ma chiney e gad be par ko ngiyal’ ni ke “mo’maw’” ni ngan par. (2 Timothy 3:1) Ma gadad be felfelan’ ko fare tamilangan’ ni pi n’en ni be k’aring e mochuch e be yip’ fan ni ke chugur ni ngan chuwegdad ko gafgow. Machane, ku ri i yib ngodad e pi n’en ni ke liyegdad. Ni bod ni, nfaanra dariy e maruwel rom? Maruwel e sana ke mo’maw’, ere nap’an nra yan boch e pul, ma ga ra lemnag ko be guy Jehovah rarogom nge be motoyil ko meybil rom fa. Ara sana kam mang be’ ni kan dabuyem ara boch ban’en ni yibe rin’ ngom nde puluw. Kemus ni ngam man u fithik’ e pi kenggin e thin ko simbung me k’aringem ngam lem ni bod Lot, ni “ri gel e mochuch rok” (“meewar nib gel,” ni bay ko Young’s Literal Translation of the  Holy Bible) nbochan e ngongol ni kireb u tooben i yan.​—2 Peter 2:7.

¹⁴ Bay taareb e ban’en ko tin tomuren e rran ndabiyog ni nge dab da lemniged. Ke yog e Bible ko som’on ni boor e girdi’ e “bay dab kur runguyed e girdi’.” (2 Timothy 3:3) Runguy u lan e tabinaw e boor e tabinaw ni ke m’ay riy. Rriyul’, “be m’ug e mich riy ni girdi’ ni yima li’ ngem’, ara kan cham ngak, ara ni gafgownag e lem rok, ara ni gafgownag ko ngongol ni puwlag e baga’ ni be’ u lan e tabinaw e ma rin’ ko bin be’ u bang,” rogon ni yog fare babyor ni Family Violence (Cham u Tabinaw). “Re gi n’en ni susun e ngan t’ufeg ma nge pagan’ e girdi’ riy e boch e piilal nge bitir, e aram e gin ni th’abi ga’ e riya’ riy rorad.” Piin ni ki immoy u reb e tabinaw nib kireb rarogon e par riy e rayog ni nge boch e duw nga tomur mi i pirieg e magafan’ nge mochuch. Uw rogon ni faanra aray rogom?

15. Uw feni kab ga’ e t’ufeg rok Got ko t’ufeg ko girdi’?

¹⁵ I tang fare psalmist ni David ni gaar: “Ra chey ni digeyeg e chitamag nge chitinag, ma ra ayuwegeg Jehovah.” (Psalm 27:10, NW) Rib gel e pagan’ ni ngan nang ni t’ufeg rok Jehovah e kab gel ko t’ufeg ko gallabthir! Yugu aram rogon feni gel e amith riy, ni nge digeyem ara i gafgownigem reb e gallabthir ma dariy rogon nga rogon ni ma ayuwegem Jehovah. (Roma 8:38, 39) Dab mu pag talin ni Got e ma girngiy ngak e piin nib t’uf rok. (John 3:16; 6:44) Demtrug rogon e n’en be rin’ e girdi’ ngom, ma ga ba t’uf ko Chitamam nu tharmiy!

Pi N’en ni Yira Rin’ Me Achig e Mulan’

16, 17. Nap’an ni yira mada’nag e kireban’ nib gel, ma mang e rayog ni rin’ be’ ni nge ayuweg gelngin ko tirok Got?

¹⁶ Rayog ni mu rin’ boch ban’en nge yog ni nga man u fithik’ e kireban’ nib gel. Bod rogon, ni ngam un nga reb e pi n’en ni ma rin’ e pi Kristiano. Um fal’eg i lemnag e Thin ku Got, nib ga’ ni ngiyal’ ni kari gel e mochuch rom. Fare psalmist e tang ni gaar: “Nap’an nra lungug: ‘Rifrif rog e ri bayi dabki mudugil,’ ma t’ufeg rom nib yul’yul’, O Jehovah, e be par ni be pi’ gelngig. Nap’an ni ke yoor e lem ni be magawonnageg, ma thin rom ni ma fal’eg lanin’uy e ke tabab ni nge ayuweg e yaal rog nib fel’ rogon.” (Psalm 94:18, 19, NW) Ra un beeg e Bible ni gubin e rran ma ra ayuweg i suguy lanin’dad ko thin nra fal’eg lanin’uy nge lem nra gelnagey.

¹⁷ Ku arrogon e meybil ni kub ga’ fan. Ku yugu ra dabiyog ni ngam weliy e lem rom nrogon ko thin, ma manang Jehovah e n’en ni ga be gay rogon ni nga mog. (Roma 8:26, 27) I micheg fare psalmist e re n’ey ni gaar: “Mu paged e pi n’en ni ke tomalnagmed nga daken Jehovah, me ir e bayi ayuwegmed. Ya ri dabi pag e piin nib mat’aw nga u ra yoyowolgad.”​—Psalm 55:22, NW.

18. Mang e pi n’en nra yog ni nge rin’ be’ ni ke mochuch?

¹⁸ Boch e girdi’ e yad ra lemnag ndakuriy e athap rorad nbochan e mochuch nib gel. b Faanra aray rogom, mag guy rogon ngam lemnag boch rogon e bin nib beech e fayleng rok Got nge fare ngiyal’ “ndariy be’ ni be par u lan e nam rorad ni bay ki yog nib m’ar.” (Isaiah 33:24) Machane, faanra lem rom ni be kireb e kab gel ko tini yugu ma kireban’uy ngay, ma sana ba fel’ ni ngan gay e ayuw rok be’ nib ta ayuwegey. (Matthew 9:12) Maku baga’ fan ni ngam ayuweg e dowef rom. Ggan ni yibe kay nib gaman urngin ban’en riy nge chamag e ku rayog ni ayuwegey. Ma thingar mu guy ni be gaman e toffan rom. Dab um od nge n’uw e nep’ ni ga be mayal television,  ma ga pag e pi n’en ni yima felfelan’ ngay nra magarnag e dowef nge lem rom. Ma bin th’abi ga’ fan, e ngam ul’ul i rin’ e maruwel rok Got! Yugu aram rogon ni dawori taw nga nap’an ni nge n’ag Jehovah “urngin e lu’,” ma ra ayuwegem ni ngam k’adan’um.​—Revelation 21:4; 1 Korinth 10:13.

Par u “Tan Pa’ Got nib Gel”

19. Mang e be micheg Jehovah ngak e piin ni yibe gafgownagrad?

¹⁹ Be micheg e Bible ngodad ni yugu aram rogon ni boor e gafgow ni ma yib ko en nib mat’aw, ma “Somol e ma chuweg u fithik’ ni gubin.” (Psalm 34:19) Uw rogon nra rin’ Got e re n’ey? Nap’an ni yigi i meybil apostal Paul ni ngan chuweg “ba liliy nib gel e amith riy,” me yog Jehovah ngak ni gaar: “Ayuw rog ngom e ke mus e taare n’en ni ir e thingari yog ngom; ya gelngig e rib gel ko ngiyal’ ni gab meewar.” (2 Korinth 12:7-9) Mang e micheg Jehovah ngak Paul, ma mang e be micheg ngom? Gathi ngam gol e chiney, machane ra pi’ gelngidad ni ngad k’adan’gad.

20. Demtrug rogon e skeng nra yib ngodad, ma 1 Peter 5:6, 7 e be micheg e mang ngodad?

²⁰ I yoloy apostal Peter ni gaar: “Ere mu sobut’niged lanin’med u tan pa’ Got nib gel gelngin, me fal’eg lanin’med ko ngiyal’ ni be finey. Mpaged fan urngin e magafan’ romed ngak, ya be lemnag rogomed.” (1 Peter 5:6, 7) Bochan ni ma ayuwegem Jehovah, ma dabi digeyem. Ra ayuwegnem ndemtrug rogon e skeng nra yib ngom. Um lemnag ni pi Kristiano nib yul’yul’ e yad bay “u tan pa’ Got nib gel gelngin.” Nap’an ni ruud pigpiggad ngak Jehovah, ma ra pi’ gelngidad ni ngada k’adan’gad. Faanra gad ra yul’yul’ ngak, ma dariy ban’en nrayog ni nge kirebnagdad ko tirok Got ban’en. Arfan, ngada pired ni ngad yul’yul’gad ngak Jehovah nge yog ni da felfelan’gad ko yafas ni manemus u lan e bin nib beech e fayleng nke micheg ma gad guy fare rran nra chuweg e piin kan gafgownagrad ko gafgow ni manemus!

[Footnotes]

Ka Ga Manang?

• Mang fan ni ku ma yib e gafgow ngak e pi tapigpig rok Jehovah?

• Mang boch ban’en nrayog ni nge k’aring boch e girdi’ rok Got ngar mochuchgad?

• Uw rogon ni ma ayuwegdad Jehovah nge yog ndarod u fithik’ e pi magafan’ rodad?

• Mang kanawo’ e gad bay riy u “tan pa’ Got nib gel”?

[Study Questions]

[Picture on page 17]

Demtrug rogon e pi skeng, ma girdi’ rok Jehovah e bay rogon ni ngar felfelan’gad