1. Ana lipopelo lya pa Matayo 6:9-13 mpaka tulikamulicisye masengo catuli mu undumetume?

ŴANDU ŵajinji akusalimanyilila lipopelo lyalikusimanikwa pa Matayo 6:9-13. Patukulalicila, tukusakamulicisya masengo lipopelo lyeleli pakwakamucisya ŵandu kuti amanyilile kuti Ucimwene wa Mlungu uli boma jisyesyene jajicicenga cilambo capasici kuŵa paladaiso. Tukusakamulicisyasoni masengo lipopeloli pakwakamucisya ŵandu kuti amanyilile kuti Mlungu akwete lina lyalikusosekwa kuliswejesya.—Mat. 6:9.

2. Ana tukumanyilila catuli kuti Yesu nganasakaga kuti tuwilisyeje maloŵe gamwipopelo lyacisyasyo ndaŵi jilijose patukupopela?

² Ana Yesu ŵasakaga kuti tuwilisyeje maloŵe ga mwipopeloli ndaŵi jilijose patukupopela, mpela mwakusatendela ŵa dini sya Ciklistu? Iyayi. Ligongo lyakuti Yesu mkanasale lipopelo lyacisyasyoli ŵatite, “Pamkupopela, mkasalaga yindu mwakuwilisyawilisya.” (Mat. 6:7) Lisiku line, jwalakwe ŵasasilesoni lipopeloli nambo ŵakamulicisye masengo maloŵe gane. (Luk. 11:1-4) Pakutenda yeleyi, Yesu  ŵatupele cisyasyo ca lipopelo nambosoni yindu yatukusosekwa kuŵenda.

3. Ana yiwusyo yapi yatukusosekwa kuyiganicisya patukulijiganya ya lipopelo lyacisyasyo?

³ Mu ngani ajino soni jakuyicisya citulijiganye ya lipopelo lyacisyasyo lyeleli. Patukulijiganya tuliwusyeje kuti, ‘Ana lipopelo lyacisyasyoli mpaka lingamucisye catuli kongolela mapopelo gangusapeleka? Soni, ana uneji ngusatenda yindu mwakamulana ni lipopelo lyeleli?’

4. Ana maloŵe gakuti “Atati ŵetu” gakutukumbusya cici, soni ligongo cici Aklistu ŵakwete cembeceyo cakutama pacilambo capasi mpaka am’wonejesoni Yehofa kuŵa “Atati”?

⁴ Maloŵe gakuti “Atati ŵetu” gakutukumbusya kuti wosopewe tuli ‘m’likuga limo lya abale’ ŵakusanonyelana yisyesyene. (1 Pet. 2:17) Welewu uli upile wapenani mnope! Msimu wa Mlungu ukusatendekasya Aklistu ŵasagulwe kuŵa ŵanace wa Mlungu soni kola upile wakuja kutama kwinani. Jemanjaji ali ŵakuŵajilwa kumkolanga Yehofa kuti “Atati.” (Alo. 8:15-17) Aklistu ŵakwete cembeceyo cakutama ni umi wangamala pacilambo capasi mpaka am’wonejesoni Yehofa kuŵa “Atati” ligongo lyakuti ni ŵaŵapele umi nambosoni ni ŵakusapeleka yakusosecela ya paumi kwa wosope ŵakusamlambila yisyesyene. Wosope ŵakwete cembeceyo cakutama pacilambo capasi taciŵa ŵakuŵajilwa cenene kuŵa ŵanace wa Mlungu pacaciŵa ŵamlama soni pacacindelecela kuŵa ŵakulupicika pandaŵi ja kulinjidwa kwakumalisya.

5, 6. Ana acinangolo akusosekwa kwapa ŵanace ŵawo mtuka wambone wapi, soni ana ŵanacewo akusosekwa kutenda cici ni mtukawu? (Alole ciwulili cacili kundanda kwa nganiji.)

⁵ Acinangolo akusapa ŵanace ŵawo mtuka wambone pakwajiganya kupopela soni pakwakamucisya kuti am’woneje Yehofa kuŵa Atati ŵawo ŵakwinani ŵakusasamala ya ŵandu. Jwakulolela mkuli jwine jwakutumicila ku South Africa ŵatite, “Kutandila pa lisiku lyaŵapagwile ŵanace ŵetu ŵacakongwe, twapopelaga nawo cilo cilicose naga ndili panyumbapo. Ndaŵi syejinji ŵanace ŵetuŵa akusaŵeceta kuti ŵangakumbucila cenene maloŵe gam’mapopelogo. Nambo akusakumbucila yayatendekwaga pandaŵi janapopelaga, kusosekwa kwa kuŵecetana ni Atati ŵetu, Yehofa, nambosoni kulipikana kuti ali pamtendele. Paŵamanyilile kupopela nalimbikasyaga kuti apopeleje mwakwesya maloŵe kuti mbikaneje pakumsalila Yehofa nganisyo syawo soni mwakupikanila mumtima mwawo. Kumanyilila yayaliji mumtima mwa ŵanace ŵangu kwaliji kwakusosekwa mnope. Kaneko najiganyisye yindu yakusosekwa ya m’lipopelo lyacisyasyo kuti apopeleje mwakamula mtima.”

⁶ Ligongo lya yeleyi, ŵanace ŵa m’baleju ŵajendelecele kula mwausimu. Apano ŵalombegwe, soni akusangalala ni aciŵamkwawo pakutenda undumetume wa ndaŵi syosope. Pangalisoni cindu cine cambone campaka acinangolo ŵatendele ŵanace ŵawo kupunda kwakamucisya kuti amnonyeleje Yehofa soni kuti aŵe najo paunasi wambone. Kusala yisyene mwanace jwalijose akusosekwa kwendelecela kuŵa paunasi wambone ni Yehofa, yayikupwatikapo kulinonyela lina lya Mlungu, soni kulicimbicisya mnope.—Sal. 5:11, 12; 91:14.

7. Ana ŵandu ŵa Mlungu akwete upile watuli, soni ana tukusosekwa kutenda cici mwakamula ni upilewu?

⁷ M’weji tukwete upile wa kumanyilila soni kumanyika ni lina lya Mlungu. (Mase. 15:14; Yes. 43:10) Tukusapopela kwa Atati ŵetu ŵakwinani kuti, “Lina lyawo liswejesyedwe.” Patukutenda yeleyi tukusaŵa tuli mkum’ŵenda Yehofa kuti atukamucisye kuŵambala kutenda kapena kuŵeceta yindu yampaka yisakasye lina lyakwe lyeswela. Ngatukusosekwa  kutenda yindu mpela mwaŵatendelaga ŵane mu yaka 100 yandanda, ŵaŵatendega yindu yangakamulana ni yaŵalalicilaga. Ndumetume Paulo ŵalembile kuti, “Ŵandu ŵamitundu ngakucimbicisya lina lya Mlungu ligongo lya jemanja.” Alo. 2:21-24.

8, 9. Asale cisyasyo cakulosya kuti Yehofa akusiŵajaliwa ŵandu ŵakusalingalinga kuswejesya lina lyakwe.

⁸ Tukusatenda cilicose campaka tukombole kuti lina lya Mlungu licimbicikwe. Mwambone, mlongo jwine jwa ku Norway, ŵamkwakwe ŵajasice ni ŵamlesile ni mwanace jwamlume jwa yaka yiŵili. Mlongoju ŵatite, “Jaliji ndaŵi jakusawusya paumi wangu. Napopelaga lisiku lililosye, ciŵandika awala jilijose kuti nganisyeje cenene soni Satana akapata lipesa lyakunyosya Yehofa ligongo lyakuti sagwile kutenda yindu mwangaŵajilwa kapena mwangakulupicika. Nasakaga kuliswejesya lina lya Yehofa, soni nasakaga kuti mwanangu ciŵawonesoni babagwe m’Paladaiso.”—Miy.  27:11.

⁹ Ana Yehofa ŵajanjile mapopela gakwe gakutyocela pasi pamtimago? Elo. Mlongoju ŵapatile cikamucisyo kutyocela kwa ŵakulupilila acimjakwe ŵaŵakungulukaga nawo ndaŵi syosope. Payamasile yaka msano ŵalombegwe ni jwamkulungwa jwa mumpingo. Mwanace jula apano akwete yaka 20 soni ŵabatiswe. Mlongoju ŵatite, “Ngusangalala kwejinji ligongo lyakuti ŵamkwangu ŵangamucisye kulela mwanaceju cenene.”

10. Ana Mlungu caciswejesya catuli lina lyakwe?

¹⁰ Yehofa caciswejesya lina lyakwe pacacatyosya wosope ŵangakulicimbicisya nambosoni wosope ŵakusakana kuti jwalakwe aŵe jwakulamula jwawo. (Aŵalanje Ezekieli 38:22, 23.) Kaneko mwapanandipanandi Mlungu cacatendekasya ŵandu kuŵa ŵamlama. Tukwembeceya mwalung’wanu ndaŵi jele ŵandu, soni malayika gosope gacilicimbicisya lina lya Yehofa. Kaneko, pambesi pa yosope, Atati ŵetu ŵakwinani ‘caciŵa yindu yosope kwa jwalijose.’—1 Akoli. 15:28.

11, 12. Yesu ali asigele panandi kuŵa mwenye, ana Yehofa ŵakamucisye Aklistu ŵasyesyene kuti amanyilile cici?

¹¹ Yesu mkanajawule kwinani, ŵakumkuya ŵakwe ŵam’wusisye kuti, “Ambuje, ana cawucisye ucimwene kwa Ayisalayeli sambano jino?” Kwanga kwa Yesu kwalosisye kuti jelejo nganijiŵa ndaŵi jakuti jemanjajo amanyilile ndaŵi jele Ucimwene wa Mlungu ucitanda kulamulila. Ŵasalile jemanjajo kuti akamuleje masengo gakusosekwa mnope gakulalicila. (Aŵalanje Masengo 1:6-8.) Ŵasalilesoni kuti ajembeceyeje kwika kwa Ucimwene wa Mlungu. M’yoyo, Aklistu wosope kutandila ndaŵi ja ŵandumetume aŵele ali mkupopelela kuti ucimwenewu uyice.

¹² Pajaŵandicilaga ndaŵi jakuti Yesu atande kulamulila mpela mwenye jwa Ucimwene wa Mlungu kwinani, Yehofa ŵakamucisye ŵandu ŵakwe mkanipaŵe kuti amanyilile ndaŵi jakwe. M’caka ca 1876, M’bale Charles Taze Russel ŵalembile ngani ja mtwe wakuti, “Ana Ndaŵi sya Ŵakusa Sicimala Cakaci?” m’maganasini ja Bible Examiner. Nganiji jasasile kuti “ndaŵi msano ni siŵili” syaŵasasile Daniyele syakamulanaga ni kumala kwa “ndaŵi sya ŵandu ŵa mitundu jine” syaŵasisasile Yesu. Jalosisye kuti ndaŵiji jicimala m’caka ca 1914. *—Dan. 4:16; Luk. 21:24.

13. Ana cici cacatendekwe m’caka ca 1914, soni ana yayikutendekwa pacilamboci kutandila m’cakaci yikulosya cici?

¹³ M’caka ca 1914 ngondo jatandite pasika pa yilambo ya ku Europe. Ngondoji jajendelecele mpaka pacilambo cosope. M’caka ca 1918,  ngondoji jili jigambile kumala kwene, kwaliji sala soni ulwele wa liwundika wawawuleje ŵandu ŵajinji kupunda ŵaŵawile pangondo. Yeleyi yaliji “yimanyilo” yaŵasalile Yesu ŵakulijiganya ŵakwe yakulosya kuti jwalakwe atandite kulamulila mpela Mwenye jwa cilambo capasi. (Mat. 24:3-8; Luk. 21:10, 11) Maumboni gamajinji gakusalosya kuti Ambuje Yesu Klistu ‘ŵapele cisoti ca Ucimwene’ m’caka ca 1914. Jwalakwe “ŵajawile kukwagomeka acimmagongo ŵakwe ni ŵapundile ngondo jakulimbana nawo.” (Ciu. 6:2) Yesu ŵatandite kuswejesya kwinani pakuputa ngondo jakulimbana ni Satana, juŵamgomece ni kumgwicisya pacilambo capasi yimpepe ni malayika gakwe. Kutandila ndaŵijo ŵandu akuweni kwanilicikwa kwa maloŵe ga Mlungu gakuti, “Likungu pacilambo capasi ni nyasa, ligongo Satana atulucile kwa jemanja. Jwalakwe ali jwawukali mnope ligongo akumanyilila kuti jimsigalile ndaŵi jamnono.”—Ciu. 12:7-12.

14. (a) Ligongo cici kuli kwakusosekwape kupopelelaga kuti Ucimwene wa Mlungu uyice? (b) Ana tukwete upile wakutenda cici?

¹⁴ Yakulocesya yayikusimanikwa pa lilemba lya Ciunukuko 12:7-12 yikusasala ligongo lyakwe kutanda kwa Ucimwene wa Mlungu kukukamulana ni yindu yakusawusya yayikwendelecela kulagasya ŵandu pacilambopa. Yesu jwali Mwenye jwa Ucimwene wa Mlungu ŵatandite kulamulila pasikati pa acimmagongo ŵakwe. Kwende tupopeleje kuti Ucimwene wa Mlungu uyice mpaka pandaŵi jacacimalisya kugomeka ni kumasya yakusakala yosope yayikutendekwa pacilambo capasi. Tukusosekwasoni kutendaga yindu mwakamulana ni mapopelo getu pakamula nawo masengo gakulalicila  ya Ucimwene wa Mlungu mwamtawu. Masengo getu gakulalicila gakukwanilisya yaŵasasile Yesu kuti, “Utenga awu wambone wakwamba ya Ucimwene wa Mlungu tiwucilalicikwa pacilambo cosope capasi, kuti uŵe umboni kwa ŵandu ŵa mitundu josope, kaneko mbesi jiciyika.”—Mat. 24:14

15, 16. Ana mpaka tutendeje yatuli mwakamulana ni lipopelo lyakuti lisosa lya Mlungu litendekwe pacilambo capasi?

¹⁵ Yaka 6,000 yipiteyo, lisosa lya Mlungu lyatendekwaga cenene pacilambo capasi. Ni ligongo lyakwe Yehofa paŵayiweni yindu yambone yaŵapele ŵandu ŵatite, “yaliji yambone nditu.” (Gen. 1:31) Nambo kutandila paŵajimucile Satana, ŵandu ŵamnono ni ŵakusatenda lisosa lya Mlungu pacilambo capasi. Lelojino tukwete upile wakuŵa ni ŵa Mboni ciŵandika 8 miliyoni ŵakusapopela kuti Ucimwene wa Mlungu uyice nambosoni kulingalinga kutenda yindu mwakamulana ni mapopelo gawo. Akusalosya yeleyi paumi wawo ni pakukamula nawo masengo gakulalicila mwamtawu.

¹⁶ Mwambone, mlongo jwine juŵabatiswe m’caka ca 1948 juŵatumicilaga mpela m’mishonale ku Africa ŵatite, “Mwakamulana ni mbali ja lipopelo lyacisyasyo jeleji, ndaŵi syosope ngusapopela kuti Yehofa ŵakamucisye ŵandu ŵampela ngondolo kummanyilila jwalakwejo ndaŵi mkanijimale. Nambosoni pangulalicila, ngusapopela kwa Yehofa kuti ambe lunda kuti nayiceje pamtima ŵandu ŵangwajiganya. Pambatile ŵandu ŵampela ngondolo, ngusapopela kwa Yehofa kuti ajaliwe yosope yatukusatenda patukwasamalila.” Mlongoju apano akwete yaka 80, nambo akwendelecelape kutenda cenene mu undumetume soni ni cikamucisyo ca Aklistu ŵane akombwele kamucisya ŵandu ŵajinji kuŵa ŵa Mboni sya Yehofa. Komboleka kuti wawojo akumanyilila ŵane ŵakutenda yejinji pa undumetume wamumgunda atamose kuti akusasimana ni yakusawusya yejinji ligongo lya ucekulu.—Aŵalanje Afilipi 2:17.

17. Ana akupikana wuli pakumanyilila yacacitenda Yehofa pakwanga mbali ja lipopelo jakuti lisosa lyakwe litendekwe pacilambo capasi?

¹⁷ Kwende tupopeleje kuti lisosa lya Mlungu litendekwe pacilambo capasi mpaka pandaŵi jele Mlungu cacijonanga acimmagongo ŵa Ucimwene wa Mlungu. Lisosa lya Mlungu licitendekwa m’litala lyekulungwa pandaŵi jele ŵandu ŵajinji cacijimuka nikutama ni umi m’paladaiso pacilambo capasi. Yesu ŵatite, “Akasimonga ni yeleyi, pakuŵa jikwisa ndaŵi jele ŵandu ŵali m’malembe gacikumbucilo cacipikana maloŵe [gangu] ni cacijimuka.” (Yoh. 5:28, 29) Jiciŵa ndaŵi jakusangalasya mnope kwapocela acimjetu ŵakunonyelwa ali ni umisoni kutyocela kumalembe. Mlungu “cacipukuta misosi josope mmeso [mwetu].” (Ciu. 21:4) Ŵandu ŵajinji ŵacacijimuka kuŵawe caciŵa “ŵangalungama,” ŵaŵawile mkanalijiganye ya Yehofa Mlungu soni Mwanagwe. Uciŵa upile kamula nawo masengo gakwajiganya lisosa lya Mlungu, ni kwakamucisya kuti aŵajilwe kupocela “umi wangamala.”—Mase. 24:15; Yoh. 17:3.

18. Ana Ucimwene wa Mlungu uciyikasya cici pacilambopa?

¹⁸ Kuti pacilambo cosope paŵe mtendele soni mkamulano, yikwegamila kuswejesyedwa kwa lina lya Yehofa kwakucitendekwa ni Ucimwene wa Mlungu. Pandaŵi jele Ucimwenewu ucitenda yeleyi uciŵa uli mkukwanilisya yakusosecela ya ŵandu wosope soni kuciŵa kwanga kwa mbali sitatu syandanda sya lipopelo lyacisyasyo. Nambo pasigele mbali sine mcece syakusosekwasoni syaŵasisasile Yesu mu lipopelo lyacisyasyoli. Tucilijiganya mbali syelesi mungani jakuyicisya.