FEBULUWALE 10, 2023
TURKEY
Ŵandu Masawusande Gejinji Akwayidwe ni Yisichinya Yakonanga Mnope Yayitendekwe ku Turkey
Lyakulemba kundaŵi pa Febuluwale 6, 2023 kungopoko lyuŵa kwa chilambo cha Turkey kwatendekwe chisichinya cha machili gakwana 7.8. Panyuma pa chisichinyachi patendekwesoni chisichinya chine chamachili gakwana 7.5. Yili yitendekwe yisichinya yiŵiliyi patendekwesoni yisichinya yinesoni yamwanamwana kudelaji. Ŵandu ŵakupunda 21,000 awile ligongo lya yisichinyayi, soni ŵakupunda 74,000 awulele
Mwayiŵelele Yindu kwa Abale ni Alongo Ŵetu ku Turkey
Yachanasa yili yakuti, mlongo jumo jwachikulile jwatemiji mtawuni ja Adana jwawulajidwe. M’bale, ŵamkwakwe, ŵanache ŵakwe, soni ŵachibale ŵakwe chagwilile chijumba mtawuni ja Adiyaman
Majumba gatatu gajonasiche
Nyumba syakwana 17 sijonasiche mnope
Nyumba syakwana 22 sijonasiche panandi
Nyumba ja Uchimwene jimo jijonasiche mnope
Nyumba sya Uchimwene siŵili sijonasiche panandi
Masengo Gakamuchisya Ŵandu
Abale ŵa m’maudindo akwakamuchisya mwausimu ŵandu ŵakwayidwe ni ngosi jachilengedweji
Makomiti gaŵili gakamuchisya pajitendekwe ngosi gapanganyidwe kuti galoleleje masengo gakupeleka chikamuchisyo
M’bale jwa m’Komiti ja Nyambi akuŵecheta mfundo syakulimbikasya sya m’Malemba kwa abale ni alongo ŵetu, kupwatikapo ŵele nyumba syawo syajonasiche
Yiŵalanjilo yayili penanipa yikwimila malipoti gapachangakaŵapa. Atamose kuti kutendekwe chisichinya chakonanga mnopechi nambosoni yisichinya yine yamwanamwana yayatendekwe panyuma pachisichinya chekulungwachi, abale ŵetu akulimbikasidwa ligongo lyakumanyilila kuti Yehofa ali “kwakutilila kwetu ni machili getu, ŵakutukamuchisya pa ndaŵi ja yisawusyo.”—Salimo 46:1.