Ŵandu ŵajinji ŵakusawusya yiwusyoyi akusaŵa kuti ŵachibale ŵawo kapena katundu jwawo jwajasiche. Jemanjaji ŵangagamba kusaka kupata kwanga kwa yiwusyoyi basi, nambo akusasakasoni kwalimbikasya. Ŵane akusaganisya kuti ngondoji jatendekwe ligongo lyakutupa kwa ndamo syakusakala sya ŵandu. Yeleyi yikusiyatendekasyaga kuti akakulupililaga kuti kwana Mlungu.

 Yindu yaunami: Kuli kulemwa kumwusya Mlungu ligongo lyakwe ŵakundile kuti ngondoji jitendekwe.

 Yisyesyene yakwe: Ŵandu ŵane munyumamu ŵaŵamkulupililaga Mlungu, ŵasakaga kumanyilila ligongo lyakwe jwalakwe akusakunda yipwetesi. Mwachisyasyo, jwakulochesya Habakuku jwamwusisye Mlungu kuti, “Ligongo chichi akundile kuti chiwawa, kasa malamusi, soni ngasa yitendekweje palipose?” (Habakuku 1:3, Contemporary English Version.) Mlungu nganamkalipila Habakuku, mmalo mwakwe jwatesile yakuti yiwusyo yakwe yilembedwe m’Baibulo.

 Yindu yaunami: Mlungu jwangatendelaga ŵandu chanasa pakulaga.

 Yisyesyene yakwe: Mlungu akusaŵengana ni yakusakala. (Misyungu 6:16-19) Mundaŵi ja Nowa, Mlungu ‘yamsakalisye mu mtima’ ligongo lya chiwawa chachatendekwaga pachilambo chapasi pandaŵijo. (Genesesi 6:5, 6) Mwangakayichila, Mlungu yampweteche mumtima ligongo lya ŵandu ŵaŵawile pa ngondo jajatendekwe mu ulamusi wa Nazi.—Malaki 3:6.

 Yindu yaunami: Ngondoji jatendekwe ligongo lyakuti Mlungu ŵasakaga kwajonanga Ayuda.

 Yisyesyene yakwe: Mu yaka 100 yandanda Mlungu jwakundile kuti Aloma ajonanje msinda wa Yelusalemu. (Mateyu 23:37–24:2) Nambope, Mlungu jwangasala kuti pana mtundu wine ŵa ŵandu wakusawunonyela mnope kapena wampaka awujonanje. Mwamti jwalakwe “jwangalekanganya pasikati pa Ayuda ni ŵanganaŵa Ayuda.”—Aloma 10:12, Good News Translation.

 Yindu yaunami: Yikaŵe kuti Mlungu jwachinonyelo soni jwamachili apali, ni kuti akatesile yakuti ngondoji jikatendekwa.

 Yisyesyene yakwe: Atamose kuti Mlungu jwangatendekasya yipwetesi, nambo ndaŵi sine akusayikunda kuti yitendekwe kwa kandaŵi kamnono.—Yakobo 1:13; 5:11.

 Mlungu ŵakundile kuti ngondoji jitendekwe ku Germany pakusaka kumasya ngani jajatandite kalakalako jakwamba jwali jwakuŵajilwa kulamulila ŵandu. Baibulo jikusasala mwakupikanika chenene kuti Satana ni jwakulamulila chilambochi, ngaŵaga Mlungu. (Luka 4:1, 2, 6; Yohane 12:31) Kwende tukambilane mfundo siŵili sya m’Baibulo syakutukamuchisya kumanyilila ligongo lyakwe Mlungu jwakundile kuti ngondoji jitendekwe.

1.   Mlungu ŵapanganyisye ŵandu kuti asaguleje achimsyene yakutenda. Mlungu ŵamsalile Adamu ni Hawa yindu yaŵasosekwaga kutenda. Nambo nganiŵakanganichisya kuti ampikanileje. Jemanjaji ŵasagwile kuti akampikanila Mlungu. Ligongo lyakusagula kwawo mwakulemwecheka, yatendekasisye kuti ŵandu asimaneje ni yipwetesi. (Genesesi 2:17; 3:6; Aloma 5:12) Yeleyi yikukamulana ni yajaŵechete buku jine kuti, “Yipwetesi yejinji yatukusimana nayoyi lili ligongo lya yindu yakulemwecheka yatukusasagula.” Mmalo mwakulekasya kuti tukalisagulilaga yindu, Mlungu ŵapele ŵandu ndaŵi kuti alinje kutenda yakusaka yawo pakamulichisya masengo lunda lwawo.—Statement of Principles of Conservative Judaism.

2.   Mlungu chachilinganya yosope yayajonasiche ligongo lya ngondo jajatendekwe ku Germany. Mlungu asasile kuti chachajimusya ŵandu ŵajinji ŵaŵawile, kupwatikapo ŵaŵawile pangondo ja ku Germany. Jwalakwe chachimasya kupweteka kosope kwakusapikana ŵandu ŵaŵakulupwiche pangondoji. (Yesaya 65:17; Masengo 24:15) Chinonyelo chakwete Mlungu pa ŵandu chikusatusimichisya kuti jwalakwe chachikwanilisya yeleyi.—Yohane 3:16.

 Ŵandu ŵajinji ŵele ŵachibale ŵawo ŵajasiche pangondoji soni ŵaŵakulupwiche ŵapitilisye kuŵa ŵakulupichika. Soni jemanjaji ŵapitilisye kuŵa ŵakusangalala ligongo lyakumanyilila kuti Mlungu akundile kuti tusimaneje ni yipwetesi. Mwamti jwalakwe akwete chakulinga chakulinganya yosope yayijonasiche.