NGANI JAPANDANDA | MPAKA AJIPIKANICISYE BAIBULO
Ligongo Cici Tukusosekwa Kujipikanicisya Baibulo?
“Baibulo jili buku jakumanyika mnope jadini. Nambo ŵandu ŵa ku China akusajiwona kuti jili jakusosekwa kwa ŵandu ŵa m’yilambo yine ngaŵa kumangwawoko.”—LIN, CHINA.
“Ngusalepela kupikanicisya atamose mabuku geswela ga dini jangu jacihindu. Ni mpaka najipikanicisye catuli Baibulo?”—AMIT, INDIA.
“Ngusinajicimbicisya Baibulo mpela buku jakala soni ngusimbikana kuti ŵandu akusajisuma mnope. Nambo nganinajiwoneje.”—YUMIKO, JAPAN.
Ŵandu ŵajinji pacilambo cosope akusajicimbicisya Baibulo. Nambope akusamanyilila yindu yamnono kapenasoni ngakusamanyilila yajikusasala Baibulojo. Mwelemu ni mwayiŵelele ni ŵandu ŵajinji ŵa ku Asia, atamosesoni ŵane ŵa m’yilambo yele Baibulo jili jakuwanda.
Nambope, mpaka aliwusye kuti, “Ligongo cici ngusosekwa kujipikanicisya Baibulo? Kupikanicisya yajikusasala Baibulo mpaka kwakamucisye pa yindu yakuyicisyayi:
-
Kuŵa ŵakwikutila soni ŵakusangalala
-
Kumalana ni yakusawusya yamwiŵasa
-
Kumalana ni kulaga nganisyo
-
Kuŵa paunasi wambone ni ŵane
-
Kamulicisya masengo mbiya mwalunda
Yoshiko jwa ku Japan jwatumkolasile jula ŵasakaga kumanyilila yajikusasala Baibulo, m’yoyo ŵasagwile yakuti ajiŵalanje. Ali aŵalasile jwalakwe ŵatite, “Baibulo jingamucisye kumanyilila cakulinga ca umi soni yatukwembeceya msogolo. Apano ngangusaliwonasoni mpela mundu jwangamanyilila cilicose.” Amit jwatumkolasilesoni jula ŵaganisisye yakujiŵalanga Baibulo. Jwalakwe ŵatite, “Nasimonjile mnope kulola kuti Baibulo jikusasala yindu yakamucisya kwa jwalijose.”
Baibulo jakamucisye ŵandu ŵajinji. Uli nombe wawojo ngalijiganya ni kulola mwampaka jakamucisye?
