LITALA lyambone mnope lyampaka mtati ŵajiganyile ŵanace ŵakwe lili kupitila m’cisyasyo cakwe. Ndumetume Yohane ŵalembile kuti “tukusalosya cinonyelo, ligongo [Mlungu] ni juŵatandite kutunonyela.” (1 Yoh. 4:19) Yehofa ŵatupele cisyasyo cambone mnope ca cinonyelo campaka citukamucisye kuti tumnonyelejesoni.

1, 2. Mwakamulana ni yaŵalembile ndumetume Yohane, ana Mlungu ŵatupele cisyasyo catuli pangani ja cinonyelo?

² Ana Mlungu ‘ŵatandite kutunonyela’ m’matala gapi? Ndumetume Paulo ŵatite, “Mlungu akulosya cinonyelo cakwe kwetuwe, mwati patwaliji ŵakulemwa, Klistu ŵatuwilile.” (Alo. 5:8) Yehofa ŵalosisye kuti akusiŵanonyela mnope ŵandu paŵalinganyisye mbopesi ja Mwanagwe kuti ŵawombole ŵandu ŵakulupicika. Mtuka wapenaniwu wakombolekasisye kuti tum’ŵandicileje Mlungu, soni kulosya kuti tukusamnonyela. Jwalakwe ŵatupele cisyasyo cambone cakuti tunonyelaneje mwakuŵa ŵangalinonyela soni ŵakoloŵa makono.—1 Yoh. 4:10.

3, 4. Ana mpaka tulosye catuli kuti tukusamnonyela Mlungu?

³ Cinonyelo cili ndamo jekulungwa mnope ja Yehofa. Ni ligongo lyakwe Yesu ŵasasile kuti lilamusi lyekulungwa mnope  lya Mlungu lili lyakuti, “Mumnonyeleje Yehofa Mlungu jwenu ni mtima wenu wosope, umi wenu wosope, nganisyo syenu syosope ni macili genu gosope.” (Maliko 12:30) Maloŵe ga Yesuga gakutukamucisya kumanyilila kuti tukusosekwa kumnonyela Yehofa kutyocela mumtima mwetu candanda. Yehofa yikusamsakalisya naga ngatukusamnonyela ni mtima wetu wosope. Nambope, Yesu ŵasasilesoni kuti tukusosekwa kumnonyela Mlungu ni umi wetu wosope, nganisyo syetu syosope soni macili getu gosope. Yeleyi yikulosya kuti kumnonyela yisyene Mlungu kukusapwatika yejinji ngaŵape kwamba kulipikana mumtima kuti ngusamnonyela Mlungu. Tukusosekwasoni kumnonyela Mlungu ni “nganisyo syetu syosope” soni “macili getu gosope.” Yeleyi yigopolela kuti yatukusaganisya soni yatukusatenda yilosyeje kuti tukusamnonyela Yehofa.—Aŵalanje Mika 6:8.

⁴ Ana mpaka tulosye catuli kuti tukusanonyela yisyene Atati ŵetu ŵakwinani? Tukusosekwa kwaŵika pamalo gandanda pa umi wetu. Mu ngani jipite jila twalijiganyisye matala gakwana mcece gakulosya kuti Yehofa akusiŵanonyela mnope ŵanace ŵakwe. Kwende sambano tulole yampaka tutende kuti tulosyeje kuti tukusamnonyela mnope Yehofa.

5. Ana mpaka tulosye catuli kuti tukusayamicila yosope yakusatutendela Yehofa?

⁵ Ana akusatenda cici papocele mtuka? Mwangakayicila akusatenda kanekakwe kakulosya kuyamicila. Konjecesya pelepa, ngakusawujigala mtukawo mpela cindu cangali mate nambo akusawukamulicisya masengo mwakuŵajilwa. Ndumetume Yohane ŵalembile kuti, “Mtuka wuliwose wambone soni wamlama ukusatyocela kwinani, pakuti ukusatuluka kutyocela kwa Atati ŵa yakumulicila yakwinani, soni ŵalakwe ŵangacenga mpela ciwulili.” (Yak. 1:17) Yehofa akusatupa yosope yatukusasosecela kuti tuŵe cijumi soni kuti tusangalaleje. Ana yeleyi ngayikututendekasya kusacilila kumnonyela mnope Yehofajo?

6. Ana Ayisalayeli ŵasosekwaga kutenda cici kuti Yehofa ajendelecele kwajaliwa?

⁶ Kwa yaka yejinji, Yehofa ŵanonyelaga mnope Ayisalayeli, soni ŵajaliwaga mwakucilu ni mwausimu. (Deut. 4:7, 8) Yehofa ŵanonyelaga jemanjaji ligongo lyakuti ŵapikanilaga Malamusi gakwe kupwatikapo lilamusi lyakuti ampeje Yehofajo “yisogosi yandanda kwiwula yambone mnope” ya m’cilambomo. (Eks. 23:19) Kutenda yeleyi, kwalosisye kuti Ayisalayeliwo ŵayamicilaga mnope cinonyelo soni majali gaŵapele Yehofa.—Aŵalanje Deuteronomo 8:7-11.

7. Ana mpaka tukamulicisye masengo catuli “yindu yamtengo wapenani” yatukwete pakulosya cinonyelo cetu kwa Yehofa?

⁷ Wuli pakwamba m’weji? Atamose kuti moŵa agano ngatukusasosekwa kupeleka mbopesi, nambope tukusosekwa kulosya kuti tukusamnonyela Mlungu mwakumpa “yindu yamtengo wapenani” yatukwete. (Miy. 3:9) Ana mpaka tutende yeleyi catuli? Mpaka tukamulicisye masengo yindu yetu yakucilu pakamucisya masengo ga Ucimwene, cinga kwatukusatama kapena gapacilambo cosope. Cinga tukwete yindu yamnono kapena yejinji, wosopewe mpaka tukombolece kamulicisya masengo yatukweteyo pakulosya kuti tukusamnonyela Yehofa. (2 Akoli. 8:12) Nambope, panasoni yindu yine yampaka tutende pakulosya kuti tukusamnonyela Yehofa.

8, 9. Ana kulupilila yilanga ya Yehofa kukusakamulana catuli ni kumnonyela? Asale cisyasyo.

⁸ Yesu ŵasalile ŵakumkuya ŵakwe kuti akalagaga nganisyo pangani ja yakulya soni yakuwala. Mmalo mwakwe ŵalimbikasisye kuti  asosesoseje Ucimwene wa Mlungu candanda. Jwalakwe ŵasasile kuti Atati akusamanyilila yindu yatukusosecela. (Mat. 6:31-33) Kulupilila kwetu cilanga celeci kukusalosya mwatukusamnonyelela Yehofa ligongo cikulupi ni cinonyelo yikusajendela yalumo. Ngaŵa mkomboleka kumnonyela mundu jwangamkulupilila. (Sal. 143:8) M’yoyo, mpaka tuliwusye kuti, ‘Ana yakulinga yangu soni yitendo yangu yikusalosya kuti ngusamnonyela yisyene Yehofa? Ana yangusatenda lisiku lililyose yikusalosya kuti ngusakulupilila kuti Mlungu mpaka angamucisye kupata yakusosecela yangu?’

⁹ Mklistu jwine lina lyakwe Mike ŵalosisye kuti akusamnonyela soni akusamkulupilila Yehofa. Paŵaliji jwacinyamata, ŵasacililaga mnope kutumicila Mlungu m’cilambo cine. Jwalakwe paŵalombele ni kola ŵanace ŵaŵili ŵakwetepe cakulinga cakweco. Ngani syakusala ya kutumicila ku mikuli jakusosecela ŵakulalicila ŵajinji syamlimbikasisye mnope mwati jwalakwe ni liŵasa lyakwe ŵasagwile kutama ni umi wangasaka yejinji. Ŵasumisye nyumba jawo ni kusamila m’kajumba kamwana. Mike ŵalesile kulipanika mnope pamasengo gakwe gakusamalila nyumba sya ŵandu ni ŵalijiganyisye mwampaka akamulileje masengogo ali m’cilambo cine kupitila pa Intaneti. Liŵasalyo lyasamile m’cilambo cine. Ali atumicile kwa yaka yiŵili m’cilambomo, Mike ŵatite, “Apano tuyiweni kuti maloŵe ga Yesu ga pa Matayo 6:33 gali gasyesyene.”

10. Mwakamulana ni yaŵatesile Mwenye Daudi, ana ganicisya ya Yehofa mpaka kutukamucisye catuli?

¹⁰ Yakupanganyikwa yakwinani yaŵayiweni Mwenye Daudi yamlimbikasisye mnope. Jwalakwe ŵalembile kuti, “Yakwinani yikusajenesya ucimbicimbi wa Mlungu, nipo liwunde likulosya masengo ga makono gakwe.” Kaneko ŵatite, “Cilamusi ca Yehofa cili camlama, cakuwucisya umi. Cikumbusyo ca Yehofa cili cakulupicika, cakwapa ŵangamanyilila yejinji lunda.” Ana yakuyicisya ya mtima wakuyamicilawu yaliji yatuli? Jwalakwe ŵatite, “Maloŵe gapakamwa pangu soni yaganicisya ya mumtima mwangu, yasangalasyeje wawo Yehofa, Lwala lwangu soni Jwakuwombola jwangu.” Yisyene, unasi wa Daudi ni Mlungu wajendelecele kwenda cenene.—Sal. 19:1, 7, 14.

11. Ana mpaka tukamulicisye masengo catuli umanyilisi watupele Yehofa pakulosya kuti tukusamnonyela? (Alole ciwulili cacili kundanda kwa nganiji.)

¹¹ Moŵa agano, tukwete upile ligongo tukumanyilila yejinji yakwamba yakupanganyikwa soni yakulinga ya Yehofa. Cilamboci cikusalimbikasya majiganyo gapenani. Nambo ŵandu ŵajinji ayiweni kuti majiganyo gapenani gakusatendekasya kola cikulupi camnono soni kunandiya cinonyelo cetu kwa Yehofa. Yehofa ngakusasakape kuti tuŵeje ŵakumanyilila yindu nambo akusatukamucisya kuti tuŵe ŵalunda. Yeleyi yigopolela kuti tukusosekwa kamulicisya masengo umanyilisi watupele Yehofa kuti yindu yitujendele cenene m’weji soni ŵane. (Miy. 4:5-7) Cakulinga ca Mlungu cili cakuti ‘ŵandu ŵamitundu josope akulupuce soni ayice pakumanyilila cenene usyesyene.’ (1 Tim. 2:4) Tukusalosya kuti tukusamnonyela Yehofa patukulipeleka ni mtima wosope pakwasalila ŵandu ya ngani syambone sya Ucimwene soni kwakamucisya kupikanicisya cakulinga cekulungwa ca Mlungu cakwamba ŵandu.—Aŵalanje Salimo 66:16, 17.

12. Ana jwacinyamata jwine jwaŵecete yatuli pakulosya kuyamicila yindu yausimu yakusapeleka Yehofa?

¹² Ŵacinyamata mpaka alosyesoni kuti akusamnonyela Yehofa mwakuyamicila yindu yausimu yatupele jwalakwejo. Mwambone, msikana jwine lina lyakwe Shannon ŵasasile kuti  paŵaliji ni yaka 11 jwalakwe ni mpwakwe jwa yaka 10 pampepe ni acinangolo ŵakwe ŵapite ku Msongano Waupande wa mtwe wakuti “Kulipeleka kwa Mlungu.” Ndaŵi jine pamsonganopo ŵasalile ŵacinyamata wosope kuti atame malo gawogawope. Jwalakwe ŵakwete woga panandi nambope ŵajawile kukutama pamalopo. Jwalakwe ŵasangalele mnope pandaŵi jele jwacinyamata jwalijose ŵampele buku jakusalala mnope jakuti Mayankho a Zimene Achinyamata Amafunsa. Ana yeleyi yamkwayiye wuli Shannon? Jwalakwe ŵatite, “Namanyilile kuti Yehofa ali jusyesyene soni kuti akusanonyela mnope uneji pajika.” Ŵajonjecesyesoni kuti, “Tuli ŵakusangalala mnope kuti Yehofa Mlungu akusatupa kwalulele yindu yakusalala mpela yeleyi yayili mtuka wamlama.”

13, 14. Ana kupikanila camuko ca Yehofa kukusalosya catuli kuti tukusamnonyela?

¹³ Baibulo jikusasala kuti, “Yehofa akusajamuka ŵandu ŵakusiŵanonyela, mpela mwele mtati akusamjamucila mwanace jwakwe jwakusasangalala najo.” (Miy. 3:12) Ana tukusosekwa kuciwona catuli camuko cakweco? Ndumetume Paulo ŵasasile kuti, “Pangali camuko cacikusasangalasya pandaŵi jakucipocela, nambo cikusaŵa cakupweteka.” Jwalakwe ŵalosisyesoni umbone wa camuko paŵatite, “Nambo panyuma pakwe, kwa ŵandu ŵalijiganyisye pa camukoco, cikusaŵeleka cisogosi camtendele.” (Ahe. 12:11) M’yoyo, naga tukusamnonyela Yehofa ngasitutenguka ni camukoco nambo tucicikamulicisya masengo. Kwa ŵane kutenda yeleyi kukusaŵa kwakusawusya. Nambo naga tukusamnonyela mnope Mlungu tucikuya camuko cakwe.

¹⁴ M’moŵa ga Malaki ŵandu ŵajinji nganayamicilaga camuko ca Yehofa. Jemanjajo ŵamanyililaga Cilamusi ca Yehofa cakwamba kupeleka mbopesi nambo nganakuyaga Cilamusico ni Yehofa ŵajamwice mnope. (Aŵalanje Malaki 1:12, 13.) Yindu yasakele mnope pandaŵijo mwati Yehofa ŵasalile kuti, “Cinjatumicisya likungu, soni majali gawo cinjigagalawusya kuŵa likungu. Elo lwesile majali galigose ga jemanja ligongo nganimganicisya ya [cilamusi cangu] m’mitima jenu.” (Mal. 2:1, 2) Yeleyi yikulosya kuti naga ngatukusakamulicisya masengo camuko catupele Yehofa mpaka tusimane ni yakogoya mnope.

15. Ana moŵa agano tukusosekwa kuŵambala ndamo japi?

¹⁵ M’cilambo cegumbale ni ŵandu ŵakupoka soni ŵakulinonyelaci, kukusaŵa kwakusawusya kumjamuka mundu kapena kupocela camuko. Atamose ŵandu ŵakusawoneka mpela kuti apocele camukoco, ngakusacikamulicisya masengo. Nambo Baibulo jikusalimbikasya Aklistu kuti ‘akajigalilaga lunda lwa ndaŵi ajino,’ nambo akusosekwa kutenda ‘lisosa lya Mlungu lyalili lyamlama.’ (Alo. 12:2) Kupitila mu likuga lyakwe, Yehofa akutupa  camuko capandaŵi jakwe mu yakutendekwa yakulekanganalekangana mpela katende ketu ka yindu ni ŵakulekangana nawo yiŵalo, ŵakunguluka nawo, soni yakusangalasya. Kupikanila soni kamulicisya masengo yeleyi kucilosya kuti tukusam’yamicila soni kumnonyela mnope Yehofa.—Yoh. 14:31; Alo. 6:17.

16, 17. (a) Ligongo cici tukusosekwa kum’ŵenda Yehofa mkanitusagule yakutenda? (b) Ana Ayisalayeli ŵalosisye wuli kuti nganamnonyelaga soni kumkulupilila mnope Yehofa?

¹⁶ Ŵanace paciweni cakogoya, mwacitema akusatilila kwa acinangolo ŵawo. Nambo pakukula ŵanacewo akusalijegamila jika soni akusasagula yakutenda jika. Nambope, ŵanace ŵakusaŵa paunasi wambone ni acinangolo ŵawo akusaŵa ŵagopoka kupikanila nganisyo sya acinangolowo soni kuŵenda cikamucisyo cawo mkanasagule yakutenda. Yehofa akusatukunda kuti tusaguleje jika yakutenda. Nambo ligongo lyakuti tukusamkulupilila soni kumnonyela, ndaŵi syosope mkanitusagule yakutenda tukusam’ŵenda jwalakwe kuti atukamucisye kusagula mwalunda. Naga tukusajegamila kwa Yehofa, jwalakwe cacitupa msimu wakwe weswela kuti utukamucisye kutenda yindu yambone.—Afi. 2:13.

¹⁷ M’moŵa ga Samuyele, Afilisiti ŵagomece Ayisalayeli ku ngondo. Ŵandu ŵa Mlungu ŵasingalilwe ni ŵasakaga cikamucisyo soni citeteyo. Ana jemanjajo ŵatesile cici? Ŵatite, “Kwende tujigale libokosi lya malangano lya Yehofa ku Silo, kuti liŵe pasikati petu ni kutukulupusya m’miyala mwa acimmagongo ŵetu.” Ana yakuyicisya yakwe yaliji yatuli? “Ŵaŵawulajigwe ŵaliji ŵajinji mnope. Pawulajidwe acalume ŵakwenda pasi ŵa Ciyisalayeli ŵakwana 30,000. Konjecesya pelepo, Libokosi lya Malangano lya Mlungu ŵalisumwile.” (1 Sam. 4:2-4, 10, 11) Ayisalayeli ŵajigele Libokosi lya Malanganolyo aciganisyaga kuti Yehofa ciŵakamucisye. Nambo jemanjajo nganakunda kuti Yehofa ŵalongolele. Ŵakuyaga nganisyo syawo soni yakuyicisya yakwe yaliji yakogoya mnope.—Aŵalanje Miyambo 14:12.

18. Ana Baibulo jikusasala yatuli pakwamba ya kulupilila Yehofa?

¹⁸ Jwamalumbo ŵalosisye kuti akusamnonyela soni kumjegamila Yehofa paŵalembile kuti, “Mjembeceye Mlungu, nipo cinjimlumba pakuŵa jwalakwe ali Mkulupusyo jwangu jwamkulungwa. Mlungu jwangu, une singalilwe. Ni ligongo lyakwe nakumbucile wawo.” (Sal. 42:5, 6) Ana wawojo akusapikanasoni mumtima mpela muŵatendele jwamalumboju? Ana nombenawo akusiŵajegamila Atati ŵetu ŵakwinani? Mpaka akombolece kumjegamila mnope jwalakwe. Baibulo jikusatusalila kuti, “Mumkulupilile Yehofa ni mtima wenu wosope, soni mkajegamila pa lunda lwenu. Mumcimbicisyeje m’matala genu gosope, soni jwalakwe cacijongola kajende kenu.”—Miy. 3:5, 6.

19. Ana akusaka kulosya kuti akusamnonyela Yehofa kupitila m’matala gapi?

¹⁹ Yehofa ŵalosisye mwampaka tumnonyeleje pakutunonyela m’weji candanda. Kwende ndaŵi syosope tukuyeje cisyasyo cakwe camboneci. Soni kwende tulosyeje kuti tukusamnonyela jwalakwe ni ‘mtima wetu wosope, umi wetu wosope, nganisyo syetu syosope soni ni macili getu gosope.’—Maliko 12:30.